መጽሐፈ ነገሥት ፩ 14

1 ወሶበ ፡ ጸብሐ ፡ ይቤሎ ፡ ዮናታን ፡ ለቍልዔሁ ፡ ዘይጸውር ፡ ንዋየ ፡ ሐቅሉ ፡ ነዓ ፡ ንዕዱ ፡ ውስተ ፡ ማሴብ ፡ ዘኢሎፍሊ ፡ ዘውስተ ፡ እንታክቲ ፡ ማዕዶት ፡ ወኢያይድዖ ፡ ለአቡሁ ። 2 ወሳኦልሰ ፡ ይነብር ፡ ውስተ ፡ ርእስ ፡ ወግር ፡ ታሕተ ፡ ሮማን ፡ እንተ ፡ መጌዶን ፡ ወሀለዉ ፡ ምስሌሁ ፡ ስድስቱ ፡ ምእት ፡ ብእሲ ። 3 ወአኪያ ፡ ወልደ ፡ አኪጦብ ፡ እኁሁ ፡ ለዮከሌድ ፡ ወልደ ፡ ፊንሐስ ፡ ወልደ ፡ ኤሊ ፡ ካህኑ ፡ ለእግዚአብሔር ፡ ውስተ ፡ ሴሎም ፡ ዘይጸውር ፡ ኤፉደ ፡ ወኢያእመሩ ፡ ሕዝብ ፡ ከመ ፡ ኀለፈ ፡ ዮናታን ። 4 ወማእከለ ፡ ይእቲ ፡ ማዕዶት ፡ እንተ ፡ ኀበ ፡ ፈቀደ ፡ ይዕዱ ፡ ዮናታን ፡ ውስተ ፡ ደወሎሙ ፡ ለኢሎፍሊ ፡ ፍናው ፡ ውስተ ፡ ውእቱ ፡ መካን ፡ ዘኴኵሕ ፤ ስማ ፡ ለእሐቲ ፡ ባዜስ ፡ ወስማ ፡ ለካልእታ ፡ ሰናአር ። 5 አሐቲ ፡ ፍኖት ፡ እመንገለ ፡ መስዕ ፡ ትመጽእ ፡ ቅርብተ ፡ መኬማስ ፡ ወካልእት ፡ ፍኖት ፡ እመንገለ ፡ አዜብ ፡ ትመጽእ ፡ ላዕለ ፡ ገበኦን ። 6 ወይቤሎ ፡ ዮናታን ፡ ለቍልዔሁ ፡ ዘይጸውር ፡ ንዋየ ፡ ሐቅሉ ፡ ነዓ ፡ ንዕዱ ፡ ውስተ ፡ ማሴብ ፡ ዘእሉ ፡ ቈላፋን ፡ ዮጊ ፡ ይረድአነ ፡ እግዚአብሔር ፡ እስመ ፡ አልቦ ፡ ተስፋ ፡ ሐይው ፡ ኢበብዙኅ ፡ ወኢበውሑድ ። 7 ወይቤሎ ፡ ውእቱ ፡ ዘይጸውር ፡ ንዋየ ፡ ሐቅሉ ፡ ግበር ፡ በከመ ፡ ፈቀደ ፡ ልብከ ፤ ነየ ፡ አነ ፡ ሀለውኩ ፡ ምስሌከ ፤ ከመ ፡ ልብከ ፡ ልብየ ። 8 ወይቤሎ ፡ ዮናታን ፡ ናሁ ፡ ነዐርግ ፡ ንሕነ ፡ ኀበ ፡ እሉ ፡ ዕደው ፡ ወንቀርብ ፡ ኀቤሆሙ ። 9 ለእመ ፡ ይቤሉነ ፡ ረሐቁ ፡ ከሐከ ፡ እስከ ፡ ንነግረክሙ ፡ ቃለ ፡ ወንትገሐሥ ፡ እምኔሆሙ ፡ ወኢነዐርግ ፡ ኀቤሆሙ ። 