መጽሐፈ ነገሥት ፩ 30

1 ወእምዝ ፡ ሶበ ፡ ቦኡ ፡ ዳዊት ፡ ወሰብኡ ፡ ውስተ ፡ [ሴቂላቅ ፡] አመ ፡ ሣልስት ፡ ዕለት ፡ ወዐማሌቅ ፡ መጽኡ ፡ እምነ ፡ አዜባ ፡ ለሴቄላቅ ፡ ወቀተልዋ ፡ ለሴቄላቅ ፡ ወአውዐይዋ ፡ በእሳት ። 2 ወአንስትሰ ፡ ወኵሉ ፡ ዘውስቴታ ፡ ንኡሶሙ ፡ ወዐቢዮሙ ፡ ኢቀተሉ ፡ አንስቲያሆሙ ፡ ወኢዕደዊሆሙ ፡ ፄወውዎሙ ፡ ወአተዉ ፡ ብሔሮሙ ። 3 ወበጽሑ ፡ ዳዊት ፡ ወሰብኡ ፡ ውስተ ፡ ሀገር ፡ ወረከብዋ ፡ በዘአውዐይዋ ፡ በእሳት ፡ ወአንስቲያሆሙሰ ፡ ወደቂቆሙ ፡ ወአዋልዲሆሙ ፡ ፄወዉ ። 4 ወአልዐሉ ፡ ቃሎሙ ፡ ዳዊት ፡ ወሰብኡ ፡ ወበከዩ ፡ እስከ ፡ ደክሙ ፡ ወአልቦሙ ፡ ኀይለ ፡ እንከ ፡ ለበኪይ ። 5 ወተፄወዋ ፡ ክልኤሆን ፡ አንስቲያሁ ፡ ለዳዊት ፡ አኪናሆም ፡ [ኢይዝ]ራኤላዊት ፡ ወአቤግያ ፡ ብእሲተ ፡ ናባል ፡ ቀርሜላዊ ። 6 ወተከዘ ፡ ዳዊት ፡ ጥቀ ፡ እስመ ፡ ይቤሉ ፡ ሕዝብ ፡ ይውግርዎ ፡ እስመ ፡ ትኩዝ ፡ ነፍሶሙ ፡ ለኵሎሙ ፡ ሕዝብ ፡ በእንተ ፡ ደቂቆሙ ፡ ወአዋልዲሆሙ ፡ ወጸንዐ ፡ ዳዊት ፡ በእግዚአብሔር ። 7 ወይቤሎ ፡ ዳዊት ፡ ለአብያታር ፡ ካህን ፡ ወልደ ፡ አኪሜሌክ ፡ አብእ ፡ ኤፉደ ። 8 ወተስእለ ፡ ዳዊት ፡ ቃለ ፡ እግዚአብሔር ፡ እንዘ ፡ ይብል ፡ እዴግኖሙኑ ፡ ለእሉ ፡ ጌዶር ፡ ለእመ ፡ እረክቦሙ ፡ ወይቤሎ ፡ ዴግኖሙ ፡ እስሙ ፡ ተረክቦሙሂ ፡ ወታስተጋብኦኒ ፡ ወታድኅንሂ ፡ ወታሐዩሂ ። 9 ወሖረ ፡ ዳዊት ፡ ወእልክቱ ፡ ፬፻ዕደው ፡ እለ ፡ ምስሌሁ ፡ ወበጽሑ ፡ ፈለገ ፡ ባር ፡ ወቦእለ ፡ ቆሙ ። 10 ወእልክቱሰ ፡ ፬፻ዕደው ፡ ዴገኑ ፡ ወቆሙ ፡ ፪፻ዕደው ፡ ወነበሩ ፡ ማዕዶተ ፡ ፈለግ ፡ ዘባሶር ። 11 ወረከሱ ፡ ብእሴ ፡ ግብጻዌ ፡ ውስተ ፡ ገዳም ፡ ወአኀዝዎ ፡ ወወሰድዎ ፡ ኀበ ፡ ዳዊት ፡ ውስተ ፡ ገዳም ፡ ወወሀብዎ ፡ ኅብስተ ፡ ወበልዐ ፡ ወአስተይዎ ፡ ማየ ። 