መጽሐፈ ነገሥት ፫ 19

1 ወእምድኅረ ፡ ብዙኅ ፡ መዋዕል ፡ ኮነ ፡ ቃለ ፡ እግዚአብሔር ፡ ኀበ ፡ ኤልያስ ፡ ወይቤሎ ፡ አስተርእዮ ፡ ላአካአብ ፡ ወእሁብ ፡ ዝናመ ፡ ላዕለ ፡ ምድር ። 2 ወሖረ ፡ ኤልያስ ፡ ከመ ፡ ያስተርእዮ ፡ ለአካአብ ፡ ወ ፡ ጸንዐ ፡ ረኃብ ፡ በሰማርያ ። 3 ወጸውዖ ፡ አካአብ ፡ ለአብድዩ ፡ መጋቢሁ ፡ ወአብድዩሰ ፡ ፈራሂ ፡ እግዚአብሔር ፡ ውእቱ ፡ ፈድፋደ ። 4 ወአመ ፡ ቀተለቶሙ ፡ ኤልዛቤል ፡ ለነቢያተ ፡ እግዚአብሔር ፡ ነሥአ ፡ አብድዩ ፡ ፻ብእሴ ፡ እምውስተ ፡ ነቢያት ፡ ወኀብአሙ ፡ በበ ፡ ፶ውስተ ፡ በአት ፡ ወሴሰዮሙ ፡ እክለ ፡ ወማየ ። 5 ወይቤሎ ፡ አካአብ ፡ ለአብድዩ ፡ ነዓ ፡ ናንሶሱ ፡ ውስተ ፡ ገዳም ፡ ወኀበ ፡ አንቅዕተ ፡ ማይ ፡ ወውስተ ፡ አፍላግ ፡ እመቦ ፡ ከመ ፡ ንርከብ ፡ ሣዕረ ፡ ወናሐዩ ፡ አፍራሲነ ፡ ወአብቅሊነ ፡ ወኢይጥፋእ ፡ እንስሳነ ። 6 ወተፋለጡ ፡ እንዘ ፡ የሐውሩ ፡ ፍኖተ ፡ ወአካአብኒ ፡ ሖረ ፡ አሐተ ፡ ፍኖተ ፡ ወአብድዩኒ ፡ ሖረ ፡ ካልእተ ፡ ፍኖተ ፡ እንተ ፡ ባሕቲቱ ። 7 ወእንዘ ፡ ሀለወ ፡ አብድዩ ፡ ውስተ ፡ ፍኖት ፡ ባሕቲቱ ፡ መጽአ ፡ ኤልያስ ፡ ቅድሜሁ ፡ ባሕቲቱ ፡ ወሮጸ ፡ አብድዩ ፡ ወወድቀ ፡ በገጹ ፡ ወሰገደ ፡ ሎቱ ፡ ወይቤሎ ፡ አንተኑ ፡ ውእቱ ፡ እግዚእየ ፡ ኤልያስ ። 8 ወይቤሎ ፡ ኤልያስ ፡ አነ ፡ ውእቱ ፡ ወሖር ፡ በሎ ፡ ለእግዚእከ ፡ ናሁ ፡ ኀበ ፡ ሀለወ ፡ ኤልያስ ። 9 ወይቤሎ ፡ አብድዩ ፡ ምንተ ፡ አበስኩ ፡ ለከ ፡ ከመ ፡ ትመጥዎ ፡ ለገብርከ ፡ ውስተ ፡ እዴሁ ፡ ለአካአብ ፡ ከመ ፡ ይቅትለኒ ። 10 ሕያሡ ፡ እግዚአብሔር ፡ ከመ ፡ አልቦቱ ፡ ሕዝበ ፡ ወመንግሥተ ፡ ኀበ ፡ ኢለአከ ፡ እግዚእየ ፡ ይኅሥሡከ ፡ ወይቤልዎ ፡ ኢሀለወ ፡ ወአውዐየ ፡ መግሥተ ፡ ወበሓውርቲሃ ፡ እስመ ፡ ኢረከብከ ። 