መጽሐፈ ኩፋሌ 7

7 1 ወበሱባዔ ፡ ሳብዕ ፡ በቀዳሚ ፡ ዓመቱ ፡ ሎቱ ፡ በዝ ፡ ኢዮቤልዉ ፡ ተከለ ፡ ኖኅ ፡ ወይነ ፡ ኀበ ፡ ደብር ፡ እንተ ፡ ዲቤሁ ፡ አዕረፈት ፡ ታቦት ፡ ዘስሙ ፡ ሉባር ፡ እምአድባረ ፡ አራራት ፡ ወገብረ ፡ ፍሬ ፡ በራብዕ ፡ ዓመት ፡ ወዐቀበ ፡ ፍሬሁ ፡ ወቀሰሞ ፡ በውእቱ ፡ ዓመት ፡ በወርኅ ፡ ሳብዕ ፡ 2 ወገብረ ፡ እምውስቴቱ ፡ ወይነ ፡ ወወደዩ ፡ ውስተ ፡ ንዋይ ፡ ወዐቀቦ ፡ እስከ ፡ ዓመት ፡ ኃምስቱ ፡ እስከ ፡ ዕለት ፡ ቀዳሚት ፡ በሠርቀ ፡ ወርኅ ፡ ቀዳሚት ፡ 3 ወገብረ ፡ ዕለተ ፡ ዛቲ ፡ በዓል ፡ በፍሥሐ ። ወገብረ ፡ ጽንሐሐ ፡ ለእግዚአብሔር ፡ ጣዕዋ ፡ እምአልህምት ፡ አሐደ ፡ ወበሐኰ ፡ አሐደ ፡ ወአባግዐ ፡ ዘዘ ፡ ዓመት ፡ ሰብዐተ ፡ ወመሐስአ ፡ ጠሊ ፡ አሐደ ፡ ከመ ፡ ያስተስሪ ፡ ቦቱ ፡ ለርእሱ ፡ ወበእንተ ፡ ውሉዱ ፡ 4 ወገብረ ፡ ማሕስአ ፡ ቅድመ ፡ ወአንበረ ፡ እምነ ፡ ደሙ ፡ ዲበ ፡ ሥጋ ፡ ዘምሥዋዕ ፡ ዘገብረ ፡ ወኵሎ ፡ ስብሐ ፡ አዕረገ ፡ ውስተ ፡ ምሥዋዕ ፡ ዘኀበ ፡ ገብረ ፡ ጽንሐሐ ፡ ወላህመ ፡ ወበሐኰ ፡ ወአባግዐ ። ወአዕረገ ፡ ኵሎ ፡ ሥጋሆሙ ፡ ዲበ ፡ ምሥዋዕ ፡ 5 ወአንበረ ፡ ኵሎ ፡ መሥዋዕቶሙ ፡ ልዉሰ ፡ በቅብእ ፡ ላዕሌሁ ፡ ወእምዝ ፡ ነዝኀ ፡ ወይነ ፡ ውስተ ፡ እሳት ፡ ዘዲበ ፡ ምሥዋዕ ፡ አቅደመ ፡ ወአንበረ ፡ ስሒነ ፡ ዲበ ፡ ምሥዋዕ ፡ ወአዕረገ ፡ መዓዛ ፡ ሠናየ ፡ ዘይሠምር ፡ ቅድመ ፡ እግዚአብሔር ፡ አምላኩ ። 6 ወተፈሥሐ ፡ ወሰትየ ፡ እምዝ ፡ ወይን ፡ ውእቱ ፡ ወውሉዱ ፡ በፍሥሓ ። 7 ወኮነ ፡ ምሴተ ፡ ወቦአ ፡ ውስተ ፡ ሰቀላሁ ፡ ወሰከበ ፡ ስኩሩ ፡ ወኖመ ፡ ወተከሥተ ፡ በውስተ ፡ ሰቀላሁ ፡ እንዘ ፡ ይነውም ። 