መጽሐፈ ኩፋሌ 30

30 1 ወበቀዳሚ ፡ ዓመት ፡ ዘሱባዔ ፡ ሳድስ ፡ ዐርገ ፡ ሳሌምሃ ፡ ዘመንገለ ፡ ጽባሒሁ ፡ ለሰዊማ ፡ በሰላም ፡ በራብዕ ፡ ወርኅ ። 2 ወበህየ ፡ መሠጥዋ ፡ ለዲና ፡ ለወለተ ፡ ያዕቆብ ፡ ውስተ ፡ ቤተ ፡ ሴኬም ፡ ወልደ ፡ ኤሞር ፡ ኤዋዊ ፡ መኰንነ ፡ ምድር ፡ ወሰከበ ፡ ምስሌሃ ፡ ወአርኰሳ ። ወይእቲሰ ፡ ንስቲት ፡ ወለተ ፡ ዐሠርቱ ፡ ወክልኤቱ ፡ ዓመት ። 3 ወአስተብቍዐ ፡ እምኀበ ፡ አቡሃ ፡ ትትወሀብ ፡ ሎቱ ፡ ብእሲተ ፡ ወእምኀበ ፡ አኃዊሃ ፡ ብእሲተ ፡ ሎቱ ። ወተምዕዐ ፡ ያዕቆብ ፡ ወውሉዱ ፡ በእንተ ፡ ዕደወ ፡ ሰቂማ ፡ እስመ ፡ አርኰስዋ ፡ ለዲና ፡ እኅቶሙ ፡ ወተናገሩ ፡ ምስሌሆሙ ፡ በእከይ ፡ ወሐብለይዎሙ ፡ ወአስፈጥዎሙ ። 4 ወቦኡ ፡ ስምዖን ፡ ወሌዊ ፡ ሰዊማሃ ፡ ግብተ ፡ ወገብሩ ፡ ኵነኔ ፡ ላዕለ ፡ ኵሎሙ ፡ ዕደወ ፡ ሰቂሞን ፡ ወቀተሉ ፡ ኵሎ ፡ ብእሴ ፡ ዘረከቡ ፡ ውስቴታ ፡ ወኢያትረፉ ፡ ውስቴታ ፡ ወኢአሐደ ፡ ኵሎ ፡ ቀተሉ ፡ በጻዕር ፡ እስመ ፡ ገመኑ ፡ ዲናሃ ፡ እኅቶሙ ። 5 ወከመዝ ፡ እንከ ፡ ኢይትገበር ፡ እምይእዜ ፡ ለአርኵሶ ፡ ወለተ ፡ እስራኤል ፡ እስመ ፡ በሰማይ ፡ ተሠርዐ ፡ ላዕሌሆሙ ፡ ኵነኔ ፡ ከመ ፡ ያጥፍእዎሙ ፡ በሰይፍ ፡ ለኵሎሙ ፡ ዕደወ ፡ ሰቂማ ፡ እስመ ፡ ገብሩ ፡ ኀፍረተ ፡ ውስተ ፡ እስራኤለ ፡ 6 ወመጠዎሙ ፡ እግዚአብሔር ፡ ውስተ ፡ እደ ፡ ውሉደ ፡ ያዕቆብ ፡ ከመ ፡ ይሠርውዎሙ ፡ በሰይፍ ፡ ወከመ ፡ ይግበሩ ፡ ላዕሌሆሙ ፡ ኵነኔ ። ወከመ ፡ ኢይኩን ፡ እንከ ፡ ከመዝ ፡ በውስተ ፡ እስራኤል ፡ ለአርኵሶ ፡ ድንግል ፡ እስራኤላዊት ። 