መጽሐፈ ኩፋሌ 28

28 1 ወአንሥአ ፡ እገሪሁ ፡ ወሖረ ፡ ምድረ ፡ ጽባሕ ፡ ኀበ ፡ ላባ ፡ እኅወ ፡ ርብቃ ፡ ወሀሎ ፡ ምስሌሁ ፡ ወተቀንየ ፡ ሎቱ ፡ ህየንተ ፡ ራሔል ፡ ወለቱ ፡ ሱባዔ ፡ አሐደ ። 2 ወበዓመት ፡ ቀዳሚ ፡ በሣልስ ፡ ሱባዔ ፡ ይቤሎ ፡ ሀበኒ ፡ ብእሲትየ ፡ ዘበእንቲአሃ ፡ ተቀነይኩ ፡ ለከ ፡ ሰብዐተ ፡ ዓመተ ፡ ወይቤሎ ፡ ላባ ፡ ለያዕቆብ ፡ አነ ፡ እሁበከ ፡ ብእሲተከ ። 3 ወገብረ ፡ ላባ ፡ ግዝአ ፡ ወነሥአ ፡ ልያሃ ፡ ወለቶ ፡ እንተ ፡ ትልህቅ ፡ ወወሀቦ ፡ ለያዕቆብ ፡ ብእሲተ ፡ ወወሀባ ፡ ዘለፋሃ ፡ አመቶ ፡ ለአኪተ ፡ ወያዕቆብሰ ፡ ኢያእመረ ፡ እስመ ፡ አምሰላ ፡ ያዕቆብ ፡ ዘራሔል ፡ ይእቲ ። 4 ወቦአ ፡ ኀቤሃ ፡ ወናሁ ፡ ይእቲሰ ፡ ልያ ። ወተምዕዐ ፡ ያዕቆብ ፡ ላዕለ ፡ ላባ ፡ ወይቤሎ ፡ ለምንት ፡ ገበርከ ፡ ከመዝ ፡ አኮኑ ፡ በእንተ ፡ ራሔል ፡ ተቀነይኩ ፡ ለከ ፡ ወአኮ ፡ በእንተ ፡ ልያ ፡ ለምንት ፡ ገፋዕከኒ ፡ ንሣእ ፡ ወለተከ ፡ ወአሐውር ፡ እስመ ፡ እኩየ ፡ ገበርከ ፡ ላዕሌየ ። 5 እስመ ፡ ያፈቅር ፡ ያዕቆብ ፡ ራሔልሃ ፡ እምነ ፡ ልያ ፡ እስመ ፡ አዕይንቲሃ ፡ ለልያ ፡ ድኩም ፡ ወባሕቱ ፡ ላሕይ ፡ ራእያ ፡ ጥቀ ፡ ወራሔል ፡ ሠናይ ፡ አዕይንቲሃ ፡ ወሠናይ ፡ ራእያ ፡ ወላሕይት ፡ ጥቀ ። 6 ወይቤሎ ፡ ላባ ፡ ለያዕቆብ ፡ ኢኮነ ፡ ከመዝ ፡ በምድርነ ፡ ውሂበ ፡ እንተ ፡ ትንእስ ፡ እምእንተ ፡ ትልህቅ ። ወአኮ ፡ ርቱዕ ፡ ለገቢረ ፡ ዝንቱ ፡ እስመ ፡ ከመዝ ፡ ሥሩዕ ፡ ወጽሑፍ ፡ ውስተ ፡ ጽላተ ፡ ሰማይ ፡ ከመ ፡ አልቦ ፡ ዘይሁብ ፡ ወለቶ ፡ እንተ ፡ ትንእስ ፡ እምእንተ ፡ ትልህቅ ፡ እስመ ፡ እንተ ፡ ትልህቅ ፡ ያቀድም ፡ ውሂበ ፡ ወእምድኅሬሃ ፡ እንተ ፡ ትንእስ ። ወብእሲ ፡ ዘይገብር ፡ ከመዝ ፡ አበሳ ፡ ያዐርጉ ፡ በእንቲአሁ ፡ ውስተ ፡ ሰማይ ፡ ወአልቦ ፡ ዘይጸድቅ ፡ ወይገብር ፡ ዘንተ ፡ ነገረ ፡ እስመ ፡ እኩይ ፡ ዝንቱ ፡ ግብር ፡ በቅድመ ፡ እግዚአብሔር ። 