መጽሐፈ ነገሥት ፫ 8

1 ወለአከ ፡ ንጉሥ ፡ ሰሎሞን ፡ ወነሥኦ ፡ ለኪራም ፡ እምነ ፡ ጢሮስ ፡ ወልደ ፡ ብእሲት ፡ መበለት ፡ ወእምነ ፡ ነገደ ፡ ንፍታሌም ፡ ውእቱ ፡ ወአቡሁሰ ፡ ብእሲ ፡ ጢርያዊ ፡ ነሃቤ ፡ ብርት ፡ ወኬንያ ፡ ፍጹም ፡ ውእቱ ፡ ወጠቢብ ፡ ወማእምር ፡ ወያአምር ፡ ኵሎ ፡ ግብረ ፡ ብርት ፡ ወቦአ ፡ ኀበ ፡ ሰሎሞን ፡ ንጉሥ ፡ ወገብረ ፡ ኵሎ ፡ ግብረ ። 2 ወሰበከ ፡ ፪አዕማደ ፡ ለኤላም ፡ ዘውስተ ፡ ቤት ፡ ወዐሥር ፡ ወሰምን ፡ በእመት ፡ ኑኁ ፡ ለዓምድ ፡ ወአምጣነ ፡ ዘየዐውዶ ፡ ዐሥር ፡ ወርብዕ ፡ በእመት ፡ ዘግዝፉ ፡ አርባዕ ፡ አጻብዕ ፡ ዘይትራከብ ፡ ላዕሌሁ ፡ ዐቀዱ ፡ ወከማሁ ፡ ካልእኒ ፡ ዐምዱ ። 3 ወገብረ ፡ ፪አርእስተ ፡ ሎቶን ፡ ዘያነብሩ ፡ መልዕልተ ፡ አዕማድ ፡ ዘብርት ፡ ስብኮ ፡ ኀምስ ፡ በእመት ፡ ቆሙ ፡ ለ፩ርእስ ። 4 ወገብረ ፡ ፪ሠቅሠቀ ፡ ዘያነብር ፡ ውስተ ፡ አርእስተ ፡ አዕማድ ፤ ፩ሠቅሠቅ ፡ ዲበ ፡ ፩ርእስ ፡ ወካልእ ፡ ሠቅሠቅ ፡ ዲበ ፡ ካልእ ፡ ርእስ ። 5 ወገብሮሙ ፡ ከመ ፡ እንተ ፡ ላዕሉ ፡ ይሰቀሉ ፡ በ፪ሰሌዳተ ፡ ብርት ፡ ሥቅሡቃን ፡ ገብረ ፡ ዘይሰቀል ፡ ሰሌዳ ፡ መልዕልተ ፡ ሰሌዳ ፡ ወከማሁ ፡ ገብረ ፡ ለካልእ ፡ ርእስ ። 6 ወአቀመ ፡ ፪አዕማደ ፡ ዘኤላም ፡ ዘውስተ ፡ መቅደስ ፡ ወሶበ ፡ አቀመ ፡ አሐተ ፡ ዐምደ ፡ ሰመያ ፡ ስማ ፡ ያቁም ፡ ወሶበ ፡ አቀመ ፡ ካልእተ ፡ ዐምደ ፡ ሰመያ ፡ ስማ ፡ በለዝ ። 7 ወውስተ ፡ አርእስተ ፡ አዕማድ ፡ ገብረ ፡ ጽጌያተ ፡ ወመንገለ ፡ ኤላም ፡ ዘዘ ፡ ርብዕ ፡ በእመት ። 8 ወሜላንትሮን ፡ ላዕለ ፡ ክልኤሆን ፡ አዕማድ ፡ ወመልዕልተ ፡ አርእስቲሆን ፡ በአምጣነ ፡ ግዘፈ ፡ ሜላንትሮን ፡ ዘመንገለ ፡ ገቦሆን ። 9 ወገብረ ፡ ባሕረ ፡ ዘዕሥር ፡ በእመት ፡ እምጽንፉ ፡ እስከ ፡ ጽንፉ ፡ ወከባብ ፡ ዐውዳ ፡ ወኀምስ ፡ በእመት ፡ ላዕላ ፡ ወኵሉ ፡ አምጣነ ፡ በውዳ ፡ ሠላሳ ፡ ወሥልስ ፡ በእመት ። 10 ወመታግርተ ፡ ገብረ ፡ ላቲ ፡ እምነ ፡ መንገለ ፡ መትሕተ ፡ ከናፍሪሃ ፡ እንተ ፡ ዐውዳ ፡ ዘየዐውዳ ፡ ዘዘ ፡ ዕሥር ፡ በእመት ፡ ዘይመጥቃ ፡ ለይእቲ ፡ ባሕር ፡ ወያላዕላ ፡ ወገብረ ፡ ከናፍሪሃ ፡ ከመ ፡ ከናፍረ ፡ ጽዋዕ ፡ ወበውስቴታበቈለ ፡ ጽጌያተ ፡ ወግዘፉ ፡ ስዝር ። 