መጽሐፈ ነገሥት ፪ 10

1 ወእምዝ ፡ እምድኅረ ፡ ዝንቱ ፡ ሞተ ፡ ንጉሠ ፡ ደቂቀ ፡ ዐሞን ፡ ወነግሠ ፡ ሐኖን ፡ ወልዱ ፡ ህየንቴሁ ። 2 ወይቤ ፡ ዳዊት ፡ እገብር ፡ ምሕረተ ፡ ምስለ ፡ ሐኖን ፡ ወልደ ፡ ነአሶ ፡ በከመ ፡ ገብረ ፡ አቡሁ ፡ ምሕረተ ፡ ላዕሌየ ፡ ወፈነወ ፡ ዳዊት ፡ ሰብአ ፡ ያስተብቍዕዎ ፡ ሰብኡ ፡ በእንተ ፡ አቡሁ ፡ ከመ ፡ ያንግፍዎ ፡ ላሐ ፡ ወበጽሑ ፡ ደቂቀ ፡ ዳዊት ፡ ውስተ ፡ ብሔረ ፡ ደቂቀ ፡ ዐሞን ። 3 ወይቤልዎ ፡ መላእክቲሆሙ ፡ ለደቂቀ ፡ ዐሞን ፡ ለሐኖን ፡ ለእግዚኦሙ ፡ ይመስለከኑ ፡ ዳዊት ፡ ከመ ፡ ይንአዶ ፡ ለአቡከ ፡ ዘፈነወ ፡ በቅድሜከ ፡ ያስተብቍዑከ ፤ አኮኑ ፡ አዕይንት ፡ እሙንቱ ፡ ወከመ ፡ ይፍትንዋ ፡ ለሀገር ፡ ወከመ ፡ ያእምርዋ ፡ ዘፈነወ ፡ ሰብአ ፡ ኀቤከ ። 4 ወነሥኦሙ ፡ ሐኖን ፡ ለደዊቀ ፡ ዳዊት ፡ ወላጸዮ ፡ ጽሕሞሙ ፡ ወመተረ ፡ አልባሰ ፡ ድርዖሙ ፡ እምነ ፡ ማአከሉ ፡ እስከነ ፡ ሐቌሆሙ ፡ ወእምዝ ፡ ፈነዎሙ ። 5 ወዜነውዎ ፡ ለዳዊት ፡ ዘእሙንቱ ፡ ዕደው ፡ ወፈነወ ፡ ዳዊት ፡ ይትቀበልዎሙ ፡ እስመ ፡ ክቡራን ፡ እሙንቱ ፡ ዕደው ፡ ጥቀ ፡ ወይቤሎሙ ፡ ዳዊት ፡ ንጉሥ ፡ ንበሩ ፡ ውስተ ፡ ኢያሪኮ ፡ እስከ ፡ ይበቍል ፡ ጽሕምክሙ ፡ ወእምዝ ፡ ተጋብኡ ። 6 ወርእዩ ፡ ደቂቀ ፡ ዐሞን ፡ ከመ ፡ ተኀፍሩ ፡ ሕዝበ ፡ ዳዊት ፡ ወለአኩ ፡ ደቂቀ ፡ ዐሞን ፡ ወዐሰቡ ፡ ሎሙ ፡ ሶርያሃ ፡ ወሮዖብሃ ፡ ፪፼አጋር ፡ ወበኀበ ፡ ንጉሠ ፡ ዐማሌቅ ፡ ፲፻ብእሴ ፡ ወበእስጦብ ፡ ፼ወ፳፻ብእሴ ። 7 ወሰምዐ ፡ ዳዊት ፡ ወፈነዎ ፡ ለኢዮአብ ፡ ወኵሎ ፡ ጽኑዓነ ፡ ኀይለ ። 8 ወወፅኡ ፡ ደቂቀ ፡ ዐሞን ፡ ወተኣኀዙ ፡ ይትቃተሉ ፡ በኀበ ፡ አንቀጽ ፡ ወሶርያ ፡ ዘሱባ ፡ ወሮዖብ ፡ ወእስጦብ ፡ ወዐማሌቅ ፡ ኅቡረ ፡ ውስተ ፡ ገዳም ። 9 ወርእየ ፡ ኢዮአብ ፡ ከመ ፡ መጽእዎሙ ፡ እምኔሆሙ ፡ ምክዕቢተ ፡ ይትቃተልዎሙ ፡ እምቅድሜሆሙኒ ፡ ወእምድኅሬሆሙኒ ፡ ወኀረየ ፡ ሎቱ ፡ እምነ ፡ ኵሉ ፡ ወራዙተ ፡ እስራኤል ፡ ወተቃተልዎሙ ፡ ለሶርያ ፡ እምቅድም ። 