መዝሙራት ዘዳዊት 84

◎ 1 ፍጻሜ ፡ ዘደቂቀ ፡ ቆሬ ፡ መዝሙር ፡ ጸሎት ፡ ዘዳዊት ። 2 ተሣሀልከ ፡ እግዚኦ ፡ ምድረከ ፤ ወሜጥከ ፡ ፄዋሁ ፡ ለያዕቆብ ። 3 ወኀደገ ፡ ኃጢአቶሙ ፡ ለሕዝብከ ፤ ወከደንከ ፡ ኵሎ ፡ አበሳሆሙ ። 4 ወኀደገ ፡ ኵሎ ፡ መዐትከ ። ወሜጥከ ፡ መቅሠፍተ ፡ መዐተከ ። 5 ሚጠነ ፡ አምላክነ ፡ ወመድኀኒነ ፤ ወሚጥ ፡ መዐተከ ፡ እምኔነ ። 6 ወለዓለምሰ ፡ ኢትትመዐዐነ ። ወኢታኑኅ ፡ መዐተከ ፡ ላዕለ ፡ ትውልደ ፡ ትውልድ ። 7 አንተ ፡ አምላክነ ፡ ተመየጠነ ፡ ወኣሕይወነ ፤ ወሕዝብከኒ ፡ ይትፌሥሑ ፡ ብከ ። 8 አርእየነ ፡ እግዚኦ ፡ ሣህለከ ፤ ወሀበነ ፡ አምላክነ ፡ አድኅኖተከ ። 9 ኣፀምእ ፡ ዘይነበኒ ፡ እግዚአብሔር ፡ አምላኪየ ፤ እስመ ፡ ይነብብ ፡ ሰላመ ፡ ላዕለ ፡ ሕዝቡ ፡ ላዕለ ፡ ጻድቃኑ ፡ ወላዕለ ፡ እለ ፡ ይመይጡ ፡ ልቦሙ ፡ ኀቤሁ ። 10 ወባሕቱ ፡ ቅሩብ ፡ አድኅኖቱ ፡ ለእለ ፡ ይፈርህዎ ፤ ከመ ፡ ይኅድር ፡ ስብሐቲሁ ፡ ውስተ ፡ ምድርነ ። 11 ሣህል ፡ ወርትዕ ፡ ተራከባ ፤ ጽድቅ ፡ ወሰላም ፡ ተሳዐማ ። 12 ርትዕሰ ፡ እምድር ፡ ሠረጸት ፤ ወጽድቅኒ ፡ እምሰማይ ፡ ሐወጸ ። 13 ወእግዚአብሔርኒ ፡ ይሁብ ፡ ምሕረቶ ፤ ወምድርኒ ፡ ትሁብ ፡ ፍሬሃ ። 14 ጽድቅ ፡ የሐውር ፡ ቅድሜሁ ፤ ወየኀድግ ፡ ውስተ ፡ ፍኖት ፡ አሰሮ ።