መሓልየ መሓልይ 3

በዐራትየ ፡ በለያልይ ፡ እኅሥሥ ፡ ዘአፍቀረት ፡ ነፍስየ ፤ ኀሠሥክዎ ፡ ወኢረከብክዎ ፤ ጸዋዕክዎ ፡ ወኢተሰጥወኒ ። እትነሣእ ፡ ወአዐውድ ፡ ሀገረ ፡ ውስተ ፡ ምሥያጣት ፡ ወውስተ ፡ መራሕብት ፤ እኅሥሥ ፡ ዘአፍቀረት ፡ ነፍስየ ፤ ኀሠሥክዎ ፡ ወኢረከብክዎ ፡ ጸዋዕክዎ ፡ ወኢተሰጥወኒ ። ረከቡኒ ፡ መዓቅብት ፡ እለ ፡ የዐውዱ ፡ ሀገረ ፤ ዘአፍቀረት ፡ ነፍስየ ፡ ርኢክሙኑ ። ንስቲተ ፡ ኅሊፍየ ፡ እምኔሆሙ ፡ ውእተ ፡ ጊዜ ፡ ረከብኩ ፡ ዘአፍቀረት ፡ ነፍስየ ፤ አኀዝክዎ ፡ ወኢየኀድጎ ፡ እስከ ፡ ሶበ ፡ አባእክዎ ፡ ውስተ ፡ ቤተ ፡ እምየ ፡ ወውስተ ፡ ውሳጥያቲሃ ፡ ለእንተ ፡ ሐፀነተኒ ። አምሐልኩክን ፡ አዋልደ ፡ ኢየሩሳሌም ፡ በኀይሉ ፡ ወበጽንዑ ፡ ለገዳም ፤ አመ ፡ ተንሥአ ፡ ወአንሥአ ፤ ኣፈቅሮ ፡ እስከ ፡ አመ ፡ ፈቀደ ። መኑ ፡ ይእቲ ፡ ዛቲ ፡ እንተ ፡ ተዐርግ ፡ እምገዳም ፡ ከመ ፡ ሠርጸ ፡ ጢስ ፡ ዕጥነታ ፤ ከርቤ ፡ ወስኂን ፡ እምኵሉ ፡ ጸበለ ፡ ኤፌንዮስ ። ናሁ ፡ ዐራቱ ፡ ለሰሎሞን ፤ ስሳ ፡ ኀያላን ፡ ዐውዳ ፡ እምኀያላነ ፡ እስራኤል ። ኵሎሙ ፡ እኁዛነ ፡ አስይፍት ፡ ወምሁራነ ፡ ቀትል ፤ ብእሲ ፡ ብእሲ ፡ ሰይፉ ፡ ዲበ ፡ መንቅዕቱ ፡ በድንጋፄ ፡ ሌሊት ። መጾረ ፡ ገብረ ፡ ለርእሱ ፡ ንጉሥ ፡ ሰሎሞን ፡ እምዕፀወ ፡ ሊባኖስ ። አዕማዲሁ ፡ ገብረ ፡ ዘብሩር ፤ ምስማኩ ፡ ዘወርቅ ፤ መንበሩ ፡ ዘሜላት ፤ ውስጡ ፡ንጹፍ ፡ በእብነ ፡ ሰንፔር ፤ ኣፈቅሮ ፡ እምአዋልደ ፡ ኢየሩሳሌም ። ፃኣ ፡ ትርአያ ፡ አዋልደ ፡ ጽዮን ፡ ለንጉሥ ፡ ሰሎሞን ፡ በአክሊል ፡ ዘአስተቀጸለቶ ፡ እሙ ፡ አመ ፡ ዕለተ ፡ መርዓሁ ፡ ወአመ ፡ ዕለተ ፡ ፍሥሓ ፡ ልቡ ።