7 ወአንተኒ ፡ አዝዝ ፡ ለደቂቀ ፡ እስራኤል ። ወኢይግበሩ ፡ ዘንተ ፡ ቃለ ፡ ወኢይንሥኡ ፡ ወኢየሀቡ ፡ እንተ ፡ ትንእስ ፡ ዘእንበለ ፡ ያቅድሙ ፡ እንተ ፡ ትልህቅ ፡ እስመ ፡ እኩይ ፡ ጥቀ ። 8 ወይቤ ፡ ላባ ፡ ለያዕቆብ ፡ ይኅልፍ ፡ ሰቡዐ ፡ መዋዕለ ፡ ግዝእ ፡ ለዛ ፡ ወእሁበከ ፡ ራሔልሃ ፡ ከመ ፡ ትትቀነይ ፡ ሊተ ፡ ካልኣነ ፡ ዓመተ ፡ ሰብዐተ ፡ ከመ ፡ ትርዐይ ፡ አባግዕየ ፡ በከመ ፡ ገበርከ ፡ በሱባዔ ፡ ቀዳሚ ። 9 ወበመዋዕል ፡ አመ ፡ ኀለፈ ፡ ሰቡዕ ፡ ዕለት ፡ ዘግዝእ ፡ ዘልያ ፡ ወወሀቦ ፡ ላባ ፡ ራሔልሃ ፡ ለያዕቆብ ፡ ከመ ፡ ይትቀነይ ፡ ሎቱ ፡ ካልአተ ፡ ዓመተ ፡ ሰብዐተ ፡ ወወሀባ ፡ ባላንሃ ፡ እኅታ ፡ ለዘለፋ ፡ ላእኪተ ። 10 ወተቀንየ ፡ ሰብዐተ ፡ ዓመተ ፡ ዳግመ ፡ በእንተ ፡ ራሔል ፡ እስመ ፡ ልያ ፡ ተውህበቶ ፡ በከ ። 11 ወአርኀወ ፡ እግዚአብሔር ፡ ማሕፀነ ፡ ልያ ፡ ወፀንሰት ፡ ወወለደት ፡ ለያዕቆብ ፡ ወልደ ፡ ወጸውዐ ፡ ስሞ ፡ ሮቤል ። አመ ፡ ዐሡሩ ፡ ወረቡዑ ፡ ለወርኅ ፡ ታስዕ ፡ በቀዳሚ ፡ ዓመት ፡ ዘሱባዔ ፡ ሣልስ ። 12 ወማሕፀናሰ ፡ ለራሔል ፡ ተጸፍቀ ፡ እስመ ፡ ርእየ ፡ እግዚአብሔር ፡ ከመ ፡ ትጸላእ ፡ ልያ ፡ ወራሔልሰ ፡ ትትፈቀር ። 13 ወደገመ ፡ ያዕቆብ ፡ ቦአ ፡ ኀበ ፡ ልያ ፡ ወፀንሰት ፡ ወወለደት ፡ ለያዕቆብ ፡ ወልደ ፡ ካልአ ፡ ወጸውዐ ፡ ስሞ ፡ ስምዖን ። አመ ፡ ዕሥራ ፡ ወአሐቲ ፡ ዘወርኅ ፡ ዓሥር ፡ ወበሣልስ ፡ ዓመቱ ፡ ለዝ ፡ ሱባዔ ። 14 ወደገመ ፡ ያዕቆብ ፡ ወቦአ ፡ ኀበ ፡ ልያ ፡ ወፀንሰት ፡ ወወለደት ፡ ሎቱ ፡ ወልደ ፡ ሣልሰ ፡ ወጸውዐ ፡ ስሞ ፡ ሌዊ ። በሠርቀ ፡ ወርኅ ፡ ቀዳሚ ፡ በሳድስ ፡ ዓመት ፡ ዘዝ ፡ ሱባዔ ። 