መጽሐፈ ነገሥት ፬ 5

1 ወንእማን ፡ መልአከ ፡ ስራዊሆሙ ፡ ለሶርያ ፡ ብእሲ ፡ ዕቢይ ፡ በቅድመ ፡ እግዚኡ ፡ ወክቡር ፡ ውእቱ ፡ ወያከብሮ ፡ እስመ ፡ በእደ ፡ ዚአሁ ፡ አድኀኖሙ ፡ እግዚአብሔር ፡ ለሶርያ ፡ ወብእሲ ፡ ጽኑዕ ፡ ውእቱ ፡ ወኀያል ፡ ወአኀዞ ፡ ለምጽ ። 2 ወአመ ፡ መጽአ ፡ ምስለ ፡ ሶርያ ፡ ጸብአ ፡ ወፄወወ ፡ እምነ ፡ ምድረ ፡ እስራኤል ፡ አሐተ ፡ ወለተ ፡ ነኣሳ ፡ ወአንበራ ፡ ኀበ ፡ ብእሲቱ ። 3 ወትቤላ ፡ ለእግዝእታ ፡ ርቱዕ ፡ ይሖር ፡ እግዚእየ ፡ ኀበ ፡ ብእሴ ፡ እግዚአብሔር ፡ ነቢይ ፡ ዘውስተ ፡ ሰማርያ ፡ ወይፌውሶ ፡ እምዝንቱ ፡ ለምጹ ። 4 ወቦአት ፡ ብእሲቱ ፡ ኀቤሁ ፡ ወነገረቶ ፡ ወትቤሎ ፡ ከመዝ ፡ ትቤ ፡ ዛቲ ፡ ወለት ፡ እንተ ፡ እምብሔረ ፡ እስራኤል ። 5 ወይቤሎ ፡ ንጉሠ ፡ ሶርያ ፡ ለንእማን ፡ ነዓ ፡ ሖር ፡ እፌኑ ፡ ለከ ፡ መጽሐፈ ፡ ኀበ ፡ ንጉሠ ፡ እስራኤል ፡ ወሖረ ፡ ወነሥአ ፡ ምስሌሁ ፡ ፲መክሊተ ፡ ብሩረ ፡ ወ፰፻ወርቀ ፡ ወ፲ዐራዘ ፡ አልባስ ። 6 ወአብጽሐ ፡ መጽሐፈ ፡ ኀበ ፡ ንጉሠ ፡ እስራኤል ፡ ወይብል ፡ መጽሐፉ ፡ ይእዜኒአ ፡ እምከመአ ፡ በጽሐት ፡ ዛቲ ፡ መጽሐፍ ፡ ኀቤከ ፡ ናሁ ፡ ፈነውኩ ፡ ኀቤከ ፡ ንእማን ፡ ቍልዔየ ፡ ወፈውሶ ፡ እምነአ ፡ ለምጹአ ። 7 ወእምዝ ፡ ሶበ ፡ አንበባ ፡ ንጉሠ ፡ እስራኤል ፡ ለይእቲ ፡ መጽሐፍ ፡ ሠጠጠ ፡ አልባሲሁ ፡ ወይቤ ፡ ቦኑ ፡ እግዚአብሔር ፡ አነ ፡ ከመ ፡ እክል ፡ ቀቲለ ፡ ወአሕይዎ ፡ ከመ ፡ ይፈኑ ፡ ኀቤየ ፡ ዝንቱ ፡ ብእ[ሴ] ፡ ዘለምጽ ፡ ወእፈውሶ ፡ እምነ ፡ ለምጹ ፤ ናሁ ፡ ርእዩ ፡ ከመ ፡ ምክንያተ ፡ የኀሥሥ ፡ ዝንቱ ፡ ለነ ። 8 ወእምዝ ፡ ሶበ ፡ ሰምዐ ፡ ኤልሳዕ ፡ ከመ ፡ ሠጠጠ ፡ አልባሲሁ ፡ ንጉሠ ፡ እስራኤል ፡ ለአከ ፡ ኀበ ፡ ንጉሥ ፡ ወይቤሎ ፡ ለምንትአ ፡ ሠጠጥከአ ፡ አልባሲከ ፤ ለይምጻእ ፡ ኀቤየ ፡ ንእማን ፡ ወታአምር ፡ ከመ ፡ ቦቱ ፡ ነቢየ ፡ ውስተአ ፡ እስራኤልአ ። 9 ወሖረ ፡ ንእማን ፡ በአፍራስ ፡ ወበሰረገላት ፡ ወቆመ ፡ ኀበ ፡ ኆኅተ ፡ ቤቱ ፡ ለኤልሳዕ ። 