መጽሐፈ ነገሥት ፬ 15

1 አመ ፡ ፳ወ፯ዓመተ ፡ መንግሥቱ ፡ ለኢዮርብዓም ፡ ንጉሠ ፡ እስራኤል ፡ [ነግሠ ፡ አዛርያስ ፡ ወልደ ፡ አሜስያስ ፡ ንጉሠ ፡ ይሁዳ ።] 2 ወ፲ወ፮ክረምቱ ፡ ለአዛርያስ ፡ አመ ፡ ይነግሥ ፤ ፶ወ፪ክረምተ ፡ ነግሠ ፡ በኢየሩሳሌም ፡ ወስማ ፡ ለእሙ ፡ ከልያ ፡ እንተ ፡ ኢየሩሳሌም ። 3 ወገብረ ፡ ጽድቀ ፡ በቅድመ ፡ አዕይንቲሁ ፡ ለእግዚአብሔር ፡ ዘከመ ፡ ገብረ ፡ አሜስያስ ፡ አቡሁ ። 4 ወአብያተ ፡ አማልክትሰ ፡ ኢያሰሰለ ፤ ዓዲሆሙ ፡ ሕዝብ ፡ ህየ ፡ የዐጥኑ ፡ ወይሠውዑ ፡ ውስተ ፡ አብያተ ፡ አማልክት ። 5 ወገሰሶ ፡ እግዚአብሔር ፡ ለንጉሥ ፡ ወአኀዞ ፡ ለምጽ ፡ እስከ ፡ አመ ፡ ሞተ ፡ ወነግሠ ፡ እምቤተ ፡ አፍሶት ፡ ወዮናታን ፡ ወልደ ፡ ንጉሥ ፡ የዐቅብ ፡ ቤቶ ፡ ወይኴንን ፡ አሕዛበ ፡ ምድር ። 6 ወኵሉ ፡ ነገሩ ፡ ለአዛርያስ ፡ ወኵሉ ፡ ዘገብረ ፡ ናሁ ፡ ዝውእቱ ፡ ዘጽሑፍ ፡ ውስተ ፡ መጽሐፈ ፡ ነቢያቲሆሙ ፡ ለነገሥተ ፡ ይሁዳ ። 7 ወስከበ ፡ አዛርያስ ፡ ምስለ ፡ አበዊሁ ፡ ውስተ ፡ ሀገረ ፡ ዳዊት ፡ ወነግሠ ፡ ዮናታን ፡ ወልዱ ፡ ህየንቴሁ ። 8 ወአመ ፡ ፴ወ፰ዓመተ ፡ መንግሥቱ ፡ ለአዛርያስ ፡ ንጉሠ ፡ ይሁዳ ፡ ነግሠ ፡ አዜኬርያስ ፡ ወልደ ፡ ኢዮርብዓም ፡ ለእስራኤል ፡ በሰማርያ ፡ ፮አውራኀ ። 9 ወገብረ ፡ እኩየ ፡ ቅድመ ፡ አዕይንቲሁ ፡ ለእግዚአብሔር ፡ በከመ ፡ ገብሩ ፡ አበዊሁ ፡ ወኢኀደገ ፡ ኀጢአቶ ፡ ለኢዮርብዓም ፡ ወልደ ፡ ናባጥ ፡ ዘአስሐቶሙ ፡ ለእስራኤል ። 10 ወዐለውዎ ፡ ሴሎም ፡ ወልደ ፡ ኢያቢሶ ፡ ወበላዓን ፡ ወሴሎም ፡ አቡሁ ፡ ቀተልዎ ፡ ወነግሠ ፡ ሴሎም ፡ ህየንቴሁ ። 11 ወኵሉ ፡ ነገሩ ፡ ለአዜኬርያስ ፡ ናሁ ፡ ዝንቱ ፡ ዘጽሑፍ ፡ ውስተ ፡ መጽሐፈ ፡ ነቢያቲሆሙ ፡ ለነገሥተ ፡ እስራኤል ። 12 ወዝውእቱ ፡ ቃለ ፡ እግዚአብሔር ፡ ለኢዩ ፡ ዘይቤለመ ፡ እስከ ፡ ራብዕ ፡ ትውልድከ ፡ ይነብሩ ፡ ውስተ ፡ መንበረ ፡ እስራኤል ፡ ወከማሁ ፡ ኮነ ። 13 ወነግሠ ፡ ሴሎም ፡ ወልደ ፡ ያቤሳ ፤ አመ ፡ ፴ወ፱ዓመተ ፡ መንግሥቱ ፡ ለአዛርያ ፡ ንጉሠ ፡ ይሁዳ ፡ ነግሠ ፡ ሴሎም ፡ ፴መዋዕለ ፡ በሰማርያ ። 