መጽሐፈ ኩፋሌ 17

17 1 ወበአሐዱ ፡ ዓመት ፡ ዘሱባዔ ፡ ኃምስ ፡ ኀደገ ፡ ጥበ ፡ ይስሐቅ ፡ በዝንቱ ፡ ኢዮቤልዉ ፡ ወገብረ ፡ አብርሃም ፡ ግዝአ ፡ ዐቢየ ፡ በወርኅ ፡ ሣልስ ፡ በዕለተ ፡ ኀድገ ፡ ጥበ ፡ ወልዱ ፡ ደስሐቅ ። 2 ወይስማዔል ፡ ወልዳ ፡ ለአጋር ፡ ግብጻዊት ፡ በቅድመ ፡ ገጹ ፡ ለአብርሃም ፡ አቡሁ ፡ በመካኑ ፡ ወተፈሥሐ ፡ አብርሃም ፡ ወባረኮ ፡ ለእግዚአብሔር ፡ እስመ ፡ ርእየ ፡ ሎቱ ፡ ውሉዶ ፡ ወኢሞተ ፡ ዘእንበለ ፡ ውሉድ ፡ 3 ወተዘከረ ፡ ቃሎ ፡ ዘተናገሮ ፡ በዕለተ ፡ ተፈልጠ ፡ ሎጥ ፡ እምኔሁ ። ወተፈሥሐ ፡ እስመ ፡ ወሀቦ ፡ እግዚአብሔር ፡ ዘርአ ፡ በዲበ ፡ ምድር ፡ ከመ ፡ ይረሳ ፡ ለምድር ። ወባራኮ ፡ በኵሉ ፡ አፉሁ ፡ ለፈጣሬ ፡ ኵሉ ። 4 ወርእየቶ ፡ ለይስማዔል ፡ ሳራ ፡ እንዘ ፡ ይትዋነይ ፡ ወይዘፍን ፡ ወአብርሃምኒ ፡ እንዘ ፡ ይትፌሣሕ ፡ ፍሥሓ ፡ ዐቢየ ፡ ወቀንአት ፡ ለይስማዔል ። ወትቤሎ ፡ ለአብርሃም ፡ ስድድ ፡ ዛተ ፡ ወለተ ፡ ወወልዳ ፡ እስመ ፡ ኢይወርስ ፡ ወልዳ ፡ ለዛ ፡ ወለት ፡ ምስለ ፡ ወልድየ ፡ ይስሐቅ ። 5 ወማሕዝን ፡ ቃሉ ፡ በቅድመ ፡ አዕይንተ ፡ አብርሃም ፡ በእንተ ፡ አመቱ ፡ ወበእንተ ፡ ወልዱ ፡ ከመ ፡ ይስድዶሙ ፡ እምኀቤሁ ። 6 ወይቤሎ ፡ እግዚአብሔር ፡ ለአብርሃም ፡ ኢይኩን ፡ ሐዘን ፡ በቅድመ ፡ አዕይንቲከ ፡ በእንተ ፡ ሕፃን ፡ ወበእንተ ፡ ወለት ፡ ኵሎ ፡ ዘትቤለከ ፡ ሳራ ፡ ስማዕ ፡ ንባባ ፡ ወግበር ፡ እስመ ፡ በይስሐቅ ፡ ይጼዋዕ ፡ ለከ ፡ ስም ፡ ወዘርእ ። 7 ወበእንተ ፡ ወልዳስ ፡ ለዛ ፡ ወለት ፡ ውስተ ፡ ዐቢይ ፡ ሕዝብ ፡ እሬስዮ ፡ እስመ ፡ እምዘርእከ ፡ ውእቱ ። 8 ወጌሠ ፡ አብርሃም ፡ በነግህ ፡ ወነሥአ ፡ ሐባውዘ ፡ ወዝቀ ፡ ማይ ፡ ወአስከማ ፡ ለአጋር ፡ ወለሕፃን ፡ ወፈነዋ ፡ 9 ወሖረት ፡ ወታንጌጊ ፡ በገዳመ ፡ ቤርሳቦ ፡ ወተፈጸመ ፡ ማይ ፡ እምዝቅ ፡ ወጸምአ ፡ ሕፃን ፡ ወስእነ ፡ ሐዊረ ፡ ወወድቀ ። 10 ወነሥአቶ ፡ እሙ ፡ ወሐዊራ ፡ ገደፈቶ ፡ ታሕተ ፡ አሐቲ ፡ ኤልያስ ፡ ወሖረት ፡ ወነበረት ፡ አንጻሮ ፡ መጠነ ፡ አሐቲ ፡ ምንዳፍ ፡ እስመ ፡ ትቤ ፡ ኢይርአይ ፡ ሞቶ ፡ ለሕፃንየ ፡ ወነቢራ ፡ በከየት ። 