11 ወይእዜኒ ፡ ትብለኒ ፡ አንተ ፡ ሖር ፡ በሎ ፡ ለእግዚእከ ፡ ናሁ ፡ ኀበ ፡ ሀለወ ፡ ኤልያስ ። 12 ወለእመ ፡ ሖርኩ ፡ አነ ፡ እምኀቤከ ፡ ወመንፈሰ ፡ እግዚአብሔር ፡ ነሥአከ ፡ ወወሰይከ ፡ ባዕደ ፡ ብሔረ ፡ ኀበ ፡ ኢያአምር ፡ ወሖርኩ ፡ ወነገርክዎ ፡ ለአካአብ ፡ እምከመ ፡ ኢረከበከ ፡ ይቀትለኒ ፡ ወአነ ፡ ገብርከ ፡ ፈራሂ ፡ እግዚአብሔር ፡ እምንእስየ ። 13 ወእመ ፡ ሰማዕከ ፡ አንተ ፡ እግዚእየ ፡ ዘገበርኩ ፡ አመ ፡ ቀተለቶሙ ፡ ኤልዛቤል ፡ ለነቢያተ ፡ እግዚአብሔር ፡ ወኀባእኩ ፡ እምውስተ ፡ ነቢያተ ፡ እግዚአብሔር ፡ ፻ዕደወ ፡ በበ ፡ ፶ውስተ ፡ በአት ፡ ወሴሰይክዎሙ ፡ እክለ ፡ ወማየ ። 14 ወይእዜኒ ፡ አንተ ፡ ትብለኒ ፡ ሖር ፡ ወበሎ ፡ ለእግዚእከ ፡ ናሁ ፡ ኀበ ፡ ሀለወ ፡ ኤልያስ ፡ ወይቀትለኒ ፡ እንከ ። 15 ወይቤሎ ፡ ኤልያስ ፡ ሕያው ፡ እግዚአብሔር ፡ አምላከ ፡ ኀይል ፡ ዘቆምኩ ፡ ቅድሜሁ ፡ ከመ ፡ ዮም ፡ ኣስተርእዮ ። 16 ወሖረ ፡ አብድዩ ፡ ወተቀበሎ ፡ ለአካአብ ፡ ወአይድዖ ፡ ወሮጸ ፡ አካአብ ፡ ወሖረ ፡ ወተቀበሎ ፡ ለኤልያስ ። 17 ወይቤሎ ፡ አካአብ ፡ ለኤልያስ ፡ አንተኑ ፡ ውእቱ ፡ ዘትገፈትኦሙ ፡ ለእስራኤል ። 18 ወይቤሎ ፡ ኤልያስ ፡ አንሰ ፡ ኢይገፈትኦሙ ፡ ለእስራኤል ፡ አላ ፡ አንተ ፡ ወቤተ ፡ አቡከ ፡ እለ ፡ ኀደግምዎ ፡ ለእግዚአብሔር ፡ አምላክክሙ ፡ ወሖርክሙ ፡ ወተለውክሙ ፡ አማልክት ፡ በለአም ። 19 ወይእዜኒ ፡ ለአከ ፧ ሎሙ ፡ ለእስራኤል ፡ ወአስተጋብኦሙ ፡ ኀቤየ ፡ ውስተ ፡ ደብረ ፡ ቄርሜሎስ ፡ ወለነቢያተ ፡ ኀፍረት ፡ ፬፻ወ፶ወለነቢያተ ፡ ምሕራማተ ፡ አዕዋም ፡ ፬፻ ፡ እለ ፡ ይሴሰዩ ፡ ማእዳ ፡ ለኤልዛቤል ። 20 ወለአከ ፡ አካአብ ፡ ኀበ ፡ ኵሉ ፡ እስራኤል ፡ ወአስተጋብኦሙ ፡ ለኵሉ ፡ ነቢያት ፡ ውስተ ፡ ደብረ ፡ ቀርሜሎስ ። 