መጽሐፈ ነገሥት ፪ 9

1 ወይቤ ፡ ዳዊት ፡ ቦኑ ፡ ዘተርፈ ፡ ዓዲ ፡ ለቤተ ፡ ሳኦል ፡ ወእገብር ፡ ምሕረተ ፡ ላዕሌሁ ፡ በእንተ ፡ ዮናታን ። 2 ወሀሎ ፡ ወልድ ፡ እምነ ፡ ቤተ ፡ ሳኦል ፡ ወስሙ ፡ ሲባ ፡ ወጸውዕዎ ፡ ኀበ ፡ ዳዊት ፡ ወይቤሎ ፡ ንጉሥ ፡ አንተኑ ፡ ውእቱ ፡ ሲባ ፡ ወይቤ ፡ አነ ፡ ውእቱ ፡ ገብርከ ። 3 ወይቤሎ ፡ ንጉሥ ፡ ቦኑ ፡ ዘተርፈ ፡ ዓዲ ፡ እምነ ፡ ቤተ ፡ ሳኦል ፡ ብእሲ ፡ ወእገብር ፡ ምሕረተ ፡ ምስሌሁ ፡ ዘእግዚአብሔር ፡ ወይቤሎ ፡ ሲባ ፡ ለንጉሥ ፡ ሀሎ ፡ ፩ወልደ ፡ ዮናታን ፡ ወፅውስ ፡ እገሪሁ ። 4 ወይቤሎ ፡ ንጉሥ ፡ አይቴ ፡ ሀሎ ፡ ወይቤሎ ፡ ሲባ ፡ ለንጉሥ ፡ ሀለወ ፡ ቤተ ፡ ማኪር ፡ ወልደ ፡ አቢያል ፡ ዘእምነ ፡ ለበደር ። 5 ወለአከ ፡ ንጉሥ ፡ ወነሥኦ ፡ እምነ ፡ ቤተ ፡ ማኪር ፡ ወልደ ፡ አቢያል ፡ ዘእምነ ፡ ለበደር ። 6 ወመጽአ ፡ ሜንፌቦስቴ ፡ ወልደ ፡ ዮናታን ፡ ወልደ ፡ ሳኦል ፡ ኀበ ፡ ዳዊት ፡ ንጉሥ ፡ ወወድቀ ፡ በገጹ ፡ ወሰገደ ፡ ሎቱ ፡ ወይቤሎ ፡ ዳዊት ፡ ሜንፌቦስቴ ፡ ወይቤ ፡ ነየ ፡ አነ ፡ ገብርከ ። 7 ወይቤሎ ፡ ዳዊት ፡ ኢትፍራህ ፡ እስመ ፡ ገቢረ ፡ እገብር ፡ ምሕረተ ፡ ምስሌከ ፡ በእንተ ፡ ዮናታን ፡ አቡከ ፡ ወኣገብእ ፡ ለከ ፡ ኵሎ ፡ ሐቅሎ ፡ ለሳኦል ፡ አቡሁ ፡ ለአቡከ ፡ ወአንተ ፡ ብላፅ ፡ እከለ ፡ በውስተ ፡ ማእድየ ፡ ዘልፈ ። 8 ወሰገደ ፡ ሜንፌቦስቴ ፡ ወይቤ ፡ ምንትኑ ፡ ገብርከ ፡ ከመ ፡ ትነጽር ፡ ላዕሌየ ፡ ከልብ ፡ ምውት ፡ ዘከማየ ። 9 ወጸውዖ ፡ ንጉሥ ፡ ለሲባ ፡ ለገብረ ፡ ሳኦል ፡ ወይቤሎ ፡ ኵሎ ፡ ንዋየ ፡ ሳኦል ፡ ወኵሎ ፡ ቤቶ ፡ ወሀብክዎ ፡ ለወልደ ፡ እግዚእከ ። 10 ወተገበር ፡ ሎቱ ፡ ምድር ፡ አንተ ፡ ወደቂቅከ ፡ ወነባሪከ ፡ ወአእትዉ ፡ ለወልደ ፡ እግዚእክሙ ፡ እክሎ ፡ ወተሴሰይዎ ፡ አንትሙ ፡ ወሜንፎብስቴ ፡ ወልደ ፡ እግዚእከ ፡ ይብላዕ ፡ እክለ ፡ ዘልፈ ፡ በውስተ ፡ ማእድየ ፤ ወቦ ፡ ሲባ ፡ ፲ወ፭ደቂቀ ፡ ወ፳አግብርተ ። 11 ወይቤሎ ፡ ሲባ ፡ ለንጉሥ ፡ ኵሎ ፡ ዘአዘዞ ፡ እግዚእየ ፡ ንጉሥ ፡ ለገብሩ ፡ ከማሁ ፡ ይገብር ፡ ገብርከ ፡ ወሜንፎብስቴሰ ፡ ይበልዕ ፡ በውስተ ፡ ማእደ ፡ ዳዊት ፡ በከመ ፡ ፩እምደቂቀ ፡ ንጉሥ ። 12 ወቦ ፡ ሜንፎብስቴ ፡ ወልድ ፡ ንኡስ ፡ ወስሙ ፡ ሚከ ፡ ወኵሉ ፡ ሰብአ ፡ ሲባ ፡ አግብርቲሁ ፡ ለሜንፎብስቴ ፡ እሙንቱ ። 13 ወሜንፎብስቴሰ ፡ ነበረ ፡ ውስተ ፡ ኢየሩሳሌም ፡ እስመ ፡ ውስተ ፡ ማእደ ፡ ንጉሥ ፡ ይበልዕ ፡ ዘልፈ ፡ ወፅውስ ፡ እገሪሁ ፡ ውእቱ ፡ ክልኤሆን ።