15 ወደገመ ፡ ካዕበ ፡ ወቦአ ፡ ኀቤሃ ፡ ወወለደት ፡ ወልደ ፡ ራብዐ ። ወጸውዐ ፡ ስሞ ፡ ይሁዳ ፡ በዐሡሩ ፡ ወኀሙሱ ፡ ለወርኅ ፡ ሣልስ ፡ በቀዳሚ ፡ ዓመት ፡ ዘሱባዔ ፡ ራብዕ ። 16 ወበዝ ፡ ኵሉ ፡ ራሔል ፡ ትቀንእ ፡ በልያ ፡ እስመ ፡ ይእቲ ፡ ኢትወልድ ። ወትቤሎ ፡ ለያዕቆብ ፡ ሀበኒ ፡ ውሉደ ። ወይቤላ ፡ ያዕቆብ ፡ አነሁ ፡ ከላእኩ ፡ እምኔኪ ፡ ፍሬ ፡ ከርሥኪ ፡ አነሁ ፡ ኀደጉኪ ። 17 ወሶበ ፡ ርእየት ፡ ራሔል ፡ ከመ ፡ ወለደት ፡ ልያ ፡ ደቀ ፡ አርባዕተ ፡ ለያዕቆብ ፡ ሮቤልሃ ፡ ወስምዖንሃ ፡ ወሌዊሃ ፡ ወይሁዳሃ ። ወትቤሎ ፡ ባእ ፡ ኀበ ፡ ባላን ፡ አመትየ ፡ ወትፀንስ ፡ ወትወልድ ፡ ሊተ ፡ ወልደ ፡ 18 ወቦአ ፡ ወፀንሰት ፡ ወወለደት ፡ ሎቱ ፡ ወልደ ። ወጸውዐ ፡ ስሞ ፡ ዳን ። አመ ፡ ተሱዑ ፡ ለወርኅ ፡ ሳድስ ፡ በሳድስ ፡ ዓመት ፡ ዘሱባዔ ፡ ሣልስ ። 19 ወደገመ ፡ ያዕቆብ ፡ ካዕበ ፡ ወቦአ ፡ ኀበ ፡ ባላ ፡ ወፀንሰት ፡ ወወለደት ፡ ወልደ ፡ ዳግመ ፡ ለያዕቆብ ፡ ወጸውዐት ፡ ስሞ ፡ ራሔል ፡ ንፍታሌም ፡ በኀሙሱ ፡ ለወርኅ ፡ ሳብዕ ፡ በካልእ ፡ ዓም ፡ ዘሱባዔ ፡ ራብዕ ። 20 ወሶበ ፡ ርእየት ፡ ልያ ፡ ከመ ፡ መከነት ፡ ወኢትወልድ ፡ ቀንአት ፡ ይእቲኒ ፡ ለራሔል ፡ ወወሀበት ፡ ይእቲኒ ፡ ዘለፋሃ ፡ ላእኪታ ፡ ለያዕቆብ ፡ ብእሲተ ፡ ወፀንሰት ፡ ወወለደት ፡ ወልደ ፡ ወጸውዐት ፡ ስሞ ፡ ልያ ፡ ጋድ ፡ አመ ፡ ዐሡሩ ፡ ወሰኑዩ ፡ ለወርኅ ፡ ሳምን ፡ በሣልስ ፡ ዓመት ፡ ዘሱባዔ ፡ ራብዕ ። 21 ወደገመ ፡ ቦአ ፡ ኀቤሃ ፡ ወፀንሰት ፡ ወወለደት ፡ ሎቱ ፡ ወልደ ፡ ካልአ ፡ ወጸውዐት ፡ ስሞ ፡ ልያ ፡ አሴር ፡ በሰኑዩ ፡ ለወርኅ ፡ ዘዐሠርቱ ፡ ወአሐዱ ፡ በዓመት ፡ ኃምስ ፡ ዘሱባዔ ፡ ራብዕ ። 