21 ወአቅረቦ ፡ ለኤልያስ ፡ ኀበ ፡ ኵሎሙ ፡ ወይቤሎሙ ፡ ኤልያስ ፡ እስከ ፡ ማእዜ ፡ ተሐነክሱ ፡ በክልኤሆን ፡ ጌጋይክሙ ፤ ለእመ ፡ እግዚአብሔር ፡ ውእቱ ፡ አምላክ ፡ ትልዉ ፡ ኪያሁ ፡ ወለእመ ፡ በዓል ፡ ውእቱ ፡ ትልዉ ፡ ኪያሁ ፡ ወአልቦ ፡ ቃለ ፡ ዘአውሥእዎ ፡ ሕዝብ ። 22 ወይቤሎሙ ፡ ኤልያስ ፡ ለሕዝብ ፡ አነ ፡ ባሕቲትየ ፡ ተረፍኩ ፡ ነቢየ ፡ እግዚአብሔር ፡ ወናሁ ፡ ነቢያተ ፡ በዓል ፡ ፬፻ወ፶ብእሲ ፡ ወነቢያተ ፡ ምሕራማተ ፡ ዖም ፡ ፬፻ ። 23 የሀቡነ ፡ ፪አልህምተ ፡ ወይኅረዩ ፡ ሎሙ ፡ እሙንቱ ፡ አሐደ ፡ ወይጥብሕዎ ፡ በበመሌሊቱ ፡ ወይደይዎ ፡ መልዕልተ ፡ ዕፀው ፡ ወኢያንድዱ ፡ እሳተ ፡ ወአነኒ ፡ እገብር ፡ ካልአ ፡ ላህመ ፡ ወኢይወዲ ፡ እሳተ ። 24 ወይጸውዑ ፡ እሙንቱኒ ፡ አማልክቲሆሙ ፡ በበአስማቲሆሙ ፡ ወአነኒ ፡ እጼውዕ ፡ ስመ ፡ እግዚአብሔር ፡ አምላኪየ ፡ ወዘውስቴቶሙ ፡ አምላክ ፡ ውእቱ ፡ ዘፈነወ ፡ እላተ ፡ አምላክ ፡ ውእቱ ፤ ወአውሥእዎ ፡ ኵሎሙ ፡ ሕዝብ ፡ ወይቤልዎ ፡ ሠናየ ፡ ነበብከ ፡ ቃለከ ። 25 ወይቤሎሙ ፡ ኤልያስ ፡ ነቢያተ ፡ ኀፍረት ፡ ኅረዩ ፡ ለክሙ ፡ አሐደ ፡ ላህመ ፡ ወግበሩ ፡ ቅድሙ ፡ አንትሙ ፡ እስመ ፡ አንትሙ ፡ ትበዝኁ ፡ ወጸውዑ ፡ በስመ ፡ አምላክክሙ ፡ ወእሳተ ፡ ኢትደዩ ። 26 ወነሥኡ ፡ ላህሞሙ ፡ ወገብሩ ፡ ወጸውዑ ፡ በስመ ፡ በዓል ፡ አምነግህ ፡ እስከ ፡ ቀትር ፡ ወይቤሉ ፡ ስምዐነ ፡ በዐል ፡ ስምዐነ ፡ ወአልቦ ፡ ቃለ ፡ ወአልቦ ፡ ድምፀ ፡ ወይረውጹ ፡ ኀበ ፡ ምሥዋዕ ፡ ዘገብሩ ። 27 ወሶበ ፡ ቀትረ ፡ አኀዘ ፡ ይሳለቅ ፡ ላዕሌሆሙ ፡ ኤልያስ ፡ ትስብያዊ ፡ ወይቤሎሙ ፡ ጸውዑ ፡ በዐቢይ ፡ ቃል ፡ እስመ ፡ ዮጊ ፡ ይትላሀይ ፡ ወእመ ፡ አኮ ፡ ይቴክዝ ፡ ዮጊ ፡ ወእመኒ ፡ ይነውም ፡ ጽርኁ ፡ ሎቱ ፡ ወአንቅህዎ ። 28 ወአኀዙ ፡ ይጽርኁ ፡ ወይጸውዑ ፡ በዐቢይ ፡ ቃል ፡ ወይጥብሑ ፡ ሥጋሆሙ ፡ በመጥባሕት ፡ ወበኰያንው ፡ እስከ ፡ ኀየሎሙ ፡ ደም ። 