መጽሐፈ ነገሥት ፩ 22

1 ወኀለፈ ፡ እምህየ ፡ ዳዊት ፡ ወአምሰጠ ፡ ወሖረ ፡ ኀበ ፡ በአት ፡ ዘኤዶላም ፡ ወሶበ ፡ ሰምዑ ፡ አኀዊሁ ፡ ወሰብአ ፡ ቤተ ፡ አቡሁ ፡ ወረዱ ፡ ኀቤሁ ፡ ህየ ። 2 ወአስተጋብአ ፡ ኀቤሁ ፡ ኵሎ ፡ ምንዱበ ፡ ወኵሎ ፡ ዘይፈዲ ፡ ዕዳሁ ፡ ወኵሎ ፡ ሕዙነ ፡ መንፈስ ፡ ወሜምዎ ፡ መስፍነ ፡ ሳዕሌሆሙ ፡ ወሀለዉ ፡ ምስሌሁ ፡ አርባዕቱ ፡ ምእት ፡ ብእሲ ። 3 ወሖረ ፡ ዳዊት ፡ እምህየ ፡ ውስተ ፡ መሴፋ ፡ ዘሞአብ ፡ ወይቤሎ ፡ ለንጉሠ ፡ ሞአብ ፡ ኀቤከ ፡ ይንበሩ ፡ አቡየ ፡ ወእምየ ፡ እስከ ፡ አመ ፡ እሬኢ ፡ ዘከመ ፡ ይገብር ፡ እግዚአብሔር ። 4 ወአስተብቍዖ ፡ ለንጉሠ ፡ ሞአብ ፡ ወነበሩ ፡ ምስሌሁ ፡ ኵሎ ፡ መዋዕለ ፡ ዘሀሎ ፡ ዳዊት ፡ ውስተ ፡ ቅጽር ። 5 ወይቤሎ ፡ ጋድ ፡ ነቢይ ፡ ለዳዊት ፡ ኢትንበር ፡ ውስተ ፡ ቅጽር ፡ ሖር ፡ ወባእ ፡ ውስተ ፡ ይሁዳ ፡ ወሖረ ፡ ዳዊት ፡ ወበጽሐ ፡ ወነበረ ፡ ውስተ ፡ ሀገረ ፡ ሰሬሕ ። 6 ወሰምዐ ፡ ሳኦል ፡ ከመ ፡ ተሰምዐ ፡ ኀበ ፡ ሀሎ ፡ ዳዊት ፡ ወሰብእ ፡ እለ ፡ ምስሌሁ ፡ ወሳኦልኒ ፡ ሀሎ ፡ ይኑበር ፡ ውስተ ፡ ወግር ፡ ኀበ ፡ ዐጸደ ፡ ወፍር ፡ ዘባማ ፡ ወኲናት ፡ ውስተ ፡ እዴሁ ፡ ወኵሎሙ ፡ ደቁ ፡ ይቀውሙ ፡ ምስሌሁ ። 7 ወይቤሎሙ ፡ ሳኦል ፡ ለደቁ ፡ እለ ፡ ይቀውሙ ፡ ምስሌሁ ፡ ስምሁ ፡ ቤተ ፡ ብንያም ፡ እሙነኑ ፡ ይሁበክሙ ፡ ለኵልክሙ ፡ ወልደ ፡ እሴይ ፡ አዕጸደ ፡ ወፍር ፡ ወአዕጸደ ፡ ወይን ፡ ወይሠይመክሙ ፡ መላእክተ ፡ ወመሳፍንተ ፤ 8 ከመ ፡ ትኅበሩ ፡ ላዕሌየ ፡ ኵልክሙ ፡ ወአልቦ ፡ እምኔክሙ ፡ ዘያየድዐኒ ፡ ከመ ፡ ተማሐለ ፡ ወልድየ ፡ ምስለ ፡ ወልደ ፡ እሴይ ፡ ወአልቦ ፡ እምውስቴትክሙ ፡ ዘየሐምመኒ ፡ ወዘይነግረኒ ፡ ከመ ፡ አቀሞ ፡ ወልድየ ፡ ለገብርየ ፡ ላዕሌየ ፡ ፀርየ ፡ እስከ ፡ ዛቲ ፡ ዕለት ። 9 ወአውሥአ ፡ ዶይቅ ፡ ሶርያዊ ፡ ኖላዌ ፡ አብቅሊሁ ፡ ለሳኦል ፡ ወይቤሎ ፡ ርኢክዎ ፡ ለወልደ ፡ እሴይ ፡ መጽአ ፡ ውስተ ፡ ኖምባ ፡ ኀበ ፡ አኪሜሌክ ፡ ወልደ ፡ አኪጦብ ፡ ካህን ። 10 ወተስእሎ ፡ በእንተ ፡ እግዚአብሔር ፡ ወስንቆኒ ፡ ወሀቦ ፡ ወሰይፎ ፡ ለጎልያድ ፡ ኢሎፍላዊ ፡ ወሀቦ ። 11 ወለአከ ፡ ንጉሥ ፡ ይጸውዕዎ ፡ ለአኪሜሌክ ፡ ወልደ ፡ አኪጦብ ፡ ወለኵሎሙ ፡ ደቂቀ ፡ አቡሁ ፡ ካህናት ፡ እለ ፡ ውስተ ፡ ኖምባ ፡ ወመጽኡ ፡ ኵሎሙ ፡ ኀበ ፡ ንጉሥ ። 