መጽሐፈ ኩፋሌ 16

16 1 ወበሠርቀ ፡ ወርኅ ፡ ራብዕ ፡ አስተርአይናሁ ፡ ለአብርሃም ፡ በኀበ ፡ ድርስ ፡ ዘማምሪም ፡ ወተናገርነ ፡ ምስሌሁ ፡ ወንሕነ ፡ አይዳዕናሁ ፡ ከመ ፡ ይትወሀቦ ፡ ወልድ ፡ እምሳራ ፡ ብእሲቱ ። 2 ወሰሐቀት ፡ ሳራ ፡ እስመ ፡ ሰምዐት ፡ ከመ ፡ ተናገርነ ፡ ዘንተ ፡ ቃለ ፡ ምስለ ፡ አብርሃም ። ወዘለፍናሃ ፡ ወፈርሀት ፡ ወሐሰወት ፡ ከመ ፡ ሰሐቀት ፡ በእንተ ፡ ቃል ፡ 3 ወነገርናሃ ፡ ስሞ ፡ ለወልዳ ፡ በከመ ፡ ሥሩዕ ፡ ወጽሑፍ ፡ ውስተ ፡ ጽላተ ፡ ሰማይ ፡ ይስሐቅ ። 4 ወአመ ፡ ገባእነ ፡ ኀቤሃ ፡ በጊዜ ፡ ሰዓት ፡ ወይእቲኒ ፡ ፀንሰት ፡ ወልደ ። 5 ወበዝ ፡ ወርኅ ፡ ገብረ ፡ እግዚአብሔር ፡ ኵነኔሆሙ ፡ ለሰዶም ፡ ወለገሞራ ፡ ወሶቦኤም ፡ ወለኵሉ ፡ አድያመ ፡ ዮርዳኖስ ፡ ወአውዓዮሙ ፡ በእሳት ፡ ወበተይ ፡ ወአጥፍኦሙ ፡ እስከ ፡ ዛቲ ፡ ዕለት ። በከመ ፡ ናሁ ፡ አይዳዕኩከ ፡ ኵሎ ፡ ምግባሮሙ ፡ ከመ ፡ ፀዋጋን ፡ ወኃጥኣን ፡ ጥቀ ፡ ወይትራኰሱ ፡ ወይዜምዉ ፡ በሥጋሆሙ ፡ ወይገብሩ ፡ ርኵሰ ፡ በዲበ ፡ ምድር ። 6 ወከማሁ ፡ ይገብር ፡ እግዚአብሔር ፡ ኵነኔ ፡ በመካናት ፡ በውእደ ፡ ይገብሩ ፡ በከመ ፡ ይኵሶሙ ፡ ለሰዶም ፡ ከመ ፡ ኵነኔሃ ፡ ለሰዶም ። 7 ወለሎጥ ፡ ናድኅኖ ፡ እስመ ፡ ተዘከሮ ፡ እግዚአብሔር ፡ ለአብርሃም ፡ ወአውፅኦ ፡ እማእከለ ፡ ግፍታኤ ። 8 ወገብረ ፡ ውእቱኒ ፡ ወአዋልዲሁኒ ፡ ኀጢአተ ፡ በዲበ ፡ ምድር ፡ ዘኢኮነ ፡ ዲበ ፡ ምድር ፡ እመዋዕለ ፡ አዳም ፡ እስከ ፡ አሜሁ ፡ እስመ ፡ ሰከበ ፡ ብእሲ ፡ ምስለ ፡ ወለቱ ፡ 9 ወናሁ ፡ ተአዘዘ ፡ ወተቈርፀ ፡ ላዕለ ፡ ኵሉ ፡ ዘርኡ ፡ ውስተ ፡ ጽላተ ፡ ሰማይ ፡ ከመ ፡ ያእትቶሙ ፡ ወከመ ፡ ይሠርዎሙ ፡ ወከመ ፡ ይግበር ፡ ኵነኔሆሙ ፡ በከመ ፡ ኵነኔ ፡ ሰዶም ፡ ወከመ ፡ ኢያትርፍ ፡ ሎቱ ፡ ኵሎ ፡ ዘርአ ፡ ውስተ ፡ ምድር ፡ ዘሰብእ ፡ በዕለተ ፡ ደይን ። 