መጽሐፈ ኩፋሌ 32

32 1 ወኀደረ ፡ በይእቲ ፡ ሌሊት ፡ ውስተ ፡ ቤቴል ፡ ወሐለመ ፡ ሌዊ ፡ ከመ ፡ ሤምዎ ፡ ወረሰይዎ ፡ ለክህነት ፡ ለአምላክ ፡ ልዑል ፡ ኪያሁ ፡ ወውሉዶ ፡ እስከ ፡ ለዓለም ። ወነቅሀ ፡ እምንዋሙ ፡ ወባረኮ ፡ ለእግዚአብሔር ። 2 ወጌሰ ፡ ያዕቆብ ፡ በነግህ ፡ አመ ፡ ዐሡሩ ፡ ወረቡዑ ፡ ለዝ ፡ ወርኅ ። ወዐሠረ ፡ እምኵሉ ፡ ዘመጽአ ፡ ምስሌሁ ፡ እምሰብእ ፡ እስከ ፡ እንስሳ ፡ እምወርቅ ፡ እስከ ፡ ኵሉ ፡ ንዋይ ፡ ወልብስ ፡ ወዐሠረ ፡ እምኵሉ ። 3 ወበውእቶን ፡ መዋዕል ፡ ፀንሰት ፡ ይእቲ ፡ ራሔል ፡ ብንያምሃ ፡ ወልዳ ፡ ወኆለቈ ፡ እምኔሁ ፡ ያዕቆብ ፡ ወልዶ ። ወዐርገ ፡ ወወረደ ፡ ላዕሌሁ ፡ ለሌዊ ፡ በመክፈልተ ፡ እግዚአብሔር ፡ ወአልበሶ ፡ አቡሁ ፡ አልባሰ ፡ ክህነት ፡ ወመልአ ፡ እደዊሁ ። 4 ወአመ ፡ ወሡሩ ፡ ወኀሙሱ ፡ ለዝ ፡ ወርኅ ፡ አብአ ፡ ውስተ ፡ ምሥዋዕ ፡ አስዋረ ፡ እምአልህምት ፡ ዐሠርተ ፡ ወአርባዕተ ፡ ወአብሐኰ ፡ ዕሥራ ፡ ወሰማኒተ ፡ ወአባግዐ ፡ አርብዓ ፡ ወተስዐተ ፡ ወመሓስአ ፡ ስሳ ፡ ወመሓስአ ፡ ጠሊ ፡ ዕሥራ ፡ ወተስዐተ ፡ ጽንሐሐ ፡ ውስተ ፡ ምሥዋዕ ፡ ወቍርባነ ፡ ሥሙረ ፡ ለመዓዛ ፡ ሠናይ ፡ ቅድመ ፡ አምላክ ። 5 ዝውእቱ ፡ መባኡ ፡ እምጸሎት ፡ እንተ ፡ ጸለየ ፡ ከመ ፡ የዐሥር ፡ ምስለ ፡ መሥዋዕቶሙ ፡ ወለሞጻሕቶሙ ። 6 ወሶበ ፡ በልዖ ፡ እሳት ፡ የዐጥን ፡ ስኂነ ፡ ዲቤሁ ፡ ለእሳት ፡ መልዕልቶ ። ወለመሥዋዕተ ፡ መድኃኒት ፡ አስዋረ ፡ ክልኤተ ፡ ወአብሐኰ ፡ አርባዕተ ፡ ወአባግዐ ፡ አርባዕተ ፡ ዳቤላተ ፡ አርባዕተ ፡ አባግዐ ፡ ዘዘ ፡ ዓመት ፡ ክልኤተ ፡ ወመሓስአ ፡ ጠሊ ፡ ክልኤተ ። ከመዝ ፡ ይገብር ፡ እንተ ፡ ጸብሐት ፡ ሰቡዐ ፡ መዋዕለ ፡ 7 ወሀሎ ፡ እንዘ ፡ ይበልዕ ፡ ውእቱ ፡ ወኵሎሙ ፡ ውሉዱ ፡ ወሰብኡ ፡ በፍሥሓ ፡ በህየ ፡ ሰቡዐ ፡ መዋዕለ ፡ ወይባርኮ ፡ ወያአኵቶ ፡ ለእግዚአብሔር ፡ ለዘ ፡ ባልሖ ፡ እምኵሉ ፡ ምንዳቤሁ ፡ ወለዘ ፡ ወሀቦ ፡ ጸሎቶ ። 