11 ወ፲ወ፪አልህምት ፡ መትሕታ ፡ ለይእቲ ፡ ባሕር ፤ ፫ደኔጽሩ ፡ ለመንገለ ፡ መስዕ ፤ ወ፫ይኔጽሩ ፡ ለመንገለ ፡ ባሕር ፤ ወ፫ይኔጽሩ ፡ ለመንገለ ፡ አዜብ ፤ ወ፫ይኔጽሩ ፡ ለመንገለ ፡ ጽባሕ ፡ ወዘባናተ ፡ ኵሎሙ ፡ ለመንገለ ፡ አረፍት ፡ ወይእቲ ፡ ባሕር ፡ እምላዕሉ ፡ ዲቤሆሙ ። 12 ወገብረ ፡ ፲ሜካኖተ ፡ ዘብርት ፡ ኀምስ ፡ በእመት ፡ ኑኃ ፡ ለአሐቲ ፡ ሜከኖት ፡ ወርሕባ ፡ ርብዕ ፡ በእመት ፡ ወስድስ ፡ በእመት ፡ ቆማ ። 13 ወከመዝ ፡ ገብሮን ፡ ለሜካኖት ፤ አስተዳረጎን ፡ ወአስተናበሮን ፡ ከመ ፡ ማዕገት ፡ ወአስተኣኀዞን ፡ ከመ ፡ ማዕገት ፡ በበይናቲሆን ። 14 ወማእከሎን ፡ በኀበ ፡ ይትኣኀዛ ፡ አናብስት ፡ ወአልህምት ፡ ወኪሩብ ፡ ወከመዝ ፡ ውስተ ፡ መአኀዛቲሆን ፡ እምታሕቱሂ ፡ ወእምላዕሉሂ ፡ አናብስት ፡ ወአልህምት ፡ ግብረ ፡ ኮሬ ፡ ሙራዱ ። 15 ወ፬መንኰራኵረ ፡ ብርት ፡ ለለ ፡ ፩ሜከኖት ፡ ወመአኀዛቲሁ ፡ ዘብርት ፡ ወ፬ገበዋቲሁ ፡ ከመ ፡ አምሳለ ፡ ዘመትሕተ ፡ ማዕከክ ። 16 ወእደው ፡ ውስተ ፡ ውእቱ ፡ መንኰራኵር ፡ እኁዝ ፡ ዘሜከኖት ። 17 ወቆሙ ፡ ለውእቱ ፡ መንኰራኵር ፡ ለለ ፡ አሐዱ ፡ እመት ፡ ወመንፈቀ ፡ እመት ። 18 ወግብረቱ ፡ ለውእቱ ፡ መንኰራኵር ፡ ከመ ፡ ግብረተ ፡ መንኰራኵረ ፡ ሰረገላት ፡ ወእደዊሆሙ ፡ ወዘባናቲሆሙ ፡ ወኵሉ ፡ ግብሮሙ ፡ ስብኮ ። 19 ወኵሉ ፡ ፬መታክፍቲሆሙ ፡ ውስተ ፡ ፬መኣዝኒሃ ፡ ለለ ፡ አሐቲ ፡ ሜኬኖት ፡ ወእኁዝ ፡ በሜክኖት ፡ ወመታክፊሃ ። 20 ወውስተ ፡ ርእሰ ፡ ሜኮኖት ፡ መንፈቀ ፡ እመት ፡ ቀጸላ ፡ ክባብ ፡ ዐውዳ ፡ ውስተ ፡ ርእሳ ፡ ለሜኮኖት ፡ ወአርእስተ ፡ እዴዊሃ ፡ ይእኅዝ ፡ ኀበ ፡ ተራከባ ፡ ወአርእስተ ፡ እደዊሆን ፡ ክሡት ። 21 ወኀበ ፡ ተኣኀዛ ፡ ኪሩብ ፡ ወበቀልት ፡ ወኣናብስት ፡ ዘከመ ፡ ውስተ ፡ ገጾሙ ፡ ለኵሎሙ ፡ እለ ፡ ውስተ ፡ ዐውድ ። 22 ወከመዝ ፡ ገብረ ፡ ለዐሥሩ ፡ መካኖት ፡ ፩ግብረቶን ፡ ወ፩አምጣኖን ፡ ለኵሎን ። 