መጽሐፈ ኩፋሌ 20

20 1 ወበአርብዓ ፡ ወክልኤቱ ፡ ኢዮቤልዉ ፡ በዓመት ፡ ቀዳሚ ፡ ዘሱባዔ ፡ ሳብዕ ፡ ጸውዐ ፡ አብርሃም ፡ ይስማዔልሃ ፡ ወዐሠርተ ፡ ወክልኤተ ፡ ደቂቆ ፡ ወይስሐቅሃ ፡ ወክልኤሆሙ ፡ ደቂቆ ፡ ወስድስተ ፡ ደቂቀ ፡ ኬጡራ ፡ ወውሉዶሙ ፡ 2 ወአዘዞሙ ፡ ከመ ፡ ይዕቀቡ ፡ ፍኖተ ፡ እግዚአብሔር ፡ ከመ ፡ ይግበሩ ፡ ጽድቀ ፡ ወያፍቅር ፡ አሐዱ ፡ አሐዱ ፡ ቢጾ ፡ ወከመ ፡ ይኩኑ ፡ ከማሁ ፡ በውስተ ፡ ኵሉ ፡ ፀብእ ፡ ከመ ፡ ይሖሩ ፡ ዲበ ፡ አሐዱ ፡ ላዕሌሆሙ ፡ ወለገቢረ ፡ ፍትሕ ፡ ወጽድቅ ፡ በዲበ ፡ ምድር ፡ 3 ከመ ፡ ይክስቡ ፡ ውሉዶሙ ፡ በኪዳን ፡ እንተ ፡ ተካየደ ፡ ምስሌሆሙ ፡ ወከመ ፡ ኢይትዐደዉ ፡ የማነ ፡ ወፀጋመ ፡ እምኵሎን ፡ ፍናዌ ፡ ዘአዘዘነ ፡ እግዚአብሔር ፡ ወከመ ፡ ንትዐቀብ ፡ እምኵሉ ፡ ዝሙት ፡ ወርኵስ ፡ ወከመ ፡ ንኅድግ ፡ እማእከሌነ ፡ ኵሎ ፡ ርኵሰ ፡ ወዝሙተ ። 4 ወእመ ፡ ዘመወት ፡ ለክሙ ፡ ኵላ ፡ ብእሲት ፡ ወእመኒ ፡ ወለት ፡ አውዕይዋ ፡ በእሳት ፡ ወኢይዘምዋ ፡ ድኅረ ፡ አዕይንቲሆን ፡ ወልቦንሂ ፡ ከመ ፡ ይንሥኡ ፡ ሎሙ ፡ ብእሲተ ፡ እምነ ፡ አዋልደ ፡ ከናአን ፡ እስመ ፡ ይሤሮ ፡ ዘርአ ፡ ከናአን ፡ እምድር ። 5 ወነገሮሙ ፡ ኵነኔሆሙ ፡ ለረዐይት ፡ ወኵነኔ ፡ ሰዶም ፡ ከመ ፡ ተኰነኑ ፡ በእንተ ፡ እከዮሙ ፡ በእንተ ፡ ዝሙት ፡ ወርኵስ ፡ ወሙስና ፡ በበይናቲሆሙ ፡ በዝሙት ፡ ሞቱ ። 6 ወአንትሙኒ ፡ ተዐቀቡ ፡ እምኵሉ ፡ ዝሙት ፡ ወርኵስ ፡ ወእምኵሉ ፡ ግማኔ ፡ ኀጢአት ፡ ከመ ፡ ኢተሀቡ ፡ ስመነ ፡ ለመርገም ፡ ወኵሎ ፡ ሕይወተክሙ ፡ ለትምክሕት ፡ ወኵሎ ፡ ውሉደክሙ ፡ ለሙስና ፡ በሰይፍ ፡ ወትከውኑ ፡ ርጉማነ ፡ ከመ ፡ ሰዶም ፡ ወኵሉ ፡ ተረፍክሙ ፡ ከመ ፡ ውሉደ ፡ ገሞራ ። 