10 ወአዝንቱ ፡ ወርኅ ፡ ግዕዘ ፡ አብርሃም ፡ እምነ ፡ ኬብሮን ፡ ወሖረ ፡ ወኀደረ ፡ ማእከለ ፡ ቃዴስ ፡ ወሱር ፡ ውስተ ፡ አድባረ ፡ ጌራሮን ፡ 11 ወበመንፈቀ ፡ ወርኅ ፡ ኃምስ ፡ ግዕዘ ፡ እምህየ ፡ ወኀደረ ፡ ኀበ ፡ ዐዘቅተ ፡ መሐላ ። 12 ወበመንፈቀ ፡ ወርኅ ፡ ሳድስ ፡ ሐወጸ ፡ እግዚአብሔር ፡ ለሳራ ፡ ወገብረ ፡ ላቲ ፡ በከመ ፡ ይቤ ፡ 13 ወፀንሰት ፡ ወወለደት ፡ ወልደ ፡ በወርኅ ፡ ሣልስ ፡ ወበመንፈቀ ፡ ወርኅ ፡ በመዋዕል ፡ ዘይቤሎ ፡ እግዚአብሔር ፡ ለአብርሃም ፡ በበዓለ ፡ ቀዳሚ ፡ ማእረር ፡ ተወልደ ፡ ይስሐቅ ፡ 14 ወከሰቦ ፡ አብርሃም ፡ ወልደ ፡ መዋዕል ፡ ሰሙን ፡ ውእቱ ፡ ቀዳሚ ፡ ተከስበ ፡ በከመ ፡ ኪዳን ፡ እንተ ፡ ተሠርዐት ፡ ለዓለም ። 15 ወበዓመት ፡ ሳድስ ፡ ዘሱባዔ ፡ ራብዕ ፡ መጻእነ ፡ ኀበ ፡ አብርሃም ፡ ኀበ ፡ ዐዘቅተ ፡ መሐላ ፡ ወአስተርአይናሁ ፡ በከመ ፡ ንቤላ ፡ ለሳራ ፡ ከመ ፡ ንግባእ ፡ ኀቤሃ ፡ ወይእቲሂ ፡ ፀንሰት ፡ ወልደ ፡ 16 ወተመየጥነ ፡ በወርኅ ፡ ሳብዕ ፡ ወረከብናሃ ፡ ለሳራ ፡ ፅንስተ ፡ ቅድሜነ ፡ ወባረክናሃ ፡ ወዜነውናሃ ፡ ኵሎ ፡ ዘተአዘዘ ፡ ሎቱ ፡ ከመ ፡ ኢይመውት ፡ ዓዲ ፡ እስከ ፡ ይወልድ ፡ ስድስተ ፡ ውሉደ ፡ ወይሬኢ ፡ ዘእንበለ ፡ ይሙት ። ወበይስሐቅ ፡ ይጼዋዕ ፡ ሎቱ ፡ ስም ፡ ወዘርእ ፡ 17 ወኵሉ ፡ ዘርአ ፡ ውሉዱ ፡ አሕዛበ ፡ ይከውኑ ፡ ወምስለ ፡ አሕዛብ ፡ ይትኌለቁ ። ወእምነ ፡ ውሉደ ፡ ይስሐቅሂ ፡ አሐዱ ፡ ይከውን ፡ ለዘርእ ፡ ቅዱስ ፡ ወውስተ ፡ አሕዛብኒ ፡ ኢይትኌለቍ ። 