10 ወለእመ ፡ ይቤሉነ ፡ ዕርጉ ፡ ኀቤነ ፡ ወነዐርግ ፡ ኀቤሆሙ ፡ ወዝንቱ ፡ ውእቱ ፡ ትእምርትነ ፡ አመ ፡ አግብኦሙ ፡ እግዚአብሔር ፡ ውስተ ፡ እዴነ ። 11 ወቦኡ ፡ ክልኤሆሙ ፡ ውስተ ፡ ማሴብ ፡ ዘኢሎፍሊ ፡ ወይቤሉ ፡ ኢሎፍሊ ፡ ነዮሙ ፡ ዕብራውያን ፡ ይወፅኡ ፡ እምነ ፡ ግበቢሆሙ ፡ እምኀበ ፡ ተኀብኡ ። 12 ወኦውሥእዎሙ ፡ ሰብአ ፡ ማሴብ ፡ ወይቤልዎሙ ፡ ለዮናታን ፡ ወለወልዱ ፡ ዘይጸውር ፡ ንዋየ ፡ ሐቅሉ ፡ ዕርጉ ፡ ኀቤነ ፡ ወንነግረክሙ ፡ ቃለ ፡ ወይቤሎ ፡ ዮናታን ፡ ለወልዱ ፡ ዘይጸውር ፡ ንዋየ ፡ ሐቅሉ ፡ ዕርግ ፡ ትልወኒ ፡ እስመ ፡ አግብኦሙ ፡ እግዚአብሔር ፡ ውስተ ፡ እዴሆሙ ፡ ለእስራኤል ። 13 ወዐርገ ፡ ዮናታን ፡ በእደዊሀ ፡ ወበእገሪሁ ፡ ወዘይጸውር ፡ ንዋየ ፡ ሐቅሉ ፡ ምስሌሁ ፡ ወሜጠ ፡ ገጾ ፡ ዮናታን ፡ ወቀተሎሙ ፡ ወዝክቱሰ ፡ ዘይጸውር ፡ ንዋየ ፡ ሐቅሉ ፡ ይሜጥዎ ፡ እምድኅሬሁ ። 14 ወኮነት ፡ ቀዳሚት ፡ ቀትሉ ፡ ለዮናታን ፡ ምስለ ፡ ዘይጸውር ፡ ንዋየ ፡ ሐቅሉ ፡ ዕሥራ ፡ ብእሲ ፡ ዘበሞገርተ ፡ እብን ፡ ወበዕፀወ ፡ ገዳም ። 15 ወኮነ ፡ ድንጋፄ ፡ ውስተ ፡ ትዕይንት ፡ ወውስተ ፡ ሐቅል ፡ ወኵሉ ፡ ሕዝብ ፡ ዘውስተ ፡ ማሴብ ፡ ወእለ ፡ ይትቃተሉሂ ፡ ደንገፁ ፡ ወስእኑ ፡ ተቃትሎ ፡ ወደንገፀት ፡ ምድር ፡ ወኮነ ፡ ድንጋፄ ፡ እምኀበ ፡ እግዚአብሔር ። 16 ወርእዩ ፡ ሰብአ ፡ ዐይን ፡ እለ ፡ እምኀበ ፡ ሳኦል ፡ በገባኦን ፡ ዘብንያም ፡ ከመ ፡ ተሀውከ ፡ ትዕይንቶሙ ፡ እምለፌሂ ፡ ወእምለፌሂ ። 17 ወይቤሎሙ ፡ ሳኦል ፡ ለሕዝብ ፡ እለ ፡ ምስሌሁ ፡ ተፋቀዱ ፡ ወአእምሩ ፡ መኑ ፡ ዘሖረ ፡ እምውስቴትክሙ ፡ ወተፋቀዱ ፡ ወኢተረክበ ፡ ዮናታን ፡ ወኢዘይጸውር ፡ ንዋየ ፡ ሐቅሉ ። 18 ወይቤሎ ፡ ሳኦል ፡ ለአኪያ ፡ አምጽእ ፡ ኤፉደ ፡ እስመ ፡ ውእቱ ፡ ይእውር ፡ ኤፉደ ፡ ይእተ ፡ ኦሚረ ፡ ቅድሜሆሙ ፡ ለእስራኤል ። 