መዝሙራት ዘዳዊት 63

◎ 1 ፍጻሜ ፡ መዝሙር ፡ ዘዳዊት ። 2 ስምዐኒ ፡ እግዚኦ ፡ ጸሎትየ ፡ ዘሰአልኩ ፡ ኀቤከ ፤ እምትሕዝብተ ፡ ጽላኢ ፡ አድኅና ፡ ለነፍስይ ። 3 ወሰውረኒ ፡ እምዕሌቶሙ ፡ ለእኩያን ፤ ወእምብዝኆሙ ፡ ለገበርተ ፡ ዐመፃ ። 4 እለ ፡ አብልኁ ፡ ልሳኖሙ ፡ ከመ ፡ አርዌ ፡ ምድር ፤ ወወሰቁ ፡ ቀስቶሙ ፡ ለገቢረ ፡ መሪር ። 5 ከመ ፡ ይቅትልዎ ፡ ለንጹሕ ፡ በጽሚት ፤ ግብተ ፡ ይነድፍዎሙ ፡ ወኢይፈርሁ ። 6 ወአጽንዑ ፡ ሎሙ ፡ ነገረ ፡ እኩየ ፡ ወተማከሩ ፡ ይኅብኡ ፡ ሎሙ ፡ መሥገርተ ፤ ወይቤሉ ፡ አልቦ ፡ ዘይሬእየነ ። 7 ወኀሠሥዋ ፡ ለዐመፃ ፡ ወኀልቁ ፡ እዝነ ፡ ይፈትኑ ፡ ወይወጥኑ ፤ ወይበውእ ፡ ሰብእ ፡ በልብ ፡ ዕሙቅ ፤ 8 ወይትሌዐል ፡ እግዚአብሔር ። ከመ ፡ ሐጸ ፡ ደቂቅ ፡ ኮነ ፡ መቅሠፍቶሙ ። 9 ወደክመ ፡ ለሳኖሙ ፡ በላዕሌሆሙ ፡ ወደንገፁ ፡ ኵሎሙ ፡ እለ ፡ ርእይዎሙ ። 10 ወፈርሁ ፡ ኵሉ ፡ ሰብእ ፡ ወነገሩ ፡ ግብረ ፡ እግዚአብሔር ፤ ወአእመሩ ፡ ምግባሮ ። 11 ይትፌሣሕ ፡ ጻድቅ ፡ በእግዚአብሔር ፡ ወይትዌከል ፡ ቦቱ ፤ ወይከብሩ ፡ ኵሎሙ ፡ ርቱዓነ ፡ ልብ ።