10 ወዘተርፈ ፡ ሕዝቦ ፡ ፈነወ ፡ ምስለ ፡ አቢሳ ፡ እኁሁ ፡ ወተቃደምዎሙ ፡ ለደቂቀ ፡ ዐሞን ፡ ወተቃተልዎሙ ። 11 ወይቤ ፡ ለእመ ፡ ጸንዑ ፡ ሶርያ ፡ እምኔየ ፡ ትከውኑኒ ፡ ረድኤተ ፡ አንትሙ ፡ ወእመ ፡ ደቂቀ ፡ ዐሞን ፡ ጸንሁ ፡ እምኔክሙ ፡ ወንከውነክሙ ፡ ንሕነ ፡ ረድኤተ ። 12 ጽንዑ ፡ ወኀይሉ ፡ በእንተ ፡ ሕዝብነ ፡ ወበእንተ ፡ አህጉረ ፡ አምላክነ ፡ ወእግዚአብሔር ፡ ይገብር ፡ ሠናይተ ፡ ዘይኤድም ፡ በቅድመ ፡ አዕይንቲሁ ። 13 ወቦኡ ፡ ኢዮአብ ፡ ወኵሉ ፡ ሕዝብ ፡ ዘምስሌሁ ፡ ይትቃተሉ ፡ ምስለ ፡ ሶርያ ፡ ወጐዩ ፡ እምቅድመ ፡ ገጾሙ ። 14 ወሶበ ፡ ርእዩ ፡ ደቂቀ ፡ ዐሞን ፡ ከመ ፡ ጐዩ ፡ ሶርያ ፡ ጐዩ ፡ እሙንቱኒ ፡ እምቅድመ ፡ ገጹ ፡ ለአቢሳ ፡ ወቦኡ ፡ ውስተ ፡ ሀገር ፡ ወአተወ ፡ ኢዮአብ ፡ እምኀበ ፡ ደቂቀ ፡ ዐሞን ፡ ወቦአ ፡ ውስተ ፡ ኢየሩሳሌም ። 15 ወሶበ ፡ ርእዩ ፡ ሶርያ ፡ ከመ ፡ ወድቁ ፡ ቅድሜሆሙ ፡ ለእስራኤል ፡ ወተጋብኡ ፡ ኅቡረ ። 16 ወለአከ ፡ እድረዐዛር ፡ ወአስተጋብኦሙ ፡ ለሶርያ ፡ እምነ ፡ ማዕዶት ፡ ፈለገ ፡ ከማዐቅ ፡ ወመጽኡ ፡ ውስተ ፡ ኤላም ፡ ወሶቤቅ ፡ መልአከ ፡ ኀይሉ ፡ ለእድረዐዛር ፡ ቅድሜሆሙ ። 17 ወዜነውዎ ፡ ለዳዊት ፡ ወእስተጋብኦሙ ፡ ለኵሉ ፡ እስራኤል ፡ ወዐደዉ ፡ ዮርዳኖስ ፡ ወመጽኡ ፡ ሶርያ ፡ ተቀበልዎ ፡ ለዳዊት ፡ ወተቃተሉ ፡ ሶርያ ፡ ምስሌሆሙ ። 18 ወጐዩ ፡ እምቅድመ ፡ እስራኤል ፡ ወቀተለ ፡ እምነ ፡ ሶርያ ፡ ዳዊት ፡ ፯፻ሰረገላተ ፡ ወ፬፼ሰብአ ፡ ፈረስ ፡ ወሶሌቅሃኒ ፡ መልአከ ፡ ኀይሉ ፡ ቀተሎ ፡ ወሞተ ፡ በህየ ። 19 ወሶበ ፡ ርእዩ ፡ ኵሉ ፡ ነገሥት ፡ አግብርተ ፡ አድረዐዛር ፡ ከመ ፡ ወድቁ ፡ ቅድመ ፡ እስራኤል ፡ ወገረሩ ፡ ለእስራኤል ፡ ወተቀንዩ ፡ ሎሙ ፡ ወፈርሁ ፡ ሶርያ ፡ ህየ ፡ አድኅኖቶሙ ፡ ለደቂቀ ፡ ዐሞን ።