መሓልየ መሓልይ 7

ተመየጢ ፡ ተመየጢ ፡ ሱላሜጢስ ፡ ተመየጢ ፡ ወንርአይ ፡ ብኪ ፡ ሰላመ ፤ ምንተ ፡ ትሬእዩ ፡ በእንተ ፡ ሰላመ ፡ ሰጣዊት ፤ እንተ ፡ ትሔውጽ ፡ እምርሑቅ ፡ ከመ ፡ መድበለ ፡ መኅባር ። ጥቀ ፡ አዳም ፡ ሑረታትኪ ፡ ዘበሥን ፡ ወለተ ፡ ናዳብ ፤ ንብረተ ፡ መናቅዕትኪ ፡ ይመስል ፡ አርማስቆስ ፡ ግብረ ፡ እደ ፡ ኬንያ ። ሕንብርትኪ ፡ ከመ ፡ ማዕከክ ፡ ፍሑቅ ፡ ዘኢየዐርቅ ፡ እምቱስሕቱ ፤ ከርሥኪ ፡ ስውጠ ፡ ሥርናይ ፡ ወሕጹር ፡ በጽጌ ። ክልኤ ፡ አጥባትኪ ፡ ከመ ፡ ክልኤ ፡ እጕለ ፡ መንታ ፡ ዘወይጠል ። ወክሳድኪ ፡ ከመ ፡ ማኅፈደ ፡ ቀርነ ፡ ነጌ ። አዕይንትኪ ፡ ከመ ፡ ምዕቃላተ ፡ በኤሴቦን ፡ በአናቅጽ ፡ ወለተ ፡ ብዙኃን ፤ አንፍኪ ፡ ይመስል ፡ ማኅፈደ ፡ ሊባኖስ ፡ ዘይኔጽር ፡ መንገለ ፡ ገጸ ፡ ደማስቆ ። ሥዕርትኪ ፡ ዘዲቤኪ ፡ ከመ ፡ ቀርሜሎስ ፤ ወፅፍሮ ፡ ርእስኪ ፡ ከመ ፡ ሜላት ፤ አሠረ ፡ ንጉሥ ፡ ለረዊጽ ። ጥቀ ፡ ሠነይኪ ፡ ወጥቀ ፡ አደምኪ ፤ ኣፈቅሮ ፡ ለፍግዕኪ ። ዘቆምኪ ፡ ይመስል ፡ በቀልተ ፤ ወአጥባትኪ ፡ ከመ ፡ ሄላ ። እቤ ፡ እዕርግ ፡ ውስተ ፡ በቀልት ፡ ወአኀዝ ፡ መልዕልቶ ፤ ወኮነ ፡ አጥባትኪ ፡ ከመ ፡ አስካል ፡ ወጼና ፡ አንፍኪ ፡ ከመ ፡ ኮል ። ወጕርዔኪ ፡ ከመ ፡ ወይን ፡ ሠናይ ፤ እንዘ ፡ የሐውር ፡ ወልድ ፡ እኁየ ፡ እንዘ ፡ ይደሉ ፡ ለከናፍርየ ፡ ወለልሳንየ ። አነ ፡ ለወልድ ፡ እኁየ ፡ ወኀቤየ ፡ ምግባኢሁ ። ነዓ ፡ ወልድ ፡ እኁየ ፡ ንፃእ ፡ ሐቅለ ፤ ናዕርፍ ፡ ውስተ ፡ አድያም ። ንጊስ ፡ ውስተ ፡ ኣዕጻዳተ ፡ ወይን ፤ ንርአይ ፡ እመ ፡ ጸገየ ፡ ወይን ፡ ወእመ ፡ ጸገየ ፡ ቆዕ ፡ ወእመ ፡ ፈረየ ፡ ሮማን ፤ በህየ ፡ እሁብ ፡ አጥባትየ ፡ ለከ ። ዕንጐታት ፡ ወሀቡ ፡ መዐዛ ፤ ወውስተ ፡ ኣዕጻዲነ ፡ ኵሉ ፡ አቅማሕ ፤ ሐዲስ ፡ ምስለ ፡ ብሉይ ፤ ወልድ ፡ እኁየ ፡ አነ ፡ ዐቀብኩ ፡ ለከ ።