መዝሙራት ዘዳዊት 111

◎ 1 ሀሌሉያ ። ብፁዕ ፡ ብእሲ ፡ ዘይፈርሆ ፡ ለእግዚአብሔር ፤ ወዘይፈቅድ ፡ ትእዛዞ ፡ ፈድፋደ ። 2 ወይከውን ፡ ጽኑዐ ፡ ዘርዑ ፡ ውስተ ፡ ምድር ፤ ትውልደ ፡ ጻድቃን ፡ ይትባረኩ ። 3 ክብር ፡ ወብዕል ፡ ውስተ ፡ ቤቱ ፤ ወጽድቁኒ ፡ ይነብር ፡ ለዓለመ ፡ ዓለም ። 4 ሠረቀ ፡ ብርሃን ፡ ለራትዓን ፡ በውስተ ፡ ጽልመት ፤ መሓሪ ፡ ወመስተሣህል ፡ እግዚአብሔር ፡ ወጻድቅ ፡ አምላክነ ። 5 ብእሲ ፡ መሓሪ ፡ መስተሣህል ፡ ወኄር ፤ ወይዔቅም ፡ ቃሎ ፡ በውስተ ፡ ፍትሕ ። 6 ወኢይትሀወክ ፡ ለዓለም ፤ ዝክረ ፡ ጻድቅ ፡ ለዓለም ፡ ይሄሉ ። 7 ወኢይፈርህ ፡ እምነገር ፡ እኩይ ፤ ጥቡዕ ፡ ልቡ ፡ ለተወክሎ ፡ በእግዚአብሔር ። 8 ጽኑዕ ፡ ልቡ ፡ ወኢይትሀወክ ፡ ለዓለም ፤ እስከ ፡ ይሬኢ ፡ በጸላእቱ ። 9 ዘረወ ፡ ወወሀበ ፡ ለነዳይ ፡ ወጽድቁኒ ፡ ይነብር ፡ ለዓለመ ፡ ዓለም ፤ ወይትሌዐል ፡ ቀርኑ ፡ በክብር ። 10 ይሬኢ ፡ ኃጥእ ፡ ወይትመዓዕ ፡ ወይሐቂ ፡ ስነኒሁ ፡ ወይትመሰው ፤ ወተኀልቅ ፡ ፍትወቶሙ ፡ ለኃጥኣን ፡፡