8 ወርእዮ ፡ ካም ፡ ለኖኅ ፡ አቡሁ ፡ ዕራቆ ። ወወፅአ ፡ ወነገረ ፡ ለክልኤ ፡ አኃዊሁ ፡ በአፍአ ፡ 9 ወነሥአ ፡ ሴም ፡ ልብሰ ፡ ወተንሥአ ፡ ውእቱ ፡ ወያፌት ፡ ወአንበሩ ፡ ልብሰ ፡ ዲበ ፡ መታክፍቲሆሙ ፡ ወገጾሙ ፡ ድኅሪተ ፡ ወከደኑ ፡ ኃፍረተ ፡ አቡሆሙ ፡ ወገጾሙ ፡ ድኅሪተ ። 10 ወነቅሀ ፡ ኖኅ ፡ እምንዋሙ ፡ ወአእመረ ፡ ኵሎ ፡ ዘገብረ ፡ ላዕሌሁ ፡ ወልዱ ፡ ዘይንእስ ፡ ወረገሞ ፡ ለወልዱ ፡ ወይቤ ፡ ርጉም ፡ ከናአን ፡ ቅኑየ ፡ ገብረ ፡ ይኩን ፡ ለአኃዊሁ ። 11 ወባረኮ ፡ ለሴም ፡ ወይቤ ፡ ይትባረክ ፡ እግዚአብሔር ፡ አምላኩ ፡ ለሴም ። ወይኩን ፡ ከናአን ፡ ገብሮ ፡ 12 ያስፍሕ ፡ እግዚአብሔር ፡ ለያፌት ፡ ወይኅድር ፡ እግዚአብሔር ፡ ውስተ ፡ ማኅደረ ፡ ሴም ፡ ወይኩን ፡ ከናአን ፡ ገብሮሙ ። 13 ወአእመረ ፡ ካም ፡ ከመ ፡ ረገሞ ፡ አቡሁ ፡ ለወልዱ ፡ ዘይንእስ ፡ ወሕሡም ፡ ሎቱ ፡ እስመ ፡ ረገሞ ፡ ለወልዱ ። ወተፈልጠ ፡ እምአቡሁ ፡ ውእቱ ፡ ወውሉዱ ፡ ምስሌሁ ፡ ኵስ ፡ ወምስጥሬም ፡ ወፉድ ፡ ወከናአን ፡ 14 ወሐነጸ ፡ ሎቱ ፡ ውእቱሂ ፡ ሀገረ ፡ ወጸውዐ ፡ ስማ ፡ በስመ ፡ ብእሲቱ ፡ ኔኤላተማኡክ ። 15 ወርእየ ፡ ያፌት ፡ ወቀንአ ፡ ለእኁሁ ። ወሐነጸ ፡ ሎቱ ፡ ውእቱሂ ፡ ሀገረ ፡ ወጸውዓ ፡ በስመ ፡ ብእሲቱ ፡ አደታኔሴስ ። 16 ወሴምሰ ፡ ነበረ ፡ ምስለ ፡ አቡሁ ፡ ኖኅ ፡ ወሐነጸ ፡ ሀገረ ፡ በእደ ፡ አቡሁ ፡ ኀበ ፡ ደብር ፡ ወጸውዐ ፡ ስማ ፡ ውእቱሂ ፡ በስመ ፡ ብእሲቱ ፡ ሴዴቃቴልባብ ፡ 17 ናሁ ፡ አህጉር ፡ እላንቱ ፡ ሠላስ ፡ ቅሩበ ፡ ሉባር ፡ ደብር ፡ ሴዴቃቴልባብ ፡ ቅድመ ፡ ገጸ ፡ ደብር ፡ በጽባሒሁ ፡ ወናኤልታ ፡ ማኡክ ፡ ገጸ ፡ ሰሜኑ ፡ አዳተኔሴስ ፡ መንገለ ፡ ባሕር ። 18 ወእሉ ፡ ውሉደ ፡ ሴም ፡ ኤላም ፡ ወአሱር ፡ ወአርፋክስድ ። ዝንቱ ፡ ትውልድ ፡ እምድኅረ ፡ ክልኤ ፡ ዓም ፡ ዘአይኅ ፡ አራም ፡ ውሉድ ፡ 19 ውሉደ ፡ ያፌት ፡ ጎሜር ፡ ወማጉግ ፡ ወማዳይ ፡ ወኢዩአያቶቤል ፡ ምስክ ፡ ወቲራስ ፡ እሉ ፡ ውሉደ ፡ ኖኅ ። 