ዘሰፎንያስ ነቢይ 2

ተጋብኡ ፡ ወተጋነዩ ፡ ሕዝብ ፡ አብዳን ። ዘእንበለ ፡ ትኩኑ ፡ ከመ ፡ ጽጌ ፡ ይቡስ ፡ ዘወድቀ ፡ ዘእንበላ ፡ ትብጻሕክሙ ፡ መቅሠፍተ ፡ እግዚአብሔር ፡ ወዘእንበለ ፡ ትምጻእክሙ ፡ ዕለተ ፡ መዐቱ ፡ ለእግዚአብሔር ። ኅሥሥዎ ፡ ለእግዚአብሔር ፡ ኵልክሙ ፡ ትሑታነ ፡ ምድር ፤ ተገበሩ ፡ ጽድቀ ፡ ወኅሥሥዋ ፡ ለርትዕ ፡ ወአውሥእዋ ፡ ከመ ፡ ትትከደኑ ፡ እምዕለተ ፡ መዐቱ ፡ ለእግዚአብሔር ። እስመ ፡ ትትበረበር ፡ ጋዛ ፡ ወትጠፍእ ፡ አስቃሎን ፡ ወይገፈትእዋ ፡ ለአዛጦን ፡ ቀትረ ፡ ወይሤርውዋ ፡ ለአቃሮን ። አሌሎሙ ፡ ለፈላስያን ፡ እለ ፡ ይነብሩ ፡ ጠቃ ፡ ባሕር ፡ ፈላሲያነ ፡ ቀሬጤ ፤ ቃለ ፡ እግዚአብሔር ፡ ላዕሌክሙ ፡ ምድረ ፡ ኢሎፍሊ ፡ ወያጠፍአክሙ ፡ እምነ ፡ በሓውርቲክሙ። ወትከውን ፡ ቀሬጤ ፡ ጺኦተ ፡ መራዕይ ፡ ወምርዓየ ፡ አባግዕ ። ወይከውን ፡ በሓውርተ ፡ ብሔር ፡ ላዕለ ፡ ተረፈ ፡ ቤተ ፡ ይሁዳ ፡ ወይትረዐይዎሙ ፡ በውስተ ፡ አብያተ ፡ አስቃሎን ፤ ድንጉፃኒሆሙ ፡ ይነብሩ ፡ እምቅድመ ፡ ገጾሙ ፡ ለደቂቀ ፡ ይሁዳ ፤ እስመ ፡ ተሣሀሎሙ ፡ እግዚአብሔር ፡ አምላኮሙ ፡ ወሜጠ ፡ ፄዋሆሙ ። ወሰምዑ ፡ ጽዕለተ ፡ ሞአብ ፡ ወኵርዐቶሙ ፡ ለደቂቀ ፡ ዐሞን ፡ ዘከመ ፡ አኅሰርዎሙ ፡ ለሕዝብየ ፡ ወተዘኀሩ ፡ ላዕለ ፡ ብሔርየ ። በእንተ ፡ ዝንቱ ፡ ሕያው ፡ አነ ፤ ይቤ ፡ እግዚአብሔር ፡ ኀያል ፡ አምላከ ፡ እስራኤል ፤ እስመ ፡ ሞአብኒ ፡ ከመ ፡ ሰዶም ፡ ትከውን ፡ ወደቂቀ ፡ ዐሞንሂ ፡ ከመ ፡ ጎሞራ ፡ ወደማስቆኒ ፡ ተኀልቅ ፡ ከመ ፡ ክምረ ፡ እክል ፡ ወትማስን ፡ ለዓለም ፤ ወእለ ፡ ተርፉ ፡ ሕዝብየ ፡ ይበረብርዎሙ ፡ ወእለ ፡ ተርፉ ፡ ሕዝብየ ፡ ይወርስዎሙ ። ወዛቲ ፡ ትከውኖሙ ፡ ህየንተ ፡ ጽዕለቶሙ ፡ እስመ ፡ አመ ፡ ነስሑ ፡ ወተዐበዩ ፡ ላዕለ ፡ እግዚአብሔር ፡ ዘኵሎ ፡ ይመልክ ። ወያመጽእ ፡ እግዚአብሔር ፡ ላዕሌሆሙ ፡ ወይሤርዎሙ ፡ ለኵሎሙ ፡ አማልክተ ፡ አሕዛበ ፡ ምድር ፡ ወይሰግዱ ፡ ሎቱ ፡ ኵሎሙ ፡ በበሓውርቲሆሙ ፡ ኵሉ ፡ ደሰያተ ፡ አሕዛብ ። ወአንትሙሂ ፡ ኢትዮጵያ ፡ ቅቱላን ፡ በኲናት ፡ አንትሙ ። ወኣነሥእ ፡ እዴየ ፡ ላዕለ ፡ ደቡብ ፡ ወኣጠፍኦሙ ፡ ለፋርስ ፤ ወእሬስያ ፡ መዝብረ ፡ ለነኔዌ ፡ ወከመ ፡ በድው ፡ ዘአልቦ ፡ ማየ ። ወይትረዐዩ ፡ መራዕይ ፡ በማእከላ ፡ ወኵሉ ፡ አርዌ ፡ ገዳም ፡ ወአርዌ ፡ ምድር ፡ ወይነብሩ ፡ ዐቃርብት ፡ ውስተ ፡ ጺኦታ ፤ ወይነቅዉ ፡ አርዌ ፡ ገዳም ፡ በውስተ ፡ አፍላጊሃ ፡ ወቋዓት ፡ በውስተ ፡ አናቅጺሃ ፤ እስመ ፡ ከመ ፡ አርዝ ፡ ኑኃ ።