መጽሐፈ ኩፋሌ 31

31 1 ወበሠርቀ ፡ ወርኅ ፡ ነገረ ፡ ያዕቆብ ፡ ለኵሉ ፡ ሰብአ ፡ ቤቱ ፡ እንዘ ፡ ይብል ፡ ንጹሑ ፡ ወወልጡ ፡ አልባሲክሙ ፡ ወተንሢአነ ፡ ንዕርግ ፡ ቤቴል ፡ በኀበ ፡ ጸለይኩ ፡ ሎቱ ፡ ጸሎተ ፡ አመ ፡ ዕለተ ፡ ጐየይኩ ፡ እምገጸ ፡ ዔሳው ፡ እኁየ ፡ ዘውእቱ ፡ ምስሌየ ፡ ወሜጠኒ ፡ ውስተ ፡ ዛቲ ፡ ምድር ፡ በሰላም ፡ ወአሰስሉ ፡ አማልክተ ፡ ነኪር ፡ እለ ፡ ማእከሌክሙ ። 2 ወመሰውዎሙ ፡ ለአማልክተ ፡ ነኪር ፡ ወዘውስተ ፡ እዘኒሆሙ ፡ ወዘውስተ ፡ ክሳውዲሆሙ ፡ ወጣዖተ ፡ ዘሰረቀት ፡ ራሔል ፡ እምኀበ ፡ ላባ ፡ አቡሃ ፡ ወወሀበት ፡ ኵሎ ፡ ለያዕቆብ ፡ ወአውዐዮ ፡ ወጸተሞ ፡ ወአማስኖ ፡ ወኀብኦ ፡ ታሕተ ፡ ድርዮስ ፡ ዘሀሎ ፡ ውስተ ፡ ምድረ ፡ ሰቂሞን ። 3 ወዐርገ ፡ አመ ፡ ሠርቀ ፡ ወርኅ ፡ ሳብዕ ፡ ውስተ ፡ ቤቴሌ ፡ ወሐነጸ ፡ ምሥዋዐ ፡ ውስተ ፡ መካን ፡ ኀበ ፡ ኖመ ፡ ህየ ፡ ወአቀመ ፡ ህየ ፡ ሐውልተ ። ወለአከ ፡ ኀበ ፡ አቡሁ ፡ ይስሐቅ ፡ ከመ ፡ ይምጻእ ፡ ኀቤሁ ፡ ውስተ ፡ መሥዋዕቱ ፡ ወኀበ ፡ እሙሂ ፡ ርብቃ ። 4 ወይቤ ፡ ይስሐቅ ፡ ይምጻእ ፡ ወልድየ ፡ ያዕቆብ ፡ ወእርአዮ ፡ ዘእንበለ ፡ እሙት ። 5 ወሖረ ፡ ያዕቆብ ፡ ኀበ ፡ አቡሁ ፡ ይስሐቅ ፡ ወኀበ ፡ እሙ ፡ ርብቃ ፡ ውስተ ፡ ቤቱ ፡ ለአቡሁ ፡ አብርሃም ፡ ወክልኤተ ፡ እምውሉዱ ፡ ነሥአ ፡ ምስሌሁ ፡ ሌዊሃ ፡ ወይሁዳሃ ፡ ወመጽአ ፡ ኀበ ፡ አቡሁ ፡ ይስሐቅ ፡ ወኀበ ፡ እሙ ፡ ርብቃ ። 6 ወወፅአት ፡ ርብቃ ፡ እማኅፈድ ፡ ውስተ ፡ አንቀጸ ፡ ማኅፈድ ፡ ከመ ፡ ትስዐሞ ፡ ለያዕቆብ ፡ ወትሕቅፎ ። እስመ ፡ ሐይወ ፡ መንፈሳ ፡ በጊዜ ፡ ሰምዐት ፡ ናሁ ፡ ያዕቆብ ፡ ወልድኪ ፡ በጽሐ ፡ ወሰዐመቶ ፡ 7 ወርእየት ፡ ክልኤሆሙ ፡ ውሉዶ ። ወአእመረቶሙ ፡ ወትቤሎ ፡ እሉሰ ፡ ውሉድከኑ ፡ ወልድየ ። ወሐቀፈቶሙ ፡ ወሰዐመቶሙ ፡ ወባረከቶሙ ፡ እንዘ ፡ ትብል ፡ ብክሙ ፡ ይከብር ፡ ዘርአ ፡ አብርሃም ፡ ወአንትሙ ፡ ትከውኑ ፡ ለበረከት ፡ በዲበ ፡ ምድር ። 