መጽሐፈ ኩፋሌ 29

29 1 ወኮነ ፡ እምዘ ፡ ወለደት ፡ ራሔል ፡ ዮሴፍሃ ፡ ወሖረ ፡ ላባ ፡ ይቅርጽ ፡ አባግዒሁ ፡ እስመ ፡ ርሑቅ ፡ ሀለዋ ፡ እምኀቤሁ ፡ ምሕዋረ ፡ ሠሉስ ፡ ዕለት ። 2 ወርእየ ፡ ያዕቆብ ፡ ከመ ፡ የሐውር ፡ ላባ ፡ ይቅርጽ ፡ አባግዒሁ ። ወጸውዖን ፡ ለልያ ፡ ወለራሔል ፡ ወተናገረ ፡ ውስተ ፡ ልቦን ፡ ከመ ፡ ይምጽኣ ፡ ምስሌሁ ፡ ምድረ ፡ ከናአን ፡ 3 እስመ ፡ ነገሮን ፡ ዘከመ ፡ ርእየ ፡ ኵሎ ፡ በሕልም ፡ ወኵሎ ፡ ዘተናገረ ፡ ሎቱ ፡ ከመ ፡ ይግባእ ፡ ቤተ ፡ አቡሁ ። ወይቤላ ፡ ነሐውር ፡ ውስተ ፡ ኵሉ ፡ መካን ፡ ውእደ ፡ ተሐውር ፡ ምስሌከ ። 4 ወባረከ ፡ ያዕቆብ ፡ አምላከ ፡ አቡሁ ፡ ይስሐቅ ፡ ወአምላከ ፡ አብርሃም ፡ አቡሁ ፡ ለአቡሁ ። ወተንሥአ ፡ ወጸዐነ ፡ አንስቲያሁ ፡ ወውሉዶ ፡ ወኵሎ ፡ ጥሪቶ ። ነሥአ ፡ ወዐደወ ፡ ፈለገ ፡ ወበጽሐ ፡ ምድረ ፡ ገለአድ ፡ ወኀብአ ፡ ያዕቆብ ፡ ልቦ ፡ ለላባ ፡ ወኢነገሮ ። 5 ወበሳብዕ ፡ ዓም ፡ ዘሱባዔ ፡ ራብዕ ፡ ተመይጠ ፡ ያዕቆብ ፡ ገለአድ ፡ በቀዳሚ ፡ ወርኅ ፡ አመ ፡ ዕሥራሁ ፡ ወአሚሩ ፡ ወዴገኖ ፡ ላባ ፡ ድኅሬሁ ፡ ወረከቦ ፡ ለያዕቆብ ፡ በደብረ ፡ ገለአድ ፡ በወርኅ ፡ ሣልስ ፡ አመ ፡ ዐሡሩ ፡ ወሠሉሱ ። 6 ወኢኀደጎ ፡ እግዚአብሔር ፡ ከመ ፡ ያሕሥም ፡ ላዕለ ፡ ያዕቆብ ፡ እስመ ፡ አስተርአዮ ፡ በሕልም ፡ ሌሊተ ፡ ወነገሮ ፡ ላባ ፡ ለያዕቆብ ። 7 ወአመ ፡ ዐሡሩ ፡ ወሐሙሱ ፡ ለውእቱ ፡ መዋዕል ፡ ገብረ ፡ ያዕቆብ ፡ ግዝአ ፡ ለላባ ፡ ወለኵሎሙ ፡ እለ ፡ መጽኡ ፡ ምስሌሁ ፡ ወመሐለ ፡ ያዕቆብ ፡ ለላባ ፡ በዛቲ ፡ ዕለት ፡ ወላባሂ ፡ ለያዕቆብ ፡ ከመ ፡ ኢይትዐደው ፡ አሐዱ ፡ ካልኦ ፡ በእከይ ፡ በደብረ ፡ ገለአድ ። 8 ወገብረ ፡ ህየ ፡ ፍሥሐተ ፡ ለስምዕ ፡ በእንተዝ ፡ ተጸውዐ ፡ ስሙ ፡ ለውእቱ ፡ መካን ፡ ፍሥሐተ ፡ ስምዕ ፡ ከመዝ ፡ ፍሥሐት ። 9 ወቀዲሙሰ ፡ ይጼውዕዎ ፡ ለምድረ ፡ ገለአድ ፡ ምድረ ፡ ራፋኤል ፡ እስመ ፡ ምድረ ፡ ራፋኤም ፡ ይእቲ ። ወተወልዱ ፡ ራፋኤም ፡ ረዐይት ፡ እለ ፡ ዕሥር ፡ በእመት ፡ ወትስዕ ፡ በእመት ፡ ወስምን ፡ በእመት ፡ ወእስከ ፡ ስብዕ ፡ በእመት ፡ ውእቱ ፡ ኑኆሙ ። 10 ወመኃድሪሆሙ ፡ እምነ ፡ ምድረ ፡ ውሉደ ፡ አሞን ፡ እስከ ፡ ደብረ ፡ ኤርሞን ፡ ወቤተ ፡ መንግሥቶሙ ፡ ቀራናኤም ፡ ወአስጠሮስ ፡ ወአድራኦ ፡ ወሚሱር ፡ ወቤዎን ። 