መጽሐፈ ነገሥት ፩ 3

1 ወዝክቱሰ ፡ ወልድ ፡ ሳሙኤል ፡ ሀለወ ፡ ይትለአክ ፡ ለእግዚአብሔር ፡ ቅድመ ፡ ኤሊ ፡ ካህን ፡ ወክቡር ፡ ውእቱ ፡ ቃል ፡ በእማንቱ ፡ መዋዕል ፡ ዘእግዚአብሔር ፡ ወአልቦ ፡ ራእየ ፡ ዘይከውን ። 2 ወእምዝ ፡ በይእቲ ፡ ዕለት ፡ እንዘ ፡ ይነውም ፡ ኤሊ ፡ በውስተ ፡ መካኑ ፡ ወአዕይንቲሁኒ ፡ አኀዛ ፡ ይክብዳ ፡ ወኢይክል ፡ ርእየ ፤ 3 ወማኀቶተ ፡ እግዚአብሔር ፡ ዓዲ ፡ ኢያሠነዩ ፡ ለአቢቶ ፡ ወይነብር ፡ ሳሙኤል ፡ ውስተ ፡ ቤተ ፡ መቅደስ ፡ ኀበ ፡ ታቦተ ፡ እግዚአብሔር ፤ 4 ወጸውዖ ፡ እግዚአብሔር ፡ ወይቤሎ ፡ ሳሙኤል ፡ ሳሙኤል ፡ ወይቤሎ ፡ ነየ ፡ አነ ። 5 ወሮጻ ፡ ኀበ ፡ ኤሊ ፡ ወይቤሎ ፡ ነየ ፡ አነ ፡ መጻእኩ ፡ እስመ ፡ ጸዋዕከኒ ፡ ወይቤሎ ፡ ኤሊ ፡ ኢጻዋዕኩከ ፡ ግባእ ፡ ስክብ ። 6 ወደገመ ፡ ዓዲ ፡ እግዚአብሔር ፡ ጸውዖቶ ፡ ወይቤሎ ፡ ሳሙኤል ፡ ወተንሥአ ፡ ሳሙኤል ፡ ወሖረ ፡ ኀበ ፡ ኤሊ ፡ ዳግመ ፡ ወይቤሎ ፡ ነየ ፡ መጻእኩ ፡ እስመ ፡ ጸዋዕከኒ ፡ ወይቤሎ ፡ ኢጸዋዕኩከ ፡ ግባእ ፡ ስክብ ። 7 ወሳሙኤልሰ ፡ ዓዲ ፡ ኢያእመሮ ፡ ለእግዚአብሔር ፡ ወኢተከሥተ ፡ ሎቱ ፡ ቃለ ፡ እግዚአብሔር ። 8 ወጸውዖ ፡ ዓዲ ፡ እግዚአብሔር ፡ በሣልስ ፡ ለሳሙኤል ፡ ወተንሥአ ፡ ወሖረ ፡ ኀበ ፡ ኤሊ ፡ ወይቤሎ ፡ ነየ ፡ አነ ፡ መጻእኩ ፡ እስመ ፡ ጸዋዕከኒ ፡ ወሐለየ ፡ ኤሊ ፡ ከመ ፡ እግዚአብሔር ፡ ጸውዖ ፡ለውእቱ ፡ ወልድ ። 9 ወይቤሎ ፡ ግባእ ፡ ወስክብ ፡ ወልድየ ፡ ወእመቦ ፡ ዘጸውዐከ ፡ በሎ ፡ በል ፡ እግዚእየ ፡ እስመ ፡ ይሰምዐከ ፡ ገብርከ ፤ ወሖረ ፡ ሳሙኤል ፡ ወሰከበ ፡ ውስተ ፡ ምስካቡ ። 10 ወመጽአ ፡ እግዚአብሔር ፡ ወቆመ ፡ ወጸውዖ ፡ ከመ ፡ ቀዳሚ ፡ ወይቤሎ ፡ ሳሙኤል ፡ በል ፡ እስመ ፡ ይሰምዐከ ፡ ገብርከ ። 11 ወይቤሎ ፡ እግዚአብሔር ፡ ለሳሙኤል ፡ ናሁ ፡ አነ ፡ እገብር ፡ ቃለ ፡ ላዕለ ፡ እስራኤል ፡ ከመ ፡ ኵሉ ፡ ዘሰምዖ ፡ የአኀዝ ፡ ክልኤሆን ፡ እዘኒሁ ። 