20 ወበዕሥራ ፡ ወሰማኒቱ ፡ ኢዮቤልዉሳት ፡ አኀዘ ፡ ኖኅ ፡ የአዝዝ ፡ ለውሉደ ፡ ውሉዱ ፡ ሥርዓተ ፡ ወትእዛዛተ ፡ ኵሎ ፡ ዘያአምር ፡ ፍትሐ ፡ ወአስምዐ ፡ ላዕለ ፡ ውሉዱ ፡ ከመ ፡ ይግበሩ ፡ ጽድቀ ፡ ወከመ ፡ ይክድኑ ፡ ኃፍረተ ፡ ሥጋሆሙ ፡ ወከመ ፡ ይባርክዎ ፡ ለዘ ፡ ፈጠሮሙ ፡ ወያክብሩ ፡ አበ ፡ ወእመ ፡ ወያፍቅሩ ፡ አሐዱ ፡ አሐዱ ፡ ቢጾ ፡ ወይዕቀቡ ፡ ነፍሶሙ ፡ እምዝሙት ፡ ወትኵስ ፡ ወእምኵሉ ፡ ዐመፃ ። 21 እስመ ፡ በእንተ ፡ ዝንቱ ፡ ሠለስቱ ፡ ኮነ ፡ አይኅ ፡ ላዕለ ፡ ምድር ፡ እስመ ፡ በእንተ ፡ ዝሙት ፡ ዘዘመዉ ፡ ትጉሃን ፡ እምትእዛዘ ፡ ኵነኔሆሙ ፡ በድኅረ ፡ አዋልደ ፡ ሰብእ ፡ ወነሥኡ ፡ ሎሙ ፡ አንስተ ፡ እምኵሉ ፡ እለ ፡ ኀረዩ ፡ ገብሩ ፡ መቅድመ ፡ ርኵስ ፡ 22 ወወለዱ ፡ ውሉደ ፡ ናፊዲም ፡ ወኵሎሙ ፡ ኢይትማሰሉ ። ወይበልዕ ፡ አሐዱ ፡ አሐዱ ፡ ካልኦ ። ወቀተሎ ፡ ያርብሕ ፡ ለናፊል ፡ ወናፊል ፡ ቀተሎ ፡ ለኤልዮ ፡ ወኤልዮ ፡ እጓለ ፡ እመሕያው ፡ ወሰብእሂ ፡ ቢጾ ፡ 23 ወኵሉ ፡ ተሠይጠ ፡ ይግበር ፡ ዐመፃ ፡ ወከመ ፡ ይክዐው ፡ ደመ ፡ ንጹሐ ፡ ወመልአት ፡ ምድር ፡ ዐመፃ ። 24 ወእምድኅረ ፡ እሉ ፡ ኵሎሙ ፡ አራዊት ፡ ወአዕዋፍ ፡ ወዘይትሐወስ ፡ ወዘያንሶሱ ፡ ዲበ ፡ ምድር ። ወተክዕወ ፡ ደም ፡ ብዙኅ ፡ ላዕለ ፡ ምድር ፡ ወኵሉ ፡ ኅሊናሁ ፡ ወፈቃዱ ፡ ለሰብእ ፡ ይኄሊ ፡ ከንቶ ፡ ወእኩየ ፡ በኵሉ ፡ መዋዕል ። 25 ወደምሰሰ ፡ እግዚአብሔር ፡ ኵሎ ፡ እምገጸ ፡ ምድር ፡ በእንተ ፡ ምግባሮሙ ፡ ወበእንተ ፡ ደም ፡ ማእከለ ፡ ምድር ። 