መጽሐፈ ነገሥት ፩ 11

1 ወእምዝ ፡ እምድኅረ ፡ አሐዱ ፡ ወርኅ ፡ ዐርገ ፡ ናአስ ፡ ዐሞናዊ ፡ ወተዐየነ ፡ ኀበ ፡ ኢያቢስ ፡ ዘገለዓድ ፡ ወይቤልዎ ፡ ኵሉ ፡ ሰብአ ፡ ገለዓድ ፡ ለናአስ ፡ ዐሞናዊ ፡ ተማሐል ፡ ምስሌነ ፡ ወንትቀነይ ፡ ለከ ። 2 ወይቤሎሙ ፡ ናአስ ፡ ዐሞናዊ ፡ ለእመ ፡ አውጻእክሙ ፡ ዐይነክሙ ፡ እንተ ፡ የማን ፡ እትማሐል ፡ ምስሌክሙ ፡ ከመ ፡ እግበር ፡ ጽእለተ ፡ ላዕለ ፡ እስራኤል ። 3 ወይቤልዎ ፡ ሰብአ ፡ ኢያቢስ ፡ ተዐገሠነ ፡ ሰቡዐ ፡ ዕለታት ፡ ወንልእከ ፡ ሐዋርያት ፡ ውስተ ፡ ኵሉ ፡ እስራኤል ፡ ወውስተ ፡ ደወሎሙ ፡ ወለእመ ፡ አልቦ ፡ ዘያድኅነነ ፡ ንገብእ ፡ ኀቤክሙ ። 4 ወበጽሑ ፡ እልክቱ ፡ ሐዋርያት ፡ ውስተ ፡ ገባኦን ፡ ኀበ ፡ ሳኦል ፡ ወነገርዎሙ ፡ ዘንተ ፡ ነገረ ፡ ለሕዝብ ፡ ወጸርሑ ፡ ኵሉ ፡ ሕዝብ ፡ በቃሉ ፡ ወበከዩ ። 5 ወእምዝ ፡ ነዋ ፡ ሳኦል ፡ የአቱ ፡ እምነ ፡ ሐቅል ፡ በጽባሕ ፡ ወይቤ ፡ ሳኦል ፡ ምንት ፡ ያበክዮሙ ፡ ለሕዝብ ፡ ወአይድዕዎ ፡ ነገሮሙ ፡ ለሰብአ ፡ ኢያቢስ ። 6 ወመጽአ ፡ መንፈሰ ፡ እግዚአብሔር ፡ ላዕለ ፡ ሳኦል ፡ ሶበ ፡ ሰምዐ ፡ ዘንተ ፡ ነገረ ፡ ወተምዐ ፡ መዐተ ፡ ላዕሌሆሙ ፡ ወተቈጥዐ ፡ ጥቀ ። 7 ወነሥአ ፡ ክልኤተ ፡ አልህምተ ፡ ወመተሮሙ ፡ በበ ፡ መለያልዪሆሙ ፡ ወፈነወ ፡ ምስለ ፡ ሐዋርያት ፡ ውስተ ፡ ኵሉ ፡ ደወለ ፡ እስራኤል ፡ እንዘ ፡ ይብል ፡ ዘኢወፅአአ ፡ ወኢተለዎሙአ ፡ ለሳኦልአ ፡ ወለሳሙኤልአ ፡ ከመዝአ ፡ ይረስይዎአ ፡ (ለመራዕዪሁአ ፡ ወ)ለእልህምቲሁአ ፡ ወመጽአ ፡ ኀይለ ፡ እግዚአብሔር ፡ ላዕለ ፡ ሕዝበ ፡ እስራኤል ፡ ወወውዑ ፡ ከመ ፡ አሐዱ ፡ ብእሲ ፡ ኅቡረ ። 8 ወኈለቆሙ ፡ በባማ ፡ ለኵሉ ፡ ሰብአ ፡ እስራኤል ፡ ወኮኑ ፡ ፷፼ ፡ ወሰብአ ፡ ይሁዳ ፡ ፫፼ ። 9 ወይቤሎሙ ፡ ለሐዋርያት ፡ ለእለ ፡ መጽኡ ፡ ከመዝ ፡ በልዎሙ ፡ ለሰብአ ፡ ኢያቢስ ፡ ጌሠመአ ፡ ትከውንአ ፡ መድኀኒትክሙአ ፡ ሶበ ፡ ሞቀአ ፡ ፀሓይአ ፤ ወበጽሑ ፡ እልክቱ ፡ ሐዋርያት ፡ ውስተ ፡ ሀገር ፡ ወዜነውዎሙ ፡ ለሰብአ ፡ ኢያቢስ ፡ ወተፈሥሑ ። 10 ወይቤልዎ ፡ ሰብአ ፡ ኢያቢስ ፡ ለናአስ ፡ ጌሠመ ፡ ንወጽእ ፡ ኀቤክሙ ፡ ወረስዩነ ፡ ዘከመ ፡ ትፈትዱ ። 11 ወእምዝ ፡ በሳኒታ ፡ ረስዮሙ ፡ ሳኦል ፡ ለሕዝብ ፡ ሠለስተ ፡ ሠራዊተ ፡ ወቦኡ ፡ ማእከለ ፡ ትዕይንቶሙ ፡ በጊዜ ፡ ጽባሕ ፡ ወቀተልዎሙ ፡ ለደቂቀ ፡ ዐሞን ፡ እስከ ፡ ቀትረ ፡ መዓልት ፡ ወእምዝ ፡ እለ ፡ ተርፉ ፡ ተዘርዉ ፡ ወኢተረክቡ ፡ እምውስቴቶሙ ፡ ክልኤቱ ፡ ኅቡረ ፡ ውስተ ፡ አሐዱ ፡ መካን ። 12 ወይቤልዎ ፡ ሕዝብ ፡ ለሳኦል ፡ መኑ ፡ እሉ ፡ እለ ፡ ይብሉ ፡ ኢይንግሥ ፡ ለነ ፡ ሳኦል ፤ አምጽእዎሙ ፡ ለነ ፡ ለእሙንቱ ፡ ዕደው ፡ ወንቅትሎሙ ። 13 ወይቤሎሙ ፡ ሳኦል ፡ አልቦ ፡ ዘይመውት ፡ ዮምሰ ፡ ወኢመኑሂ ፡ በዛቲ ፡ ዕለት ፡ እስመ ፡ ገብረ ፡ ሕይወተ ፡ ለእስራኤል ። 14 ወይቤሎሙ ፡ ሳሙኤል ፡ ለሕዝብ ፡ ንዑ ፡ ንሖር ፡ ውስተ ፡ ገልገላ ፡ ወበህየ ፡ ነሐድስ ፡ መንግሥቶ ። 15 ወሖሩ ፡ ኵሉ ፡ ሕዝብ ፡ ውስተ ፡ ገልገላ ፡ ወቀብኦ ፡ ሳሙኤል ፡ ለሳኦል ፡ ወአንገሦ ፡ በቅድመ ፡ እግዚአብሔር ፡ በገልገላ ፡ ወሦዐ ፡ በህየ ፡ ወአብእ ፡ ዘሰላም ፡ ቅድመ ፡ እግዚአብሔር ፡ ወተፈሥሑ ፡ ሳሙኤል ፡ ወኵሉ ፡ ሕዝብ ፡ ፍጹመ ።