14 ወዐርገ ፡ ምናሔም ፡ ወልደ ፡ ጌዱ ፡ እምተርሲላቅ ፡ ወሖረ ፡ ሰማርያ ፡ ወቀተሎ ፡ ለሴሎም ፡ ወልደ ፡ ያቤሶ ፡ በሰማርያ ። 15 ወኵሉ ፡ ነገሩ ፡ ለሴሎም ፡ ወማዕሌቱኒ ፡ ዘዐለወ ፡ ናሁ ፡ ዝንቱ ፡ ውእቱ ፡ ዘጽሑፍ ፡ ውስተ ፡ መጽሐፈ ፡ ነቢያቲሆሙ ፡ ለነገሥተ ፡ እስራኤል ። 16 ወእምዝ ፡ ቀተሎሙ ፡ ምናሔም ፡ ለቴርሳ ፡ ወኵሎሙ ፡ ዘውስተ ፡ ቴርሳ ፡ ወለኵሉ ፡ አድያሚሆሙ ፡ ወዘእምቴርሳ ፡ እስመ ፡ [ኢያ]ርኀውዎ ፡ ወኵሎሙ ፡ እለ ፡ ሀለዉ ፡ ውስቴታ ፡ ወፅኑሳቲሆሙኒ ፡ ነፀሮን ። 17 ወአመ ፡ ፴ወ፱ዓመተ ፡ መንግሥቱ ፡ ለአዛርያስ ፡ ንጉሠ ፡ ይሁዳ ፡ ነግሠ ፡ ምናሔም ፡ ወልደ ፡ ጊዱ ፡ ለእስራኤል ፡ ፲ክረምተ ፡ በሰማርያ ። 18 ወገብረ ፡ እኩየ ፡ ቅድመ ፡ አዕይንቲሁ ፡ ለእግዚአብሔር ፡ ወኢኀደገ ፡ ኵሎ ፡ ኀጢአቶ ፡ ለኢዮርብዓም ፡ ወልደ ፡ ናባጥ ፡ ዘአስሐቶሙ ፡ ለእስራኤል ። 19 ወበመዋዕሊሁ ፡ ዐርገ ፡ ፎሐ ፡ ንጉሠ ፡ ፋርስ ፡ ውስተ ፡ ውእቱ ፡ ብሔር ፡ ወወሀቦ ፡ ምናሔም ፡ ለፉሐ ፡ ፲፻መካልየ ፡ ብሩር ፡ ከመ ፡ ይኅበር ፡ ምስሌሁ ። 20 ወአዘዞሙ ፡ ምናሔም ፡ ለእስራኤል ፡ የሀብዎ ፡ ብዙኀ ፡ ብሩረ ፡ ለንጉሠ ፡ ፋርስ ፡ ያስተዋፅኡ ፡ ሎቱ ፡ ብእሲ ፡ ብእሲ ፡ በበ፶ሰቅሎን ፡ ወኢቦአ ፡ ንጉሠ ፡ ፋርስ ፡ ወኢነበረ ፡ ውስተ ፡ ውእቱ ፡ ብሔር ። 21 ወኵሉ ፡ ነገሩ ፡ ለምናሔም ፡ ወኵሉ ፡ ዘገብረ ፡ ናሁ ፡ ዝውእቱ ፡ ዘጽሑፍ ፡ ውስተ ፡ መጽሐፈ ፡ ነቢያቲሆሙ ፡ ለነገሥተ ፡ እስራኤል ። 22 ወሰከበ ፡ ምናሔም ፡ ምስለ ፡ አበዊሁ ። 23 ወአመ ፡ ኀምሳ ፡ ዓመተ ፡ መንግሥቱ ፡ ለአዛርያስ ፡ ንጉሠ ፡ ይሁዳ ፡ ነግሠ ፡ ፋቄስያስ ፡ ወልደ ፡ ምናሔም ፡ ለእስራኤል ፡ በሰማርያ ፡ ፪ዓመተ ። 24 ወገብረ ፡ እኩየ ፡ ቅድመ ፡ አዕይንቲሁ ፡ ለእግዚአብሔር ፡ ወኢኀደገ ፡ ኀጢአቶ ፡ ለኢዮርብዓም ፡ ወልደ ፡ ናባጥ ፡ ዘአስሐቶሙ ፡ ለእስራኤል ። 25 ወዐለዎ ፡ ፋቂሔ ፡ ወልደ ፡ ሮሜልዩ ፡ ወዓሊሁ ፡ ወቀተስመ ፡ በሰማርያ ፡ በቅድመ ፡ ቤተ ፡ ንጉሥ ፡ ምስለ ፡ አርጎብ ፡ ወምስለ ፡ አርያ ፡ ወምስሌሁ ፡ ፶ብእሲ ፡ እምውስተ ፡ ፬፻ወቀተሎ ፡ ወነግሠ ፡ ህየንቴሁ ። 26 ወኵሉ ፡ ነገሩ ፡ ለፋቄስያስ ፡ ወኵሉ ፡ ዘገብረ ፡ ናሁ ፡ ዝውእቱ ፡ ዘጽሑፍ ፡ ውስተ ፡ መጽሐፈ ፡ ነቢያቲሆሙ ፡ ለነገሥተ ፡ እስራኤል ። 