ዘናሖም ነቢይ 3

አሌላ ፡ ለሀገረ ፡ ደም ፡ እንተ ፡ መልአት ፡ ሐሰተ ፡ ወጸግበት ፡ ዐመፃ ፡ ኢትግስስ ፡ ማዕገተ ። ድምፀ ፡ መቅሠፍት ፡ ወቃለ ፡ መንኰራኵረ ፡ ድልቅልቅ ፡ ወአፍራስ ፡ ዘይረውድ ፡ ወሰረገላት ፡ ዘይረውጽ ። ወመስተጽዕናን ፡ ይጼዐኑ ፡ ወኵናተ ፡ ይመልሱ ፡ ወወላትው ፡ ይበርቅ ፡ ወብዙኅ ፡ አብድንት ፡ ወክቡድ ፡ ድቀት ፡ ወአልቦሙ ፡ ጸንፈ ፡ ለአሕዛቢሃ ፡ ወይደውዩ ፡ ሥጋሆሙ ፡ እምብዝኀ ፡ ዝሙቶሙ ። ዘማ ፡ ሠናይት ፡ ወፍሥሕት ፡ ለድቀቶሙ ፡ ለሰብአ ፡ ሥራይ ፡ እንተ ፡ ትሣየጥ ፡ አሕዛበ ፡ በዝሙታ ፡ ወሕዝበ ፡ በሥራያቲሃ ። ናሁ ፡ አነ ፡ ላዕሌኪ ፤ ይቤ ፡ እግዚአብሔር ፡ ዘኵሎ ፡ ይመልክ ፤ ወእቀፍጸኪ ፡ ድኅሬኪ ፡ ውስተ ፡ ገጽኪ ፡ ወኣርእዮሙ ፡ ለአሕዛብ ፡ ኅፍረተኪ ፡ ወለነገሥት ፡ ኀሳረኪ ። ወእገድፍ ፡ ላዕሌኪ ፡ ርኵሰ ፡ ዘከመ ፡ ርኵስኪ ፡ ወኣረስሐኪ ፡ ወእሰጥሐኪ ፡ ወእሬስየኪ ፡ ኅስርተ ። ወኵሉ ፡ ዘርእየኪ ፡ ይወርቅ ፡ አምኔኪ ፡ ወይብል ፤ ደንገፀት ፡ ነኔዌ ፡ ምንተ ፡ ይግዕር ፡ ላዕሌኪ ፡ እምአይቴ ፡ ነኀሥሥ ፡ ዘይናዝዛ ። ታስተዳሉ ፡ መክፈልታ ፡ ወትቃኒ ፡ አውታሪሃ ፡ ወታስተዳሉ ፡ መክፈልታ ፡ አሞን ፡ እንተ ፡ ትነብር ፡ ውስተ ፡ አፍላገ ፡ ማይ ፡ ሕጹራ ፡ ወጽንፋ ፡ ውስተ ፡ ባሕር ፡ ወማይ ፡ አረፋቲሃ ። ወኢትዮጵያ ፡ ኀይላ ፡ ወግብጽ ፡ ወአልቦ ፡ ጽንፈ ፡ ለምጕያይኪ ፡ ወሊቢዩስ ፡ ረድእዋ ። ወይእቲኒ ፡ እምነ ፡ ምንባሪሃ ፡ ወይፄውውዋ ፡ ወይወስድዋ ፡ ወይነጽኅዎሙ ፡ ለሕፃናቲሃ ፡ ውስተ ፡ ኵሉ ፡ ፍናዊሃ ፡ ወይትዓፀዉ ፡ ኵሎ ፡ ክብራ ፡ ወይሞቅሕዎሙ ፡ ለመላእክቲሃ ፡ ለኵሎሙ ። ወአንቲኒ ፡ ትሰክሪ ፡ ወትከውኒ ፡ እቡደ ፡ ወተኀሥሢ ፡ ለኪ ፡ ዘይባልሐኪ ፡ እምፀርኪ ። ወኢያድኅነኪ ፡ አጽዋኒኪ ፡ ወይሜምዑ ፡ መዓቅቢኪ ፡ ወይወድቁ ፡ ውስተ ፡ አፈ ፡ በላዒ ። ናሁ ፡ አሕዛብኪ ፡ ከመ ፡ አንስት ፡ በውስቴትኪ ፡ ወይትረኀው ፡ ለፀርኪ ፡ አናቅጸ ፡ ብሔርኪ ፡ ይበልዖሙ ፡ እሳት ፡ ለመናስግቲኪ ። ናሁ ፡ ማይ ፡ ዐገተኪ ፤ ፃኢ ፡ ወአጽንዒ ፡ አጽዋነኪ ፡ ዕረጊ ፡ ውስተ ፡ ፅቡር ፡ ወአጽብሪ ፡ በሐሠር ፡ ወአይብስዮ ፡ እምግንፋል ። እስመ ፡ በህየ ፡ ትበልዐኪ ፡ እሳት ፡ ወታጠፍአኪ ፡ ኲናት ፡ ወይበልዑኪ ፡ ከመ ፡ አንበጣ ፡ ወትከብዲ ፡ እምደገብያ ። ወአብዛኅኪ ፡ ተግባረኪ ፡ እምኮከበ ፡ ሰማይ ፤ ደገብያ ፡ ነበረሂ ፡ ወሰረረ ። ወአምሠጡ ፡ ድሙራንኪ ፡ ከመ ፡ አንበጣ ፡ ዘይነብር ፡ ዲበ ፡ ጥቅም ፡ በዕለተ ፡ ጊሜ ፡ ወእምከመ ፡ ሠረቀ ፡ ፀሐይ ፡ ይትገሐሥ ፡ ወኢያእመረት ፡ ብሔራ ፡ አሌሎሙ ። እስመ ፡ ደቀሱ ፡ ኖሎትኪ ፤ ንጉሠ ፡ ፋርስ ፡ አነሞሙ ፡ ለኀያላንኪ ፡ ወግዕዙ ፡ አሕዛቢኪ ፡ ውስተ ፡ አድባር ፡ ወአልቦ ፡ ዘይሬኢ ፡ ወዘይጸንሕ ። ወአልቦ ፡ ፈውሰ ፡ ለቍስልኪ ፤ ኵሕሠ ፡ ጽልዕኪ ፤ ወኵሎሙ ፡ እለ ፡ ይሰምዑ ፡ ዜናኪ ፡ ወይጠፍሑ ፡ እደዊሆሙ ፡ ላዕሌኪ ፡ እስመ ፡ ላዕለ ፡ ኵሉ ፡ በጽሐት ፡ እከይኪ ፡ በኵሉ ፡ ጊዜ ። = ።