መጽሐፈ ነገሥት ፩ 10

1 ወነሥአ ፡ ሳሙኤል ፡ ቀርነ ፡ ቅብእ ፡ ወሶጠ ፡ ላዕለ ፡ ርእሱ ፡ ወሰአሞ ፡ ወይቤሎ ፡ ቀብአከ ፡ እግዚአብሔር ፡ ትንግሥ ፡ ላዕለ ፡ ሕዝቡ ፡ ላዕለ ፡ እስራኤል ፡ ወአንተ ፡ ትኴንኖሙ ፡ ለሕዝበ ፡ እግዚአብሔር ፡ ወአንተ ፡ ታድኅኖሙ ፡ እምእደ ፡ ፀሮሙ ፡ እለ ፡ ዐውዶሙ ፡ ወዝንቱ ፡ ውእቱ ፡ ተኣምሪከ ፡ ከመ ፡ ቀብአከ ፡ እግዚአብሔር ፡ ትንግሥ ፡ ሳዕለ ፡ ርስቱ ። 2 ሶበ ፡ ሖርከ ፡ ዮም ፡ እምኀቤየ ፡ ወትረክብ ፡ አንተ ፡ ክልኤተ ፡ ዕደወ ፡ ኀበ ፡ ደወለ ፡ ቤቴል ፡ ውስተ ፡ ደብረ ፡ ብንያም ፡ እንዘ ፡ ይሜርዱ ፡ ወይብሉከ ፡ ተረክቡ ፡ አእዱጊክሙ ፡ ዘሖርክሙ ፡ ትኅሥሡ ፡ ወለአቡከሰ ፡ ኀደጎ ፡ ትካዘ ፡ አእዱግ ፡ ወይቴከዝ ፡ በእንቲአክሙ ፡ ወይብል ፡ ምንተ ፡ እሬሲ ፡ በእንተ ፡ ወልድየ ። 3 ወኀሊፈከ ፡ እምህየ ፡ ሶበ ፡ በጻሕከ ፡ ኀበ ፡ ዕፅ ፡ ነዋኅ ፡ ትረክብ ፡ በህየ ፡ ሠለስተ ፡ ዕደወ ፡ እንዘ ፡ የዐርጉ ፡ ኀበ ፡ እግዚአብሔር ፡ ውስተ ፡ ቤቴል ፡ አሐዱ ፡ ይነድእ ፡ ሠለስተ ፡ አጣሌ ፡ ወአሐዱ ፡ ይጸውር ፡ ሠለስተ ፡ መሳንቀ ፡ ኅብስት ፡ ወአሐዱ ፡ ይጸውር ፡ ዝቅ ፡ ወይን ። 4 ወይዜንዉከ ፡ ዳኅና ፡ ብሔር ፡ ወይሁቡከ ፡ ክልኤተ ፡ ቀዳምያተ ፡ ኅብስት ፡ ወትነሥእ ፡ እምኔሆሙ ። 5 ወእምድኅረ ፡ ዝንቱ ፡ ትበውእ ፡ ውስተ ፡ ደብረ ፡ እግዚአብሔር ፡ ኀበ ፡ ሀሎ ፡ ህየ ፡ ምንግላጊሆሙ ፡ ለኢሎፍሊ ፡ ወህየ ፡ ሀሎ ፡ ናሴብ ፡ ኢሎፍላዊ ፡ ወእምዝ ፡ ሶበ ፡ ቦእክሙ ፡ ህየ ፡ ውስተ ፡ ሀገር ፡ ትረክቡ ፡ መዝሙረ ፡ ነቢያት ፡ እንዘ ፡ ይወርዱ ፡ እምነ ፡ ባማ ፡ ወቅድሜሆሙ ፡ ማኅሌት ፡ ወከበሮ ፡ ወዕንዚራ ፡ ወመሰንቆ ፡ [ወናሁ ፡ ይትኔበዩ ።] 6 ወእንዘ ፡ እሙንቱ ፡ ከመዝ ፡ ይመጽእ ፡ ላዕሌከ ፡ መንፈሰ ፡ እግዚአብሔር ፡ ወትትኔበይ ፡ ምስሌሆሙ ፡ ወትትመየጥ ፡ ወትከውን ፡ ካልአ ፡ ብእሴ ። 