መጽሐፈ ኩፋሌ 6

6 1 ወአመ ፡ ሠርቁ ፡ ለወርኅ ፡ ሣልስ ፡ ወፅእ ፡ እምነ ፡ ታቦት ። ወሐነጸ ፡ ምሥዋዐ ፡ ውስተ ፡ ዝንቱ ፡ ደብር ፡ 2 ወአስተርአየ ፡ ዲበ ፡ ምድር ፡ ወነሥአ ፡ ማሕስአ ፡ ጠሊ ፡ ወአስተስረየ ፡ በደሙ ፡ በእንተ ፡ ኵሉ ፡ አበሳ ፡ ምድር ፡ እስመ ፡ ተደምሰሰ ፡ ኵሉ ፡ ዘሀሎ ፡ ውስቴታ ፡ ዘእንበለ ፡ እለ ፡ ሀለዉ ፡ ውስተ ፡ ታቦት ፡ ምስለ ፡ ኖኅ ። 3 ወአዕረገ ፡ ስብሐ ፡ ዲበ ፡ ምሥዋአ ፡ ወነሥአ ፡ ላህመ ፡ ወበሐኰ ፡ ወበግዐ ፡ ወአጣሌ ፡ ወፄወ ፡ ወመንጤጠ ፡ ወእጓለ ፡ ርግብ ። ወአዕረገ ፡ ጽንሐሐ ፡ ውስተ ፡ ምሥዋዕ ፡ ወይሠውይ ፡ ላዕሌሆን ፡ መሥዋዕተ ፡ ልዉስ ፡ በቅብእ ። ወነዝሐ ፡ ወይነ ፡ ወወደየ ፡ ላዕለ ፡ ኵሉ ፡ ስሒነ ፡ ወአዕረገ ፡ መዓዛ ፡ ሠናየ ፡ ዘይሠምር ፡ ቅድመ ፡ እግዚአብሔር ። 4 ወአጼነወ ፡ እግዚአብሔር ፡ መዓዛ ፡ ሠናየ ፡ ወተካየደ ፡ ምስሌሁ ፡ ኪዳነ ፡ ከመ ፡ ኢይኩን ፡ ማየ ፡ አይኅ ፡ ዘያማስን ፡ ምድረ ፡ ኵሎ ፡ መዋዕለ ፡ ምድር ፡ ዘርእ ፡ ወማእረር ፡ ኢይትነተግ ፡ ደደክ ፡ ወመርቄ ፡ ሐጋይ ፡ ወክረምት ፡ ወመዓልት ፡ ወሌሊት ፡ ኢይወልጡ ፡ ሥርዓቶሙ ፡ ወኢይንተጉ ፡ ለዓለም ። 5 ወአንትሙኒ ፡ ለሀቁ ፡ ወተባዝኁ ፡ ውስተ ፡ ምድር ፡ ወብዝኁ ፡ ላዕሌሃ ፡ ወኩኑ ፡ ለበረከት ፡ ማእከለ ፡ ፍርሃትክሙ ፡ ወረዓድክሙ ። እሁብ ፡ ዲበ ፡ ኵሉ ፡ ዘውስተ ፡ ምድር ፡ ወዘውስተ ፡ ባሕር ፡ 6 ወናሁ ፡ ወሀብኩክሙ ፡ ኵሎ ፡ አራዊተ ፡ ወኵሎ ፡ እንስሳ ፡ ወኵሎ ፡ ዘይሰርር ፡ ወኵሎ ፡ ዘይትሐወስ ፡ ውስተ ፡ ምድር ፡ ወውስተ ፡ ማያት ፡ ዓሣተ ፡ ወኵሎ ፡ ለሲሲት ፡ ከመ ፡ ሐምለ ፡ ሣዕር ፡ ወሀብኩክሙ ፡ ኵሎ ፡ ትብልዑ ። 7 ወባሕቱ ፡ ሥጋ ፡ ዘምስለ ፡ መንፈሱ ፡ ምስለ ፡ ደም ፡ ኢትብልዑ ፡ እስመ ፡ ነፍሰ ፡ ኵሉ ፡ ዘሥጋ ፡ ውስተ ፡ ደም ፡ ውእቱ ፡ ከመ ፡ ኢይትኃሠሥ ፡ ደምክሙ ፡ ውስተ ፡ ነፍሳቲክሙ ፡ እምውስተ ፡ እደ ፡ ኵሉ ፡ ሰብእ ፡ እምእደ ፡ ኵሉ ፡ አኀሥሦ ፡ ለደመ ፡ ሰብእ ። 