ዘዘካርያስ ነቢይ 4

ወተመይጠ ፡ መልአክ ፡ ዘይትናገረኒ ፡ ወአንሥአኒ ፡ ከመ ፡ ሶበ ፡ ይነቅህ ፡ ሰብእ ፡ እምንዋም ። ወይቤለኒ ፤ ምንተ ፡ ትሬኢ ፤ ወእቤ ፤ ርኢኩ ፡ ተቅዋመ ፡ ማኅቶት ፡ ዘኵለንታሃ ፡ ወርቅ ፡ ወማኅቶት ፡ ዲቤሃ ፡ ወሰብዐቱ ፡ መኃትው ፡ ላዕሌሃ ፡ ወሰብዐቱ ፡ መሳውር ፡ በዘ ፡ ይሰቅይዋ ፡ ለመኃትዊሃ ፡ ዘዲቤሃ ። ወክልኤ ፡ ዘይት ፡ መልዕልታ ፡ አሐቲ ፡ በየማነ ፡ ማኅቶታ ፡ ወአሐቲ ፡ በፀጋማ ። ወእምዝ ፡ ተሰአልክዎ ፡ ለዝኩ ፡ መልአክ ፡ ዘይትናገረኒ ፡ ወእቤሎ ፤ ምንትኑ ፡ ዝንቱ ፡ እግዚእየ ። ወይቤለኒ ፡ ዝኩ ፡ መልአክ ፡ ዘይትናገረኒ ፤ ኢታአምርኑአ ፡ ምንትኑዝ ፤ ወእቤ ፤ አልቦ ፡ እግዚእየ ። ወይቤለኒ ፤ ዝውእቱ ፡ ቃለ ፡ እግዚአብሔር ፡ ዘይቤሎ ፡ ለዝሩባቤል ፤ አኮአ ፡ በኀይል ፡ ዐቢይ ፡ ወአኮአ ፡ በጽንዕ ፡ እንበለ ፡ በመንፈስየ ፤ ይቤ ፡ እግዚአብሔር ፡ ዘኵሎ ፡ ይመልክ ። ምንት ፡ ውእቱ ፡ ለከ ፡ ደብር ፡ ዐቢይ ፡ ከመ ፡ ያስተራትዕ ፡ ወኣመጽኣ ፡ ለእብን ፡ ርትዕት ፡ ወኣዔርያ ፡ ወኣሠንያ ፡ ወኣሞግሳ ። ወኮነ ፡ ቃለ ፡ እግዚአብሔር ፡ ኀቤየ ፡ ወይቤለኒ ። እደወ ፡ ዝሩባቤል ፡ ሣረራሁ ፡ ለዝንቱ ፡ ቤት ፡ ወእደዊሁ ፡ ይፌጽማሁ ፡ ወታአምር ፡ ከመ ፡ እግዚአብሔር ፡ ዘኵሎ ፡ ይመልክ ፡ ፈነወኒ ፡ ኀቤከ ። እስመ ፡ አስተሐቀረ ፡ ወይትፌሥሑ ፡ ወይሬእይዋ ፡ ለእብነ ፡ ናእክ ፡ ውስተ ፡ እዴሁ ፡ ለዝሩባቤል ፤ እሙንቱ ፡ ሰብዐቱ ፡ አዕይንቲሁ ፡ ለእግዚአብሔር ፡ ውእቱ ፡ ዘይኔጽር ፡ ኵሎ ፡ ምድረ ። ወእቤሎ ፤ ምንት ፡ እንከ ፡ እላንቱ ፡ ክልኤቱ ፡ ዘይት ፡ ዘበየማነ ፡ ተቅዋመ ፡ ማኅቶት ፡ ወበፀጋማ ። ወካዕበ ፡ እቤሎ ፤ ምንትኑ ፡ አዕጹቀ ፡ ዘይት ፡ እሉ ፡ ክልኤቱ ፡ ዘውስተ ፡ እዴሁ ፡ ወክልኤቱ ፡ አጥባት ፡ ዘይሰውጥ ፡ ወዘያስተናሥእ ፡ በመሰውሪ ፡ ዘወርቅ ። ወይቤለኒ ፤ ኢታአምርኑ ፡ ምንት ፡ ዝንቱ ፤ ወእቤሎ ፤ አልቦ ፡ እግዚእየ ። ወይቤለኒ ፤ እሉኬ ፡ ደቂቀ ፡ ጠላት ፡ እሙንቱ ፡ እለ ፡ አቀምዋ ፡ ለኵላ ፡ ምድር ፡ ለእግዚአብሔር ።