8 ወዐሠረ ፡ ኵሎ ፡ እንስሳ ፡ ንጹሐ ፡ ወገብሮ ፡ ጽንሐሐ ፡ ወእንስሳ ፡ ርኩሰ ፡ ወሀቦ ፡ ለሌዊ ፡ ወልዱ ፡ ወነፍሳተ ፡ ሰብእ ፡ ኵሎ ፡ ወሀቦ ። 9 ወተክህነ ፡ ሌዊ ፡ በቤቴል ፡ ቅድመ ፡ ያዕቆብ ፡ አቡሁ ፡ እምዐሠርቱ ፡ አኃዊሁ ፡ ወሀሎ ፡ ህየ ፡ ካህነ ። ወያዕቆብ ፡ ወሀበ ፡ ጸሎቶ ፡ ከመዝ ፡ ዐሠረ ፡ ዳግመ ፡ ዓሥራተ ፡ ለእግዚአብሔር ፡ ወቀደሶ ፡ ወኮነ ፡ ቅዱሰ ። 10 ወበእንተዝ ፡ ሥሩዕ ፡ ውስተ ፡ ጽላተ ፡ ሰማይ ፡ ሕግ ፡ ለዐሥሮ ፡ ዓሥራት ፡ ካዕበ ፡ ለበሊዖቱ ፡ በቅድመ ፡ እግዚአብሔር ፡ በመካን ፡ በኀበ ፡ ተኀርየ ፡ ይኅድር ፡ ስሙ ፡ ላዕሌሁ ፡ ዓም ፡ እምዓም ። ወአልቦ ፡ ለዝ ፡ ሕግ ፡ ዐቅመ ፡ መዋዕል ፡ ለዓለም ፡ 11 ውእቱ ፡ ሥርዐት ፡ ጽሑፍ ፡ ለገቢሮቱ ፡ ዓመት ፡ እምዓመት ፡ ለበሊዐ ፡ ዓሥራት ፡ ዳግመ ፡ ቅድመ ፡ እግዚአብሔር ፡ በመካን ፡ በኀበ ፡ ተኀርየ ። ወአልቦ ፡ ለአትርፎ ፡ እምኔሁ ፡ እምዝ ፡ ዓመት ፡ ለዓመት ፡ ለዘ ፡ ይመጽእ ፡ 12 እስመ ፡ በዓመቲሁ ፡ ይትበላዕ ፡ ዘርእ ፡ እስከ ፡ አመ ፡ መዋዕለ ፡ ሐሪፍ ፡ ዘርአ ፡ ዓመት ፡ ወወይን ፡ እስከ ፡ አመ ፡ መዋዕለ ፡ ወይን ፡ ወለዘይት ፡ እስከ ፡ አመ ፡ መዋዕለ ፡ ጊዜ ፡ መዋዕሊሁ ። 13 ኵሉ ፡ ዘይተርፍ ፡ እምኔሁ ፡ ወዘይበሊ ፡ ይኩን ፡ ስኡበ ፡ በእሳት ፡ የዐይ ፡ እስመ ፡ ኮነ ፡ ርኩሰ ፡ 14 ወከማሁ ፡ ይብልዕዎ ፡ ኅቡረ ፡ በቤት ፡ ቅዱስ ፡ ወኢያብልይዎ ፡ 15 ወኵሉ ፡ ዓሥራተ ፡ ላህም ፡ ወአባግዕ ፡ ቅዱስ ፡ ለእግዚአብሔር ፡ ወለካህናቲሁ ፡ ይኩን ፡ ዘይበልዑ ፡ በቅድሜሁ ፡ ዓመት ፡ እምዓመት ። እስመ ፡ ከማሁ ፡ ሥሩዕ ፡ ወቍሩጽ ፡ በእንተ ፡ ዓሥራት ፡ ውስተ ፡ ጽላተ ፡ ሰማይ ። 16 ወበሌሊት ፡ ካልእት ፡ አመ ፡ ዕሥራ ፡ ወሰኑዩ ፡ ለመዋዕለ ፡ ዝወርኅ ፡ መከረ ፡ ያዕቆብ ፡ ከመ ፡ ይሕንጽ ፡ ውእተ ፡ መካነ ፡ ወከመ ፡ ይጥቅም ፡ ዐጸደ ፡ ወይቀድሶ ፡ ወከመ ፡ ይግበሮ ፡ ቅዱሰ ፡ ዘለዓለም ፡ ሎቱ ፡ ወለውሉዱ ፡ እስከ ፡ ለዓለም ፡ እምድኅሬሁ ። 