8 ዘይክዑ ፡ ደመ ፡ ሰብእ ፡ በሰብእ ፡ ደሙ ፡ ይትከዐው ፡ እስመ ፡ በመልክዐ ፡ እግዚአብሔር ፡ ገብሮ ፡ ለአዳም ፡ 9 ወአንትሙሂ ፡ ለሀቁ ፡ ወብዝኁ ፡ ዲበ ፡ ምድር ። 10 ወመሐሉ ፡ ኖኅ ፡ ወደቂቁ ፡ ከመ ፡ ኢይብልዑ ፡ ኵሎ ፡ ደመ ፡ ዘበኵሉ ፡ ሥጋ ። ወተካየደ ፡ ኪዳነ ፡ ቅድመ ፡ እግዚአብሔር ፡ አምላክ ፡ ለዓለም ፡ በኵሉ ፡ ትውልደ ፡ ምድር ፡ በዝንቱ ፡ ወርኅ ። 11 በእንተ ፡ ዝንቱ ፡ ተናገረከ ፡ ትትካየድ ፡ ኪዳነ ፡ አንተኒ ፡ ምስለ ፡ ደቂቀ ፡ እስራኤል ፡ በዝ ፡ ወርኅ ፡ በዲበ ፡ ደብር ፡ ምስለ ፡ መሐላ ። ወትነዝኅ ፡ ላዕሌሆሙ ፡ ደመ ፡ በእንተ ፡ ኵሉ ፡ ነገረ ፡ ኪዳን ፡ ዘይትካየድ ፡ እግዚአብሔር ፡ ምስሌሆሙ ፡ ለኵሉ ፡ መዋዕል ። 12 ወጽሕፍት ፡ ዛቲ ፡ ስምዕ ፡ ላዕሌክሙ ፡ ከመ ፡ ትዕቀብዋ ፡ ኵሎ ፡ መዋዕለ ፡ ከመ ፡ ኢትብልዑ ፡ በኵሉ ፡ መዋዕል ፡ ኵሎ ፡ ደመ ፡ አራዊት ፡ ወአዕዋፍ ፡ ኵሎ ፡ መዋዕለ ፡ ምድር ። ወሰብእ ፡ ዘበልዐ ፡ ደመ ፡ አርዌ ፡ ወዘእንስሳ ፡ ወዘአዕዋፍ ፡ በኵሉ ፡ መዋዕለ ፡ ምድር ፡ ይሠሮ ፡ ውእቱ ፡ ወዘርኡ ፡ እምድር ። 13 ወአንተ ፡ አዝዞሙ ፡ ለደቂቀ ፡ እስራኤል ፡ ኢይብልዑ ፡ ኵሎ ፡ ደመ ፡ ከመ ፡ የሀሉ ፡ ስሞሙ ፡ ወዘርኦሙ ፡ ቅድመ ፡ እግዚአብሔር ፡ አምላክነ ፡ መዋዕለ ። 14 ወአልቦ ፡ ለዝሕግ ፡ ዐቅመ ፡ መዋዕል ፡ እስመ ፡ ለዓለም ፡ ውእቱ ፡ ይዕቀብዎ ፡ ለትውልድ ፡ ከመ ፡ ይኩኑ ፡ እንዘ ፡ ይትመሀለሉ ፡ በእንቲአሆሙ ፡ በደም ፡ በቅድመ ፡ ምሥዋዕ ፡ በኵሉ ፡ ዕለት ፡ ወዕለተ ፡ ነግህ ፡ ወሰርክ ፡ ያስተስርዩ ፡ በእንቲአሆሙ ፡ ወትረ ፡ ቅድመ ፡ እግዚአብሔር ፡ ከመ ፡ ይዕቀብዎ ፡ ወኢይሠረዉ ። 