19 ወእምዝ ፡ እንዘ ፡ ይትናገሮ ፡ ሳኦል ፡ ለካህን ፡ በዝኀ ፡ ዝክቱ ፡ ድምፀ ፡ ሁከት ፡ ውስተ ፡ ትዕይንቶሙ ፡ ለኢሎፍሊ ፡ ወይቤሎ ፡ ሳኦል ፡ ለካህን ፡ ኅድግ ፡ ምዕረ ። 20 ወሖረ ፡ ሳኦል ፡ ወኵሉ ፡ ሕዝብ ፡ እለ ፡ ምስሌሁ ፡ ኀበ ፡ ይትቃተሉ ፡ ወተቃተልዎሙ ፡ ወኮነ ፡ ዐቢይ ፡ ቀትል ፡ ጥቀ ። 21 ወእልክቱኒ ፡ አግብርቲሆሙ ፡ እለ ፡ ትካት ፡ የዐርጉ ፡ ውስተ ፡ ትዕይንቶሙ ፡ ለኢሎፍሊ ፡ ገብኡ ፡ ኀበ ፡ እስራኤል ፡ ምስለ ፡ ዮናታን ። 22 ወኵሎሙ ፡ እስራኤል ፡ እለ ፡ ይትኀብኡ ፡ ቀዳሚ ፡ ውስተ ፡ ይብረ ፡ ኤፍሬም ፡ ሶበ ፡ ሰምዑ ፡ ከመ ፡ ነትዑ ፡ ኢሎፍሊ ፡ ዴገኑ ፡ እሙንቱኒ ፡ ይትቃተሉ ፡ ምስሌሆሙ ፡ ወአድኀኖሙ ፡ እግዚአብሔር ፡ ለእስራኤል ፡ ይእተ ፡ አሚረ ፡ ወኀለፈ ፡ እምነ ፡ በሞት ፡ ቀትሎሙ ፡ ወኵሉ ፡ ሕዝብ ፡ ዘምስለ ፡ ሳኦል ፡ የአክሉ ፡ ፼ብእሲ ። 23 ወተዘርወ ፡ ቀትሎሙ ፡ ውስተ ፡ ኵላ ፡ ይእቲ ፡ ሀገር ፡ እንተ ፡ ውስተ ፡ ደብረ ፡ ኤፍሬም ። 24 ወሳኦል ፡ አብደ ፡ ዐቢየ ፡ እበደ ፡ ይእተ ፡ አሚረ ፡ ወረገሞሙ ፡ ለሕዝብ ፡ እንዘ ፡ ይብል ፡ ርጉመ ፡ ለይኩን ፡ ብእሲ ፡ ዘበልዐ ፡ እክለ ፡ እስከ ፡ ሰርክ ፡ ወእትቤቀሎ ፡ ለፀርየ ፤ ወኵሉ ፡ ሕዝብ ፡ ኢጥዕመ ፡ እክለ ፡ ወኵሉ ፡ ብሔር ፡ ኢመስሐ ። 25 ወናሁ ፡ ቀፎ ፡ ዘመዓር ፡ ውስተ ፡ ገጸ ፡ ገዳም ። 26 ወቦአ ፡ ውእቱ ፡ ሕዝብ ፡ ኀበ ፡ ውእቱ ፡ መዓር ፡ ወአልቦ ፡ ዘአልዐለ ፡ እዴሁ ፡ ወወደየ ፡ ውስተ ፡ አፉሁ ፡ እስመ ፡ ፈርሁ ፡ ሕዝብ ፡ መሐላ ፡ እግዚአብሔር ። 27 ወዮናታንሰ ፡ ኢሰምዐ ፡ ከመ ፡ አምሐሎሙ ፡ አቡሁ ፡ ለሕዝብ ፡ ወአልዐለ ፡ ከተማ ፡ በትሩ ፡ በእዴሁ ፡ ወጠምዐ ፡ ውስተ ፡ ዘትረ ፡ መዓር ፡ ወአግብዐ ፡ እዴሁ ፡ ውስተ ፡ አፉሁ ፡ ወተከሥተ ፡ አዕይንቲሁ ። 