ዘዘካርያስ ነቢይ 11

አርኁ ፡ አናቅጺከ ፡ ሊባኖስ ፡ ወትበልዕ ፡ እሳት ፡ አርዘከ ። ለየዐይ ፡ ባሕሩስ ፡ እስመ ፡ ወድቀ ፡ ዘግባ ፡ እስመ ፡ ፈድፋደ ፡ ኀስሩ ፡ መኳንንት ፤ ለየዐይ ፡ ዖመ ፡ ባሳን ፡ እስመ ፡ ተገዝመ ፡ ዖም ፡ ሐዲስ ፡ ተክል ። ቃለ ፡ ኖሎት ፡ እለ ፡ ያስቆቅዉ ፡ እስመ ፡ ኀስረ ፡ ዕበዮሙ ፤ ቃለ ፡ አናብስት ፡ እለ ፡ ይጥሕሩ ፡ እስመ ፡ ኀስረ ፡ አድያመ ፡ ዮርዳኖስ ። ከመዝ ፡ ይቤ ፡ እግዚአብሔር ፡ ዘኵሎ ፡ ይመልክ ፤ ረዐይዎን ፡ ለአባግዐ ፡ ቀትል ። ወእመሂ ፡ አድምዑ ፡ ረገዙ ፡ ወኢነስሑ ፡ ወእለሂ ፡ ይሠይጥዎን ፡ ይቤሉ ፤ ይትባረክ ፡ እግዚአብሔር ፡ ወብዕልነ ፡ ወእለሂ ፡ ይርዕይዎሙ ፡ ኢያጽህቆሙ ፡ ወኢምንተኒ ፡ በእንቲአሆን ። በእንተ ፡ ዝንቱ ፡ ኢይምህኮሙ ፡ እንከ ፡ ለእለ ፡ ይነብሩ ፡ ውስተ ፡ ምድር ፤ ይቤ ፡ እግዚአብሔር ፤ ወናሁ ፡ አነ ፡ ኣገብኦ ፡ ለሰብእ ፡ አሐዱ ፡ ውስተ ፡ እደ ፡ ካልኡ ፡ ወውስተ ፡ እደ ፡ ንጉሡ ፡ ወያኀልቅዋ ፡ ለምድር ፡ ወኢያድኅኖሙ ፡ እምእዴሆሙ ። ወእርዕዮሙ ፡ ለአባግዐ ፡ ቀትል ፡ ውስተ ፡ ከናአን ፡ ወእነሥእ ፡ ሊተ ፡ ክልኤ ፡ አብትረ ፡ ለአሐቲኒ ፡ ሰመይክዋ ፡ ሥነ ፡ ወለካልእታ ፡ ሰመይክዋ ፡ ሐብለ ፡ ወእርዕዮሙ ፡ ለአባግዕየ ። ወኣጠፍኦሙ ፡ ለሠለስቱ ፡ ኖሎት ፡ በአሐዱ ፡ ወርኅ ፡ ወትከብድ ፡ ነፍስየ ፡ ላዕሌሆሙ ፤ እስመ ፡ ነፍሶሙ ፡ ግዕረት ፡ ላዕሌየ ። ወእቤሎሙ ፤ ኢይርዕየክሙ ፡ ዘሞተሂ ፡ ለይሙት ፡ ዘደክመሂ ፡ ለይድከም ፡ ወዘተርፈ ፡ ይብላዕ ፡ ሥጋ ፡ ቢጹ ። ወኣነሥኣ ፡ ለበትርየ ፡ ለሥን ፡ ወእገድፋ ፡ ከመ ፡ እሚጥ ፡ ኪዳንየ ፡ ዘተካየድኩ ፡ ምስለ ፡ ኵሉ ፡ አሕዛብ ። ወእትመየጥ ፡ ይእተ ፡ አሚረ ፡ ወያአምርዎን ፡ ከናአን ፡ ለአባግዕ ፡ እለ ፡ ተዐቅባ ፡ እስመ ፡ ቃለ ፡ እግዚአብሔር ፡ ውእቱ ። ወእቤሎሙ ፤ እመ ፡ አሥመርኩክሙ ፡ በቅድሜክሙ ፡ ሀቡኒ ፡ ዐስብየ ፡ ድልው ፡ ሊተ ፡ ወድልዉ ፡ ዐስብየ ፡ ሠላሳ ፡ ብሩረ ። ወይቤለኒ ፡ እግዚአብሔር ፤ ደዮ ፡ ውስተ ፡ ሕንቅርት ፡ ወፍትኖ ፡ ለእመ ፡ ጽሩይ ፡ ውእቱ ፡ በከመ ፡ አመከርዎ ፡ እሙንቱ ፤ ወነሣእኩ ፡ ዝኩ ፡ ሠላሳ ፡ ብሩረ ፡ ወወደይክዎ ፡ ውስተ ፡ ሕንቅርት ፡ በቤተ ፡ እግዚአብሔር ። ወገደፍኩ ፡ ካልእተ ፡ በትርየ ፡ ሐብለ ፡ ከመ ፡ እሚጥ ፡ መኰንነ ፡ ዘማእከለ ፡ ይሁዳ ፡ ወዘማእከለ ፡ ኤሩሳሌም ። ወይቤለኒ ፡ እግዚአብሔር ፤ ዓዲ ፡ ንሣእ ፡ ለከ ፡ ንዋየ ፡ ኖሎት ፡ ዘኖላዊ ፡ አብድ ። እስመ ፡ ናሁ ፡ አነ ፡ ኣነሥእ ፡ ኖላዌ ፡ ውስተ ፡ ምድር ፤ ዘተገድፈ ፡ ኢይረድእ ፡ ወዘተዘርወሂ ፡ ኢያስተጋብእ ፡ ወዘቈስለሂ ፡ ኢይፌውስ ፡ ወዘሐይወሂ ፡ ኢያረትዕ ፡ ወይበልዕ ፡ ሥጋ ፡ ዘሠብሐ ፡ ወያነጕዕ ፡ አገዳሆን ። አሌሎሙ ፡ ለእለ ፡ ከንቶ ፡ ይርዕዩ ፡ እለ ፡ የኀድጉ ፡ አባግዐ ፤ መጥባሕት ፡ ውስተ ፡ መዝራዕቱ ፡ ወውስተ ፡ ዐይኑ ፡ ዘየማን ፤ ወመዝራዕቱኒ ፡ የቢሰ ፡ ይየብስ ፡ ወዐይኑሂ ፡ ዘየማን ፡ ነቊረ ፡ ይነቍር ።