10 ወለአከ ፡ ኀቤሁ ፡ ኤልሳዕ ፡ እንዘ ፡ ይብል ፡ ሖርአ ፡ ተጠመቅአ ፡ ውስተ ፡ ተከዚ ፡ ዮርዳኖስ ፡ ስብዕ ፡ ወይገብእ ፡ ኅብረ ፡ ሥጋከ ፡ ወተሐዩአ ፡ እምለምጽከአ ። 11 ወተምዕዐ ፡ ንእማን ፡ ወአተወ ፡ ወይቤ ፡ መሰለኒ ፡ ሊተሰ ፡ ዘይወፅእ ፡ ወይቀውም ፡ ኀቤየ ፡ ወይጼውዕ ፡ ስመ ፡ እግዚአብሔር ፡ አምላኩ ፡ ወይወዲ ፡ እዴሁ ፡ ዲቤየ ፡ ወይፌውሰኒ ። 12 ኢይኄይስኑ ፡ ማያተ ፡ ደማስቆ ፡ እምነ ፡ ኵሉ ፡ ማያቲሆሙ ፡ ለእስራኤል ፡ ይኄይሱ ፡ ፈለገ ፡ አበና ፡ ወፈለገ ፡ ፈርፋ ፤ ኢየሐውርኑ ፡ እትኀፀብ ፡ ውስቴቶሙ ፡ ወእሕየሡ ፡ እምነ ፡ ለምጽየ ፡ ወተግሕሠ ፡ ወሖረ ፡ እንዘ ፡ ይትመዓዕ ። 13 ወመጽኡ ፡ ደቁ ፡ ኀቤሁ ፡ ወይቤልዎ ፡ ዐቢየ ፡ ነገረ ፡ ይቤለከ ፡ ነቢይ ፤ ግበር ፡ በከመ ፡ ይቤለከ ፡ ሖር ፡ ተኀፀብ ፡ ወተሐዩ ። 14 ወሖረ ፡ ንእማን ፡ ወወረደ ፡ ወተጠምቀ ፡ ውስተ ፡ ፈለገ ፡ ዮርዳኖስ ፡ ስብዕ ፡ በከመ ፡ ይቤሎ ፡ ኤልሳዕ ፡ ወሐይወ ፡ ወኮነ ፡ ሥጋሁ ፡ ከመ ፡ ሥጋ ፡ ሕፃን ፡ ንኡስ ። 15 ወገብአ ፡ ኀበ ፡ ኤልሳ ፡ ዕ ፡ ለሊሁ ፡ ምስለ ፡ ኵሉ ፡ ትዕይንቱ ፡ ወበጽሐ ፡ ኀቤሁ ፡ ወቆመ ፡ ቅድሜሁ ፡ ወይቤሎ ፡ ናሁ ፡ አእመርኩ ፡ ከመ ፡ አልቦቱ ፡ አምላከ ፡ በኵሉ ፡ ምድር ፡ እንበለ ፡ በውስተ ፡ እስራኤል ፡ ወይእዜኒ ፡ ንሣእ ፡ አምኃሁ ፡ እምነ ፡ እዴሁ ፡ ለገብርከ ። 16 ወይቤሎ ፡ ኤልሳዕ ፡ ሕያው ፡ እግዚአብሔር ፡ ዘቆምኩ ፡ ቅድሜሁ ፡ ከመ ፡ ኢይነሥእ ፡ ወአስተብቍዖ ፡ ይንሣእ ፡ ወኦሆ ፡ ኢይቤ ። 17 ወይቤሎ ፡ ንእማን ፡ ወእመ ፡ አኮ ፡ የሀብዎ ፡ ለገብርከ ፡ በመስፈርተ ፡ ጎሞር ፡ ጾረ ፡ ፪አብቅል ፡ እስመ ፡ ኢይገብር ፡ ገብርከ ፡ እምይእዜ ፡ እንከ ፡ መሥዋዕተ ፡ ለባዕድ ፡ አማልክት ፡ ዘእንበለ ፡ ለግዚአብሔር ፡ ለባሕቲቱ ፡ በቃለ ፡ ዚአከ ። 18 ወበእንተ ፡ ዝንቱ ፡ ይሰሪ ፡ ሎቱ ፡ እግዚአብሔር ፡ ለገብርከ ፡ ሶበ ፡ ይበውእ ፡ እግዚእየ ፡ ቤተ ፡ ሬማን ፡ ይሰግድ ፡ ሎቱ ፡ በህየ ፡ ያሰምክ ፡ ዲበ ፡ እዴየ ፡ ወእሰግድ ፡ አነኒ ፡ ምስሌሁ ፡ በቤተ ፡ ሬማን ፡ ሶበ ፡ ሰገደ ፡ ውእቱ ፡ ውስተ ፡ ቤተ ፡ ራማን ፡ ወይስሪ ፡ ሎቱ ፡ እግዚአብሔር ፡ ለገብርከ ፡ እንበይነ ፡ ዝንቱ ፡ ነገር ። 