ጥበበ ሲራክ 22

1 ከመ ፡ እብነ ፡ ጾላዕ ፡ ከማሁ ፡ ሀካይ ፡ በኀበ ፡ ነበረ ፤ ወያፀርዕ ፡ ኵሎ ፡ በኀሳረ ፡ ሀኬቱ ። 2 ከመ ፡ ፅፍዕ ፡ ግዱፍ ፡ ከማሁ ፡ ሀካይ ፡ በኀበ ፡ ሰከበ ፤ ኵሉ ፡ ዘቀተሎ ፡ ነገፈ ፡ እዴሁ ። 3 ኀፍረት ፡ ለአቡ[ሁ] ፡ ውሉድ ፡ አብድ ፤ ወወለትሰ ፡ አብድ ፡ ኅስርተ ፡ ትከውን ። 4 ወወለትሰ ፡ ጠባብ ፡ ትወርሶ ፡ ለምታ ፤ ወእንተሰ ፡ ታስተኃፍር ፡ ሐዘን ፡ ይእቲ ፡ ለወላዲሃ ። 5 ወበኵለሄ ፡ ተሐረትም ፡ ምክዕቢተ ፤ ታስተኃፍር ፡ አባሃኒ ፡ ወታስተኀፍር ፡ ምታኒ ፡ ዝልፍት ። 6 ከመ ፡ ዘይሰነቁ ፡ በቤተ ፡ ላሕ ፡ ዘይነግር ፡ ቃሎ ፡ በኀበ ፡ ረከበ ፤ መቅሠፍት ፡ ወተግሣጽ ፡ በኵለሄ ፡ ያጠብብ ። 7 ከመ ፡ ዘያስተጣብቅ ፡ አግዕልተ ፡ ዘይሜህሮ ፡ ለአብድ ፤ አንቅሆ ፡ እምዐቢይ ፡ ንዋም ፡ ለዘይነውም ። 8 (ከማሁ ፡) ዘይነግሮ ፡ ለአብድ ፡ ከመ ፡ ዘይነግሮ ፡ ለድቁስ ፤ ወሶበ ፡ አኅለቀ ፡ ነጊሮቶ ፡ ይብለከ ፡ ምንተ ፡ ትቤ ። 11 ብክዮ ፡ ለዘሞተ ፡ እስመ ፡ ኀለፈ ፡ ብርሃኑ ፤ ወብክዮ ፡ ለአብድ ፡ እስመ ፡ አምሠጦ ፡ ልቡ ። ርቱዕ ፡ ትብክዮ ፡ ለዘሞተ ፡ እስመ ፡ አልቦ ፡ ምግባአ ፤ ወለአብድሰ ፡ ብክዮ ፡ በሕይወቱ ፤ እስመ ፡ ሐይው ፡ የአክዮ ፡ እምነ ፡ መዊት ። 12 . . . . ፤ ብክዮ ፡ ለአብድ ፡ ወለኃጥእ ፡ በኵሉ ፡ ረመዋዕለ ፡ ሕይወቱ ። 13 ኢታብዝኅ ፡ ተናግሮ ፡ ምስለ ፡ አብድ ፤ ወኢትሖር ፡ ምስለ ፡ ዘአልቦ ፡ ልበ ። ወተዐቀብ ፡ ከመ ፡ ኢያብእከ ፡ ውስተ ፡ ጻሕብ ፤ ወከመ ፡ ኢትትሐየስ ፡ አንተ ፡ በእበደ ፡ ዚአሁ ። ረሐቅ ፡ እምኔሁ ፡ ወታዐርፍ ፡ ነፍስከ ፡ (ወይቀልለከ) ፤ ወአልቦ ፡ ዘትት[ነከይ] ፡ አንተ ፡ በእበደ ፡ ዚአሁ ። 14 ምንት ፡ ይከብድ ፡ እምነ ፡ ዐረር ፤ ወምንት ፡ ስሙ ፡ ዘእንበለ ፡ አብድ ። 15 ይኄይስ ፡ ትጾር ፡ ኆጻ ፡ ወፄወ ፡ ወዘብርታተ ፡ ኀጺን ፤ እምትንበር ፡ ምስለ ፡ አብድ ። 