መጽሐፈ ኩፋሌ 19

19 1 ወበዓመት ፡ አሐዱ ፡ ዘሱባዔ ፡ ቀዳሚ ፡ በዘ ፡ አርብዓ ፡ ወክልኤቱ ፡ ኢዮቤልዉ ፡ ተመይጠ ፡ አብርሃም ፡ ወኀደረ ፡ አንጸረ ፡ ኬብሮን ፡ ዛቲ ፡ ይእቲ ፡ ቀሪያታርባቅ ፡ ክልኤ ፡ ሱባዔ ፡ ዓመት ። 2 ወበዓመት ፡ ቀዳሚ ፡ ዘሱባዔ ፡ ሣልስ ፡ ዘዝ ፡ ኢዮቤልዉ ፡ ተፈጸመ ፡ መዋዕለ ፡ ሕይወተ ፡ ሳራ ፡ ወሞተት ፡ በኬብሮን ። 3 ወሖረ ፡ አብርሃም ፡ ከመ ፡ ይብኪያ ፡ ወይቅብራ ። ወናሜክሮ ፡ እመ ፡ ይትዔገሥ ፡ መንፈሱ ፡ ወኢይትአነተል ፡ በቃለ ፡ አፉሁ ፡ ወተረክበ ፡ በዝኒ ፡ ዕጉሠ ፡ ወኢተሀውከ ። 4 እስመ ፡ በትዕግሥተ ፡ መንፈስ ፡ ተናገረ ፡ ምስለ ፡ ውሉደ ፡ ኬጥ ፡ ከመ ፡ የሀብዎ ፡ መካነ ፡ ከመ ፡ ይቅበር ፡ በድኖ ፡ ውስቴቱ ። 5 ወእግዚአብሔር ፡ ወሀቦ ፡ ሞገሰ ፡ ሎቱ ፡ በቅድመ ፡ ኵሎሙ ፡ እለ ፡ ይሬእይዎ ። ወአስተብቍዐ ፡ በየውሀት ፡ እምኀበ ፡ ውሉደ ፡ ኬጥ ፡ ወወሀብዎ ፡ ምድረ ፡ በዐት ፡ ዘካዕበት ፡ ዘአንጸረ ፡ መምብራም ፡ እንተ ፡ ይእቲ ፡ ኬብሮን ፡ በአርብዓ ፡ ብሩር ፡ 6 ወእሙንቱሂ ፡ ያስተበቍዕዎ ፡ እንዘ ፡ ይብሉ ፡ ነሀብከ ፡ በከ ፡ ወኢነሥአ ፡ እምእዴሆሙ ፡ በከ ፡ እስመ ፡ ወሀበ ፡ ሤጦ ፡ ለመካን ፡ ብሩረ ፡ ፍጹመ ። ወሰገደ ፡ ሎሙ ፡ ካዕበ ፡ ወእምዝ ፡ ቀበረ ፡ በድኖ ፡ ውስተ ፡ በዐት ፡ ዘካዕበት ። 7 ወኮነ ፡ ኵሉ ፡ መዋዕለ ፡ ሕይወታ ፡ ለሳራ ፡ ምእት ፡ ወዕሥራ ፡ ወሰብዐቱ ፡ እሉ ፡ ዝክልኤ ፡ ኢዮቤልዉ ፡ ወአርባዕቱ ፡ ሱባዔ ፡ ወዓመት ፡ አሐዱ ፡ ዝንቱ ፡ መዋዕለ ፡ ዓመታተ ፡ ሕይወታ ፡ ለሳራ ። 8 ወዝመከራ ፡ ዓሥር ፡ በዘ ፡ ተመከረ ፡ ቦቱ ፡ አብርሃም ፡ ወተረክበ ፡ ምእመነ ፡ ዕጉሠ ፡ መንፈስ ፡ 9 ወኢይቤ ፡ ቃለ ፡ በእንተ ፡ ንባብ ፡ ዘምድር ፡ ዘይቤ ፡ እግዚአብሔር ፡ የሀባ ፡ ኪያሃ ፡ ሎቱ ፡ ወለዘርኡ ፡ እምድኅሬሁ ። ወመካነ ፡ አስተብቍዐ ፡ በህየ ፡ ከመ ፡ ይቅበር ፡ በድኖ ፡ እስመ ፡ ተረክበ ፡ መሃይምነ ፡ ወተጽሕፈ ፡ ዐርከ ፡ እግዚአብሔር ፡ ውስተ ፡ ጽላተ ፡ ሰማይ ። 