18 እስመ ፡ ለመክፈልተ ፡ ልዑል ፡ ይከውን ፡ ወውስተ ፡ ዘይመልክ ፡ አምላክ ፡ ወረደ ፡ ኵሉ ፡ ዘርኡ ፡ ከመ ፡ ይኩን ፡ ለእግዚአብሔር ፡ ሕዝበ ፡ ትርሲት ፡ እምኵሉ ፡ ሕዝብ ፡ ወከመ ፡ ይኩን ፡ መንግሥተ ፡ ወክህነተ ፡ ወሕዝበ ፡ ቅዱሰ ። 19 ወሖርነ ፡ ፍኖተነ ፡ ወዜነውናሃ ፡ ለሳራ ፡ ኵሎ ፡ ዘነገርናሁ ፡ ወተፈሥሑ ፡ ክልኤሆሙ ፡ ፍሥሐ ፡ ዐቢየ ፡ ጥቀ ። 20 ወሐነጸ ፡ ህየ ፡ ምሥዋዐ ፡ ለእግዚአብሔር ፡ ዘባልሖ ፡ ወለዘያስተፈሥሖ ፡ በምድረ ፡ ፍልሰቱ ። ወገብረ ፡ በዓለ ፡ ፍሥሓ ፡ በዝ ፡ ወርኅ ፡ ሰቡዐ ፡ መዋዕለ ፡ በቅሩበ ፡ ምሥዋዕ ፡ ዘሐነጸ ፡ ኀበ ፡ ዐዘቅተ ፡ መሐላ ፡ 21 ወሐነጸ ፡ ምጽላላተ ፡ ሎቱ ፡ ወለአግብርቲሁ ፡ በዛቲ ፡ በዓል ፡ ወውእቱ ፡ መቅድመ ፡ ገብረ ፡ በዓለ ፡ መጸላት ፡ በዲበ ፡ ምድር ፡ 22 ወበዝ ፡ ሰቡዕ ፡ መዋዕል ፡ ሀሎ ፡ ይቄርብ ፡ ኵሎ ፡ ዕለተ ፡ በበ ፡ ዕለት ፡ ውስተ ፡ ምሥዋዕ ፡ ጽንሐሐ ፡ ለእግዚአብሔር ፡ አልህምተ ፡ ክልኤተ ፡ ወአብሐኰ ፡ ክልኤተ ፡ አባግዐ ፡ ሰብዓተ ፡ መሐስአ ፡ ጠሊ ፡ አሐደ ፡ በእንተ ፡ ኃጢአት ፡ ከመ ፡ ያስተስሪ ፡ ቦቱ ፡ በእንቲአሁ ፡ ወበእንተ ፡ ዘርኡ ፡ 23 ወለመሥዋዕተ ፡ መድኃኒት ፡ አብሐኰ ፡ ሰብዓተ ፡ ወመሐስአ ፡ ሰብዓተ ፡ ወአባግዐ ፡ ሰብዓተ ፡ ወደቤላተ ፡ ሰብዓተ ፡ ወመሥዋዕቶሙሂ ፡ ወሞጻሕቶሙሂ ፡ ላዕለ ፡ ኵሉ ፡ ሥብሖሙ ፡ የዐጥን ። በዲበ ፡ ምሥዋዕ ፡ ጽንሐሐ ፡ ኅሩየ ፡ ለመዓዛ ፡ ሠናይ ። 24 ወበጽባሕ ፡ ወሰርክሂ ፡ የዐጥን ፡ አፈወ ፡ ስኂን ፡ ወቅንአተ ፡ ወማየ ፡ ልብን ፡ ወናርዶስ ፡ ወከርቤ ፡ ወሰንብልተ ፡ ወቍስጠ ፡ ሰብዓቲሆሙ ፡ ዘንተ ፡ ኵሎ ፡ ይቄርብ ፡ ወጉአ ፡ ዕሩየ ፡ ተዐርዮ ፡ ድሙረ ፡ ንጹሐ ። 