16 መሠንየ ፡ ማእሰር ፡ ዘእሱር ፡ ውስተ ፡ ቅጽረ ፡ ንድቅ ፤ ወኢይትፈታሕ ፡ ለእመኒ ፡ አድለቅለቀ ፤ ከማሁ ፡ ምክረ ፡ ጥበብ ፡ ውስተ ፡ ልበ ፡ ጽኑዕ ። 17 ወኢይትፈታሕ ፡ ቅጽሩ ፡ ለዝላፉ ፡ ለልብ ፡ ጽኑዕ ፡ ወለምክረ ፡ ጥበብ ፤ ወከመ ፡ መርገ ፤ ኆጻ ፡ በውስተ ፡ አረፍት ። 18 ወከመ ፡ ሐሠር ፡ ቅድመ ፡ ዐውሎ ፤ ዘኢይቀውም ፡ እምከመ ፡ መጽአ ፡ ነፋስ ፤ ከማሁ ፡ ኅሊና ፡ አብድ ፡ በውስተ ፡ ልበ ፡ ፈራህ ፤ ዘኢይቀውም ፡ ለእምከመ ፡ ቦቱ ፡ ዘገረሞ ። 19 ዘደጐጸ ፡ ዐይኖ ፡ ያወርድ ፡ አንብዐ ፤ ወዘደጐጸ ፡ ልቦ ፡ ያርኢ ፡ ጥበበ ። 20 ዘወገሮን ፡ ለአዕዋፍ ፡ ይሰዶን ፤ ወዘይዘረክዮ ፡ ለዐርኩ ፡ ሰዐረ ፡ ታእኃሁ ። 21 እመኒ ፡ መላኅከ ፡ መጥባሕተ ፡ ላዕለ ፡ ዐርክከ ፤ 22 ወእመኒ ፡ አዕበይከ ፡ አፉከ ፡ ላዕሌሁ ኢትቅበጾ ፡ በከመ ፡ ይትዓረከከ ። እንበለ ፡ ዳእሙ ፡ ለእመ ፡ ዘርከይካሁ ፤ ወአዕበይከ ፡ አፉከ ፡ ላዕሌሁ ፡ ወጸዐልካሁ ፤ ወለእመኒ ፡ ከሠትከ ፡ ሎቱ ፡ ምክሮ ፡ ወተጓሕለውካሁ ፡ ወአሕመምካሁ ፤ በዝንቱ ፡ ነገር ፡ ይጐይይ ፡ ኵሉ ፡ ዐርክ ። 23 ለእመኒ ፡ ነዳይ ፡ አንተ ፡ ሃይማኖተከ ፡ ዕቀብ ፡ ምስለ ፡ ቢጽከ ፤ ከመ ፡ ትትፈሣሕ ፡ አመ ፡ ትፍሥሕቱ ። ለእመኒ ፡ ተጸነሰ ፡ ተዐገሥ ፡ ምስሌሁ ፤ ከመ ፡ ትትፈሣሕ ፡ አመ ፡ ይረክብ ፡ ርስቶ ፡ ምስሌሁ ። 24 ለእሳትኒ ፡ ይቀድም ፡ ይጠይስ ፡ ተነ ፡ ጢሱ ፤ ከማሁ ፡ ለደምኒ ፡ ይቀድም ፡ ላኳ ፡ ወጋእዝ ። 25 ሰውሮቶ ፡ ለዐርክየ ፡ ኢየኀፍር ፤ ወኢይትኀባእኒ ፡ እምቅድመ ፡ ገጹ ። 26 ወእመሰ ፡ እኪት ፡ ትረክበኒ ፡ በእንቲአሁ ፤ ኵሉ ፡ ዘሰምዐ ፡ የዐቅብ ፡ ርእሶ ፡ እምኔሁ ። 27 መኑ ፡ ይሠይም ፡ ሊተ ፡ ዐቃቤ ፡ ላዕለ ፡ አፉየ ፤ ወማኅተመ ፡ ጥበብ ፡ ዲበ ፡ ከናፍርየ ፤ ከመ ፡ ኢይደቅ ፡ ቦቱ ፤ ወከመ ፡ ኢይቅትለኒ ፡ ልሳንየ ።