28 ወይቤሎ ፡ አሐዱ ፡ እምውስተ ፡ ሕዝብ ፡ አምሕሎ ፡ አምሐሎሙ ፡ አኩከ ፡ ለሕዝብ ፡ ወይቤሎሙ ፡ ርጉመ ፡ ለይኩን ፡ ብእሲ ፡ ዘይበልዕ ፡ እክለ ፡ ዮም ፡ ወደክመ ፡ ሕዝብ ። 29 ወአእመረ ፡ ዮናታን ፡ ወይቤ ፡ ኀደጋ ፡ አቡየ ፡ ለምድር ፤ ናሁ ፡ ተከሥተ ፡ አዕይንትየ ፡ ሶበ ፡ ጥዕምኩ ፡ ሕቀ ፡ እምውስተ ፡ ዝንቱ ፡ መዓር ። 30 ወሶበሰ ፡ በልዑ ፡ ሕዝብ ፡ ዮም ፡ ወበልዑ ፡ ምህርካ ፡ ፀሮሙ ፡ ፈድፋደ ፡ ወዐቢየ ፡ ቀትለ ፡ እምቀተልዎሙ ፡ ለኢሎፍሊ ። 31 ወቀተሉ ፡ ይእተ ፡ አሚረ ፡ እምነ ፡ ኢሎፍሊ ፡ ዘመኬማስ ፡ ወደክመ ፡ ሕዝብ ፡ ጥቀ ። 32 ወሖሩ ፡ ሕዝብ ፡ ውስተ ፡ ምህርካ ፡ ወነሥኡ ፡ ሕዝብ ፡ መራዕየ ፡ ወአልሀምተ ፡ (ወአባግዐ ፡) ወእጕለ ፡ አልህምት ፡ ወቀተሉ ፡ በከመ ፡ ረከሱ ፡ ውስተ ፡ ምድር ፡ ወበልዑ ፡ ሕዝብ ፡ ምስለ ፡ ደም ። 33 ወአይድዕዎ ፡ ለሳኦል ፡ ወይቤልዎ ፡ አበሱ ፡ ሕዝብ ፡ እስመ ፡ በልዑ ፡ ምስለ ፡ ደም ፡ ወይቤ ፡ ሳኦል ፡ በውስተ ፡ ጌቴም ፡ አንኰርኵሩ ፡ ሊተ ፡ እብነ ፡ ዐቢየ ፡ ዝየ ። 34 ወይቤ ፡ ሳኦል ፡ አስተኃልፉ ፡ ለሕዝብ ፡ ወበልዎሙ ፡ ለኵሎሙ ፡ አምጽኡአ ፡ ኵልክሙኦ ፡ ዝየአ ፡ ኦልህምቲከሙአ ፡ ወአባግዒክሙአ ፡ ወጥብሑአ ፡ በዝየአ ፡ ከመ ፡ ኢተአብሱአ ፡ ለእግዚአብሔርአ ፡ ወኢትብልዑአ ፡ ምስለ ፡ ደምአ ፤ ወአምጽኡ ፡ ኵሉ ፡ ሕዝብ ፡ ዘረከቡ ፡ ወጠብሑ ፡ በህየ ። 35 ወነደቀ ፡ ሳኦል ፡ ምሥዋዐ ፡ ለእግዚአብሔር ፡ ወዘንተ ፡ ቀዳሜ ፡ ገብረ ፡ ሳኦል ፡ ምሥዋዐ ፡ ለእግዚአብሔር ፡ ዘነደቀ ። 36 ወይቤ ፡ ሳኦል ፡ ንረድ ፡ ንትልዎሙ ፡ ለኢሎፍሊ ፡ ሌሊተ ፡ ንበርብሮሙ ፡ እስከ ፡ ይጸብሕ ፡ ብሔር ፡ ወኢናትርፍ ፡ እምኔሆሙ ፡ ወኢአሐደ ፡ ብእሴ ፡ ወይቤልዎ ፡ ኵሎ ፡ ዘይኤድመከ ፡ ግበር ፡ ወይቤ ፡ ካህን ፡ ንሖር ፡ ኀበ ፡ እግዚአብሔር ፡ እምዝየ ። 