7 አነ ፡ አሰምዕ ፡ ለክሙ ፡ ውሉድየ ፡ አፍቅርዎ ፡ ለአምላከ ፡ ሰማይ ፡ ወተፀመዱ ፡ ኵሎ ፡ ትእዛዞ ፡ ወኢትሖሩ ፡ ድኅረ ፡ ጣዖቶሙ ፡ ወድኅረ ፡ ርኵሶሙ ። 8 ወአማልክተ ፡ ስብኮ ፡ ኢትግበሩ ፡ ለክሙ ፡ ወግልፈዋተ ፡ እስመ ፡ ከንቱ ፡ ውእቱ ። ወኢምንተኒ ፡ መንፈስ ፡ አልቦሙ ፡ እስመ ፡ ግብረ ፡ እደው ፡ እሙንቱ ፡ ወኵሎሙ ፡ እለ ፡ ይትዌከሉ ፡ ቦሙ ፡ ወኢበምንትኒ ፡ ኵሎሙ ፡ ተወከሉ ፡ ኢታምልክዎሙ ፡ ወኢትስግዱ ፡ ሎሙ ፡ 9 አላ ፡ አምልኩ ፡ አምላከ ፡ ልዑለ ፡ ወስግዱ ፡ ሎቱ ፡ ወትረ ፡ ወተሰፈዉ ፡ ገጸ ፡ ዚአሁ ፡ በኵሉ ፡ ጊዜ ፡ ወግብሩ ፡ ጽድቀ ፡ ወርትዐ ፡ በቅድሜሁ ፡ ከመ ፡ ይፍተው ፡ ላዕሌክሙ ፡ ወየሀብክሙ ፡ ምሕረቶ ፡ ወያውርድ ፡ ለክሙ ፡ ዝናመ ፡ ነግህ ፡ ወሰርክ ። ወይባርክ ፡ ኵሎ ፡ ተግባረክሙ ፡ ኵሎ ፡ ዘተገበርክሙ ፡ በዲበ ፡ ምድር ፡ ወይባርክ ፡ እክለከ ፡ ወማየከ ፡ ወይባርክ ፡ ዘርአ ፡ ከርሥከ ፡ ወዘርአ ፡ ምድርከ ፡ ወመራዕየ ፡ አልህምቲከ ። ወመራዕየ ፡ አባግዒከ ፡ 10 ወትከውን ፡ ለበረከት ፡ በዲበ ፡ ምድር ፡ ወይፈትዉክሙ ፡ ኵሎሙ ፡ አሕዛበ ፡ ምድር ። ወይባርኩ ፡ ውሉድክሙ ፡ በስምየ ፡ ከመ ፡ ይኩኑ ፡ ቡሩካነ ፡ በከመ ፡ አነ ። 11 ወወሀቦ ፡ ለይስማዔል ፡ ወለውሉዱ ፡ ወለውሉደ ፡ ኬጡራ ፡ ሀብተ ፡ ወፈነዎሙ ፡ እምይስሐቅ ፡ ወልዱ ፡ ወኵሎ ፡ ወሀቦ ፡ ለይስሐቅ ፡ ወልዱ ፡ 12 ወሖረ ፡ ይስማዔል ፡ ወውሉዱ ፡ ወውሉደ ፡ ኬጡራ ፡ ወውሉዶሙ ፡ ኅቡረ ፡ ወኀደሩ ፡ እምፋርሞን ፡ እስከ ፡ ምብዋአ ፡ ባቢሎን ፡ ውስተ ፡ ኵሉ ፡ ምድር ፡ እንተ ፡ ገጸ ፡ ጽባሕ ፡ አንጻረ ፡ ገዳም ። 13 ወተደመሩ ፡ እሉ ፡ ምስለ ፡ እሉ ፡ ወተጸውዐ ፡ ስሞሙ ፡ ዐረብ ፡ ወእስማዔላዊያን ።