መጽሐፈ ነገሥት ፫ 15

21 ወነግሠ ፡ ሮብዓም ፡ ወልደ ፡ ሰሎሞን ፡ ላዕለ ፡ ይሁዳ ፡ ወአመ ፡ ይነግሥ ፡ ወልደ ፡ ፵ዓም ፡ ወ፩ውእቱ ፡ ወ፲ወ፯ዓመተ ፡ ነግሠ ፡ በኢየሩሳሌም ፡ በሀገር ፡ እንተ ፡ ኀርየ ፡ እግዚአብሔር ፡ ያቅም ፡ ስሞ ፡ በህየ ፡ እምነ ፡ ኵሉ ፡ ሕዝበ ፡ እስራኤል ፡ ወስማ ፡ ለእሙ ፡ ናሐኖን ፡ ዐሞናዊት ። 22 ወገብረ ፡ ሮብዓም ፡ እኩየ ፡ ቅድመ ፡ እግዚአብሔር ፡ ወኣቅንአ ፡ በኵሉ ፡ ዘገብሩ ፡ አበዊሁ ፡ ወበአበሳሆሙ ፡ ዘአበሱ ። 23 ወሐነጹ ፡ አብያተ ፡ አማልክት ፡ ወአቀመ ፡ ምስሌሆሙ ፡ ሐውልተ ፡ ምሕራማቲሆሙ ፡ በውስተ ፡ ኵሉ ፡ አውግር ፡ ልዑላት ፡ ወታሕተ ፡ ኵሉ ፡ ዖም ፡ ጽፉቅ ፡ ዘቦ ፡ ጽላሎተ ። 24 ወአኅበረ ፡ በኵሉ ፡ ምድር ፡ ወገብሩ ፡ በኵሉ ፡ ርኵሶሙ ፡ ለአሕዛብ ፡ ዘአሰሰለ ፡ እግዚአብሔር ፡ እምቅድመ ፡ ገጾሙ ፡ ለደቂቀ ፡ እስራኤል ። 25 ወእምዝ ፡ አመ ፡ ኃምስ ፡ ዓመት ፡ እምዘ ፡ ነግሠ ፡ ሮብዓም ፡ ዐርገ ፡ ሱስቀም ፡ ንጉሠ ፡ ግብጽ ፡ ላዕለ ፡ ኢየሩሳሌም ። 26 ወነሥአ ፡ ኵሎ ፡ መዛግብተ ፡ ቤተ ፡ እግዚአብሔር ፡ ወመዛግብተ ፡ ቤተ ፡ ንጉሥ ፡ ወኲናታተ ፡ ዘወርቅ ፡ ዘሰለበ ፡ ዳዊት ፡ እምላዕለ ፡ ደቀ ፡ አድርዐዛር ፡ ንጉሠ ፡ ሱባ ፡ ወአእተወ ፡ ኢየሩሳሌም ፡ ኵሎ ፡ ዘሰለበ ፤ ወላትወኒ ፡ ዘወርቅ ፡ ወወሰደ ፡ ብሔረ ፡ ግብጽ ። 27 ወገብረ ፡ ሮብዓም ፡ ንጉሥ ፡ ወላትወ ፡ ዘብርት ፡ ህየንቴሆሙ ፡ ወአወፈዮን ፡ ለመላእክቲሆሙ ፡ ለእለ ፡ ይረውጹ ፡ ቅድሜሁ ፡ ወእለ ፡ የዐቅቡ ፡ ዴዴ ፡ ቤተ ፡ ንጉሥ ። 28 ወእ ፡ ምዝ ፡ ሶበ ፡ የሐውር ፡ ቤተ ፡ እግዚአብሔር ፡ ይጸውርዎን ፡ እለ ፡ የሐውሩ ፡ ቅድሜሁ ፡ ወይጸንሕዎ ፡ እስከ ፡ ይወፅእ ፡ በምቅዋሞሙ ። 29 ወዝንቱ ፡ ውእቱ ፡ ኵሉ ፡ ነገሩ ፡ ለሮብዓም ፡ ወኵሉ ፡ ግብሩ ፡ ዘገብረ ፡ ዝንቱ ፡ ውእቱ ፡ ዘጽሑፍ ፡ ውስተ ፡ መጽሐፈ ፡ ነዚያት ፡ ወዓመተ ፡ መንግሥቱ ፡ በይሁዳ ። 30 ወኵሉ ፡ ንብረቶሙ ፡ በቀትል ፡ በኵሉ ፡ መዋዕሊሆሙ ፡ ማእከለ ፡ ሮብዓም ፡ ወማእከለ ፡ ኢዮራብዓም ። 31 ወሰከበ ፡ ሮብዓም ፡ ምስለ ፡ አበዊሁ ፡ ወተቀብረ ፡ ውስተ ፡ ሀገረ ፡ ዳዊት ፡ ወነግሠ ፡ አብያ ፡ ወልዱ ፡ ህየንቴሁ ።