23 ወገብረ ፡ ፲መስፈርተ ፡ ብርት ፡ ዘስሙ ፡ ኪጥሮገውሎስ ፡ ወያገምር ፡ አሐዱ ፡ ኪጥሮገውሎስ ፡ ፵በመስፈርተ ፡ ኮኢሶ ፡ ወይመልእ ፡ ወለለ ፡ አሐቲ ፡ ሜከኖት ፡ ፩ኪጥሮጋውሎስ ፡ ወከማሁ ፡ ለ፲ሜከኖት ። 24 ወአንበሮን ፡ ለ፲ሜከኖት ፡ እምገቦ ፡ ቤት ፡ ዘፀጋም ፡ ወባሕርሰ ፡ እምገቦ ፡ ቤት ፡ ዘየማን ፡ ጽባሓዊ ፡ ዘእምነ ፡ ገቦ ፡ አዜብ ። 25 ወገብረ ፡ ኪረም ፡ ጸሃራተ ፡ ወክክማተ ፡ ፫ወፍየላተኒ ፡ ወፈጸመ ፡ ኪረም ፡ ገቢረ ፡ ኵሎ ፡ ግብረ ፡ ዘገብረ ፡ ለንጉሥ ፡ ሰሎሞን ፡ በውስተ ፡ ቤተ ፡ እግዚአብሔር ። 26 አዕማደ ፡ ፪ወአርእስቲሆን ፡ ለአዕማድ ፡ መልዕልተ ፡ ክልኤሆን ፡ አዕማድ ፡ ወሠቃሥቀ ፡ ፪ዘያነብር ፡ ዲበ ፡ ክልኤሆን ፡ አርእስተ ፡ አዕማድ ፡ ዘግልፎ ፡ ዘዲበ ፡ አዕማድ ። 27 ወጽጌያተ ፡ ሮማን ፡ ፬፻ውስተ ፡ ክልኤሆን ፡ ሠቅሠቅ ፡ በበ ፡ ፪ጾታ ፡ ለለ ፡ ፩ሠቅሠቅ ፡ ዘዲበ ፡ ክልኤሆሙ ፡ አርእስተ ፡ አዕማድ ፡ ዘመልዕልተ ፡ ክልኤሆን ፡ አዕማድ ። 28 ወሜኬኖተ ፡ ፲ወ፲መሳፍርት ፡ ኪጥሮገውሎስ ፡ ለ፲ሜኮኖት ። 29 ወባሕረ ፡ አሐተ ፡ ወ፲ወ፪አልህምተ ፡ መትሕተ ፡ ባሕር ። 30 ወጸሃራተኒ ፡ ወከከማተኒ ፡ ፫ወፍየላተኒ ፡ ወኵሉ ፡ ንዋይ ፡ ዘገብረ ፡ ኪረም ፡ ለንጉሥ ፡ ሰሎሞን ፡ ለቤተ ፡ እግዚአብሔር ፤ ወ፵ወ፰አዕማድ ፡ ለቤተ ፡ ንጉሥ ፡ ወለቤተ ፡ እግዚአብሔርኒ ፡ ገብረ ፡ ንጉሥ ፡ ኵሎ ፡ ዘገብረ ፡ ኪራም ፡ ዘብርት ፡ ሰንጐጕ ። 31 ወአልቦ ፡ መድሎተ ፡ ዘተገብረ ፡ ዝንቱ ፡ ኵሉ ፡ ግብር ፡ እስመ ፡ ብዙኅ ፡ ወአልቦ ፡ ኍልቈ ፡ መድሎቱ ፡ ለውእቱ ፡ ብርት ። 32 ወበቤት ፡ ዘኀበ ፡ ዮርዳኖስ ፡ ሰበኮ ፡ በኀበ ፡ መግዘፉ ፡ ለምድር ፡ በማእከለ ፡ ሰኮት ፡ ወበማእከለ ፡ ሴይራ ። 33 ወአብአ ፡ ሰሎሞን ፡ ንዋየ ፡ ዘአግበረ ፡ ለቤተ ፡ እግዚአብሔር ፡ ምሥዋዐ ፡ ዘወርቅ ፡ ወማእደ ፡ እንተ ፡ ወርቅ ፡ እንተ ፡ ዲቤሃ ፡ ይሠርዑ ፡ ኅብስተ ፡ ቍርባን ፤ ወመራናታተ ፡ ፭እምየማኑ ፡ ወ፭እምፀጋሙ ፡ [ቅድመ ፡] ዳቤር ፡ እለ ፡ ወርቅ ፡ እኁዛተ ፡ ወርኩባተ ፡ ተቅዋማቲሆን ፡ ወመኃትዊሆን ፡ ወበዘያሤንይዎን ፡ ዘወርቅ ። 