7 ወእምዝ ፡ ሶበ ፡ በጽሐከ ፡ ኵሉ ፡ ዝንቱ ፡ ተኣምር ፡ ግበር ፡ እንከ ፡ መጠነ ፡ ትክል ፡ እዴከ ፡ እስመ ፡ እግዚአብሔር ፡ ምስሌከ ። 8 ወትወርድ ፡ ቅድመ ፡ ገልገላ ፡ ወናሁ ፡ እወርድ ፡ ኀቤከ ፡ ከመ ፡ ኣዕርግ ፡ መሥዋዕተ ፡ ወቍርባነ ፡ ሰላም ፤ ሰቡዕ ፡ መዋዕል ፡ የኀልፍ ፡ እስከ ፡ እመጽእ ፡ ኀቤከ ፡ ወኣየድዐከ ፡ ዘከመ ፡ ትገብር ። 9 ወእምዝ ፡ እምድኅረ ፡ ሜጠ ፡ ዘባኖ ፡ ከመ ፡ ይሖር ፡ እምኀበ ፡ ሳሙኤል ፡ ወወለጠ ፡ እግዚአብሔር ፡ ካልአ ፡ ልቦ ፡ ወወደየ ፡ ሎቱ ፡ ወረከበ ፡ ኵሎ ፡ ዝኩ ፡ ተኣምረ ፡ በይእቲ ፡ ዕለት ። 10 ወበጽሐ ፡ እምህየ ፡ ውስተ ፡ ወግር ፡ ወረከበ ፡ መዝሙረ ፡ ነቢያት ፡ ቅድሜሁ ፡ ወመጽአ ፡ ላዕሌሁ ፡ መንፈሰ ፡ እግዚአብሔር ፡ ወተነበየ ፡ በማእከሎሙ ። 11 ወእምዝ ፡ ሶበ ፡ ርእይዎ ፡ ኵሎሙ ፡ እለ ፡ ያአምርዎ ፡ ትካት ፡ በማእከለ ፡ ነቢያት ፡ ተባሀሉ ፡ ኵሎሙ ፡ ሕዝብ ፡ በበይናቲሆሙ ፡ ምንትኑ ፡ ዝንቱ ፡ ዘኮነ ፡ ላዕለ ፡ ወልደ ፡ ቂስ ፤ ሳኦልሂ ፡ ውስተ ፡ ነቢያትኑ ። 12 ወተሠጥወ ፡ አሐዱ ፡ እምኔሆሙ ፡ ወይቤ ፡ መኑ ፡ አቡሁ ፡ አኮኑ ፡ ቂስ ፤ በበይነ ፡ ዝንቱ ፡ ኮነ ፡ አምሳል ፡ ወይቤሉ ፡ ሳኦልኒ ፡ ውስተ ፡ ነቢያትኑ ። 13 ወፈጺሞ ፡ ተነቢዮ ፡ ሖረ ፡ ውስተ ፡ ወግር ። 14 ወይቤሎ ፡ አሐዱ ፡ እምነ ፡ ሰብአ ፡ ቤቱ ፡ ሎቱ ፡ ወለቍልዒሁ ፡ አይቴ ፡ ሖርክሙ ፡ ወይቤልዎ ፡ ንኅሥሥ ፡ አእዱጊነ ፡ ወሶበ ፡ ኢረከብናሆሙ ፡ ሖርነ ፡ ኀበ ፡ ሳሙኤል ። 15 ወይቤሎ ፡ ዝክቱ ፡ ወልደ ፡ ቤቱ ፡ ምንተ ፡ ይቤለክሙ ፡ ሳሙኤል ፡ ንግረኒ ። 16 ወይቤሎ ፡ ሳኦል ፡ ለወልደ ፡ ቤቱ ፡ ዜነወነ ፡ ወአይድዐነ ፡ ከመ ፡ ተረክቡ ፡ አእዱጊነ ፡ ወበበይነ ፡ ነገረ ፡ መንግሥትስ ፡ ኢዜነዎ ። 17 ወአዘዞሙ ፡ ሳሙኤል ፡ ለኵሉ ፡ ሕዝብ ፡ ይጊሡ ፡ ኀበ ፡ እግዚአብሔር ፡ ውስተ ፡ መሴፋ ። 