7 ወብእሲ ፡ እመቦ ፡ ዘፈቀደ ፡ በውስተ ፡ እስራኤል ፡ የሀብ ፡ ወለቶ ፡ ወእመኒ ፡ እኅቶ ፡ ለኵሉ ፡ ብእሲ ፡ ዘእምዘርአ ፡ አሕዛብ ፡ ሞተ ፡ ይሙት ፡ ወበእብን ፡ ይውግርዎ ፡ እስመ ፡ ገብረ ፡ ኀፍረተ ፡ በውስተ ፡ እስራኤል ። ወለብእሲትሂ ፡ ያውዕይዋ ፡ በእሳት ፡ እስመ ፡ አርኰሰት ፡ ስመ ፡ ቤተ ፡ አቡሃ ፡ ወትሠረው ፡ እምእስራኤል ። 8 ወኢይትረከብ ፡ ዘማ ፡ ወርኩስ ፡ በውስተ ፡ እስራኤል ፡ ኵሎ ፡ መዋዕለ ፡ ትውልደ ፡ ምድር ፡ እስመ ፡ ቅዱስ ፡ እስራኤል ፡ ለእግዚአብሔር ። ወኵሉ ፡ ሰብእ ፡ ዘአርኰሰ ፡ ሞተ ፡ ለይሙት ፡ ወበእብን ፡ ይውግርዎ ፡ 9 እስመ ፡ ከመዝ ፡ ተሠርዐ ፡ ወተጽሕፈ ፡ ውስተ ፡ ጽላተ ፡ ሰማይ ፡ በእንተ ፡ ኵሉ ፡ ዘርአ ፡ እስራኤል ፡ ዘያረኵስ ፡ ሞተ ፡ ለይሙት ፡ ወበእብን ፡ ይውግርዎ ። 10 ወአልቦ ፡ ለዝ ፡ ሕግ ፡ ዐቅመ ፡ መዋዕል ፡ ወአልቦ ፡ ኅድገተ ፡ ወኵሎ ፡ ስርየተ ፡ ዘእንበለ ፡ ዳእሙ ፡ ይሠረው ፡ ብእሲ ፡ ዘአርኰሰ ፡ ወለቶ ፡ በማእከለ ፡ ኵሉ ፡ እስራኤል ፡ እስመ ፡ እምውስተ ፡ ዘርኡ ፡ ወሀቦ ፡ ለሞሎክ ፡ ወአበሰ ፡ ለአርኵሶቱ ። 11 ወአንተኒ ፡ ሙሴ ፡ አዝዞሙ ፡ ለደቂቀ ፡ እስራኤል ፡ ወአስምዕ ፡ ላዕሌሆሙ ፡ ከመ ፡ ኢየሀቡ ፡ እምነ ፡ አዋልዲሆሙ ፡ ለአሕዛብ ፡ ወከመ ፡ ኢይንሥኡ ፡ እምአዋልደ ፡ አሕዛብ ፡ እስመ ፡ ምኑን ፡ ውእቱ ፡ በቅድመ ፡ እግዚአብሔር ። 12 በእንተዝ ፡ ጸሐፍኩ ፡ ለከ ፡ ውስተ ፡ ቃለ ፡ ሕግ ፡ ኵሎ ፡ ግብሮሙ ፡ ለሰቂማ ፡ ዘገብሩ ፡ ላዕለ ፡ ዲና ፡ ወዘከመ ፡ ተናገሩ ፡ ደቁ ፡ ለያዕቆብ ፡ እንዘ ፡ ይብሉ ፡ ኢንሁብ ፡ ወለተነ ፡ ለሰብእ ፡ ዘቦ ፡ ቍልፈተ ፡ እስመ ፡ ጽዕለት ፡ ውእቱ ፡ ለነ ፡ 13 ወጽዕለት ፡ ውእቱ ፡ ለእስራኤል ፡ ለእለ ፡ ይሁቡ ፡ ወለእለ ፡ ይነሥኡ ፡ እምነ ፡ አዋልደ ፡ አሕዛብ ፡ እስመ ፡ ርኩስ ፡ ውእቱ ፡ ወምኑን ፡ ውእቱ ፡ እምእስራኤል ። 