መጽሐፈ ነገሥት ፬ 25

1 ወአመ ፡ ታስዕ ፡ ክረምተ ፡ መንግሥቱ ፡ በዓሥር ፡ ወርኅ ፡ መጽአ ፡ ናቡከደናጾር ፡ ንጉሠ ፡ ባቢሎን ፡ ምስለ ፡ ሰራዊቱ ፡ ላዕለ ፡ ኢየሩሳሌም ፡ ወተዐየነ ፡ ላዕሌሃ ፡ ወሐጸራ ። 2 ወተጸወነት ፡ ሀገር ፡ እስከ ፡ አመ ፡ ፲ወ፩ዓመተ ፡ መንግሥቱ ፡ ለሴዴቅያን ፡ እስከ ፡ ፱ሠረቀ ፡ ወርኅ ። 3 ወኮነ ፡ ዐቢየ ፡ ረኃብ ፡ ወአልቦ ፡ እክለ ፡ ለአሕዛበ ፡ ምድር ። 4 ወተገፍትአት ፡ ሀገር ፡ ወኵሉ ፡ዕደው ፡ መስተቃትላን ፡ ወፅኡ ፡ በሌሊት ፡ በፍኖተ ፡ አንቀጽ ፡ ማእከላዊ ፡ እንተ ፡ መንገለ ፡ ገነቱ ፡ ለንጉሥ ፡ ወዐገትዋ ፡ ፋርስ ፡ ለሀገር ፡ ወእሙንቱሰ ፡ ወፅኡ ፡ እንተ ፡ ዐረቦት ። 5 ወዴገንዎ ፡ ሰራዊተ ፡ ፋርስ ፡ ወተለውዎ ፡ ለንጉሥ ፡ ወአኀዝዎ ፡ በዐረቦት ፡ ዘኢያሪኮ ፡ ወጐዩ ፡ ኵሉ ፡ ሰብኡ ፡ ወኀደግዎ ። 6 ወአኀዝዎ ፡ ለንጉሥ ፡ ወወሰድዎ ፡ ኀበ ፡ ንጉሠ ፡ ባቢሎን ፡ ዴብለታ ፡ ወተናገሮ ። 7 ወረገዞሙ ፡ ለደቂቁ ፡ በቅድሜሁ ፡ ወአዕወሮ ፡ ለሴዴቅያን ፡ ወሞቅሖ ፡ ወወሰዶ ፡ ባቢሎን ። 8 ወአመ ፡ ሰቡዑ ፡ ለሠርቀ ፡ ሳብዕ ፡ ወርኅ ፡ አመ ፡ ፲ወ፱ዓመተ ፡ መንግሥቱ ፡ ለናቡከደናጾር ፡ ንጉሠ ፡ ባቢሎን ፡ መጽአ ፡ ናቡዛርዳን ፡ ሊቀ ፡ መብስላኑ ፡ ለንጉሥ ፡ ዘይቀውም ፡ ቅድሜሁ ፡ መጽአ ፡ ኢየሩሳሌም ። 9 ወአውዐየ ፡ ቤተ ፡ እግዚአብሔር ፡ ወቤተ ፡ ንጉሥኒ ፡ ወኵሎ ፡ አብያተ ፡ ኢየሩሳሌም ፡ ወአውዐየ ፡ ሊቀ ፡ መብስላኒሁ ፡ ለንጉሥ ። 10 ወነሠቱ ፡ አረፍተ ፡ ጥቅማ ፡ ለኢየሩሳሌም ፡ ሰራዊቶሙ ፡ ለፋርስ ። 11 ወዘተረፈሂ ፡ ሕዝብ ፡ ውስተ ፡ ሀገር ፡ ወእለኒ ፡ ሖሩ ፡ ኀበ ፡ ንጉሠ ፡ ባቢሎን ፡ ወባዕደኒ ፡ ኵሎ ፡ ዘተረፈ ፡ እፍለሶሙ ፡ ናቡዛርዳን ፡ ሊቀ ፡ መብስላን ፡ ውስተ ፡ ከራሜ ፡ ወውስተ ፡ ኤሬቢ ። 