29 ወይትኔበዩ ፡ እስከ ፡ ፍና ፡ ሰርክ ፡ ወእምዝ ፡ ሶበ ፡ ኮነ ፡ ጊዜ ፡ ዕርገተ ፡ መሥዋዕት ፡ ወይቤሎሙ ፡ ኤልያስ ፡ ለነቢያተ ፡ ኀፍረት ፡ ይከውነክሙ ፡ እምይእዜሰ ፡ እንከ ፡ እግበር ፡ አነኒ ፡ መሥዋዕትየ ፡ ወተግሕሡ ፡ ወሖሩ ። 30 ወይቤሎሙ ፡ ኤልያስ ፡ ለሕዝብ ፡ ንዑ ፡ ኀቤየ ፡ ወሖሩ ፡ ኀቤሁ ። 31 ወነሥአ ፡ ኤልያስ ፡ ዐሥሩ ፡ ወክልኤ ፡ እብነ ፡ በከመ ፡ ኍልቆሙ ፡ ለሕዝበ ፡ እስራኤል ፡ በከመ ፡ ይቤሎ ፡ እግዚአብሔር ፡ እስራኤል ፡ ይኩን ፡ ስምከ ። 32 ወነደቆን ፡ ለእማንቱ ፡ አእባን ፡ በስመ ፡ እግዚአብሔር ፡ ወአሕየወ ፡ ምሥዋዐ ፡ ዘመዝበረ ፡ ወገብረ ፡ ባሕረ ፡ ዘያገምር ፡ ፪በመስፈርተ ፡ ዘርእ ፡ እንተ ፡ ዐውዱ ፡ ለምሥዋዕ ። 33 [ወወጥሐ ፡ ዕፀወ ፡ መልዕልተ ፡ ምሥዋዕ ፡] ዘገብረ ፡ [ወ]መተሮ ፡ በበመለያልዪሁ ፡ ለውእቱ ፡ ጽንሓሐ ፡ መሥዋዕት ፡ ወአስተናበረ ፡ [ላዕለ ፡] ዕፀዊሁ ፡ ወወጥሐ ፡ ዲበ ፡ ምሥዋዕ ። 34 ወይቤሎሙ ፡ አምጽኡ ፡ ሊተ ፡ ፬መሳብክተ ፡ ማይ ፡ ወሱጡ ፡ ዲበ ፡ ምሥዋዕ ፡ ወዲበ ፡ ዕፀዊሁኒ ፡ ወገብሩ ፡ ከማሁ ፡ ወይቤሎሙ ፡ ድግሙ ፡ ወደገሙ ፡ ወይቤሎሙ ፡ ሠልሱ ፡ ወሠለሱ ። 35 ወውሕዘ ፡ ማይ ፡ ዐውደ ፡ ምሥዋዕ ፡ መሊኦ ፡ ውስተ ፡ ባሕር ፡ ማዩ ። 36 ወጸርኀ ፡ ኤልያስ ፡ ውስተ ፡ ሰማይ ፡ ወይቤ ፡ እግዚኦ ፡ አምላከ ፡ አብርሃም ፡ ወአምላከ ፡ ይስሐቅ ፡ ወእስራኤል ፡ ስምዐኒ ፡ እግዚኦ ፡ ስምዐኒ ፡ ዮም ፡ በበይነ ፡ እሳት ፡ ወያእምሩ ፡ ኵሉ ፡ ሕዝብ ፡ ከመ ፡ አንተ ፡ ውእቱ ፡ እግዚአብሔር ፡ አምላከ ፡ እስራኤል ፡ ወአነ ፡ ገብርከ ፡ ወበእንቲአከ ፡ ገበርክዎ ፡ ለዝንቱ ፡ ግብር ። 37 ስምዐኒ ፡ እግዚኦ ፡ ስምዐኒ ፡ ወያእምሩ ፡ ኵሉ ፡ ሕዝብ ፡ ከመ ፡ አንተ ፡ ውእቱ ፡ እግዚአብሔር ፡ አምላክ ፡ ወአንተ ፡ ገፍታእኮሙ ፡ ልቦሙ ፡ ለኵሎሙ ፡ አሕዛብ ፡ ለድኅሬሆሙ ። 