12 ወበይእቲ ፡ ዕስት ፡ ኣቀውም ፡ ኵሎ ፡ ዘነበብኩ ፡ ላዕለ ፡ ኤሊ ፡ ወላዕለ ፡ ቤቱ ፤ አእኀዝኒ ፡ ወእፌጽምኒ ። 13 ወአይዳዕክዎ ፡ ከመ ፡ አትቤቀሎ ፡ አነ ፡ ለቤቱ ፡ ለዓለም ፡ በኀጢአት ፡ ደቂቁ ፡ እስመ ፡ አሕሠሙ ፡ ቃለ ፡ ላዕለ ፡ እግዚአብሔር ፡ ደቂቁ ፡ ወኢገሠጾሙ ። 14 አኮኑ ፡ ከመዝ ፡ መሐልኩ ፡ ለቤቱ ፡ ከመ ፡ ኢይደመሰስ ፡ ኀጢአተ ፡ ቤቱ ፡ ለኤሊ ፡ ኢበዕጣን ፡ ወኢበመሥዋዕት ፡ እስከ ፡ ለዓለም ። 15 ወእምዝ ፡ ሰከበ ፡ ሳሙኤል ፡ እስከ ፡ ጸብሐ ፡ ወነቅሐ ፡ በጽባሕ ፡ ወአርኀወ ፡ ኆኃተ ፡ ቤተ ፡ እግዚአብሔር ፤ ወፈርሀ ፡ ሳሙኤል ፡ አይድዖቶ ፡ ብኤሊ ፡ ዘአስተርአዮ ። 16 ወይቤሎ ፡ ኤሊ ፡ ለሳሙኤል ፡ ወልድየ ፡ ሳሙኤል ፡ ወይቤሎ ፡ ነየ ፡ አነ ። 17 ወይቤሎ ፡ ምንትኑ ፡ ነገሩ ፡ ዘነገረከ ፤ ኢትኅባእ ፡ እምኔየ ፤ ከመዝ ፡ ለይረሲከ ፡ እግዚአብሔር ፡ ወከመዝ ፡ ለትምጻእከ ፡ ለእመ ፡ ኀባእከ ፡ እምኔየ ፡ ቃለ ፡ እምኵሉ ፡ ዘነገረከ ፡ ወዘሰማዕከ ። 18 ወአይድዖ ፡ ሳሙኤል ፡ ለኤሊ ፡ ኵሎ ፡ ዘነገሮ ፡ ወአልቦ ፡ ዘኀብአ ፡ እምኔሁ ፡ ወይቤሎ ፡ ኤሊ ፡ ለይግበር ፡ እግዚአብሔር ፡ ኵሎ ፡ ዘአደሞ ፡ ሎቱ ። 19 ወዐብየ ፡ ሳሙኤል ፡ ወሀሎ ፡ እግዚአብሔር ፡ ምስሌሁ ፡ ወአልቦ ፡ ዘወድቀ ፡ እምነ ፡ ኵሉ ፡ ቃሉ ፡ ውስተ ፡ ምድር ። 20 ወአእመሩ ፡ ኵሉ ፡ እስራኤል ፡ እምነ ፡ ዳን ፡ እስከ ፡ ቤርላቤሕ ፡ ከመ ፡ መሃይምን ፡ ሳሙኤል ፡ ወነቢዩ ፡ ለእግዚአብሔር ። 21 ወደገመ ፡ እግዚአብሔር ፡ አስተርእዮቶ ፡ ከመ ፡ አስተርእዮ ፡ እግዚአብሔር ፡ ለሳሙኤል ፡ ወተአመነ ፡ ሳሙኤል ፡ ከዊነ ፡ ነቢዩ ፡ ለእግዚአብሔር ፡ በውስተ ፡ ኵሉ ፡ እስራኤል ፡ አምአጽናፈ ፡ ምድር ፡ እስከ ፡ አጽናፊሃ ። 22 ወልህቀ ፡ ኤሊ ፡ ጥቀ ፡ ወደቂቁሰ ፡ ሐዊረ ፡ ሖሩ ፡ በፍኖት ፡ እኪት ፡ ቅድመ ፡ እግዚአብሔር ።