ዘአሞጽ ነቢይ 7

ከመዝ ፡ አርአየኒ ፡ እግዚአብሔር ፡ ወናሁ ፡ ይመጽእ ፡ አንበጣ ፡ በጽባሕ ፡ ወአሐዱ ፡ ደጎብያ ፡ ጎግ ፡ ንጉሥ ። ወይበልዕ ፡ ኵሎ ፡ ሣዕረ ፡ ምድር ፡ ወየኀልቅ ፡ ወእቤ ፡ ተሣሀል ፡ እግዚአብሔር ፡ መኑ ፡ ያነሥኦ ፡ ለያዕቆብ ፡ እስመ ፡ ውሕደ ፡ ውእቱ ። ወነሥሐ ፡ እግዚአብሔር ፡ በእንተ ፡ ዝንቱ ፡ ወዝኒ ፡ ኢያመጽእ ፡ ይቤ ፡ እግዚአብሔር ። ከመዝ ፡ አርአየኒ ፡ እግዚአብሔር ፡ ወናሁ ፡ ጸውዐ ፡ እግዚአብሔር ፡ በቃሉ ፡ እሳተ ፡ ወበልዐት ፡ ዐቢየ ፡ ቀላየ ፡ ወበልዐት ፡ መክፈልቶሙ ። ወእቤ ፡ አነ ፡ እብለከ ፡ እግዚኦ ፡ ኅድግ ፡ መኑ ፡ ያነሥኦ ፡ ለያዕቆብ ፡ እስመ ፡ ውሕደ ፡ ውእቱ ። ወንሥሐ ፡ እግዚአብሔር ፡ በበይነ ፡ ዝንቱ ። ወዝኒ ፡ ኢያመጽእ ፡ ይቤ ፡ እግዚአብሔር ። ወከመዝ ፡ አርአየኒ ፡ እግዚአብሔር ፡ ወናሁ ፡ ብእሲ ፡ ይቀውም ፡ ዲበ ፡ አረፍተ ፡ አድማስ ፡ ወውስተ ፡ እዴሁ ፡ አድማስ ። ወይቤለኒ ፡ እግዚአብሔር ፡ ምንተ ፡ ትሬኢ ፡ አሞጽ ። ወእቤ ፡ አድማሰ ። ወይቤ ፡ እግዚአብሔር ፡ ናሁ ፡ አነ ፡ እኤዝዝ ፡ አድማሰ ፡ ማእከለ ፡ ሕዝብየ ፡ እስራኤል ፡ ወኢይደግም ፡ እንከ ፡ አናሕስዮ ፡ ሎሙ ። ወይማስኑ ፡ አውግረ ፡ ዘውዑ ፡ ወይጠፍኡ ፡ ኄራቶሙ ፡ ለእስራኤል ፡ ወእትነሣእ ፡ በኲናት ፡ ላዕለ ፡ ቤተ ፡ ኢዮርብንም ። ወለአከ ፡ አምአስያስ ፡ ካህነ ፡ ቤቴል ፡ ኀበ ፡ ኢዮርብዓም ፡ ንጉሠ ፡ እስራኤል ፡ እንዘ ፡ ይብል ፡ ማዕሌተ ፡ ይገብር ፡ ላዕሌከ ፡ አሞጽ ፡ በማእከለ ፡ ቤተ ፡ እስራኤል ፡ ወምድርኒ ፡ ኢትክል ፡ ጸዊሮቶ ፡ ለኵሉ ፡ ዘይነብብ ። ወይቤልኬ ፡ አሞጽ ፡ በኲናትአ ፡ ይመውትአ ፡ ኢዮርብዓምአ ፡ ወእስራኤልአ ፡ ይጼወዉአ ፡ እምብሕሮሙአ ። ወይቤሎ ፡ አምአስያስ ፡ ለአሞጽ ፡ ሖር ፡ ፍልስ ፡ ብሔረ ፡ ይሁዳ ፡ ወንበር ፡ ሂየ ፡ ወበህየ ፡ ተነበይ ። ወኢትትንበይ ፡ እንከ ፡ በቤቴል ፡ እስመ ፡ ምሕራመ ፡ ነገሥት ፡ ይእቲ ፡ ወቤተ ፡ መንግሥት ፡ ይእቲ ። ወተሰጥዎ ፡ አሞጽ ፡ ለአምአስያስ ፡ ወይቤሎ ፡ አንሰ ፡ ኢኮንኩ ፡ ነቢየ ፡ ወኢኮንኩ ፡ ወልደ ፡ ነቢይ ፡ አላ ፡ ኖላዌ ፡ አንስ ፡ ሠያጤ ፡ በለስ ፡ አነ ። ወነሥአኒ ፡ እግዚአብሔር ፡ እማእከለ ፡ አባግዕ ፡ ወይቤለኒ ፡ እግዚአብሔር ፡ ተነበይ ፡ ላዕለ ፡ ሕዝብየ ፡ እስራኤል ። ወይእዚኒ ፡ ስማዕ ፡ ቃለ ፡ እግዚአብሔር ፡ አንተ ፡ ትቤ ፡ ኢትትንበይ ፡ ላዕለ ፡ ቤተ ፡ እስራኤል ፡ ወኢታንጥዮሙ ፡ ለቤተ ፡ ያዕቆብ ። በእንተ ፡ ዝንቱ ፡ ከመዝ ፡ ይቤ ፡ እግዚአብሔር ፡ ብእሲትከኒ ፡ ትዜሙ ፡ በሀገር ፡ ወደቂቅከኒ ፡ ወአዋልዲከ ፡ ይወድቁ ፡ በኲናት ፡ ወይሰፍርዋ ፡ ለምድርከ ፡ በኀብል ፡ ወአንተኒ ፡ ትመውት ፡ በምድር ፡ ርኩስ ፡ ወይጼውውዎ ፡ ለእስራኤል ፡ እምነ ፡ ምድሩ ።