34 ወመዓጹትኒ ፡ ወተቅዋማቲሁኒ ፡ ወጽዋዓቲሁኒ ፡ ወመጣብሕቲሁኒ ፡ ወአጽሕልቲሁኒ ፡ ዘወርቅ ፡ ወኆኀተ ፡ ቤቱኒ ፡ ውሳጢ ፡ ዘቅዱሰ ፡ ቅዱሳን ፡ ወመዓጹተ ፡ ጽርሑኒ ፡ ዘወርቅ ። 35 ወተፈጸመ ፡ ግብሩ ፡ ዘገብረ ፡ ሰሎሞን ፡ ለቤተ ፡ እግዚአብሔር ፡ ወአብአ ፡ ሰሎሞን ፡ ቅድሳተ ፡ ዳዊት ፡ አቡሁ ፡ ወኵሎ ፡ ቅድስተ ፡ ሰሎሞን ፡ ዘወርቅ ፡ ወዘብሩር ፡ አብአ ፡ ውስተ ፡ መዝገበ ፡ ቤተ ፡ እግዚአብሔር ። 36 ወሐነጸ ፡ ሰሎሞን ፡ በ፲ወ፫ክረምት ፤ 37 ሐነጸ ፡ ቤተ ፡ በገዳም ፡ ውስተ ፡ ደብረ ፡ ሊባኖስ ፤ ፻በእመት ፡ ኑኁ ፡ ወ፶በእመት ፡ ግድሙ ፤ ወ፫ጾታ ፡ አዕማዲሁ ፡ ዘዕፀወ ፡ ቄድሪኖን ፡ ወአርእስተ ፡ አዕማዲሁኒ ፡ ዘዕፀ ፡ ቄድሪኖን ። 38 ወአስተቀጸሎ ፡ እንተ ፡ ጠፈሩ ፡ ለቤት ፡ እንተ ፡ ዐውዱ ፡ አዕማዲሁ ፡ ፵ወ፭ለለ ፡ አሐዱ ፡ ጾታሁ ። 39 ወሜለንትራ ፡ ፫ቅሙር ፡ ዐዘቅታተ ፡ ጠፈሩ ። 40 መሥልስተ ። 41 ወኵሉ ፡ መሳክዊሁ ፡ ወዐዘቅታቲሁኒ ፡ ርቡዕ ፡ ወሥቅሡቅ ፡ ወመሥልስት ፡ መሳክዊሁ ፡ እስከ ፡ መልዕልት ፡ ኆኃቲሁ ። 42 ወኤላም ፡ ዘአዕማዲሁ ፡ ኀምሳ ፡ ኑኁ ፡ ወኀምሳ ፡ ርሕቡ ፡ ወዘውግ ፡ እሙንቱ ፡ ኤላም ፡ ዘቅድሜሆሙኒ ፡ አዕማድ ፡ ወግዙፍ ፡ ቅድሜሆሙ ፡ ለኤላም ። 43 ወኤላምሂ ፡ ዘመናብርት ፡ በዘ ፡ ይኴንን ፡ ኤላም ፡ ዘምኵናን ። 44 ወቤቶሙኒ ፤ 45 ቤተ ፡ ዘውስቴቱ ፡ ይነብር ፡ ህየ ፡ ዐጸድ ፡ ፩ፍሉጥ ፡ እምነ ፡ እሉ ፡ ወግብሩሰ ፡ ካማሁ ፡ ወቤታኒ ፡ ለወለተ ፡ ፈርዖን ፡ እንተ ፡ አውሰባ ፡ ሰሎሞን ፡ በከመ ፡ ዝንቱ ፡ ኤላም ። 46 ወኵሉ ፡ ዝንቱ ፡ በዕንቍ ፡ ክቡር ፡ ወግሉፍ ፡ ወስርግው ፡ እንተ ፡ ውስጥ ፡ እምነ ፡ መሠረቱ ፡ እንተ ፡ ውስጥ ፡ እስከ ፡ ጠፈሩ ፡ ወአፍአኒ ፡ ውስተ ፡ ዐጸድ ፡ ዐቢይ ፤ 47 ተሣረረ ፡ በእብን ፡ ክቡር ፡ ወዐበይት ፡ እብን ፡ ዘዘ ፡ ዕሥር ፡ በእመት ፡ ወዘዘ ፡ ስምን ፡ በእመት ፤ 48 ወእምላዕሉሂ ፡ በክቡራት ፡ እለ ፡ ዕሩይ ፡ አምጣኒሆን ፡ እለ ፡ ኢኮና ፡ ውቁራተ ፡ ወዐጸዱሂ ፡ በዕፀ ፡ ቄድሪኖን ፤ 49 ወዐውዱ ፡ ፫ጾታ ፡ ዘኢኮነ ፡ ውቅሮ ፡ ወ፩ጾታ ፡ በውቅሮ ፡ ወበዕፀወ ፡ ቄድሪኖን ፡ ገለፎ ፡ ወፈጸመ ፡ ሰሎሞን ፡ ኵሎ ፡ በቤቱ ።