10 ወበዓመት ፡ ራብዕ ፡ ሎቱ ፡ ነሥአ ፡ ለይስሐቅ ፡ ወልዱ ፡ ብእሲተ ፡ ወስማ ፡ ርብቃ ፡ ወለተ ፡ ባቱኤል ፡ ወልደ ፡ ናኮር ፡ እኅወ ፡ አብርሃም ፡ እኅተ ፡ ላባ ፡ ወባቱኤል ፡ ወለዶሙ ፡ ለባቱኤላዊያን ፡ ወልደ ፡ ሜልከ ፡ ዘብእሲተ ፡ ናኮር ፡ እኅወ ፡ አብርሃም ። 11 ወአብርሃም ፡ ነሥአ ፡ ሎቱ ፡ ሣልስተ ፡ ብእሲተ ፡ ወስማ ፡ ኬጡራ ፡ እምነ ፡ ውሉደ ፡ ልደ ፡ ቤቱ ፡ አመ ፡ ሞተት ፡ አጋር ፡ እምቅድመ ፡ ሳራ ፡ 12 ወወለደት ፡ ሎቱ ፡ ውሉደ ፡ ስድስተ ፡ ዘንበሪሃ ፡ ወያክስንሃ ፡ ወማዳይሃ ፡ ወማዳንሃ ፡ ወኢያዝቦቅሃ ፡ ወሴሂያሃ ፡ በክልኤ ፡ ሱባዔ ፡ ዓመት ። 13 ወበሱባዔ ፡ ሳድስ ፡ በካልእ ፡ ዓመቱ ፡ ወለደት ፡ ርብቃ ፡ ለይስሐቅ ፡ ክልኤ ፡ ደቂቀ ፡ ያዕቆብሃ ፡ ወዔሳውሃ ፡ ወያዕቆብሰ ፡ ፍጹም ፡ ወራትዕ ፡ ወዔሳው ፡ ውእቱ ፡ ብእሲ ፡ ድሩክ ፡ ወሐቃላዊ ፡ ወጸጓር ፡ ወያዕቆብ ፡ የኀድር ፡ ውስተ ፡ ምጽላላት ፡ 14 ወልህቁ ፡ ወራዙት ፡ ወተምህረ ፡ ያዕቆብ ፡ መጽሐፈ ፡ ወዔሳውሰ ፡ ኢተምህረ ፡ እስመ ፡ ብእሲ ፡ ሐቃላዊ ፡ ውእቱ ፡ ወነዓዊ ፡ ወተምህረ ፡ ፀብአ ፡ ወኵሉ ፡ ግብሩ ፡ ድሩክ ። 15 ወያፈቅር ፡ ያዕቆብሃ ፡ አብርሃም ፡ ወይስሐቅ ፡ ዔሳውሃ ። 16 ወርእየ ፡ አብርሃም ፡ ግብሮ ፡ ለዔሳው ፡ ወአእመረ ፡ ከመ ፡ በያዕቆብ ፡ ይጼዋዕ ፡ ሎቱ ፡ ስም ፡ ወዘርእ ። ወጸውዓ ፡ ለርብቃ ፡ ወአዘዛ ፡ በእንተ ፡ ያዕቆብ ፡ እስመ ፡ ርእየ ፡ ከመ ፡ ይእቲኒ ፡ ታፈቅሮ ፡ ለያዕቆብ ፡ ፈድፋደ ፡ እምነ ፡ ዔሳው ፡ 17 ወይቤላ ፡ ወለትየ ፡ ዕቀቢ ፡ ወልድየ ፡ ያዕቆብሃ ፡ እስመ ፡ ውእቱ ፡ ይከውን ፡ ህየንቴየ ፡ ዲበ ፡ ምድር ፡ ወለበረከት ፡ በማእከለ ፡ ውሉደ ፡ ሰብእ ፡ ወለኵሉ ፡ ዘርአ ፡ ሴም ፡ ለትምክሕት ፡ 18 እስመ ፡ አአምር ፡ ከመ ፡ ኪያሁ ፡ የኀሪ ፡ እግዚአብሔር ፡ ሎቱ ፡ ለሕዝብ ፡ ቃውም ፡ እምኵሎሙ ፡ እለ ፡ ዲበ ፡ ገጸ ፡ ምድር ። 