19 ወይቤሎ ፡ ኤልሳዕ ፡ ለንእማን ፡ እቱ ፡ እንከሰ ፡ በሰላም ፡ ወአተወ ፡ በሰላም ፡ እምኀቤሁ ፡ ውስተ ፡ ብሔሩ ፡ ዴብላታ ። 20 ወይቤ ፡ ግያዝ ፡ ቍልዔሁ ፡ ለኤልሳዕ ፡ ናሁ ፡ ምሕኮ ፡ እግዚእየ ፡ ለንእማን ፡ ሶርያዊ ፡ ወኢነሥአ ፡ እምኔሁ ፡ ወኢምንተኒ ፡ እምውስተ ፡ ዘአምጽአ ፡ ሎቱ ፤ ሕያው ፡ እግዚአብሔር ፡ ከመ ፡ እረውጽ ፡ እትልዎ ፡ ወእነሥእ ፡ እምኔሁ ፡ ዘኮነ ። 21 ወዴገኖ ፡ ግያዝ ፡ ወተለዎ ፡ ለንእማን ፡ ወተመይጠ ፡ ንእማን ፡ ወርእዮ ፡ እንዘ ፡ ይተልዎ ፡ እምድኅሬሁ ፡ ወወረደ ፡ እምውስተ ፡ ሰረገላሁ ፡ ወገብአ ፡ ወተቀበሎ ። 22 ወይቤሎ ፡ ሰላም ፡ ለከ ፤ እግዚእየ ፡ ለአከኒ ፡ ኀቤከ ፡ ወይቤለከ ፡ እስመአ ፡ በጽሑአ ፡ ኀቤየ ፡ ፪ዕደው ፡ እምነ ፡ ደብረ ፡ ኤፍራም ፡ እምውስተ ፡ ደቀ ፡ ነቢያት ፡ ወሀቦሙ ፡ መክሊተ ፡ ብሩርአ ፡ ወ፪አልባስ ፡ ዐራዞሙአ ። 23 ወይቤሎ ፡ ንእማን ፡ ንሣእ ፡ ፪መክሊተ ፡ ወነሥአ ፡ ወወደዮ ፡ ውስተ ፡ መሥንቅ ፡ ፪ወአልባሰ ፡ ዐራዝ ፡ ፪ወአጾረ ፡ ሎቱ ፡ ፪እምውስተ ፡ ደቁ ፡ ወሖሩ ፡ ቅድሜሁ ። 24 ወቦኡ ፡ ውስተ ፡ ጽልመት ፡ ወእምዝ ፡ ተመጠዎሙ ፡ ወአብአ ፡ ቤቶ ፡ ወፈነዎሙ ፡ ለእሙንቱ ፡ ዕደው ። 25 ወእምዝ ፡ ቦአ ፡ ወቆመ ፡ ቅድመ ፡ እግዚኡ ፡ ወይቤሎ ፡ ኤልሳዕ ፡ ለግያዝ ፡ እምአይቴ ፡ አንተ ፡ ወይቤሎ ፡ ግያዝ ፡ አልቦ ፡ ኀበ ፡ ሖረ ፡ ገብርከ ፡ ወኢአይቴኒ ። 26 ወይቤሎ ፡ ኤልሳዕ ፡ አኮኑ ፡ ልብየ ፡ ሖረ ፡ ምስሌከ ፡ ወሶበ ፡ ተመይጠ ፡ ብእሲ ፡ እምላዕለ ፡ ሰረገላሁ ፡ ወተቀበለከ ፡ ወይእዜኒ ፡ ወርቅስ ፡ ነሣእከ ፡ ወይእዜኒ ፡ አልባስ ፡ ነሣእከ ፡ ወይኩንከ ፡ ለዐጸደ ፡ ወይን ፡ ወለዐጸደ ፡ ወፍር ፡ ወለዐጸደ ፡ ቅብእ ፡ ወለአልህምትኒ ፡ ወለአባግዕኒ ፡ ወለአግብርትኒ ፡ ወለአእማትኒ ። 27 ወባሕቱ ፡ ለምጹ ፡ ለንእማን ፡ ይግባእ ፡ ላዕሌከ ፡ ወላዕለ ፡ ውሉድከ ፡ እስከ ፡ ለዓለም ፤ወበጊዜሃ ፡ አኀዞ ፡ ለምጸ ፡ ንእማን ፡ ለግያዝ ፡ ወወፅአ ፡ እምቅድመ ፡ ገጹ ፡ ለኤልሳዕ ፡ ግያዝ ፡ እንዘ ፡ ኵለንታሁ ፡ ለምጽ ፡ ጸዐዳ ፡ ከመ ፡ በረድ ።