37 ወተስእሎ ፡ ሳኦል ፡ ለእግዚአብሔር ፡ ወይቤ ፡ እረድኑ ፡ ወእትልዎሙ ፡ ለኢሎፍሊ ፡ እመ ፡ ታገብኦሙ ፡ ውስተ ፡ እዴሆሙ ፡ ለእስራኤል ፡ ወኢያውሥኦ ፡ እግዚአብሔር ፡ ይእተ ፡ አሚረ ። 38 ወይቤ ፡ ሳኦል ፡ አምጽኡ ፡ ዝየ ፡ ኵሎ ፡ መኣዝኒሆሙ ፡ ለእስራኤል ፡ ወርእዪ ፡ ወአእምሩ ፡ በበይነ ፡ መኑ ፡ ኮነ ፡ ዝንቱ ፡ ኦበሳ ፡ ዮም ። 39 እስመ ፡ ሕያው ፡ እግዚአብሔር ፡ ለእመ ፡ ተረክበ ፡ ላዕለ ፡ ዮናታን ፡ ወልድየ ፡ ከመ ፡ ይመውት ፤ ወአልቦ ፡ ዘተሠጥዎ ፡ እምውስተ ፡ ኵሉ ፡ ሕዝብ ። 40 ወይቤሎሙ ፡ ለኵሉ ፡ ሕዝብ ፡ አንትሙኒ ፡ ኵልክሙ ፡ አግብርተ ፡ ትከውኑ ፡ ወአነሂ ፡ ወዮናታንሂ ፡ ንከውን ፡ አግብርተ ፡ ወይቤልዎ ፡ ኵሉ ፡ ሕዝብ ፡ ለሳኦል ፡ ግበር ፡ ዘከመ ፡ ይኤድመከ ። 41 ወይቤ ፡ ሳኦል ፡ እግዚኦ ፡ አምላከ ፡ እስራኤል ፡ በዐይነ ፡ ምንት ፡ ኢያውሣእኮ ፡ ለገብርከ ፡ ዮም ፡ እመኒ ፡ በእንቲአየ ፡ ወእመኒ ፡ በእንተ ፡ ዮናታን ፡ ወልድየ ፡ ዛቲ ፡ አበሳ ፡ ንግር ፡ ወለእመ ፡ ከመዝ ፡ ትቤ ፡ ሀቦ ፡ ለገብርከ ፡ እስራኤል ፡ ጽድቆ ፤ ወበጽሐ ፡ ላዕለ ፡ ዮናታን ፡ ወላዕለ ፡ ሳኦል ፡ ወወፅአ ፡ ሕዝብ ። 42 ወይቤ ፡ ሳኦል ፡ አስተዓፅዉነ ፡ ማእከሌየ ፡ ወማእከለ ፡ ዮናታን ፤ ወዘላዕሌሁ ፡ አብጽሐ ፡ እግዚአብሔር ፡ ይመውት ፤ ወይቤልዎ ፡ ሕዝብ ፡ ለሳኦል ፡ ኢኮነ ፡ ከመዝ ፡ ነገር ፡ ወአበዮሙ ፡ ሳኦል ፡ ለሕዝብ ፡ ወአስተዓፅዉ ፡ ማእከሌሁ ፡ ወማእከለ ፡ ዮናታን ፡ ወልዱ ፡ ወበጽሐ ፡ ዕፃ ፡ ላዕለ ፡ ዮናታን ። 43 ወይቤሎ ፡ ሳኦል ፡ ለዮናታን ፡ ንግረኒ ፡ ምንተ ፡ ገበርከ ፡ ወነገሮ ፡ ዮናታን ፡ ወይቤሎ ፡ ጥዒመ ፡ ጥዕምኩ ፡ በከተማ ፡ በትርየ ፡ እንተ ፡ ውስተ ፡ እዴየ ፡ ሕቀ ፡ መዓረ ፡ ወናሁ ፡ አነ ፡ እመውት ። 