19 ወናሁ ፡ ይስሐቅ ፡ ወልድየ ፡ ያፈቅሮ ፡ ለዔሳው ፡ እምነ ፡ ያዕቆብ ፡ ወአነ ፡ እሬእየኪ ፡ መፍቀሪተ ፡ ጽድቅ ፡ ያዕቆብሃ ፡ 20 ወስኪ ፡ ዓዲ ፡ አሠንዮ ፡ ላዕሌሁ ፡ ወይኩና ፡ አዕይንቲኪ ፡ ላዕሌሁ ፡ ለፍቁር ። እስመ ፡ ውእቱ ፡ ይከውነነ ፡ ለበረከት ፡ ዲበ ፡ ምድር ፡ እምይእዜ ፡ ወእስከ ፡ ኵሉ ፡ ትውልደ ፡ ዓለም ፡ 21 ይጽንዓ ፡ እደዊኪ ፡ ወትትፈሣሕ ፡ ልብኪ ፡ በወልድኪ ፡ ያዕቆብ ። እስመ ፡ ኪያሁ ፡ አፍቀርኩ ፡ ፈድፋደ ፡ እምኵሎሙ ፡ ውሉድየ ፡ እስመ ፡ ለዓለም ፡ ይትባረክ ፡ ወዘርኡ ፡ ይከውን ፡ ዘይመልእ ፡ ኵላ ፡ ምድረ ፡ 22 እመ ፡ ይክል ፡ ሰብእ ፡ ኆልቆ ፡ ኆፃ ፡ ምድር ፡ ከማሁ ፡ ይትኌለቁ ፡ ዘርኡሂ ፡ 23 ወኵሎን ፡ በረከት ፡ እለ ፡ ባረከኒ ፡ እግዚአብሔር ፡ ኪያየ ፡ ወዘርእየ ፡ ለያዕቆብ ፡ ወለዘርኡ ፡ ይኩን ፡ ኵሎ ፡ መዋዕለ ፡ 24 ወበዘርኡ ፡ ይትባረክ ፡ ስምየ ፡ ወስመ ፡ አበዊየ ፡ ሴም ፡ ወኖኅ ፡ ወሄኖክ ፡ ወመላልኤል ፡ ወሄኖስ ፡ ወሴት ፡ ወአዳም ፡ 25 ወእሙንቱ ፡ ይኩኑ ፡ ለሣርሮ ፡ ሰማይ ፡ ወለአጽንዖ ፡ ምድር ፡ ወለሐድሶ ፡ ኵሉ ፡ ብርሃናት ፡ ዘዲበ ፡ ምጽናዓት ። 26 ወጸውዖ ፡ ለያዕቆብ ፡ በቅድመ ፡ አዕይንቲሃ ፡ ለርብቃ ፡ እሙ ፡ ወሰዐሞ ፡ ወባረኮ ፡ ወይቤ ፡ 27 ወልድየ ፡ ያዕቆብ ፡ ፍቁር ፡ ዘአፍቀረት ፡ ነፍስየ ፡ ይባርከ ፡ አምላክ ፡ እመልዕልተ ፡ ምጽናዓት ፡ ወየሀብከ ፡ ኵሎን ፡ በረከታተ ፡ እለ ፡ ባረኮ ፡ ለአዳም ፡ ወሄኖክሃ ፡ ወኖኅሃ ፡ ወሴምሃ ፡ ወኵሎ ፡ ዘመጠነ ፡ ተናገረኒ ። ወኵሎ ፡ ዘመጠነ ፡ ይቤ ፡ የሀበኒ ፡ ያጥግእ ፡ ላዕሌከ ፡ ወላዕለ ፡ ዘርእከ ፡ እስከ ፡ ለዓለም ፡ በከመ ፡ መዋዕለ ፡ ሰማይ ፡ ዲበ ፡ ምድር ፡ 28 ወኢይመብሉ ፡ ላዕሌከ ፡ ወላዕለ ፡ ዘርእከ ፡ መናፍስተ ፡ መስቴማ ፡ ከመ ፡ ያርኅቁከ ፡ እምድኅረ ፡ እግዚአብሔር ፡ ዘውእቱ ፡ አምላክከ ፡ እምይእዜ ፡ ወእስከ ፡ ለዓለም ። 29 ወይኩንከ ፡ እግዚአብሔር ፡ አምላክ ፡ አበ ፡ ወአንተሂ ፡ ወልደ ፡ በኵረ ፡ ወለሕዝብ ፡ ኵሎ ፡ መዋዕለ ። ሖር ፡ ወልድየ ፡ በሰላም ። 30 ወወፅኡ ፡ ክልኤሆሙ ፡ ኅቡረ ፡ እምኀበ ፡ አብርሃም ፡ 31 ወአፍቀረቶ ፡ ርብቃ ፡ ለያዕቆብ ፡ በኵሉ ፡ ልባ ፡ ወበኵሉ ፡ መንፈሳ ፡ ብዙኀ ፡ ፈድፋደ ፡ እምነ ፡ ዔሳው ፡ ወይስሐቅ ፡ ያፈቅሮ ፡ ለዔሳው ፡ ፈድፋደ ፡ እምያዕቆብ ።