12 ወወሀብዎ ፡ ስባረ ፡ እኂለ ፡ ተመርት ፡ ወበልዐ ፡ ወገብአት ፡ ነፍሱ ፡ ላዕሌሁ ፡ እስመ ፡ ሠሉስ ፡ መዋዕል ፡ ሎቱ ፡ ወሠሉስ ፡ ለያልይ ፡ ሎቱ ፡ እምዘ ፡ ኢበልዐ ፡ እክለ ፡ ወኢሰትየ ፡ ማየ ። 13 ወይቤሎ ፡ ዳዊት ፡ ዘመኑ ፡ አንተ ፡ ወእምአይቴ ፡ መጻእከ ፡ ወይቤሎ ፡ ውእቱ ፡ ወልድ ፡ ግብጻዊ ፡ አንሰ ፡ ገብረ ፡ አሐዱ ፡ ብእሲ ፡ ዐማሌቃዊ ፡ ወኀደገኒ ፡ እግዚእየ ፡ እስመ ፡ ደወይኩ ፡ ሠሉስየ ፡ ዮም ። 14 ወንሕነ ፡ እሙንቱ ፡ እለ ፡ ፀባእነ ፡ መንገለ ፡ አዜባ ፡ ለኬሌት ፡ ወመንንለ ፡ ደወለ ፡ ኢዶምያስ ፡ ወመንንለ ፡ አዜባ ፡ ለጌላቡሄ ፡ ወላዕለ ፡ ሴቄላቅ ፡ ወአውዐይናሃ ፡ በእሳት ። 15 ወይቤሎ ፡ ዳዊት ፡ ታበጽሐኒኑ ፡ ኀቤሆሙ ፡ ለእሉ ፡ ጌዶር ፡ ወይቤሎ ፡ መሐል ፡ ሊተ ፡ በእግዚአብሔር ፡ ከመ ፡ ኢትቅትለኒ ፡ ወከመ ፡ ኢታግብአኒ ፡ ውስተ ፡ እዴሁ ፡ ለእግዚእየ ፡ ወአበጽሐከ ፡ ላዕለ ፡ እሉ ፡ ጌዶር ። 16 ወኣብጽሖ ፡ ህየ ፡ ወረከቦሙ ፡ እንዘ ፡ ዝርዋን ፡ ውስተ ፡ ኵሉ ፡ ገጸ ፡ ምድር ፡ ወይበልዑ ፡ ወይሰትዩ ፡ ወይገብሩ ፡ በዓለ ፡ በኵሉ ፡ ምህርካሆሙ ፡ ዘነሥኡ ፡ እምነ ፡ ምድረ ፡ ኢሎፍሊ ፡ ወእምነ ፡ ምድረ ፡ ይሁዳ ። 17 ወሖረ ፡ ዳዊት ፡ ላዕሌሆሙ ፡ ወቀተሎሙ ፡ እምጊዜ ፡ ይሠርቅ ፡ ኮከበ ፡ ጽባሕ ፡ እስከ ፡ ፍና ፡ ሰርከ ፡ ወዓዲ ፡ በሳኒታሂ ፡ ወአልቦ ፡ ዘድኅነ ፡ እምኔሆሙ ፡ ወኢ፩ብእሲ ፡ ዘእንበለ ፡ ፬፻ዕደው ፡ እለ ፡ ይጼዐኑ ፡ አርኩባተ ፡ ወአምሰጡ ። 18 ወኦንገፎሙ ፡ ዳዊት ፡ ኵሎ ፡ ዘነሥኡ ፡ ዐማሌቅ ፡ ወአድኀኖን ፡ ለክልኤሆን ፡ አንስቲያሁ ። 19 ወአልቦ ፡ ዘኀደገ ፡ ሎሙ ፡ ኢንኡሰ ፡ ወኢዐቢየ ፡ ወኢዘማሕረኩ ፡ ወኢደቂቀ ፡ ወኢአዋልደ ፡ ወኢእምኵሉ ፡ ዘነሥኡ ፡ እስመ ፡ ኵሎ ፡ አስተጋብአ ፡ ዳዊት ። 20 ወነሥኡ ፡ ኵሎ ፡ መራዕየ ፡ ወኵሎ ፡ እንስሳ ፡ ወነድኡ ፡ ቅድሜሁ ፡ ምህርካ ፡ ወሰመይዎ ፡ ለውእቱ ፡ ምህርካ ፡ ምህርካ ፡ ዳዊት ። 