14 ወኢይነጽሕ ፡ እስራኤል ፡ እምዝ ፡ ርኵስ ፡ ዘቦ ፡ ብእሲተ ፡ እምነ ፡ አዋልደ ፡ አሕዛብ ። ወእመቦ ፡ እምአዋልዲሁ ፡ ዘወሀቦ ፡ ለብእሲ ፡ እምኵሉ ፡ አሕዛብ ፡ 15 እስመ ፡ መቅሠፍት ፡ ላዕለ ፡ መቅሠፍት ፡ ውእቱ ፡ ወመርገም ፡ ላዕለ ፡ መርገም ፡ ወኵሉ ፡ ኵነኔ ፡ ወመቅሠፍት ፡ ወመርገም ፡ ይመጽእ ። ወለእመ ፡ ገብረ ፡ ዘቃለ ፡ ወለእመ ፡ ተዐወረ ፡ አዕይንቲሁ ፡ እምእሉ ፡ እለ ፡ ይገብሩ ፡ ርኵሰተ ፡ ወእለ ፡ ያረኵሱ ፡ መቅደሶ ፡ ለእግዚአብሔር ፡ ወእምእለ ፡ ይጌምኑ ፡ ስሞ ፡ ቅዱሰ ፡ ይትኴነን ፡ ኵሉ ፡ ሕዝብ ፡ ኀቡረ ፡ በእንተ ፡ ኵሉ ፡ ዝርኵስ ፡ ወግማኔ ፡ ዛቲ ። 16 ወአልቦ ፡ ነሢአ ፡ ገጽ ፡ ወአልቦ ፡ አድልዎ ፡ ለገጽ ፡ ወአልቦ ፡ ነሢአ ፡ እምእዴሁ ፡ ፍሬ ፡ ወመሥዋዕተ ፡ ወጽንሐሐ ፡ ወስብሐ ፡ ወተምዕዞ ፡ መዓዛ ፡ ሠናይ ፡ ከመ ፡ ይትወከፎ ። ወይኩን ፡ ኵሉ ፡ ብእሲ ፡ ወብእሲት ፡ በውስተ ፡ እስራኤል ፡ ዘያረኵስ ፡ መቅደሶ ። 17 በእንተዝ ፡ አዘዝኩከ ፡ እንዘ ፡ እብል ፡ አስምዕ ፡ ዛተ ፡ ስምዐ ፡ ላዕለ ፡ እስራኤል ። ርኢ ፡ ዘከመ ፡ ኮነ ፡ ለሰቂሞን ፡ ወለውሉዳ ፡ ዘከመ ፡ ተውህበት ፡ ውስተ ፡ እደ ፡ ክልኤሆሙ ፡ ደቂቀ ፡ ያዕቆብ ፡ ወቀተልዎሙ ፡ በጻዕር ፡ ወኮነቶሙ ፡ ጽድቀ ፡ ወተጽሕፎሙ ፡ ለጽድቅ ። 18 ወተኀርየ ፡ ዘርአ ፡ ሌዊ ፡ ለክህነት ፡ ወለሌዋዊያን ፡ ከመ ፡ ይትለአኩ ፡ ቅድመ ፡ እግዚአብሔር ፡ ከመ ፡ ንሕነ ፡ በኵሉ ፡ መዋዕል ። ወይትባረክ ፡ ሌዊ ፡ ወውሉዱ ፡ ለዓለም ፡ እስመ ፡ ቀንአ ፡ ከመ ፡ ይግበር ፡ ጽድቀ ፡ ወኵነኔ ፡ ወበቀለ ፡ እምኵሎሙ ፡ እለ ፡ ይትነሥኡ ፡ ላዕለ ፡ እስራኤል ፡ 19 ወከመዝ ፡ ያዐርጉ ፡ ሎቱ ፡ በስምዕ ፡ ውስተ ፡ ጽላተ ፡ ሰማይ ፡ በረከተ ፡ ወጽድቀ ፡ ቅድሜሁ ፡ ለአምላከ ፡ ኵሉ ። 