17 ወአስተርአዮ ፡ እግዚአብሔር ፡ በሌሊት ፡ ወባረኮ ፡ ወይቤሎ ፡ ኢይጸዋዕ ፡ ስምከ ፡ ያዕቆብሃ ፡ ባሕቲቶ ፡ አላ ፡ እስራኤልሃ ፡ ይሰምዩ ፡ ስምከ ። 18 ወይቤሎ ፡ ካዕበ ፡ አነ ፡ ውእቱ ፡ እግዚአብሔር ፡ ዘፈጠርኩ ፡ ሰማየ ፡ ወምድረ ፡ ወአልህቀከ ፡ ወአበዝኀከ ፡ ፈድፋደ ፡ ጥቀ ፡ ወነገሥት ፡ እምኔከ ፡ ይከውኑ ፡ ወይኴንኑ ፡ በኵለሄ ፡ ወእደ ፡ ኬደ ፡ አሰረ ፡ ውሉደ ፡ ሰብእ ። 19 ወእሁብ ፡ ለዘርእከ ፡ ኵላ ፡ ምድረ ፡ ዘመትሕተ ፡ ሰማይ ፡ ወይኴንኑ ፡ ውስተ ፡ ኵሉ ፡ አሕዛብ ፡ በከመ ፡ ፈቀዱ ፡ ወእምድኅረዝ ፡ ያስተጋብኡ ፡ ኵላ ፡ ምድረ ፡ ወይወርስዋ ፡ ለዓለም ፡ 20 ወፈጸመ ፡ ተናገሮ ፡ ምስሌሁ ፡ ወዐርገ ፡ እምኀቤሁ ፡ ወይሬኢ ፡ ያዕቆብ ፡ እስከ ፡ ሶበ ፡ ዐርገ ፡ ውስተ ፡ ሰማይ ። 21 ወርእየ ፡ በራእየ ፡ ሌሊት ፡ ወናሁ ፡ መልአክ ፡ ይወርድ ፡ እምሰማይ ፡ ወሰብዑ ፡ ሰሌዳት ፡ ውስተ ፡ እደዊሁ ፡ ወወሀቦ ፡ ለያዕቆብ ፡ ወአንበቦን ፡ ወአንበበ ፡ ኵሎ ፡ ዘጽሑፍ ፡ ውስቴቶን ፡ ዘይከውን ፡ ሎቱ ፡ ወለውሉዱ ፡ በኩሉ ፡ ዓለማት ። 22 ወአርአዮ ፡ ኵሎ ፡ ዘጽሑፍ ፡ ውስተ ፡ ሰሌዳት ፡ ወይቤሎ ፡ ኢትሕንጽ ፡ ዘንተ ፡ መካነ ፡ ወኢትግበሮ ፡ መቅደሰ ፡ ዘለዓለም ፡ ወኢትኅድር ፡ ዝየ ፡ እስመ ፡ አኮ ፡ ዝመካን ። ሖር ፡ ቤተ ፡ አብርሃም ፡ አቡከ ፡ ወኅድር ፡ ኀበ ፡ ይስሐቅ ፡ አቡከ ፡ ህየ ፡ እስከ ፡ አመ ፡ ዕለተ ፡ ሞቱ ፡ ለአቡከ ። 23 እስመ ፡ በግብጽ ፡ ትመውት ፡ በሰላም ፡ ወበዛ ፡ ምድር ፡ ትትቀበር ፡ በክብር ፡ ውስተ ፡ መቃብረ ፡ አበዊከ ፡ ምስለ ፡ አብርሃም ፡ ወይስሐቅ ። 24 ኢትፍራህ ፡ እስመ ፡ በከመ ፡ ርኢከ ፡ ወአንበብከ ፡ ከማሁ ፡ ይከውን ፡ ኵሉ ፡ ወአንተሂ ፡ ጸሐፍ ፡ ኵሎ ፡ ዘከመ ፡ ርኢከ ፡ ወአንበብከ ፡ 25 ወይቤ ፡ ያዕቆብ ፡ እግዚኦ ፡ እፎ ፡ እዜከር ፡ ዘከመ ፡ አንበብኩ ፡ ወርኢኩ ፡ ኵሎ ። ወይቤሎ ፡ አነ ፡ አዜክረከ ፡ ኵሎ ። 