12 ወእምውስተ ፡ ነዳያነ ፡ ብሔር ፡ አትረፈ ፡ ሊቀ ፡ መብስላን ፡ ለዐጸደ ፡ ወይን ፡ ወለማሕረስ ። 13 ወአዕማደ ፡ ብርትኒ ፡ ዘቤተ ፡ እግዚአብሔር ፡ ወሜኬኖተ ፡ ወባሕረ ፡ ብርት ፡ ዘቤተ ፡ እግዚአብሔር ፡ ሰበርዎ ፡ ፋርስ ፡ ወአእተውዎ ፡ ብርቶ ፡ ባቢሎን ። 14 ወጸሀርትኒ ፡ ወኢያሚን ፡ ወፍያላትኒ ፡ ኵሎ ፡ ንዋየ ፡ ብርት ፡ ዘቦቱ ፡ ይገብሩ ፡ ነሥኡ ። 15 ወመዓጥነ ፡ ወፍያላተ ፡ ወርቅ ፡ ወዘብሩር ፡ ነሥአ ፡ ሊቀ ፡ መብስላን ። 16 አዕማድ ፡ ክልኤ ፡ ወባሕር ፡ አሐቲ ፡ ወሜኬኖት ፡ ዘገብረ ፡ ሰሎሞን ፡ ንጉሥ ፡ ለቤተ ፡ እግዚአብሔር ፡ ወአልቦ ፡ መድሎተ ፡ ብርቱ ። 17 ፲ወ፰በእመት ፡ ኑኁ ፡ ለለ፩ ፡ ዐምድ ፡ ወከታር ፡ ዘብርት ፡ መልዕልቱ ፡ ወቆሙ ፡ ለከታር ፡ ፫በእመት ፡ ወሰቃራር ፡ ላዕለ ፡ ከታር ፡ ወ፩ኵሉ ፡ ዘብርት ፡ ወከማሁ ፡ ዘካልኡኒ ፡ ዐምድ ፡ ወ፻ጽጌያት ፡ ላዕለ ፡ ሰባኬ ፡ ዐውዱ ። 18 ወነሥኦ ፡ ሊቀ ፡ መብስላን ፡ ለሴሬያ ፡ ለዐቢይ ፡ ካህን ፡ ወሰፎንያስ ፡ ወልዱ ፡ ዘእምታሕቴሁ ፡ ወለደላዊያን ። 19 ወነሥአ ፡ እምውስተ ፡ ሀገር ፡ ፩ኅጽወ ፡ መልአከ ፡ ስረዊሆሙ ፡ ለመስተቃትላን ፡ ወ፮ዕደው ፡ እምእለ ፡ ይቀውሙ ፡ ቅድመ ፡ ንጉሥ ፡ እለ ፡ ተረክቡ ፡ ውስተ ፡ ሀገር ፡ ወጻሓፊሁ ፡ ለመልአክ ፡ ስረዊሆሙ ፡ ዘይኤዝዞሙ ፡ ለአሕዛበ ፡ ምድር ፡ ወ፷ብእሲ ፡ እምውስተ ፡ አሕዛበ ፡ ምድር ፡ እለ ፡ ተረክቡ ፡ ውስተ ፡ ሀገር ። 20 ወነሥኦሙ ፡ ናቡዛርዳን ፡ ሊቀ ፡ መብስላን ፡ ወወሰዶሙ ፡ ኀበ ፡ ንጉሠ ፡ ባቢሎን ፡ ዴብለታ ። 21 ወቀተሎሙ ፡ ንጉሠ ፡ ባቢሎን ፡ በዴብለታ ፡ በምድረ ፡ ኤማት ፡ ወአፍለሶሙ ፡ ለይሁዳ ፡ እምነ ፡ ብሔሮሙ ። 22 ወለሕዝብሰ ፡ እለ ፡ ተርፉ ፡ ውስተ ፡ ብሔረ ፡ ይሁዳ ፡ እለ ፡ አትረፈ ፡ ናቡከደነጾር ፡ ንጉሠ ፡ ባቢሎን ፡ ወሤሞ ፡ ላዕሌሆሙ ፡ ጎዶልያን ፡ ወልደ ፡ አኪቃም ፡ ወልደ ፡ ሳፍን ። 