11 ወይቤላ ፡ መልአክ ፡ አምላክ ፡ አሐዱ ፡ እምቅዱሳን ፡ ምንተ ፡ ትበክዪ ፡ አንቲ ፡ አጋር ፡ ተንሢአኪ ፡ ንሥእዮ ፡ ለሕፃን ፡ ወአኀዝዮ ፡ በእዴኪ ፡ እስመ ፡ ሰምዐ ፡ እግዚአብሔር ፡ ቃለኪ ፡ ወርእዮ ፡ ለሕፃን ። 12 ወከሠተት ፡ አዕይንቲሃ ፡ ወርእየት ፡ ዐዘቅተ ፡ ማይ ፡ ወሖረት ፡ ወመልአት ፡ ዝቃ ፡ ማየ ፡ ወአስተየት ፡ ሕፃና ። ወተንሥአት ፡ ወሖረት ፡ መንገለ ፡ በድወ ፡ ፍራም ። 13 ወልህቀ ፡ ሕፃን ፡ ወኮነ ፡ ነዳፌ ፡ ወሀሎ ፡ እግዚአብሔር ፡ ምስሌሁ ፡ ወነሥአት ፡ ሎሙ ፡ እሙ ፡ ብእሲተ ፡ እምአዋልደ ፡ ግብጽ ፡ 14 ወወለደት ፡ ሎቱ ፡ ወልደ ፡ ወጸውዐ ፡ ስሞ ፡ ናቤዎት ፡ እስመ ፡ ትቤ ፡ ቅሩብ ፡ እግዚአብሔር ፡ ሊተ ፡ ሶበ ፡ ጸዋዕክዎ ። 15 ወኮነ ፡ በሱባዔ ፡ ሳብዕ ፡ በቀዳሚ ፡ ዓመት ፡ በወርኅ ፡ ቀዳሚ ፡ በዝ ፡ ኢዮቤልዉ ፡ አመ ፡ ዐሡሩ ፡ ወሰኑዩ ፡ ለዝ ፡ ወርኅ ፡ ኮነ ፡ ቃላት ፡ በሰማያት ፡ በእንተ ፡ አብርሃም ። ከመ ፡ ውእቱ ፡ መሀይምን ፡ በኵሉ ፡ ዘይትናገሮ ፡ ወያፈቅሮ ፡ እግዚአብሔር ። ወበኵሉ ፡ ምንዳቤ ፡ ኮነ ፡ ምእመነ ። 16 ወመጽአ ፡ መኰንን ፡ መስቴማ ፡ ወይቤ ፡ ቅድሜሁ ፡ ለአምላክ ፡ ናሁ ፡ አብርሃም ፡ ያፈቅሮ ፡ ለይስሐቅ ፡ ወልዱ ፡ ወያስተአድሞ ፡ ኪያሁ ፡ እምኵሉ ። በሎ ፡ ያዕርጎ ፡ ጽንሐሐ ፡ ዲበ ፡ ምሥዋዕ ፡ ወአንተ ፡ ትሬኢ ፡ ለእመ ፡ ይገብር ፡ ዘንተ ፡ ቃለ ፡ ወታአምር ፡ ለእመ ፡ ወሀይምን ፡ ውእቱ ፡ በኵሉ ፡ ዘታሜክሮ ። 17 ወእግዚአብሔር ፡ ያአምር ፡ ከመ ፡ መሃይምን ፡ አብርሃም ፡ በኵሉ ፡ ምንዳቤ ፡ ዘይቤሎ ፡ እስመ ፡ አመክሮ ፡ በምድሩ ፡ ወበዐባር ፡ ወአመከሮ ፡ በብዕለ ፡ ነገሥት ። ወአመከሮ ፡ ካዕበ ፡ በብእሲቱ ፡ እንዘ ፡ ትትሀየድ ፡ ወበክስበት ፡ ወአመክሮ ፡ በይስማዔል ፡ ወበአጋር ፡ አመቱ ፡ አመ ፡ ፈነዎሙ ። 18 ወበኵሉ ፡ በዘአመከሮ ፡ ተረክበ ፡ ምእመነ ፡ ወኢተአንተለ ፡ ነፍሱ ፡ ወኢጐንደየ ፡ ገቢሮቶ ፡ እስመ ፡ ምእመን ፡ ወመፍቀሬ ፡ እግዚአብሔር ።