ዘአሞጽ ነቢይ 8

ከመዝ ፡ አርአየኒ ፡ እግዚአብሔር ፡ ወናሁ ፡ ሙዳየ ፡ ዔርግ ፡ ወይቤለኒ ፡ እግዚአብሔር ፡ ምንተ ፡ ትሬኢ ፡ አሞጽ ፡ ወእቤ ፡ ሙዳየ ፡ ዔርግ ። ወይቤለኒ ፡ እግዚአብሔር ፡ በጽሐቶሙ ፡ ማኅለቅቶሙ ፡ ለሕዝብየ ፡ እስራኤል ፡ ኢያነሐሲ ፡ ሎሙ ፡ እንከ ፡ ዳግመ ። ወየዐወይዉ ፡ በምኵራባቲሆሙ ፡ ይእተ ፡ አሚረ ፡ ይቤ ፡ እግዚአብሔር ። እስመ ፡ በዝኀ ፡ አብድንቲሆሙ ፡ ዘይትንጻሕ ፡ ውስተ ፡ ኵሉ ፡ በሓውርት ፡ ወይትሐጐሉ ። ስምዑ ፡ ዘንተ ፡ ነገረ ፡ እለ ፡ ታግዕሩ ፡ ነዳየ ፡ በጽባሕ ፡ ወትትዔገሉ ፡ ምስኪነ ፡ በዲበ ፡ ምድር ። እለ ፡ ትብሉ ፡ ማእዜ ፡ ይሰርቅ ፡ ወርኅ ፡ ንምላእ ፡ ወናስተማልእ ፡ ወሰንበታተኒ ፡ ወናርኁ ፡ መዛግብቲነ ፡ ወንግበር ፡ መስፈርተ ፡ ንስቲተ ፡ ወናዕቢ ፡ መዳልወ ፡ ዐመፃ ። ወንቅንዮ ፡ ለነዳይ ፡ በዕዳነ ፡ ወይኵነነ ፡ ምስኪን ፡ ዘንከይድ ፡ ህየንተ ፡ አሣእኒነ ፡ ወንትራባሕ ፡ በትግብርተ ፡ እክልነ ። መሐለኬ ፡ እግዚአብሔር ፡ በእንተ ፡ ትዝህርቱ ፡ ለያዕቆብ ፡ ከመ ፡ ኢየኀልቅ ፡ ተመውኦትክሙ ፡ በእንተ ፡ ኵሉ ፡ ምግበሪክሙ ። እንዘ ፡ ኢትትሀወክ ፡ ምድር ፡ ብዙኀ ፡ ወይላሕዉ ፡ ኵሎሙ ፡ እለ ፡ ይነብሩ ፡ ውስቴታ ፡ ወይወዐሕዝ ፡ ከመ ፡ ፈለግ ፡ ቀትል ፡ ወይመልእ ፡ ከመ ፡ ፈለገ ፡ ግብጽ ። ወይከውን ፡ ይእተ ፡ አሚረ ፡ ይቤ ፡ እግዚአብሔር ፡ አምላክ ፡ የዐርብ ፡ ፀሐይ ፡ ማዐልተ ፡ ቀትር ፡ ወይጸልም ፡ ዲበ ፡ ምድር ፡ በዕለተ ፡ ብርሃን ። ወእሬስዮ ፡ ሳሐ ፡ ለበዓላቲክሙ ፡ ወይከውንክሙ ፡ ሰቆቃወ ፡ ኵሉ ፡ መኃልዪክሙ ፡ ወአቀንተክሙ ፡ ብልበሌ ፡ ውስተ ፡ ኀቌክሙ ፡ ወእወዲ ፡ ለክሙ ፡ ብርሐተ ፡ ውስተ ፡ ርእሰ ፡ ኵልክሙ ፡ ወእሬስየክሙ ፡ ከመ ፡ ላሐ ፡ ፍቁር ፡ ወእለሂ ፡ ምስሌሁ ፡ ይከውኑ ፡ ለዕለተ ፡ ሕማም ። እስመ ፡ ናሁ ፡ ይመጽእ ፡ መዋዕል ፡ ይቤ ፡ እግዚአብሔር ፡ ወእፌኑ ፡ ረኃበ ፡ ውስተ ፡ ብሔር ፡ ወአኮ ፡ ረኃበ ፡ እክል ፡ ወአኮ ፡ ጽምአ ፡ ማይ ፡ ረኃብ ፡ ዘእምሰሚዐ ፡ ቃለ ፡ እግዚአብሔር ። ወይትሐመግ ፡ ማየ ፡ ባሕር ፡ ወይረውጹ ፡ እምደቡብ ፡ እስከ ፡ ጽባሕ ፡ ወየኀሡ ፡ ቃለ ፡ እግዚአብሔር ፡ ወኢይረክቡ ። ይእተ ፡ አሚረ ፡ ይጠፍኣ ፡ ደናግል ፡ ላሕያት ፡ ወይጠፍኡ ፡ ወራዙት ፡ ሠናያን ፡ በጽምእ ። እለ ፡ ይምሕሉ ፡ በምሥሃለ ፡ ሰማርያ ፡ እለ ፡ ይብሉ ፡ ሕያው ፡ አምላክከ ፡ ዳን ፡ ወሕያው ፡ አምላክከ ፡ ቤርሳቤሕ ፡ ወይወድቁ ፡ ወኢይትነሥኡ ፡ እንከ ።