26 ወተረፍነ ፡ አነ ፡ ወአንትሙ ፡ ደቂቅየ ፡ ወኵሉ ፡ ዘቦአ ፡ ምስሌነ ፡ ውስተ ፡ ታቦት ። ወናሁ ፡ አነ ፡ እሬኢ ፡ ቀዳሚ ፡ ምግባሪክሙ ፡ ከመዘ ፡ ኢኮንክሙ ፡ አንትሙ ፡ ዘተሐውሩ ፡ በጽድቅ ፡ እስመ ፡ በፍኖተ ፡ ሙስና ፡ ወጠንክሙ ፡ ትሖሩ ፡ ወትትፋለጡ ፡ አሐዱ ፡ አሐዱ ፡ እምነ ፡ ቢጹ ፡ ወትትቃንኡ ፡ ዝንቱ ፡ ምስለ ፡ ዝንቱ ፡ ወከመ ፡ ኢተሀልዉ ፡ ኅቡረ ፡ ውሉድየ ፡ አሐዱ ፡ ምስለ ፡ እኁሁ ። 27 እስመ ፡ እሬኢ ፡ አነ ፡ ወናሁ ፡ አጋንንት ፡ አስሕቶ ፡ ወጠኑ ፡ ላዕሌክሙ ፡ ወላዕለ ፡ ውሉድክሙ ። ወይእዜሂ ፡ እፈርህ ፡ አነ ፡ በእንቲአክሙ ፡ ከመ ፡ እምድኅረ ፡ ሞትኩ ፡ ትክዕዉ ፡ ደመ ፡ ሰብእ ፡ ውስተ ፡ ምድር ፡ ወትደመሰሱ ፡ አንትሙሂ ፡ እምገጸ ፡ ምድር ፡ 28 እስመ ፡ ኵሉ ፡ ዘይክዑ ፡ ደመ ፡ ሰብእ ፡ ወኵሉ ፡ ዘይበልዕ ፡ ደመ ፡ ዘኵሉ ፡ ዘሥጋ ፡ ይደመሰሱ ፡ ኵሎሙ ፡ እምድር ። 29 ወኢይተርፍ ፡ ኵሉ ፡ ሰብእ ፡ ዘይበልዕ ፡ ደመ ፡ ወዘይክዑ ፡ ደመ ፡ ዲበ ፡ ምድር ። ወኢይተርፍ ፡ ሎቱ ፡ ዘርአ ፡ ወደኃሪተ ፡ በታሕተ ፡ ሰማይ ፡ ሕያው ፡ እስመ ፡ ውስተ ፡ ሲኦል ፡ የሐውሩ ፡ ወውስተ ፡ መካን ፡ ዘደይን ፡ ይወርዱ ፡ ውስተ ፡ ጽልመት ፡ ማዕምቅ ፡ የአትቱ ፡ ኵሎሙ ፡ በሞት ፡ ዐዋግ ፡ 30 ኵሉ ፡ ደም ፡ ኢያስተርኢ ፡ እምኵሉ ፡ ደም ፡ ላዕሌክሙ ፡ ዘውእቱ ፡ በኵሉ ፡ መዋዕል ፡ ዘጠባሕክሙ ፡ ኵሎ ፡ አርዌ ፡ ወእንስሳ ፡ ወዘይሰርር ፡ ዲበ ፡ ምድር ፡ ወግበሩ ፡ ምጽዋተ ፡ ላዕለ ፡ ነፍስክሙ ፡ በደፊኖቱ ፡ ዘይትከዐው ፡ ዲበ ፡ ገጸ ፡ ምድር ፡ 31 ወኢትኩኑ ፡ ዘይበልዕ ፡ ምስለ ፡ ደም ። ወአጽንዑ ፡ ከመ ፡ ኢይብልዑ ፡ ደመ ፡ በቅድሜክሙ ፡ ድፍኑ ፡ ደመ ፡ እስመ ፡ ከመዝ ፡ ተአዘዝኩ ፡ አስምዕ ፡ ለክሙ ፡ ወለውሉድክሙ ፡ ምስለ ፡ ኵሉ ፡ ዘሥጋ ። 