20 ወንዜክር ፡ ንሕነ ፡ ጽድቀ ፡ ዘገብረ ፡ ሰብእ ፡ በሕይወቱ ፡ በኵሉ ፡ ጊዜያት ፡ ዘዓመት ፡ እስከ ፡ ዐሠርቱ ፡ ምእት ፡ ትውልድ ፡ ያዐርጉ ፡ ወይመጽእ ፡ ሎቱ ፡ ወለትውልዱ ፡ እምድኅሬሁ ፡ ወተጽሕፈ ፡ ዐርከ ፡ ወጻድቀ ፡ ውስተ ፡ ጽላተ ፡ ሰማይ ። 21 ኵሎ ፡ ዘንተ ፡ ነገረ ፡ ጸሐፍኩ ፡ ለከ ፡ ወአዘዝኩከ ፡ ከመ ፡ ትንግር ፡ ለውሉደ ፡ እስራኤል ፡ ከመ ፡ ኢይግበሩ ፡ አበሳ ፡ ወኢይትዐደዉ ፡ ሥርዐተ ፡ ወኢይንሥቱ ፡ ኪዳነ ፡ እንተ ፡ ተሠርዐት ፡ ሎሙ ፡ ከመ ፡ ይግበርዋ ፡ ወይጸሐፉ ፡ አዕርክተ ፡ 22 ወእመሰ ፡ ተዐደዉ ፡ ወገብሩ ፡ እምኵሉ ፡ ፍናዊሃ ፡ ለርኵስ ፡ ይጸሐፉ ፡ ውስተ ፡ ጽላተ ፡ ሰማይ ፡ ጸላእተ ፡ ወይደመሰሱ ፡ እመጽሐፈ ፡ ሕያዋን ፡ ወይጸሐፉ ፡ ውስተ ፡ መጽሐፈ ፡ እለ ፡ ይትሐጐሉ ፡ ወምስለ ፡ እለ ፡ ይሤረዉ ፡ እምውስተ ፡ ምድር ። 23 ወበዕለተ ፡ ቀተሉ ፡ ውሉደ ፡ ያዕቆብ ፡ ሰቂማሃ ፡ ዐርገ ፡ ሎሙ ፡ መጽሐፍ ፡ ውስተ ፡ ሰማይ ፡ ከመ ፡ ገብሩ ፡ ጽድቀ ፡ ወርትዐ ፡ ወበቀለ ፡ ላዕለ ፡ ኃጥኣን ፡ ወተጽሕፈ ፡ ለበረከት ። 24 ወአውፅኡ ፡ ዲናሃ ፡ እኅቶሙ ፡ እምነ ፡ ቤተ ፡ ሴኬም ፡ ወፄወዉ ፡ ኵሎ ፡ ዘሀሎ ፡ ውስተ ፡ ሰቂሞን ፡ አባግዒሆሙ ፡ ወአልህምቲሆሙ ፡ ወአእዱጊሆሙ ፡ ወኵሎ ፡ ንዋዮሙ ፡ ወኵሎ ፡ መራዕዮሙ ፡ ወአምጽኡ ፡ ኵሎ ፡ ኀበ ፡ ያዕቆብ ፡ አቡሆሙ ። 25 ወተናገረ ፡ ምስሌሆሙ ፡ በእንተ ፡ ዘቀተሉ ፡ ሀገረ ፡ እስመ ፡ ፈርሀ ፡ እምእለ ፡ ይነብሩ ፡ ምድረ ፡ እምእለ ፡ ከነናዊያን ፡ ወፈሪዛዊያን ። 26 ወኮነ ፡ ግርማ ፡ እግዚአብሔር ፡ ውስተ ፡ ኵሎን ፡ አህጉር ፡ ዘአውዳ ፡ ለሰቂሞን ፡ ወኢተንሥኡ ፡ ለሰዲደ ፡ ውሉዶ ፡ ለያዕቆብ ፡ እስመ ፡ ድንጋፄ ፡ ወድቀ ፡ ላዕሌሆሙ ።