38 ወወረደ ፡ እሳት ፡ አምሰማይ ፡ እምኀበ ፡ እግዚአብሔር ፡ ወበልዐት ፡ መሥዋዕቶ ፡ ወዕፀዊሁኒ ፡ ወማዮኒ ፡ ዘውስተ ፡ ባሕሩ ፡ ወእበኒሁኒ ፡ ወለሐሰት ፡ መሬቶሂ ። 39 ወወድቁ ፡ ኵሉ ፡ ሕዝብ ፡ በገጾሙ ፡ ወሰገዱ ፡ ሎቱ ፡ ወይቤልዎ ፡ አማን ፡ ውእቱ ፡ እግዚአብሔር ፡ አምላክ ። 40 ወይቤሎሙ ፡ ኤልያስ ፡ ለሕዝብ ፡ አኀዝዎሙ ፡ ለነቢያተ ፡ በዓል ፡ ወአልቦ ፡ ዘያመስጠክሙ ፡ እምውስቴቶሙ ፡ ወአኀዝዎሙ ፡ ለነቢያተ ፡ ሐሰት ፡ ወአውረዶሙ ፡ ኤልያስ ፡ ውስተ ፡ ፈለገ ፡ ቂሶን ፡ ወረገዞሙ ፡ በህየ ። 41 ወይቤሎ ፡ ኤልያስ ፡ ለአካአብ ፡ ዕርግ ፡ ወብላዕ ፡ ወስተይ ፡ እስመ ፡ ድምፀ ፡ እገሪሁ ፡ ለዝናም ። 42 ወዐርገ ፡ አካአብ ፡ ይብላዕ ፡ ወይስተይ ፡ ወዐርገ ፡ ኤልያስ ፡ ውስተ ፡ ደብረ ፡ ቀርሜሎስ ፡ ወሰገደ ፡ ውስተ ፡ ምድር ፡ ወወደየ ፡ ርእሶ ፡ ውስተ ፡ ብረኪሁ ። 43 ወይቤሎ ፡ ለቍልዔሁ ፡ ዕርግ ፡ ወርኢ ፡ መንገለ ፡ ፍኖተ ፡ ባሕር ፡ ወርእየ ፡ ውእቱ ፡ ወልድ ፡ ወይቤ ፡ አልቦ ፡ ወኢምንተኒ ፡ ወይቤሎ ፡ ኤልያስ ፡ ግባእ ፡ ስብዐ ። 44 ወገብአ ፡ ውእቱ ፡ ወልድ ፡ ወበሳብዕት ፡ ርእየ ፡ ሕቀ ፡ ደመና ፡ መጠነ ፡ ሰኰና ፡ ብእሲ ፡ ወታዐርግ ፡ ማየ ፡ እምባሕር ፡ ወይቤሎ ፡ ዕርግ ፡ ወንግሮ ፡ ለአካአብ ፡ ከመ ፡ ይሖር ፡ ሰረንላቲሁ ፡ ወይረድ ፡ ኢይርከቦ ፡ ዝናም ። 45 ወእምዝ ፡ እስከ ፡ ይትመየጡ ፡ ለፌ ፡ ወለፌ ፡ ጸልመ ፡ ሰማይ ፡ በደመና ፡ ወመጽአ ፡ ዐውሎ ፡ ወወረደ ፡ ዝናም ፡ ዐቢይ ፡ ወሖረ ፡ አካአብ ፡ ምስለ ፡ እስራኤል ፡ እንዘ ፡ ይበኪ ። 46 ወመጽአ ፡ እደ ፡ እግዚአብሔር ፡ ላዕለ ፡ ኤልያስ ፡ ወአቅነቶ ፡ ሐቌሁ ፡ ወሮጸ ፡ ቅድሜሁ ፡ ለአካአብ ፡ ምስለ ፡ እስራኤል ።