22 ወቦአ ፡ ያዕቆብ ፡ ኀበ ፡ ልያ ፡ ወፀንሰት ፡ ወወለደት ፡ ለያዕቆብ ፡ ወልደ ፡ ወጸውዐ ፡ ስሞ ፡ ይሳኮር ፡ በረቡዑ ፡ ለኃምስ ፡ ወርኅ ፡ በዓመት ፡ ራብዕ ፡ ዘሱባዔ ፡ ራብዕ ። ወወሀበቶ ፡ ለሐፃኒት ። 23 ወቦአ ፡ ያዕቆብ ፡ ዳግመ ፡ ኀቤሃ ፡ ወፀንሰት ፡ ወወለደት ፡ ክልኤተ ፡ ወልደ ፡ ወወለተ ፡ ወጸውዐት ፡ ስሞ ፡ ለወልድ ፡ ዛብሎን ፡ ወለወለት ፡ ዲና ፡ ስማ ። በሳብዕ ፡ ወርኅ ፡ ዘሳብዕ ፡ ዓመት ፡ በሳድስ ፡ ሱባዔ ፡ ዘራብዕ ። 24 ወተሣሀላ ፡ እግዚአብሔር ፡ ለራሔል ፡ ወአርኀወ ፡ ማሕፀና ። ወፀንሰት ፡ ወወለደት ። ወልደ ። ወጸውዐት ፡ ስሞ ፡ ዮሴፍ ። በሠርቀ ፡ ወርኅ ፡ ራብዕ ፡ በሳድስ ፡ ዓመት ፡ በሱባዔ ፡ ዝንቱ ፡ ራብዕ ። 25 ወበመዋዕለ ፡ ተወልደ ፡ ዮሴፍ ፡ ይቤ ፡ ያዕቆብ ፡ ለላባ ፡ ሀበኒ ፡ አንስትያየ ፡ ወውሉድየ ፡ ወእሖር ፡ ኀበ ፡ አቡየ ፡ ይስሐቅ ፡ ወእግበር ፡ ሊተ ፡ ቤተ ፡ እስመ ፡ ፈጸምኩ ፡ ዓመታተ ፡ ዘተቀነይኩ ፡ ለከ ፡ ህየንተ ፡ ክልኤቲ ፡ አዋልዲከ ፡ ወአሐውር ፡ ቤተ ፡ አቡየ ። 26 ወይቤሎ ፡ ላባ ፡ ለያዕቆብ ፡ ንበር ፡ ኀቤየ ፡ በዐስብከ ፡ ወረዐይ ፡ ሊተ ፡ ካዕበ ፡ መርዔትየ ፡ ወንሣእ ፡ ዐስበከ ። 27 ወተካሀሉ ፡ በበይናቲሆሙ ፡ ከመ ፡ የሀቦ ፡ ዐስቦ ፡ ኵሎ ፡ በግዐ ፡ እመሓስእ ፡ ወእምጠሊ ፡ ሐመደ ፡ ከቦ ፡ ወጋስ ፡ በጸዐዳ ፡ ዘተወልደ ፡ ይኩኖ ፡ ዐስቦ ። 28 ወይወልድ ፡ ኵሉ ፡ አባግዕ ፡ ጋስ ፡ ኵሎ ፡ ዘትእምርተ ፡ ኰሳኵሰ ፡ ዘቦ ፡ ኵሉ ፡ ወሐመደ ፡ ክቦ ፡ ኰሳኵሰ ፡ ወይደግማ ፡ አባግዕ ፡ ይወልዳ ፡ ዘበአርአያሆን ፡ ወኵሉ ፡ ዘትእምርተ ፡ ለያዕቆብ ፡ ወዘአልቦ ፡ ትእምርት ፡ ለላባ ። 29 ወበዝኀ ፡ ጥሪቱ ፡ ለያዕቆብ ፡ ጥቀ ፡ ወአጥረየ ፡ አልህምተ ፡ ወአባግዐ ፡ ወአእዱገ ፡ ወአግማለ ፡ ወደቀ ፡ ወአዋልደ ። 30 ወቀንአ ፡ ላባ ፡ ወውሉዱ ፡ ላዕለ ፡ ያዕቆብ ፡ ወአስተጋብአ ፡ ላባ ፡ አባግዒሁ ፡ እምኔሁ ፡ ወያስተሐይጾ ፡ ለእኩይ ።