8 ወቦአ ፡ ያዕቆብ ፡ ኀበ ፡ ይስሐቅ ፡ አቡሁ ፡ ውስተ ፡ ጽርሑ ፡ ኀበ ፡ ይሰክብ ፡ ህየ ። ወክልኤቱ ፡ ደቂቁ ፡ ምስሌሁ ። ወአኀዘ ፡ እደ ፡ አቡሁ ፡ ወደኒኖ ፡ ሰዐሞ ፡ ወተሰቅለ ፡ ይስሐቅ ፡ ውስተ ፡ ክሳደ ፡ ያዕቆብ ፡ ወልዱ ፡ ወበከየ ፡ ዲበ ፡ ክሳዱ ፡ 9 ወጽላሌ ፡ ኀለፈ ፡ እምአዕይንተ ፡ ይስሐቅ ፡ ወርእየ ፡ ክልኤሆሙ ፡ ውሉዶ ፡ ለያዕቆብ ፡ ሌዊሃ ፡ ወይሁዳሃ ። ወይቤ ፡ ውሉድከሁ ፡ እሉ ፡ ወልድየ ፡ እስመ ፡ ይመስሉከ ፡ 10 ወነገሮ ፡ ከመ ፡ በአማን ፡ ውሉዱ ፡ እሙንቱ ፡ ወአማን ፡ ርኢከ ፡ ከመ ፡ በአማን ፡ ውሉድየ ፡ እሙንቱ ። 11 ወቀርቡ ፡ ኀቤሁ ፡ ወተመይጠ ፡ ወሰዐሞሙ ፡ ወሐቀፎሙ ፡ ለኵሎሙ ፡ ኅቡረ ። 12 ወመንፈሰ ፡ ትንቢት ፡ ወረደ ፡ ውስተ ፡ አፉሁ ፡ ወአኀዞ ፡ ለሌዊ ፡ በየማናዊ ፡ እዴሁ ፡ ወይሁዳሃ ፡ በፀጋማዊ ፡ እዴሁ ። 13 ወተመይጠ ፡ ኀበ ፡ ሌዊ ፡ ቅድመ ፡ ወአኀዘ ፡ ይባርኮ ፡ መቅድመ ፡ ወይቤሎ ፡ ይባርከ ፡ እግዚአ ፡ ኵሉ ፡ ውእቱ ፡ እግዚአ ፡ ኵሉ ፡ ዓለማት ። ኪያከ ፡ ወውሉደከ ፡ ለኵሉ ፡ ዓለማት ። 14 ወየሀብከ ፡ እግዚአብሔር ፡ ለከ ፡ ወለዘርእከ ፡ ዕበየ ፡ ዐባየ ፡ ለክብር ፡ ወኪያከ ፡ ወዘርእከ ፡ ያቅርብ ፡ ኀቤሁ ፡ እምኵሉ ፡ ዘሥጋ ፡ ከመ ፡ ይትለአክ ፡ ውስተ ፡ መቅደሱ ፡ ከመ ፡ መላእክተ ፡ ገጽ ፡ ወከመ ፡ ቅዱሳን ። ከማሆሙ ፡ ይከውን ፡ ዘርኦሙ ፡ ለውሉድከ ፡ ለክብር ፡ ወለዕበይ ፡ ወለቅዳሴ ፡ ወያዕብዮሙ ፡ ውስተ ፡ ኵሉ ፡ ዓለማት ፡ 15 ወመኳንንተ ፡ ወመሳፍንተ ፡ ወመላእክተ ፡ ይከውኑ ፡ ለኵሉ ፡ ዘርአ ፡ ውሉደ ፡ ያዕቆብ ፡ ቃሎ ፡ ለእግዚአብሔር ፡ በጽድቅ ፡ ይነግሩ ፡ ወኵሎ ፡ ኵነኔሁ ፡ በጽድቅ ፡ ይኴንኑ ። ወይነግሩ ፡ ፍናዊየ ፡ ለያዕቆብ ፡ ወአሰርየ ፡ ለእስራኤል ፡ በረከቱ ፡ ለእግዚአብሔር ፡ ይትወሀብ ፡ ውስተ ፡ አፉሆሙ ፡ ከመ ፡ ይባርኩ ፡ ኵሎ ፡ ዘርአ ፡ ለፍቁር ። 