ዘአሞጽ ነቢይ 9

ርኢክዎ ፡ ለእግዚአብሔር ፡ ይቀውም ፡ ዲበ ፡ ምሥዋዕ ፡ ወይቤለኒ ፡ ዝብጥ ፡ ዲበ ፡ ምሥሃል ፡ ወያድለቀልቅ ፡ ዴዳያት ፡ እስመ ፡ እቀትሎሙ ፡ በኲናት ፡ ወይመትርዎሙ ፡ አርእስቲሆሙ ። ወአልቦ ፡ ዘያመስጥ ፡ እምእለ ፡ ተርፉ ፡ ወአልቦ ፡ ዘይድኅን ፡ እምኔሆሙ ። እመኒ ፡ ከረዩ ፡ ውስተ ፡ ቀላይ ፡ እምሂየኒ ፡ እዴየ ፡ ታወፅኦሙ ፡ ወእመኒ ፡ ዐረጉ ፡ ውስተ ፡ ሰማይ ፡ እምሂየኒ ፡ ኣጸድፎሙ ። ወእመኒ ፡ ተኀብኡ ፡ ውስተ ፡ ርእሰ ፡ ቀርሜሎስ ፡ በሂየኒ ፡ ኣሐሥሦሙ ፡ ወኣወፅኦሙ ፡ ወእመኒ ፡ ተሠጥሙ ፡ ውስተ ፡ ቀሳየ ፡ ባሕር ፡ እምቅድመ ፡ አዕይንቲየ ፡ በሂየኒ ፡ እኤዝዞ ፡ ለከይሲ ፡ ወይቀልጶሙ ። ወእመኒ ፡ ፄወውዎሙ ፡ ጸሮሙ ፡ እምቅድመ ፡ ገጽየ ፡ በሂየኒ ፡ እኤዝዝ ፡ ኲናተ ፡ ወይቀትሎሙ ፡ ወኣወትር ፡ አዕይንትየ ፡ ላዕሌሆሙ ፡ በእኩይ ፡ ወአኮ ፡ በሠናይ ። ወእግዚአብሔር ፡ አምላክ ፡ ዘኵሎ ፡ ይመልክ ፡ ዘይገሳ ፡ ለኵላ ፡ ምድር ፡ ወያንቀለቅላ ፡ ወይላሕዉ ፡ ኵሎሙ ፡ እለ ፡ ይነብርዋ ፡ ወይውሕዝ ፡ ከመ ፡ ፈለግ ፡ ቀትል ፡ ወይወርድ ፡ ከመ ፡ ፈለገ ፡ ግብጽ ። ዘየሐንጽ ፡ ውስተ ፡ ሰማይ ፡ ጽርሖ ፡ ወይሳርር ፡ ውስተ ፡ ምድር ፡ ትእዛዞ ። ዘይጼውዖ ፡ ለማየ ፡ ባሕር ፡ ወይክዕዎ ፡ ውስተ ፡ ገጸ ፡ ምድር ። እግዚአብሔር ፡ ዘኵሎ ፡ ይመልክ ፡ ስሙ ። ወአኮ ፡ ከመ ፡ ደቂቀ ፡ ኢትዮጵያ ፡ አንትሙ ፡ በኀቤየ ፡ ደቂቀ ፡ እስራኤል ፡ ይቤ ፡ እግዚአብሔር ። አከኑ ፡ እስራኤል ፡ ዘአውፃእክዎ ፡ እምግብጽ ፡ ወለኢሎፍሊ ፡ እምቀጰዶቅያ ፡ ወለሶርያሂ ፡ እምግብ ። ናሁ ፡ አዕይንቲሁ ፡ ለእግዚአብሔር ፡ ላዕለ ፡ መንግሥተ ፡ ኃጥኣን ። ወእስዕር ፡ እምገጸ ፡ ምድር ፡ ወባሕቱ ፡ ለግሙራ ፡ አኮ ፡ ዘኣጠፍኦ ፡ ለቤተ ፡ ያዕቆብ ፡ ይቤ ፡ እግዚአብሔር ። እስመ ፡ ናሁ ፡ አነ ፡ እኤዝዝ ፡ ወእዘርዎ ፡ ለቤተ ፡ እስራኤል ፡ ውስተ ፡ ኵሉ ፡ አሕዛብ ። ወይከውኑ ፡ በከመ ፡ ያንቀለቅል ፡ ሥርናይ ፡ ውስተ ፡ መንፌ ፡ ወይወድቅ ፡ ኆጻ ፡ ዲበ ፡ ምድር ። ወይመውቱ ፡ በኲናት ፡ ኃጥኣነ ፡ ሕዝብየ ፡ እለ ፡ ይብሉ ፡ ኢትበጽሐነ ፡ ወኢትረክበነ ፡ እኪይት ። ይእተ ፡ አሚረ ፡ ኣሐንጻ ፡ ለቤተ ፡ ዳዊት ፡ እንተ ፡ ወድቀት ፡ ወኣነሥኣ ፡ ወእነድቃ ፡ መዝብራ ፡ ከመ ፡ መዋዕሎሙ ። ከመ ፡ ይኅሥሥዎ ፡ እለ ፡ ተርፉ ፡ ሕዝብ ፡ እለ ፡ ዲቤሆሙ ፡ ተሰምየ ፡ ስምየ ፡ ይቤ ፡ እግዚአብሔር ፡ ዘገብረ ፡ ዘንተ ። ናሁ ፡ መዋዕል ፡ ይመጽእ ፡ ይቤ ፡ እግዚአብሔር ፡ ወየኀብር ፡ ቀሥም ፡ ምስለ ፡ ማእረር ፡ ወይትረከብ ፡ ሠርጽ ፡ ምስለ ፡ ዘርእ ፡ ወያንፀፈዕፍ ፡ መዐር ፡ እምአድባር ፡ ወያሕመለምል ፡ አውግር ። ወእመይጥ ፡ ፄዋ ፡ ሕዝብየ ፡ እስራኤል ፡ ወየሐንጹ ፡ አህጉረ ፡ ዘማሰነ ፡ ወይነብሩ ። ወይተክሉ ፡ ወይነ ፡ ወይሰትዬ ፡ ወይኖሙ ፡ ወይተክሉ ፡ ዐጸደ ፡ አቅማሕ ፡ ወይበልዑ ፡ ፍሬሁ ። ወእተክሎሙ ፡ ወአልቦ ፡ እንከ ፡ ዘያጠፍኦሙ ፡ እምድሮሙ ፡ እንተ ፡ ወሀብክዎሙ ፡ ይቤ ፡ እግዚአብሔር ፡ አምላክ ፡ ዘኵሉ ፡ ይመልክ ። ተፈጸመ ፡ ዘአሞጽ ፡ ነቢይ ።