27 ወአመ ፡ ፶ወ፪ዓመተ ፡ መንግሥቱ ፡ ለአዛርያስ ፡ ንጉሠ ፡ ይሁዳ ፡ ነግሠ ፡ ፋቁሔ ፡ ወልደ ፡ ሮሜልዩ ፡ ለእስራኤል ፡ በሰማርያ ፡ ፳ክረምተ ። 28 ወገብረ ፡ እኩየ ፡ ቅድመ ፡ አዕይንቲሁ ፡ ለእግዚአብሔር ፡ ወኢኀደገ ፡ ኀጢአቶ ፡ ለኢዮርብዓም ፡ ወልደ ፡ ናባጥ ፡ ዘአስሐቶሙ ፡ ለእስራኤል ። 29 በመዋዕሊሁ ፡ ለፋቁሔ ፡ መጽአ ፡ ተልገተፌለሰር ፡ ንጉሠ ፡ ፋርስ ፡ ወነሥኦ ፡ ለናይን ፡ ወለአቤል ፡ ወለዘምሕኮ ፡ ወለዘአንዮኅ ፡ ወለቄኔዝ ፡ ወለአሶር ፡ ወለገለአድ ፡ እንተ ፡ ገሊላ ፡ ወኵሎ ፡ ምድረ ፡ ንፍታሌም ፡ ወአፍለሶሙ ፡ ብሔረ ፡ ፋርስ ። 30 ወዐለዎ ፡ ማዕሌተ ፡ ሆሴዕ ፡ ወልደ ፡ ኤላ ፡ ለፋቁሔ ፡ ወልደ ፡ ሮሜልዩ ፡ ወቀተሎ ፡ ወነግሠ ፡ ህየንቴሁ ፡ አመ ፡ ፳ዓመቱ ፡ ለዮናታን ፡ ወልደ ፡ አዛርያስ ። 31 ወኵሉ ፡ ነገሩ ፡ ለፋቁሔ ፡ ወኵሉ ፡ ዘገብረ ፡ ናሁ ፡ ዝውእቱ ፡ ዘጽሑፍ ፡ ውስተ ፡ መጽሐፈ ፡ ነቢያቲሆሙ ፡ ለነገሥተ ፡ እስራኤል ። 32 አመ ፡ ፪ዓመተ ፡ መንግሥቱ ፡ ለፋቁሔ ፡ ወልደ ፡ ሮሜልዩ ፡ ንጉሠ ፡ እስራኤል ፡ ነግሠ ፡ ዮአታም ፡ ወልደ ፡ አዘርያስ ፡ ንጉሠ ፡ ይሁዳ ። 33 እንዘ ፡ ፳ወ፭ክረምቱ ፡ አመ ፡ ይነግሥ ፤ ወ፲ወ፮ክረምተ ፡ ነግሁ ፡ በኢየሩሳሌም ፡ ወስማ ፡ ለእሙ ፡ ዔሩሳ ፡ ወለተ ፡ ሳዱቅ ። 34 ወገብረ ፡ ሠናየ ፡ ቅድመ ፡ አዕይንቲሁ ፡ ለእግዚአብሔር ፡ ኵሎ ፡ ዘከመ ፡ ገብረ ፡ አዛርያስ ፡ አቡሁ ። 35 ወባሕቱ ፡ ቤተ ፡ አማልክት ፡ ኢያሰሰለ ፡ ወዓዲሆሙ ፡ ሕዝብ ፡ ይሠውዑ ፡ ወየዐጥኑ ፡ ውስተ ፡ አብያተ ፡ አማልክት ፡ ወውእቱ ፡ ሐነጸ ፡ አንቀጸ ፡ ቤተ ፡ እግዚአብሔር ፡ ላዕሌየ ። 36 ወኵሉ ፡ ነገሩ ፡ ለዮአታም ፡ ወኵሉ ፡ ዘገብረ ፡ ናሁ ፡ ዝውእቱ ፡ ዘጽሑፍ ፡ ውስተ ፡ መጽሐፈ ፡ ነዚያቲሆሙ ፡ ለነገሥተ ፡ ይሁዳ ። 37 ወይእተ ፡ አሚረ ፡ አኀዘ ፡ ይፈንዎ ፡ እግዚአብሔር ፡ ለረዐሶን ፡ ንጉሠ ፡ ሶርያ ፡ ወፋቁሔ ፡ ወልደ ፡ ሮሜልዩ ፡ ውስተ ፡ ኢየሩሳሌም ። 38 ወሰከበ ፡ ኢዮአታም ፡ ምስለ ፡ አበዊሁ ፡ ውስተ ፡ ሀገረ ፡ ዳዊት ፡ አቡሁ ፡ ወነግሠ ፡ አካዝ ፡ ወልዱ ፡ ህየንቴሁ ።