25 ወገብረ ፡ ዘንተ ፡ በዓለ ፡ ሰቡዐ ፡ መዋዕለ ፡ እንዘ ፡ ይትፌሠሕ ፡ በኵሉ ፡ ልቡ ፡ ወበኵሉ ፡ ነፍሱ ፡ ውእቱ ፡ ወኵሎሙ ፡ እለ ፡ ቤቱ ፡ ወአልቦ ፡ መነሂ ፡ ነኪረ ፡ ምስሌሁ ፡ ወኵሉ ፡ ዘኢኮነ ፡ ክሱበ ። 26 ወባረኮ ፡ ለፈጣሪሁ ፡ ዘፈጠሮ ፡ በትዝምዱ ፡ እስመ ፡ ለሥምረቱ ፡ ፈጠሮ ፡ እስመ ፡ አእመረ ፡ ወጠየቀ ፡ ከመ ፡ እምኔሁ ፡ ይከውን ፡ ተክለ ፡ ጽድቅ ፡ ለትውልድ ፡ ዘለዓለም ፡ ወእምኔሁ ፡ ዘርእ ፡ ቅዱስ ፡ ከመ ፡ ይኩን ፡ ከማሁ ፡ ለዘ ፡ ገብረ ፡ ኵሎ ። 27 ወባረከ ፡ ወተፈሥሐ ፡ ወጸውዐ ፡ ስማ ፡ ለዛቲ ፡ በዓል ፡ በዓለ ፡ እግዚአብሔር ፡ ፍሥሓ ፡ ስጥወተ ፡ ለአምላክ ፡ ልዑል ። 28 ወባረክናሁ ፡ ለዓለም ፡ ወኵሎ ፡ ዘርአ ፡ ዘእምድኅሬሁ ፡ በኵሉ ፡ ትውልደ ፡ ምድር ፡ እስወ ፡ ገብረ ፡ ዘንተ ፡ በዓለ ፡ በጊዜሃ ፡ በከመ ፡ ስምዐ ፡ ጽላተ ፡ ሰማይ ። 29 በእንተዝ ፡ ተሠርዐ ፡ ውስተ ፡ ጽላተ ፡ ሰማይ ፡ ላዕለ ፡ እስራኤል ፡ ከመ ፡ ይኩኑ ፡ ገባርያነ ፡ በዓለ ፡ መጸለት ፡ ሰቡዐ ፡ መዋዕለ ፡ በፍሥሓ ፡ በወርኅ ፡ ሳብዕ ፡ ዘይትወከፍ ፡ በቅድመ ፡ እግዚአብሔር ፡ ሕገ ፡ ዘለዓለም ፡ በትውልዶሙ ፡ በኵሉ ፡ ዓመት ፡ ወዓመታት ። 30 ወአልቦ ፡ ለዝንቱ ፡ ወሰነ ፡ መዋዕል ፡ እስመ ፡ ለዓለም ፡ ውእቱ ፡ ሥሩዕ ፡ ላዕለ ፡ እስራኤል ፡ ከመ ፡ ይግበርዋ ፡ ወይንበሩ ፡ ወስተ ፡ ምጽላል ፡ ወከመ ፡ ያንብሩ ፡ አክሊላተ ፡ ዲበ ፡ ርእሶሙ ፡ ወከመ ፡ ይንሥኡ ፡ ዐጽቀ ፡ ቈጽል ፡ ወኲሐ ፡ እሙሐዝ ። 31 ወነሥአ ፡ አብርሃም ፡ ልበ ፡ ፀበርት ፡ ወፍሬ ፡ ዕፅ ፡ ሠናይ ፡ ወበኵሉ ፡ ዕለት ፡ እምዕለት ፡ ሀሎ ፡ እንዘ ፡ የአውድ ፡ ምሥዋዐ ፡ በአዕፁቅ ፡ ስብዕ ፡ ለዕለት ፡ በጽባሕ ፡ ይጼብሕ ፡ ወይገኒ ፡ ለአምላኩ ፡ ኵሎ ፡ ዘበፍሥሓ ።