መሓልየ መሓልይ 1

መሓልየ ፡ መሓልይ ። መሓልየ ፡ መሓልይ ፡ ዝውእቱ ፡ ዘሰሎሞን ። ይስዕመኒ ፡ በስዕመተ ፡ አፉሁ ፤አዳም ፡ አጥባትኪ ፡ እምወይን ። ወመዐዛ ፡ ዕፍረትኪ ፡ እምኵሉ ፡ አፈው ፤ ዕፍረት ፡ ዘተሰውጠ ፡ ስምከ ። ወበእንተዝ ፡ ደናግል ፡ አፍቀራከ ፡ ወሰሐባከ ፡ ድኅሬከ ፤ በመዐዛ ፡ ዕፍረትከ ፡ ንረውጽ ። አብአኒ ፡ ንጉሥ ፡ ውስተ ፡ ጽርሑ ፤ ንትፈሣሕ ፡ ወንትሐሠይ ፡ ብከ ፤ ናፈቅር ፡ አጥባተኪ ፡ እምወይን ፡ ወርቱዕ ፡ አፍቅሮትኪ ። ጸላም ፡ አነ ፡ ወሠናይት ፡ እምአዋልደ ፡ ኢየሩሳሌም ፤ ከመ ፡ ምጽላላተ ፡ ቄዳር ፡ ወኀይመታተ ፡ ሰሎሞን ። ኢትርአያኒ ፡ እስመ ፡ አነ ፡ ጸላም ፡ እስመ ፡ ኢርእየኒ ፡ ፀሓይ ። ደቂቀ ፡ እምየ ፡ ተበአሱ ፡ በእንቲአየ ፤ አንበሩኒ ፡ ዐቃቢተ ፡ ዐጸደ ፡ ወይን ፤ ዐጸደ ፡ ወይን ፡ ዘዚአየ ፡ ኢዐቀብኩ ። ንግረኒ ፡ ዘአፍቀረት ፡ ነፍስየ ፡ አይቴ ፡ ትሬዒ ፡ ወአይቴ ፡ ትሰክብ ፡ ጊዜ ፡ ቀትር ፤ ከመ ፡ ኢይኩን ፡ እንዘ ፡ አንጌጊ ፡ ውስተ ፡ መራዕየ ፡ ካልአኒከ ። እመ ፡ ኢያእመርኪ ፡ ርእሰኪ ፡ ሠናይት ፡ እምአንስት ፡ ፃኢ ፡ አንቲ ፡ ውስተ ፡ ሰኰናሆሙ ፡ ለመርዔት ፤ ወርዐዪ ፡ መሓስዐ ፡ አጣሊኪ ፡ ውስተ ፡ አዕጻዳቲሆሙ ፡ ለኖሎት ። ለፈረስየ ፡ ወለሰረገላተ ፡ ፈርዖን ፡ አስተማሰልኩኪ ፡ እንተ ፡ ኀቤየ ። ጥቀ ፡ አዳም ፡ መላትሕኪ ፡ ከመ ፡ ማዕነቅ ፡ ወክሳድኪ ፡ ከመ ፡ አርማስቆስ ። አምሳለ ፡ ወርቅ ፡ ይግበሩ ፡ ለኪ ፡ ኰሳኵሰ ፡ ዘብሩር ። እስከ ፡ ሶበ ፡ ንጉሥ ፡ ያሰምክ ፡ ቦቱ ፡ ናርዶስ ፡ ወሀበ ፡ መዐዛሁ ። ዕቍረ ፡ ማየ ፡ ልብን ፡ ዘወልድ ፡ እኁየ ፡ ሊተ ፤ ማእከለ ፡ አጥባትየ ፡ ያዐርፍ ። አስካል ፡ ዘጸገየ ፡ ዘወልድ ፡ እኁየ ፡ ሊተ ፡ ውስተ ፡ ዐጸደ ፡ ወይን ፡ ዘበጋዲ ። ነያ ፡ ሠናይት ፡ እንተ ፡ ኀቤየ ፡ ነያ ፡ ሠናይት ፤ አዕይንትኪ ፡ ዘርግብ ። ናሁ ፡ ሠናይ ፡ አንተ ፡ ወልድ ፡ እኁየ ፤ አዳም ፡ በውስተ ፡ ምስካቢነ ፡ ዘይጼልል ። ወሀብኩ መዋጽሕተ ፡ ቤትነ ፡ ዘአርዝ ፡ ወመሥእርቲነ ፡ ዘሕቍ ።