15 ወወሀቦ ፡ ለኖኅ ፡ ወለደቂቁ ፡ ትእምርተ ፡ ከመ ፡ ኢይኩን ፡ ዳግመ ፡ አይኅ ፡ ዲበ ፡ ምድር ፡ 16 ቀስቶ ፡ ወሀበ ፡ ውስተ ፡ ደመና ፡ ለትእምርተ ፡ ኪዳን ፡ ዘለዓለም ። ከመ ፡ ኢይኩን ፡ እንከ ፡ ማየ ፡ አይኅ ፡ ዲበ ፡ ምድር ፡ ለአማስኖታ ፡ ኵሎ ፡ መዋዕለ ፡ ምድር ። 17 በእንተዝ ፡ ተሠርዐ ፡ ወተጽሕፈ ፡ ውስተ ፡ ጽላተ ፡ ሰማይ ፡ ከመ ፡ ይኩኑ ፡ ገበርተ ፡ በዓል ፡ ዘሱባዔ ፡ በዝ ፡ ወርኅ ፡ ምዕረ ፡ ለዓመት ፡ ለሐዲስ ፡ ኪዳን ፡ በኵሉ ፡ ዓም ፡ ወዓመት ። 18 ወኮነት ፡ ኵላ ፡ ዛቲ ፡ በዓል ፡ እንዘ ፡ ትትገበር ፡ በሰማይ ፡ እምዕለተ ፡ ፍጥረት ፡ እስከ ፡ መዋዕለ ፡ ኖኅ ፡ ዕሥራ ፡ ወስድስቱ ፡ ኢዮቤልዉ ፡ ወሱባዔ ፡ ዓመት ፡ ኃምስተ ፡ ወዐቀብዋ ፡ ኖኅ ፡ ወደቂቁ ፡ ሰብዓተ ፡ ኢዮቤልዉ ፡ ወሱባዔ ፡ ዓመታት ፡ አሐተ ፡ እስከ ፡ አመሞቱ ፡ ለኖኅ ፡ ወእምዕለተ ፡ ሞቱ ፡ ለኖኅ ፡ አማስኑ ፡ ውሉዱ ፡ እሰከ ፡ አመ ፡ መዋዕለ ፡ አብርሃም ፡ ወይበልዑ ፡ ደመ ። 19 ወአብርሃም ፡ ባሕቲቱ ፡ ዐቀበ ፡ ወይስሐቅ ፡ ወያዕቆብ ፡ ውሉዱ ፡ ዐቀብዋ ፡ እስከ ፡ መዋዕሊከ ። ወበመዋዕሊከ ፡ ረስዑ ፡ ውሉደ ፡ እስራኤል ፡ እስከ ፡ አመ ፡ ሐደስክዎሙ ፡ በኀበ ፡ ዝደብር ። 20 ወአንተሂ ፡ አዝዞሙ ፡ ለውሉደ ፡ እስራኤል ፡ ወይዕቀብዋ ፡ ለዛቲ ፡ በዓል ፡ በኵሉ ፡ ትዝምዶሙ ፡ ለትእዛዝ ፡ ሎሙ ፡ ዕለተ ፡ አሐተ ፡ በዓመት ፡ በዝ ፡ ይግበሩ ፡ በዓለ ፡ ባቲ ፡ 21 እስመ ፡ በዓለ ፡ ሱባዔያት ፡ ይእቲ ፡ ወበዓለ ፡ ቀዳሜ ፡ ፍሬ ፡ ይእቲ ፡ ክልኤ ፡ ዕፅፈት ፡ ይእቲ ፡ ወለክልኤ ፡ ዘመድ ፡ ዛቲ ፡ በዓል ፡ በከመ ፡ ጽሑፍ ፡ ወቍሩጽ ፡ በእንቲአሃ ፡ ግብራ ፡ 22 እስመ ፡ ጸሐፍኩ ፡ ውስተ ፡ መጽሐፈ ፡ ሕግ ፡ ዘቀዳሚ ፡ ውስተ ፡ ዘጸሐፍኩ ፡ ለከ ፡ ትግበራ ፡ በበ ፡ ጊዜሃ ፡ ዕለተ ፡ አሐተ ፡ ለዓመት ። ወቍርባኖሂ ፡ ነገርኩከ ፡ ከመ ፡ ይኩኑ ፡ ዝኩራነ ፡ ወይገብርዋ ፡ ውሉደ ፡ እስራኤል ፡ ውስተ ፡ ትዝምዶሙ ፡ በዝ ፡ ወርኅ ፡ ዕለተ ፡ አሐተ ፡ ለለ ፡ አሐዱ ፡ ዓመት ። 