ዘሚክያስ ነቢይ 7

አሌሊተ ፡ እስመ ፡ ኮንኩ ፡ ከመ ፡ ዘያስተጋብእ ፡ ቀሪመ ፡ በማእረር ፡ ወከመ ፡ ትቅራም ፡ አመ ፡ ቀሥም ፡ ዘአልቦ ፡ አስካል ፡ ዘይበልዑ ፡ ደቂቅ ፤ አሌላ ፡ ለነፍስ ፡ እስመ ፡ ኀልቀ ፡ ኄር ፡ እምድር ፡ ወአልቦ ፡ ሰብእ ፡ ዘያረትዕ ፤ ኵሉ ፡ ለነፍሱ ፡ ይሴነን ፡ ወኵሉ ፡ ያጠውቅ ፡ ቢጾ ፡ ወያመነድብ ። ወያነሥኡ ፡ እደዊሆሙ ፡ ለእኩይ ፡ መልአክኒ ፡ ይስእል ፡ ወመኰንንኒ ፡ ይየውህ ፡ ይርከብ ፡ ፍትወተ ፡ ነፍሱ ፤ ወአጠፍኦ ፡ ለበረከቶሙ ፡ ከመ ፡ ፃፄ ፡ ዘይበልዕ ፡ ወየዐርግ ፡ ዲበ ፡ ንዋይ ፡ በዕለተ ፡ ጽልመት ፤ አሌለኪ ፡ በጽሐኪ ፡ ፍዳኪ ፡ ይእዜ ፡ ይበጽሖሙ ፡ ገዐር ። ኢትትአመንዎሙ ፡ እንከ ፡ ለአዕርክቲክሙ ፡ ወኢትትወከልዎሙ ፡ ለመላእክት ፡ <ወእምብእሲትከ ፡> በውስተ ፡ ምስከብከ ፡ ተዐቀብ ፡ ከመ ፡ ትዕበያ ። እስመ ፡ ወልድኒ ፡ ያኀስር ፡ አባሁ ፡ ወወለትኒ ፡ ትትነሣእ ፡ ዲበ ፡ እማ ፡ ወመርዓትኒ ፡ ላዕለ ፡ ሐማታ ፡ ወኵሉ ፡ ሰብአ ፡ ቤቱ ፡ ይፃረሮ ፡ ለሰብእ ። ወአንሰ ፡ ዲበ ፡ እግዚአብሔር ፡ አዐርፍ ፡ ወእሴፈዎ ፡ ለአምላኪየ ፡ ወመድኀንየ ፡ ወይሰምዐኒ ፡ አምላኪየ ። ወኢይከውን ፡ ስላተ ፡ ጸላኢየ ፡ እመኒ ፡ ድኅፅኩ ፡ እትነሣእ ፡ ወእመኒ ፡ ነበርኩ ፡ ውስተ ፡ ጽልመት ፡ እግዚአብሔር ፡ ያበርህ ፡ ሊተ ። ተግሣጸ ፡ እግዚአብሔር ፡ አንሰ ፡ ተዐገስኩ ፡ እስመ ፡ አበስኩ ፡ ሎቱ ፡ እስከ ፡ ያጸድቀኒ ፡ ፍትሕየ ፡ ወይገብር ፡ ሊተ ፡ ቅሥትየ ፡ ወያገብአኒ ፡ ውስተ ፡ ብርሃን ፡ ወእሬእያ ፡ ለጻድቁ ። ወትሬኢ ፡ ጸላእትየ ፡ ወትለብስ ፡ ኀፍረተ ፡ እንተ ፡ ትብለኒ ፡ አይቴ ፡ ውእቱ ፡ እግዚአብሔር ፡ አምላክከ ፡ ወይሬእየሃ ፡ አዕይንቲየ ፡ ይእዜ ፡ ትከውን ፡ ከመ ፡ ጽንጒን ፡ ዘይከይዱ ፡ ውስተ ፡ ፍኖት ። ወታጠፍአኪ ፡ ይእቲ ፡ ዕለት ፡ ወትማስን ፡ ሕግኪ ፡ ይእተ ፡ ዕለተ ። ወይትዐጸዋ ፡ አህጉሪኪ ፡ ወይትካፈልዎን ፡ ፋርስ ፡ ወይትካፈሉ ፡ አህጉሪኪ ፡ ጽኑዓተ ፡ እምጢሮስ ፡ እስከ ፡ ፈለገ ፡ ሶርያ ፡ ወእምባሕር ፡ እስከ ፡ ባሕር ፡ ወእምአድባር ፡ እስከ ፡ አድባር ። ወትማስን ፡ <ምድር ፡> ምስለ ፡ ኵሉ ፡ ዘይነብራ ፡ እምፍሬ ፡ እከየ ፡ ምግባሮሙ ። ረዐይ ፡ ሕዝበከ ፡ በበትርከ ፡ ወነገደ ፡ አባግዐ ፡ ርስትከ ፡ ወይኅድሩ ፡ ባሕቲቶሙ ፡ ወይትረዐዩ ፡ ውስተ ፡ ዖም ፡ ዘማእከለ ፡ ቀርሜሎስ ፡ ዘባሳን ፡ ወገለአድ ፡ በከመ ፡ መዋዕለ ፡ ዓለም ። ወበከመ ፡ መዋዕል ፡ ዘአመ ፡ ዐርጉ ፡ እምግብጽ ፡ ወትሬእዩ ፡ መንክረ ። ወይሬእዩ ፡ አሕዛብ ፡ ወይትዌሐኩ ፡ በኵሉ ፡ ኀይሎሙ ፡ ወይወድዩ ፡ እደዊሆሙ ፡ ዲበ ፡ አፉሆሙ ፡ ወይጠይኡ ፡ እዘኒሆሙ ። ወይልሕሱ ፡ መሬተ ፡ ከመ ፡ አርዌ ፡ ምድር ፡ ወይጠፍሑ ፡ በምድር ፡ ወይትከወሱ ፡ በውስተ ፡ ማዕገቶሙ ፡ ወይደነግፁ ፡ እምእግዚአብሔር ፡ አምላክነ ፡ ወይፈርሁ ፡ እምኔሁ ። መኑ ፡ አምላክ ፡ ከማከ ፡ ዘያአትት ፡ ኀጢአተ ፡ ወይትዐዶ ፡ አበሳሆሙ ፡ ለርስቱ ፡ ለእለ ፡ ተርፉ ፡ ወኢያጸንዕ ፡ ስምዐ ፡ መዐቱ ፡ እስመ ፡ ፈቃዴ ፡ ምሕረት ፡ ውእቱ ። ወይትመየጠነ ፡ ወይሣሀለነ ፡ ወያሰጥሞን ፡ ለኀጣውኢነ ፡ ወይዌርዎን ፡ ውስተ ፡ ቀላየ ፡ ባሕር ፡ ለአበሳነ ። ወትሁቦ ፡ ጽድቀ ፡ ለያዕቆብ ፡ ወሣህለ ፡ ለአብርሃም ፡ በከመ ፡ መሐልከ ፡ ለአበዊነ ፡ በመዋዕለ ፡ ትካት ።