18 ወይቤሎሙ ፡ ለደቂቀ ፡ እስራኤል ፡ ከመዝ ፡ ይቤ ፡ እግዚአብሔር ፡ አምላከ ፡ እስራኤል ፡ አነ ፡ አውጻእክዎሙ ፡ ለእስራኤል ፡ እምድረ ፡ ግብጽ ፡ ወእምኵሎ ፡ መንግሥታት ፡ እለ ፡ ይሣቅዩክሙአ ። 19 ወዮምሰ ፡ መነንክምዎ ፡ ለእግዚአብሔርአ ፡ አንትሙ ፡ ዘኮነክሙ ፡ መድኀኒክሙ ፡ እምነ ፡ ኵሉ ፡ እሊትክሙ ፡ ወምንዳቤክሙአ ፡ ወትቤሉ ፡ አልቦ ፤ ዳእሙ ፡ አንግሥ ፡ ለነ ፡ ንጉሠአ ፤ ወይእዜኒአ ፡ ቁሙ ፡ ቅድሜሁ ፡ ለእግዚአብሔርአ ፡ በበ ፡ በትርክሙአ ፡ ወበበሕዝብክሙአ ። 20 ወአብአ ፡ ሳሙኤል ፡ ኵሎ ፡ አብትሪሆሙ ፡ ወበጽሐ ፡ ላዕለ ፡ በትረ ፡ ብንያም ። 21 ወአቀሞሙ ፡ በበነገዶሙ ፡ ወበጽሐ ፡ ላዕለ ፡ ነገደ ፡ መጣር ፡ ወአቀሞሙ ፡ ለነገደ ፡ መጣር ፡ በበብእሲሁ ፡ ወበጽሐ ፡ ላዕለ ፡ ሳኦል ፡ ወልደ ፡ ቂስ ፡ ወኀሠሦ ፡ ወኢረከቦ ። 22 ወተስእሎ ፡ ሳሙኤል ፡ ለእግዚአብሔር ፡ ለእመ ፡ ይመጽእ ፡ ውእቱ ፡ ብእሲ ፡ ህየ ፡ ወይቤሎ ፡ እግዚአብሔር ፡ ነዋ ፡ ኀበ ፡ ሀሎ ፡ ይትኀበእ ፡ ማእከለ ፡ ንዋይ ። 23 ወሖረ ፡ ወአምጽኦ ፡ እምህየ ፡ ወአቀሞ ፡ ማእከለ ፡ ሕዝብ ፡ ወኖኀ ፡ እምኵሉ ፡ ሕዝብ ፡ ወኮኑ ፡ ታሕተ ፡ መትከፍቱ ። 24 ወይቤሎሙ ፡ ሳሙኤል ፡ ለሕዝብ ፡ ናሁ ፡ ርእዩ ፡ ዘኀረዮ ፡ እግዚአብሔር ፡ ዘአልቦ ፡ ዘይመስሎ ፡ በውስተ ፡ ኵልክሙ ፡ ወአእመሩ ፡ ኵሉ ፡ ሕዝብ ፡ ወይቤሉ ፡ ሕየው ፡ አበ ፡ ነገሢ ። 25 ወነገሮሙ ፡ ሳሙኤልኵነኔሁ ፡ ለውእቱ ፡ ንጉሥ ፡ ወጸሐፎ ፡ ውስተ ፡ መጽሐፍ ፡ ወአንበሮ ፡ ቅድመ ፡ እግዚአብሔር ፤ ወፈነዎሙ ፡ ሳሙኤል ፡ ለኵሉ ፡ ሕዝብ ፡ ወአተዉ ፡ ኵሎሙ ፡ ውስተ ፡ እብያቲሆሙ ። 26 ወሳኦልኒ ፡ አተወ ፡ ውስተ ፡ ቤቱ ፡ ገባኦን ፡ ወሖሩ ፡ ደቂቀ ፡ ኀይል ፡ እለ ፡ ገሰሶሙ ፡ ልቦሙ ፡ እግዚአብሔር ፡ ምስለ ፡ ሳኦል ። 27 ወ[ደቂቅሰ ፡ ኃጥአን ፡] ይቤሉ ፡ መኑ ፡ ውእቱ ፡ ዝንቱ ፡ ከመ ፡ ያድኅነነ ፡ ወአስተሐቀርዎ ፡ ወኢያምጽኡ ፡ ሎቱ ፡ አምኃሁ ።