16 ኪያከ ፡ ጸውዐት ፡ እምከ ፡ ስመከ ፡ ሌዊሃ ፡ ወበአማን ፡ ጸውዐት ፡ ስመከ ፡ ልጹቆ ፡ ለእግዚአብሔር ፡ ትከውን ፡ ወሱታፌ ፡ ኵሎሙ ፡ ውሉደ ፡ ያዕቆብ ። ማዕዱ ፡ ለከ ፡ ትኩን ፡ ወአንተ ፡ ወውሉድከ ፡ ብልዕዋ ፡ ወለኵሉ ፡ ትውልድ ፡ ትኩን ፡ ማእድከ ፡ ምልእተ ፡ ወኢይሕጽጽ ፡ እክልከ ፡ ለኵሉ ፡ ዓለማት ፡ 17 ወኵሎሙ ፡ እለ ፡ ይጸልኡከ ፡ ቅድሜከ ፡ ይደቁ ፡ ወኵሎሙ ፡ ፀርከ ፡ ይሠረዉ ፡ ወይትሐጐሉ ፡ ዘይባርከከ ፡ ቡሩክ ፡ ወኵሉ ፡ ሕዝብ ፡ ዘይረግሙከ ፡ ይኩኑ ፡ ርጉማነ ። 18 ወለይሁዳሂ ፡ ይቤሎ ፡ የሀብከ ፡ እግዚአብሔር ፡ ኀይለ ፡ ወጽንዐ ፡ ከመ ፡ ትኪዶሙ ፡ ለኵሎሙ ፡ እለ ፡ ይጸልኡከ ፡ መኰንነ ፡ ኩን ፡ አንተ ፡ ወአሐዱ ፡ እምነ ፡ ውሉድከ ፡ ለውሉደ ፡ ያዕቆብ ፡ ስምከ ፡ ወስመ ፡ ውሉድከ ፡ ይኩን ፡ ዘየሐውር ፡ ወዘያንሶሱ ፡ ውስተ ፡ ኵላ ፡ ምድር ፡ ወአህጉር ። አሜሃ ፡ ይፈርሁ ፡ አሕዛብ ፡ እምቅድመ ፡ ገጽከ ፡ ወይትሀወኩ ፡ ኵሎሙ ፡ አሕዛብ ፡ ወኵሉ ፡ ሕዝብ ፡ ይትሀወኩ ። 19 ብከ ፡ ይኩን ፡ ረድኤቱ ፡ ለያዕቆብ ፡ ወብከ ፡ ትትረከብ ፡ መድኀኒተ ፡ እስራኤል ፡ 20 ወአመ ፡ ዕለተ ፡ ትነብር ፡ ውስተ ፡ መንበረ ፡ ክብረ ፡ ጽድቅከ ፡ ትከውን ፡ ዐባይ ፡ ሰላም ፡ ለኵሉ ፡ ዘርአ ፡ ውሉዱ ፡ ለፍቁር ። ዘይባርከከ ፡ ቡሩክ ፡ ወኵሎሙ ፡ እለ ፡ ይጸልኡከ ፡ ወይሠቅዩከ ፡ ወእለሂ ፡ ይረግሙከ ፡ ይሤረዉ ፡ ወይትሐጐሉ ፡ እምድር ፡ ወይኩን ፡ ርጉማነ ። 21 ወተመይጠ ፡ ወሰዐሞ ፡ ዳግመ ፡ ወሐቀፎ ፡ ወተፈሥሐ ፡ ዐቢየ ፡ እስመ ፡ ርእየ ፡ ውሉዶ ፡ ለያዕቆብ ፡ ወልዱ ፡ ዘበጽድቅ ። 22 ወወፅአ ፡ እማእከለ ፡ እገሪሁ ፡ ወወድቀ ፡ ወሰገደ ፡ ሎቱ ፡ ወባረኮሙ ። ወአዕረፈ ፡ ህየ ፡ ቅሩበ ፡ ይስሐቅ ፡ አቡሁ ፡ በይእቲ ፡ ሌሊት ፡ ወበልዑ ፡ ወሰትዩ ፡ በፍሥሓ ፡ 23 ወአኖሙ ፡ ክልኤሆሙ ፡ ውሉዶ ፡ ለያዕቆብ ፡ አሐደ ፡ በይምኑ ፡ ወአሐደ ፡ በፅግሙ ፡ ወተኆለቆ ፡ ሎቱ ፡ ጽድቀ ። 