32 ወኢትብልዕዋ ፡ ለነፍስ ፡ ምስለ ፡ ሥጋ ፡ ከመ ፡ ኢይኩኑ ፡ ዘይትኀሠሡ ፡ ደምክሙ ፡ ዘነፍስክሙ ፡ እምእደ ፡ ኵሉ ፡ ዘሥጋ ፡ ዘይክዕው ፡ ዲበ ፡ ምድር ፡ 33 እስመ ፡ ምድር ፡ ኢትነጽሕ ፡ እምነ ፡ ደም ፡ እምዘ ፡ ተክዕወ ፡ ላዕሌሃ ፡ እስመ ፡ በደመ ፡ ዘከዐዎ ፡ ትነጽሕ ፡ ምድር ፡ በኵሉ ፡ ትዝምዳ ። 34 ወይእዜሂ ፡ ውሉድየ ፡ ስምዑ ፡ ግበሩ ፡ ፍትሐ ፡ ወጽድቀ ፡ ከመ ፡ ትተከሉ ፡ በጽድቅ ፡ ውስተ ፡ ገጸ ፡ ኵሉ ፡ ምድር ፡ ወይትሌዐል ፡ ክብርክሙ ፡ በቅድመ ፡ አምላኪየ ፡ ዘአድኀነኒ ፡ እምነ ፡ ማየ ፡ አይኅ ፡ 35 ወናሁ ፡ አንትሙ ፡ ተሐውሩ ፡ ወተሐንጹ ፡ ለክሙ ፡ አህጉረ ፡ ወትተክሉ ፡ ውስቴቶን ፡ ኵሎ ፡ ተክለ ፡ ዘዲበ ፡ ምድር ። ወኵሎኬ ፡ ዕፀ ፡ ዘይፈሪ ፡ 36 ሠለስተ ፡ ዓመተ ፡ ይከውን ፡ ፍሬሁ ፡ ዘኢይትቀሠም ፡ እምኵሉ ፡ ለበሊዖቱ ፡ ወበዓመት ፡ ራብዕ ፡ ይትቄደስ ፡ ፍሬሁ ፡ ወያዐርጉ ፡ ቀዳሜ ፡ ፍሬ ፡ ዘይሠጠው ፡ ቅድመ ፡ እግዚአብሔር ፡ ልዑል ፡ ፈጣሬ ፡ ሰማይ ፡ ወምድር ። ወኵሎ ፡ ከመ ፡ ያዕርጉ ፡ በጥሉል ፡ ቀዳሜ ፡ ወይን ፡ ወቅብእ ፡ ቀዳሜ ፡ ፍሬ ፡ ውስተ ፡ ምሥዋዐ ፡ እግዚአብሔር ፡ ዘይትወከፍ ፡ ወዘተረፈ ፡ ይብልዑ ፡ ላእካነ ፡ ቤተ ፡ እግዚአብሔር ፡ በቅድመ ፡ ምሥዋዕ ፡ ዘይትወከፍ ። 37 ወበዓመት ፡ ኃምስ ፡ ግበሩ ፡ ኅድገቶ ፡ ከመ ፡ ትሕድግዎ ፡ አንትሙ ፡ በጽድቅ ፡ ወበርትዕ ፡ ወትጸድቁ ፡ ወይረትዕ ፡ ኵሉ ፡ ተክልክሙ ፡ 38 እስመ ፡ ከመዝ ፡ አዘዘ ፡ ሄኖክ ፡ አቡሁ ፡ ለአቡክሙ ፡ ለማቱሳላ ፡ ወልዱ ፡ ወማቱሳላ ፡ ለላሜክ ፡ ወልዱ ፡ ወላሜክ ፡ አዘዘኒ ፡ ኵሎ ፡ ዘአዘዝዎ ፡ አበዊሁ ። 39 ወአነሂ ፡ እኤዝዘክሙ ፡ ውሉድየ ፡ በከመ ፡ አዘዞ ፡ ሄኖክ ፡ ለወልዱ ፡ በቀዳሚ ፡ ኢዮቤልዉሳት ፡ እንዘ ፡ ሕያው ፡ ውእቱ ፡ ውስተ ፡ ትዝምዱ ፡ ሳብዕ ፡ አዘዘ ፡ ወአስምዐ ፡ ለውሉዱ ፡ ወለውሉደ ፡ ውሉዱ ፡ እስከ ፡ አመ ፡ ዕለተ ፡ ሞቱ ።