26 ወዐርገ ፡ እምኀቤሁ ። ወነቅሀ ፡ እምንዋሙ ፡ ወተዘከረ ፡ ኵሎ ፡ ዘአንበበ ፡ ወዘርእየ ፡ ወጸሐፈ ፡ ኵሎ ፡ ነገረ ፡ ዘአንበበ ፡ ወዘርእየ ፡ 27 ወገብረ ፡ በህየ ፡ ዓዲ ፡ ዕለተ ፡ አሐተ ፡ ወሦዐ ፡ ባቲ ፡ በከመ ፡ ኵሉ ፡ ዘይሠውዕ ፡ በመዋዕለ ፡ ቀዳሚያት ፡ ወጸውዐ ፡ ስማ ፡ ቶሳከ ፡ እስመ ፡ ተወሰከት ፡ ይእቲ ፡ ዕለት ፡ ወለቀዳሚያት ፡ ጸውዖን ፡ በዓለ ። 28 ወከመዝ ፡ ያስተርኢ ፡ ውእቱ ፡ ከመ ፡ ትኩን ፡ ወጽሑፍ ፡ ውስተ ፡ ጽላተ ፡ ሰማይ ። በእንተዝ ፡ ተከሥተ ፡ ሎቱ ፡ ከመ ፡ ይግበራ ፡ ወከመ ፡ ይወስክ ፡ ዲበ ፡ ሰብዑ ፡ መዋዕለ ፡ በዓል ፡ ኪያሃ ፡ 29 ወተጸውዐ ፡ ስማ ፡ ቶሳከ ፡ እስመ ፡ እንተ ፡ ያዐርጉ ፡ ይእቲ ፡ በስምዐ ፡ መዋዕለ ፡ በዓል ፡ በከመ ፡ ኆልቈ ፡ መዋዕል ፡ ዘዓመት ። 30 ወበሌሊት ፡ አመ ፡ ዕሥራ ፡ ወሠሉሱ ፡ ለዝ ፡ ወርኅ ፡ ሞተት ፡ ዲቦራ ፡ ሐፃኒተ ፡ ርብቃ ፡ ወቀበርዋ ፡ መትሕተ ፡ ሀገር ፡ ታሕተ ፡ ባላን ፡ ዘፈለግ ፡ ወጸውዐ ፡ ስሞ ፡ ለውእቱ ፡ መካን ፡ ፈለገ ፡ ዲቦራ ፡ ወበላኖንሃ ፡ በላኖን ፡ ለሐ ፡ ዲቦራ ። 31 ወሖረት ፡ ርብቃ ፡ ወገብአት ፡ ውስተ ፡ ቤት ፡ ኀበ ፡ አቡሁ ፡ ይስሐቅ ። ወፈነወ ፡ ያዕቆብ ፡ በእዴሃ ፡ አብሐኰ ፡ ወደቤላተ ፡ ወአባግዐ ፡ ከመ ፡ ትግበር ፡ ለአቡሁ ፡ መብልዐ ፡ ዘከመ ፡ ይፈቅድ ። 32 ወሖረ ፡ እምድኅሬሃ ፡ ለእሙ ፡ እስከ ፡ ቀርበ ፡ ምድረ ፡ ከብራታን ፡ ወኀደረ ፡ ህየ ። 33 ወወለደት ፡ ራሔል ፡ በሌሊት ፡ ወልደ ፡ ወጸውዐት ፡ ስሞ ፡ ወልደ ፡ ሕማምየ ፡ እስመ ፡ ዐጸበት ፡ ሶበ ፡ ትወልዶ ፡ ወአቡሁሰ ፡ ጸውዐ ፡ ስሞ ፡ ብንያምሃ ። አመ ፡ ዐሡሩ ፡ ወአሚሩ ፡ ለወርኅ ፡ ሳምን ። በዓመት ፡ አሐዱ ፡ ዘሱባዔ ፡ ሳድስ ፡ ዘዝንቱ ፡ ኢዮቤልውን ። 34 ወሞተት ፡ በህየ ፡ ራሔል ፡ ወተቀብረት ፡ ውስተ ፡ ምድረ ፡ ኤፍራታ ፡ እንተ ፡ ይእቲ ፡ ቤተ ፡ ልሔም ። ወሐነጸ ፡ ያዕቆብ ፡ ውስተ ፡ መቃብረ ፡ ራሔል ፡ ሐውልተ ፡ ውስተ ፡ ፍኖት ፡ ላዕለ ፡ መቃብሪሃ ።