44 ወይቤሎ ፡ ሳኦል ፡ ከመዝ ፡ ለይረስየኒ ፡ እግዚአብሔር ፡ ከመ ፡ ሞተ ፡ ትመውት ፡ ዮም ። 45 ወይቤልዎ ፡ ሕዝብ ፡ ለሳኦል ፡ ዮምኑ ፡ ይመውት ፡ ዘገብራ ፡ ለዛቲ ፡ ሕይወት ፡ ዐባይ ፡ ላዕለ ፡ እስራኤል ፤ ሕያው ፡ እግዚአብሔር ፡ ከመ ፡ ኢይወድቅ ፡ እምነ ፡ ሥዕርተ ፡ ርእሱ ፡ ውስተ ፡ ምድር ፡ እስመ ፡ ሕዝበ ፡ እግዚአብሔር ፡ ገብራ ፡ ለዛቲ ፡ ኀጢአት ፤ ወጸለዩ ፡ ሕዝብ ፡ በእንተ ፡ ዮናታን ፡ ይእተ ፡ አሚረ ፡ ወኢቀተልዎ ። 46 ወዐርገ ፡ ሳኦል ፡ እምኀበ ፡ ተለዎሙ ፡ ለኢሎፍሊ ፡ ወኢሎፍሊኒ ፡ አተዉ ፡ ውስተ ፡ በሓውርቲሆሙ ። 47 ወቆመ ፡ ሳኦል ፡ ንጉሠ ፡ ለእስራኤል ፡ ወወሀበሙ ፡ ግብሮሙ ፡ ለእስራኤል ፡ ወይፀብኦሙ ፡ ለኵሎሙ ፡ ፀሮሙ ፡ እለ ፡ ዐውዶሙ ፡ እለ ፡ ውስተ ፡ ሞአብ ፡ ወለደቂቀ ፡ ዐሞን ፡ ወለደቂቀ ፡ ኤዶም ፡ ወለሰብአ ፡ ቤዖር ፡ ወለነገሥተ ፡ ሱባ ፡ ወለኢሎፍሊ ፡ ወኀበ ፡ ሖረ ፡ ይመውእ ። 48 ወገብረ ፡ ኀይለ ፡ ዘአጥናን ፡ ወቀተሎሙ ፡ ለዐማሌቅ ፡ ወአድኀኖሙ ፡ ለእስራኤል ፡ እምእዴሆሙ ፡ ለእለ ፡ ይከይድዎሙ ። 49 ወእሉ ፡ እሙንቱ ፡ ደቂቁ ፡ ለሳኦል ፡ ዮናታን ፡ ወአሳሔል ፡ ወሜልኪስ ፤ ወአስማተ ፡ አዋልዲሁ ፡ ስማ ፡ ለበኵሩ ፡ ሜሮብ ፡ ወስማ ፡ ለካልእታ ፡ ሜልኮል ። 50 ወስማ ፡ ለብእሲቱ ፡ አኪናሆም ፡ ወለተ ፡ አቢናአስ ፤ ወስሙ ፡ ለመልአከ ፡ ኀይሉ ፡ አቤኔር ፡ ወልደ ፡ ኔር ፡ ወልደ ፡ ሰብአ ፡ ቤቱ ፡ ለሳኦል ። 51 ወቂስ ፡ አቡሀ ፡ ለሳኦል ፡ ወኔር ፡ አቡሁ ፡ ለአበኔር ፡ ወልደ ፡ አቢን ፡ ወልደ ፡ አብያር ። 52 ወጸንዐ ፡ ቀትል ፡ ላዕለ ፡ ኢሎፍሊ ፡ በኵሉ ፡ መዋዕሊሁ ፡ ለሳኦል ፡ ወዘርእየ ፡ ሳኦል ፡ ኵሎ ፡ ብእሴ ፡ ጽኑበ ፡ ወኵሎ ፡ ዕደወ ፡ ደቂቀ ፡ ኀይል ፡ ያስተጋብእ ፡ ኀቤሁ ።