11 ወአሕጐሎሙ ፡ እግዚአብሔር ፡ እምእከየ ፡ ምግባሮሙ ፡ እስመ ፡ ፀዋጋን ፡ ጥቀ ፡ እሙንቱ ። ወኀደረ ፡ አሞሬዎን ፡ ህየንቲሆሙ ፡ እኩይ ፡ ወኃጥእ ፡ ወአልቦ ፡ ሕዝበ ፡ ዮም ፡ ዘፈጸመ ፡ ኀጣውኢሆሙ ፡ ኵሎ ፡ ወአልቦሙ ፡ እንከ ፡ ኑኀ ፡ ሕይወት ፡ ውስተ ፡ ምድር ። 12 ወፈነወ ፡ ያዕቆብ ፡ ላባሃ ፡ ወሖረ ፡ ውስተ ፡ መስጴጦምያ ፡ ምድረ ፡ ጽባሕ ። ወያዕቆብሂ ፡ ተመይጠ ፡ ምድረ ፡ ገለአድ ፡ 13 ወተዐደወ ፡ ኢያቦክሃ ፡ በታስዕ ፡ ወርኅ ፡ አመ ፡ ዐሡሩ ፡ ወአሚሩ ። ወበዝ ፡ ዕለት ፡ በጽሐ ፡ ኀቤሁ ፡ ዔሳው ፡ እኁሁ ፡ ወተኳነኑ ፡ ወሖረ ፡ እምኀቤሁ ፡ ምድረ ፡ ሲኢር ፡ ወያዕቆብሰ ፡ ኀደረ ፡ በምጽላላት ። 14 ወበዓመት ፡ ቀዳሚ ፡ ዘኃምስ ፡ ሱባዔ ፡ በዝኢዮቤልውስ ፡ ዐደወ ፡ ዮርዳኖስ ፡ ወኀደረ ፡ ማዕዶተ ፡ ዮርዳኖስ ፡ ወይሬዒ ፡ አባግዒሁ ፡ እምባሕረ ፡ ፈሐሐት ፡ እስከ ፡ ቤተ ፡ ሳን ፡ ወእስከ ፡ ዶታኢም ፡ ወእስከ ፡ አመ ፡ አቅራቢት ። 15 ወይፌኑ ፡ ለአቡሁ ፡ ለይስሐቅ ፡ እምኵሉ ፡ ጥሪቱ ፡ ልብሰ ፡ ወሲሲተ ፡ ወሥጋ ፡ ወስቴ ፡ ወሐሊበ ፡ ወቅብአ ፡ ወኀብስተ ፡ ሐሊብ ፡ ወእምነ ፡ ተመርተ ፡ ቈላ ። 16 ወለእሙሂ ፡ ለርብቃ ፡ ርብዕ ፡ ለዓመት ፡ ማእከለ ፡ ጊዜያቲሆሙ ፡ ለአውራኅ ፡ ወማእከለ ፡ ሐሪስ ፡ ወለዐፂድ ፡ ወማእከለ ፡ ጸዳይ ፡ ወዝናም ፡ ወማእከለ ፡ ክረምት ፡ ወሐጋይ ፡ ውስተ ፡ ማኅፈዱ ፡ ለአብርሃም ። 17 እስመ ፡ ተመይጠ ፡ ይስሐቅ ፡ እምዐዘቅተ ፡ መሐላ ፡ ወዐርገ ፡ ውስተ ፡ ማኅፈደ ፡ አቡሁ ፡ አብርሃም ፡ ወኀደረ ፡ ህየ ፡ እምዔሳው ፡ ወልዱ ። 18 እስመ ፡ በመዋዕለ ፡ ሖረ ፡ ያዕቆብ ፡ መስጴጦምያ ፡ ነሥአ ፡ ለርእሱ ፡ ዔሳው ፡ ብእሲተ ፡ መኤሌትሃ ፡ ወለተ ፡ ይስማዔል ፡ ወአስተጋብአ ፡ ኵሎ ፡ መርዔተ ፡ አቡሁ ፡ ወአንስቲያሁ ፡ ወዐርገ ፡ ወኀደረ ፡ ውስተ ፡ ደብረ ፡ ሲር ። ወኀደገ ፡ ይስሐቅሃ ፡ አባሁ ፡ ውስተ ፡ ዐዘቅተ ፡ መሐላ ፡ ባሕቲቶ ። 19 ወዐርገ ፡ ይስሐቅ ፡ እምዐዘቅተ ፡ መሐላ ፡ ወኀደረ ፡ ማኅፈደ ፡ አብርሃም ፡ አቡሁ ፡ ውስተ ፡ ደብረ ፡ ኬብሮን ። 20 ወእምህየ ፡ ይፌኑ ፡ ያዕቆብ ፡ ኵሎ ፡ ዘይፌኑ ፡ ለአቡሁ ፡ ወለእሙ ፡ እምጊዜ ፡ በበ ፡ ጊዜ ፡ ኵሎ ፡ ትካዞሙ ። ወይባርክዎ ። ለያዕቆብ ፡ በኵሉ ፡ ልቦሙ ፡ ወበኵሉ ፡ ነፍሶሙ ።