12 ወይቤሎ ፡ ሳኦል ፡ ስማዕ ፡ ወልደ ፡ አኪጦብ ፡ ወይቤሎ ፡ በል ፡ እግዚእየ ። 13 ወይቤሎ ፡ ሳኦል ፡ ለምንት ፡ ኀበርከ ፡ ማዕሌተ ፡ ላዕሌየ ፡ አንተኒ ፡ ምስለ ፡ ወልደ ፡ እሴይ ፡ ከመ ፡ ተሀቦ ፡ ሰይፈ ፡ ወኅብስተ ፡ ወትስአል ፡ ሎቱ ፡ ቃለ ፡ እግዚአብሔር ፡ ወረሰይክምዎ ፡ ቀታሌየ ፡ እስከ ፡ ዮም ። 14 ወአውሥአ ፡ አሊሜሌክ ፡ ለንጉሥ ፡ ወይቤሎ ፡ መኑ ፡ እምውስተ ፡ አግብርቲከ ፡ ከመ ፡ ዳዊት ፡ መሃይምን ፡ ወሐሙሁ ፡ ውእቱ ፡ ለንጉሥ ፡ ወመልአከ ፡ ኵሉ ፡ ትእዛዝከ ፡ ወክቡር ፡ በውስተ ፡ ቤትከ ። 15 ዮም ፡ አእኅዝ ፡ እስአል ፡ ሎቱ ፡ ቃለ ፡ እግዚአብሔር ፤ ሐሰ ፤ ኢይረሲ ፡ ንጉሥ ፡ ላዕለ ፡ ገብሩ ፡ ዘንተ ፡ ነገረ ፡ ወላዕለ ፡ ኵሉ ፡ ቤተ ፡ አቡሁ ፡ እስመ ፡ ኢያእመረ ፡ ገብርከ ፡ ዘንተ ፡ ኵሎ ፡ ነገረ ፡ ኢንኡሰ ፡ ወኢዐቢየ ። 16 ወይቤ ፡ ንጉሥ ፡ ሳኦል ፡ አኪሜሌክ ፡ ሞተ ፡ ትመውት ፡ አንተ ፡ ወኵሉ ፡ ቤተ ፡ አቡከ ። 17 ወይቤሎሙ ፡ ንጉሥ ፡ ለእለ ፡ ይቀውሙ ፡ ኀቤሁ ፡ አምጽእዎሙ ፡ ወቅትልዎሙ ፡ ለካህናተ ፡ እግዚአብሔር ፡ እስመ ፡ ኀብሩ ፡ ምስለ ፡ ዳዊት ፡ ወ[ያአ]ምሩ ፡ ከመ ፡ ኅጡእ ፡ ውእቱ ፡ ወኢይነግሩኒ ፡ ወኢፈቀዱ ፡ ደቀ ፡ ንጉሥ ፡ ያልዕሉ ፡ እዴሆሙ ፡ ወየአብሱ ፡ ላዕለ ፡ ካህናተ ፡ እግዚአብሔር ። 18 ወይቤሎ ፡ ንጉሥ ፡ ለዶይቅ ፡ ነዓ ፡ አንተ ፡ ወቅትሎሙ ፡ ለካህናት ፡ ወመጽአ ፡ ዶይቅ ፡ ሶርያዊ ፡ ወቀተሎሙ ፡ ለካህናተ ፡ እግዚአብሔር ፡ በይእቲ ፡ ዕለት ፡ ፫፻ብእሴ ፡ ወኀምስቱ ፡ ወኵሎሙ ፡ እለ ፡ ይጸውሩ ፡ ኤፉደ ። 19 ወኖባማሂ ፡ ሀገሮሙ ፡ ለካህናት ፡ ቀተለ ፡ በአፈ ፡ ኵናት ፡ ዕደዊሆሙ ፡ ወአንስቲያሆሙ ፡ ወደቂቆሙ ፡ ወሕፃናቲሆሙ ፡ ወላህሞሙ ፡ ወአድጎሙ ፡ ወበግዖሙ ። 20 ወአምሰጠ ፡ አሐዱ ፡ ወልደ ፡ አኪሜሌክ ፡ ወልደ ፡ አኪጦብ ፡ ወስሙ ፡ አብያታር ፡ ወአምሰጠ ፡ ወተለዎ ፡ ለዳዊት ። 21 ወአይድዖ ፡ አብያታር ፡ ለዳዊት ፡ ከመ ፡ ቀተሎሙ ፡ ሳኦል ፡ ለካህናተ ፡ እግዚአብሔር ። 22 ወይቤ ፡ ዳዊት ፡ አእመርኩ ፡ ይእተ ፡ አሚረ ፡ ከመ ፡ ዶይቅ ፡ ሶርያዊ ፡ ያየድዖ ፡ ለሳኦል ፡ ወባሕቱ ፡ አነ ፡ አበስኩ ፡ ላዕለ ፡ ነፍሶሙ ፡ ለቤተ ፡ አቡከ ። 23 ንበር ፡ እንከሰ ፡ ምስሌየ ፡ ወኢትፍራህ ፡ እስመ ፡ ኀበ ፡ ተኀሠሥኩ ፡ መካነ ፡ ለነፍስየ ፡ አኀሥሥ ፡ ለነፍስከኒ ፡ እስመ ፡ ማሕፀንትየ ፡ አንተ ፡ ኀቤየ ።