23 ወሰምዑ ፡ ኵሎሙ ፡ መላእክተ ፡ ሰራዊቶሙ ፡ ወአሕዛቢሆሙ ፡ ከመ ፡ ሤሞ ፡ ንጉሠ ፡ ባቢሎን ፡ ለጎዶልያ ፡ ወሖሩ ፡ ኀበ ፡ ጎዶልያ ፡ ውስተ ፡ መሴፋ ፡ ወይስማኤል ፡ ወልደ ፡ ናታንዩ ፡ ወዮሐናን ፡ ወልደ ፡ ቃሬሄ ፡ ወሴሬያ ፡ ወልደ ፡ ቴንሄሜት ፡ ፍትያዊ ፡ ወዖዝንያስ ፡ ወልደ ፡ መካት ፡ እሙንቱኒ ፡ ምስለ ፡ ሰብአሙ ። 24 ወመሐለ ፡ ጎዶልያ ፡ ሎሙ ፡ ወለሰብኦሙ ፡ ወይቤሎሙ ፡ ኢትፍርሁ ፡ እምነ ፡ ፋርስ ፤ ንበሩ ፡ ውስተ ፡ ብሔር ፡ ወተቀነዩ ፡ ለንጉሠ ፡ ባቢሎን ፡ ወያሤኒ ፡ ላዕሌክሙ ። 25 ወአመ ፡ ሳብዕ ፡ ወርኅ ፡ መጽአ ፡ ይስማዔል ፡ ወልደ ፡ ናታንዩ ፡ ወልዶ ፡ ኤልስማ ፡ ወእምዘመደ ፡ መንግሥት ፡ ወ፲ዕደው ፡ ምስሌሁ ፡ ወቀተሎ ፡ ለጎዶልያ ፡ ወሞተ ፡ ወለአይሁድኒ ፡ ወለፋርስኒ ፡ እለ ፡ ሀለዉ ፡ ምስሌሁ ፡ ውስተ ፡ መሴፋት ። 26 ወተንሥኡ ፡ ኵሉ ፡ ሕዝብ ፡ ንኡሶሙ ፡ ወዐቢዮሙ ፡ ወመላእክተ ፡ ሰራዊቶሙኒ ፡ ወቦኡ ፡ ብሔረ ፡ ግብጽ ፡ እስመ ፡ ፈርህዎሙ ፡ ለፋርስ ። 27 ወአመ ፡ ፴ወ፯ዓመት ፡ እምዘ ፡ ፈለሰ ፡ ኢዮአቄም ፡ ንጉሠ ፡ ይሁዳ ፡ አመ ፡ ዐሡሩ ፡ ወስኑዩ ፡ ለጽልመት ፡ በዓሥር ፡ ወርኅ ፡ አክበሮ ፡ ኤዌያል ፡ ማርዴቅ ፡ ንጉሠ ፡ ባቢሎን ፡ አመ ፡ ፩ዓመተ ፡ መንግሥቱ ፡ አክበሮ ፡ ለኢዮእቄም ፡ ንጉሠ ፡ ይሁዳ ፡ ወአውፅኦ ፡ እምነ ፡ ቤተ ፡ ሞቅሕ ። 28 ወተናገሮ ፡ ሠናየ ፡ ወአዕበየ ፡ መንበሮ ፡ እመናብርተ ፡ ነገሥት ፡ እለ ፡ ምስሌሁ ፡ ውስተ ፡ ባቢሎን ። 29 ወአልበሶ ፡ ሠናየ ፡ አልባሰ ፡ ወይመስሕ ፡ ምስሌሁ ፡ ዘልፈ ። 30 ወሲሳዮ ፡ ኵሎ ፡ አሚረ ፡ ይነሥእ ፡ እምነ ፡ ቤተ ፡ ንጉሥ ፡ ወይሁብዎ ፡ እንተ ፡ ጸብሐት ፡ በኵሉ ፡ መዋዕለ ፡ ሕይወቱ ።