መሓልየ መሓልይ 8

መኑ ፡ ይሁበከ ፡ ወልድ ፡ እኁየ ፡ ትጥቡ ፡ አጥባቲሃ ፡ ለእምየ ፤ ረኪብየ ፡ በአፍአ ፡ እስዕመከ ፡ ወኢይሜንኑኒ ። እነሥአከ ፡ ወኣበውአከ ፡ ውስተ ፡ ቤተ ፡ እምየ ፡ ወውስተ ፡ ውሳጥያቲሃ ፡ ለእንተ ፡ ሐፀነተኒ ፤ ኣሰትየከ ፡ እምርሔ ፡ አፈውየ ፡ ወእምስቴ ፡ ሮማንየ ። የመኑ ፡ ተሐቅፈኒ ፤ ወፀጋሙ ፡ ታሕተ ፡ ርእስየ ። አምሐልኩክን ፡ አዋልደ ፡ ኢየሩሳሌም ፡ በኀይሉ ፡ ወበጽንዑ ፡ ለገዳም ፤ አመ ፡ ተንሥአ ፡ ወአንሥአ ፤ ኣፈቅሮ ፡ እስከ ፡ አመ ፡ ፈቀደ ። መኑ ፡ ይእቲ ፡ ዛቲ ፡ እንተ ፡ ትሔውጽ ፡ ከመ ፡ ጎሕ ፡ ጽዕዱት ፡ ወብርህት ፡ እንተ ፡ ትትመረጐዝ ፡ በወልድ ፡ እኁሃ ፤ እምኀበ ፡ ኮል ፡ አንሣእኩከ ፤ በህየ ፡ ሐመት ፡ ብከ ፡ እምከ ፡ ወበህየ ፡ ሐመት ፡ ብከ ፡ ወላዲትከ ። አንብረኒ ፡ ከመ ፡ ሕልቀት ፡ ውስተ ፡ ልብከ ፡ ወከመ ፡ ማዕተብ ፡ በመዝራዕትከ ፤ እስመ ፡ ፍቅር ፡ ከመ ፡ ሞት ፡ ጽንዕት ፡ ወድርክት ፡ ከመ ፡ ሲኦል ፡ ቅንአት ፤ ክነፊሃ ፡ ክነፈ ፡ እሳት ፡ ላህባ ። ማይ ፡ ብዙኅ ፡ ኢይክል ፡ አጥፍኦታ ፡ ለፍቅር ፡ ወአፍላግኒ ፡ ኢያንቀለቅልዋ ፤ እመ ፡ ወሀበ ፡ ብእሲ ፡ ኵሎ ፡ ንብረቶ ፡ ለፍቅር ፡ መንኖ ፡ ይሜንንዎ ። እኅትነ ፡ ንስቲት ፡ ይእቲ ፡ ወአጥባት ፡ አልባ ፤ ምንተ ፡ ንግበር ፡ ለእኅትነ ፡ በዕለት ፡ አመ ፡ ይትናገሩ ፡ ባቲ ። እመ ፡ አረፍት ፡ ይእቲ ፡ ንሕንጽ ፡ ዲቤሃ ፡ ተድባበ ፡ ዘብሩር ፤ ወለእመ ፡ ኆኅት ፡ ይእቲ ፡ ንግበር ፡ ላቲ ፡ ማዕጾ ፡ ዘቄድሮስ ። አነ ፡ ቅጽር ፡ ወአጥባትየ ፡ ከመ ፡ ማኅፈድ ፤ አነ ፡ ይእቲ ፡ በአዕይንቲሁ ፡ እረክብ ፡ ሰላመ ። ዐጸደ ፡ ወይን ፡ ኮነ ፡ ለሰሎሞን ፡ በብዔላሞን ፤ ወወሀበ ፡ ዐጸደ ፡ ወይኑ ፡ ለእለ ፡ የዐቅቡ ፡ ፍሬሁ ፡ ብእሲ ፡ ብእሲ ፡ ይሁብ ፡ ፍሬሁ ፡ በበጊዜሁ ፡ ዐሠርቱ ፡ ምእት ፡ ብሩር ። ዐጸደ ፡ ወይንየ ፡ ሊተ ፡ እንተ ፡ አንጻርየ ፤ ዐሠርቱ ፡ ምእት ፡ ለሰሎሞን ፡ ወክልኤቱ ፡ ምእት ፡ ለእለ ፡ የዐቅቡ ፡ ፍሬሁ ። ዘይነብር ፡ ውስተ ፡ ገነት ፡ ካልአን ፡ ርእይዎ ፤ ቃለከ ፡ አስምዐኒ ። ጕይይ ፡ አንተ ፡ ወልድ ፡ እኁየ ፡ ወተመሰላ ፡ ለወይጠል ፡ ወእመ ፡ አኮ ፡ ከመ ፡ ወሬዛ ፡ ኀየል ፡ ውስተ ፡ አድባረ ፡ ድኁኃን ።