23 ወበሠርቀ ፡ ወርኅ ፡ ቀዳሚ ፡ ወበሠርቀ ፡ ወርኀ ፡ ራብዕ ፡ ወበሠርቀ ፡ ወርኅ ፡ ዓሥር ፡ ዕለታተ ፡ ተዝካር ፡ እማንቱ ፡ ወዕለታተ ፡ ጊዜ ፡ እማንቱ ። ውስተ ፡ አርባዕቱ ፡ መክፈልተ ፡ ዓመት ፡ ጽሑፋት ፡ እማንቱ ፡ ወሥሩዓት ፡ ለስምዐ ፡ ዓለም ። 24 ወኖኅ ፡ ሠርዖን ፡ ሎቱ ፡ ለበዓላት ፡ ለትውልድ ፡ ዘለዓለም ፡ እስከ ፡ አመ ፡ ኮነ ፡ ሎቱ ፡ ቦቶን ፡ ተዝካረ ። 25 በሠርቀ ፡ ወርኅ ፡ ቀዳሚ ፡ ተብህለ ፡ ሎቱ ፡ ይግበር ፡ ታቦተ ፡ ወባቲ ፡ የብሰት ፡ ምድር ፡ ወአርኀወ ፡ ወርእየ ፡ ምድረ ፡ 26 ወበሠርቀ ፡ ወርኅ ፡ ራብዕ ፡ ተፈጸመ ፡ አፈ ፡ መዓምቅቲሃ ፡ ለቀላይ ፡ ታሕቲት ፡ ወበሠርቀ ፡ ወርኅ ፡ ሳብዕ ፡ ተርኅወ ፡ ኵሉ ፡ አፈወ ፡ መዓምቅተ ፡ ምድር ፡ ወአኀዘ ፡ ማያት ፡ ይረድ ፡ ውስቴቱ ። 27 ወበሠርቀ ፡ ወርኀ ፡ ዓሥር ፡ አስተርአየ ፡ አርእስተ ፡ አድባር ፡ ወተፈሥሐ ፡ ኖኅ ። 28 በእንተዝ ፡ ሠርዖን ፡ ኪያሆን ፡ ሎቱ ፡ ለበዓላት ፡ ለተዝካር ፡ እስከ ፡ ለዓለም ። ወከመዝ ፡ እማንቱ ፡ ሥሩዓት ፡ 29 ወያዐርግዎን ፡ ውስተ ፡ ጽላተ ፡ ሰማይ ። ዓሥሩ ፡ ወሠላስ ፡ ሰንበታት ፡ አሐተ ፡ አሐተ ፡ እምኔሆን ፡ እምዛቲ ፡ ውስተ ፡ ዛቲ ፡ ተዝካሮን ፡ እምቀዳሚት ፡ እስከ ፡ ካልእት ፡ ወእምካልእት ፡ እስከ ፡ ሣልስት ፡ ወእምሣልስት ፡ እስከ ፡ ራብዕት ። 30 ወይከውና ፡ ኵሎን ፡ መዋዕል ፡ ዘትእዛዛት ፡ ኀምሳ ፡ ወክልኤ ፡ ሰንበታተ ፡ መዋዕል ። ወኵሎ ፡ ዓመተ ፡ ፍጹመ ፡ 31 ከመዝ ፡ ተቈርዐ ፡ ወተሠርዐ ፡ ውስተ ፡ ጽላተ ፡ ሰማይ ። ወአልቦ ፡ ተዐድዎ ፡ አሐተ ፡ ዓመተ ፡ ዓመ ፡ ወዓመተ ። 32 ወአንተኒ ፡ አዝዞሙ ፡ ለደቂቀ ፡ እስራኤል ፡ ወይዕቀቡ ፡ ዓመታተ ፡ በዝ ፡ ኆልቍ ፡ ሠለስተ ፡ ምእተ ፡ ወስሳ ፡ ወረቡዐ ፡ መዋዕለ ፡ ወይከውን ፡ ፍጹመ ፡ ዓመት ። ወኢያማስን ፡ ጊዜሁ ፡ እመዋዕሊሁ ፡ ወእምበዓላቲሁ ፡ እስመ ፡ ኵሉ ፡ ይበጽሕ ፡ በከመ ፡ ስምዖሙ ፡ ወኢያዐርፉ ፡ ዕለተ ፡ ወኢያማስኑ ፡ በዓለ ። 