24 ወነገረ ፡ ያዕቆብ ፡ ኵሎ ፡ ለአቡሁ ፡ በሌሊት ፡ ዘከመ ፡ ገብረ ፡ እግዚአብሔር ፡ ምስሌሁ ፡ ሣህለ ፡ ዐቢይ ። ወከመ ፡ ሠርሐ ፡ ኵሎ ፡ ፍናዊሁ ፡ ወተማኅፀኖ ፡ እምኵሉ ፡ እኩይ ፡ 25 ወባረከ ፡ ይስሐቅ ፡ አምላከ ፡ አቡሁ ፡ አብርሃም ፡ ዘኢኀደገ ፡ ምሕረቶ ፡ ወጽድቆ ፡ እምወልደ ፡ ገብሩ ፡ ይስሐቅ ። 26 ወበነግህ ፡ ነገረ ፡ ያዕቆብ ፡ ለአቡሁ ፡ ይስሐቅ ፡ ጸሎተ ፡ ዘጸለየ ፡ ለእግዚአብሔር ፡ ወራእየ ፡ ዘርእየ ፡ ወከመ ፡ ሐነጸ ፡ ምሥዋዐ ፡ ወኵሉ ፡ ድልው ፡ ለመሥዋዕት ፡ ለገቢር ፡ ቅድመ ፡ እግዚአብሔር ፡ በከመ ፡ ጸለየ ፡ ወከመ ፡ መጽአ ፡ ይጽዐኖ ፡ ዲበ ፡ አድግ ። 27 ወይቤ ፡ ይስሐቅ ፡ ለያዕቆብ ፡ ወልዱ ፡ ኢይክል ፡ መጺአ ፡ ምስሌከ ፡ እስመ ፡ ረሣእኩ ፡ ወኢይክል ፡ ተዐግሦ ፡ በፍኖት ፡ ሖር ፡ ወልድየ ፡ በሰላም ፡ እስመ ፡ ወልደ ፡ ምእት ፡ ወስሳ ፡ ወኀምስቱ ፡ ዓመት ፡ አነ ። ዮም ፡ ኢይክል ፡ እንከ ፡ ነጊደ ፡ ጸዐና ፡ ለእምከ ፡ ወትሖር ፡ ምስሌከ ፡ 28 ወአአምር ፡ አነ ፡ ወልድየ ፡ ከመሰ ፡ በእንቲአየ ፡ መጻእከ ። ወዛቲ ፡ ዕለት ፡ ትኩን ፡ ቡርክተ ፡ እንተ ፡ ባቲ ፡ ርኢከኒ ፡ ሕያውየ ፡ ወርኢኩከ ፡ አነሂ ፡ ወልድየ ፡ 29 ወተሰራሕ ፡ ወግበር ፡ ጸሎተ ፡ እንተ ፡ ጸለይከ ፡ ወኢታጐንዲ ፡ ጸሎተከ ፡ እስመ ፡ ትትኃሠሥ ፡ ጸሎተ ። ወይእዜኒ ፡ ጐጕእ ፡ ትግበራ ፡ ወይሥመር ፡ ዘገብረ ፡ ኵሎ ፡ ለዘ ፡ ጸለይከ ፡ ጸሎተ ። 30 ወይቤላ ፡ ለርብቃ ፡ ሖሪ ፡ ምስለ ፡ ያዕቆብ ፡ ወልድኪ ። ወሖረት ፡ ርብቃ ፡ ምስለ ፡ ያዕቆብ ፡ ወልዳ ፡ ወዲቦራ ፡ ምስሌሃ ፡ ወበጽሑ ፡ ውስተ ፡ ቤቴል ። 31 ወተዘከረ ፡ ያዕቆብ ፡ ጸሎተ ፡ እንተ ፡ ባረኮ ፡ አቡሁ ፡ ወክልኤተ ፡ ውሉዶ ፡ ሌዊሃ ፡ ወይሁዳሃ ፡ ወተፈሥሐ ፡ ወባረኮ ፡ ለአምላከ ፡ አበዊሁ ፡ አብርሃም ፡ ወይስሐቅ ። 32 ወይቤ ፡ ይእዜ ፡ አእመርኩ ፡ ከመ ፡ ብየ ፡ ተስፋ ፡ ዘለዓለም ፡ ወለውሉድየሂ ፡ በቅድመ ፡ አምላከ ፡ ኵሉ ፡ ወከመዝ ፡ ሥሩዕ ፡ በእንተ ፡ ክልኤሆሙ ፡ ወያዐርጉ ፡ ሎሙ ፡ በስምዕ ፡ ዘለዓለም ፡ ውስተ ፡ ጽላተ ፡ ሰማይ ፡ በከመ ፡ ባረኮሙ ፡ ይስሐቅ ።