21 ወበጽሐ ፡ ዳዊት ፡ ኀበ ፡ እልክቱ ፡ ፪፻ዕደው ፡ እለ ፡ ደክሙ ፡ ወስእኑ ፡ ተሊዎቶ ፡ ለዳዊት ፡ ወአንበሮሙ ፡ ውስተ ፡ ፈለገ ፡ በይና ፡ ወተቀበልዎሙ ፡ ለዳዊት ፡ ወለሕዝብ ፡ እለ ፡ ምስሌሁ ፡ ወበጽሐ ፡ ዳዊት ፡ ኀበ ፡ ሕዝብ ፡ ወዜነውዎ ፡ በበይነ ፡ ሰላም ። 22 ወአውሥኡ ፡ ኵሉ ፡ ዕደው ፡ እኩያን ፡ እለ ፡ ፀብኡ ፡ ወሖሩ ፡ ምስለ ፡ ዳዊት ፡ ወይቤሉ ፡ ኢንሁቦሙ ፡ እምውስተ ፡ ምህርካ ፡ ወበርባር ፡ ዘአንገፍነ ፡ እስመ ፡ ኢመጽኡ ፡ ምስሌነ ፡ ወባሕቱ ፡ ብእሲ ፡ ብእሲ ፡ ለያእምር ፡ ብእሲቶ ፡ ወደቂቆ ፡ ወይንሥኡ ፡ ወይእትዉ ። 23 ወይቤሎሙ ፡ ዳዊት ፡ ኢትግበሩ ፡ ከመዝ ፡ እምድኅረ ፡ አግብአ ፡ ለነ ፡ እግዚአብሔር ፡ ወዐቀበነ ፡ ወአግብኦሙ ፡ እግዚአብሔር ፡ ውስተ ፡ እዴነ ፡ ለጌዶር ፡ እለ ፡ መጽኡ ፡ ላዕሌነ ። 24 ወመኑ ፡ ኦሆ ፡ ይብለክሙ ፡ በእንተ ፡ ዝንቱ ፡ ነንር ፡ እስመ ፡ ኢኀየስክምዎሙ ፡ አንትሙ ፡ እስመ ፡ በአምጣነ ፡ ክፍሎሙ ፡ ለእለ ፡ ሖሩ ፡ ፀብአ ፡ ከማሁ ፡ ክፍሎሙ ፡ ለእለ ፡ ነበሩ ፡ ኀበ ፡ ንዋይ ። 25 ወኮነ ፡ ዝንቱ ፡ እምይእተ ፡ አሚረ ፡ ወለዝላፉ ፡ ወከመዝ ፡ ኮነ ፡ ዝንቱ ፡ ሕግ ፡ ውስተ ፡ እስራኤል ፡ እስከ ፡ ዮም ። 26 ወበጽሐ ፡ ውስተ ፡ ሴቄላቅ ፡ ወፈነወ ፡ እምህርካ ፡ ለሊቃናተ ፡ ይሁዳ ፡ ወለካልኣኒሁ ፡ እንዘ ፡ ይብል ፡ ናሁ ፡ ኦስትዓክሙ ፡ እምነ ፡ ምህርካ ፡ (ፀርክሙ ፡ ወ)ፀረ ፡ እግዚአብሔር ፤ 27 ለእለ ፡ ውስተ ፡ ቤትሶር ፡ ወለእለ ፡ መንገለ ፡ አዜባ ፡ ለራማ ፤ 29 ወለእለኒ ፡ ውስተ ፡ ጌት ፡ ወለእለኒ ፡ ውስተ ፡ ቄኔት ፡ ወለእለኒ ፡ ውስተ ፡ ሳፌቅ ፡ ወለእለኒ ፡ ውስተ ፡ ቴማት ፡ ወለእለኒ ፡ ውስተ ፡ ቀርሜሎስ ፡ ወለእለኒ ፡ ውስተ ፡ ሀገረ ፡ እስራኤል ፡ ወለእለኒ ፡ አህጉረ ፡ ቄኔዝ ፤ 30 ወለእለኒ ፡ ውስተ ፡ ኢየርሞት ፡ ወለእለ ፡ ቤርሳቤሕ ፡ ወለእለኒ ፡ ኖባማ ፤ 31 ወለእለ ፡ ውስተ ፡ ኬብሮን ፡ ወለኵሉ ፡ በሓውርት ፡ እለ ፡ እንተ ፡ ኀቤሆሙ ፡ ኀለፈ ፡ ዳዊት ፡ ለሊሁ ፡ ምስለ ፡ ሰብኡ ።