33 ወለእመ ፡ ተዐደዉ ፡ ወኢገብርዎን ፡ በከመ ፡ ትእዛዙ ፡ ሎቱ ፡ አሜሃ ፡ ኵሎሙ ፡ ያማስኑ ፡ ጊዜያቲሆሙ ፡ ወዓመታትኒ ፡ ይትሐወሱ ፡ ዘእምውስተዝ ፡ ወጊዜያትሂ ፡ ያማስኑ ፡ ወዓመታትሂ ፡ ይትሐወሱ ፡ ወይትዐደዉ ፡ ሥርዓቶሙ ። 34 ወኵሎሙ ፡ ውሉደ ፡ እስራኤል ፡ ይረስዑ ፡ ወኢይረክቡ ፡ ፍኖተ ፡ ዓመታት ። ወይረስዑ ፡ ሠርቀ ፡ ወጊዜ ፡ ወሰንበተ ፡ ወኵሎ ፡ ሥርዓተ ፡ ዘዓመታት ፡ ይጌግዩ ፡ 35 አአምር ፡ አነ ። ወእምይእዜ ፡ አነ ፡ አየድዐከ ፡ ወአኮ ፡ እምልብየ ፡ እስመ ፡ ከመዝ ፡ መጽሐፍ ፡ ጽሑፍ ፡ ቅድሜየ ፡ ወተሠርዐ ፡ ውስተ ፡ ጽላተ ፡ ሰማይ ። ኩፋሌሁ ፡ ለመዋዕል ። ከመ ፡ ኢይርሥዑ ፡ በዓላተ ፡ ኪዳን ፡ ወየሐውሩ ፡ በበዓላተ ፡ አሕዛብ ፡ ድኅረ ፡ ስሕተቶሙ ፡ ወድኅረ ፡ ኢያእምሮቶሙ ፡ 36 ወይከውኑ ፡ እለ ፡ ያስተሐይጹ ፡ ወርኀ ፡ በሑያጼ ፡ ወርኅ ። እስመ ፡ ትማስን ፡ ይእቲ ፡ ጊዜያተ ፡ ወትቀድም ፡ እምዓመታት ፡ ለዓመት ፡ ዐሡረ ፡ ዕለተ ። 37 በእንተዝ ፡ ይመጽእ ፡ ዓመታት ፡ ሎሙ ፡ እንዘ ፡ ያማስኑ ፡ ወይገብሩ ፡ ዕለተ ፡ ስምዕ ፡ ምንንተ ። ወዕለተ ፡ ርኵሰተ ፡ በዓለ ፡ ወኵሉ ፡ ይዴምር ፡ ወመዋዕለ ፡ ቅዱሳተ ፡ ርኩሰ ፡ ወዕለተ ፡ ርኵሰተ ፡ ለዕለት ፡ ቅድስት ። እስመ ፡ ይስሕቱ ፡ አውራኀ ፡ ወሰንበታተ ፡ ወበዓላተ ፡ ወኢዮቤለ ። 38 በእንተዝ ፡ አነ ፡ እኤዝዘከ ፡ ወአሰምዕ ፡ ለከ ፡ ከመ ፡ ታስምዕ ፡ ሎሙ ፡ እስመ ፡ እምድኅረ ፡ ሞትከ ፡ ያማስኑ ፡ ውሉድከ ፡ ከመ ፡ ኢይግበሩ ፡ ዓመተ ፡ ሠለስተ ፡ ምእተ ፡ ወስሳ ፡ ወረቡዐ ፡ ባሕቲቶን ። በእንተዝ ፡ ይስሕቱ ፡ ሠርቀ ፡ ወጊዜ ፡ ወሰንበተ ፡ ወበዓላተ ፡ ወይበልዑ ፡ ኵሎ ፡ ደመ ፡ ምስለ ፡ ኵሉ ፡ ዘሥጋ ።