ዘምልክያስ ነቢይ 4

ወናሁ ፡ ይመጽኣ ፡ መዋዕለ ፡ እግዚአብሔር ፡ እንዘ ፡ ይነድዳ ፡ ከመ ፡ እሳት ፡ ወያውዕያሆሙ ፡ ወይከውኑ ፡ ባዕዳነ ፡ አሕዛበ ፡ ወኵሎሙ ፡ ገበርተ ፡ ዐመፃ ፡ ከመ ፡ ሐሠር ፡ ወታውዕዮሙ ፡ ዕለት ፡ እንተ ፡ ትመጽእ ፤ ይቤ ፡ እግዚአብሔር ፡ ዘኵሎ ፡ ይመልክ ፤ ወኢይተርፍ ፡ ሥርዎሙ ፡ ወኢዐጽቆሙ ። ወይሠርቅ ፡ ለክሙ ፡ ለእለ ፡ ትፈርሁ ፡ ስምየ ፡ ፀሐየ ፡ ጽድቅ ፡ ወሕይወት ፡ ውስተ ፡ ክነፊሁ ፤ ወትወፅኡ ፡ ወታንፈርዕፁ ፡ ከመ ፡ ጣዕዋ ፡ ዘተፈትሐ ፡ እማእሰሩ ። ወትከይድዎሙ ፡ ለኃጥኣን ፡ ወይከውኑ ፡ ሐመደ ፡ በታሕተ ፡ እገሪክሙ ፡ በዕለት ፡ እንተ ፡ እገብር ፡ አነ ፤ ይቤ ፡ እግዚአብሔር ፥ ዘኵሎ ፡ ይመልክ ። ወናሁ ፡ አነ ፡ እፌንዎ ፡ ለክሙ ፡ ኤልያስሃ ፡ ተስብያዊ ፡ ዘእንበለ ፡ ትምጻእ ፡ ዕለተ ፡ እግዚአብሔር ፡ ዐባይ ፡ እንተ ፡ ታስተርኢ ። ወይመይጥ ፡ ልበ ፡ አብ ፡ ኀበ ፡ ውሉድ ፡ ወልበ ፡ ብእሲ ፡ ኀበ ፡ ቢጹ ፡ አመ ፡ መጻእኩ ፡ ወቀሠፍክዋ ፡ ለምድር ። ተዘከሩ ፡ ሕገ ፡ ሞሴ ፡ ገብርየ ፡ ዘአዘዝክዎ ፡ በኮሬብ ፡ ሥርዐተ ፡ ወኵነኔ ፡ ለኵሉ ፡ እስራኤል ። = ። ለይኩን ፡ ስብሐተ ፡ እግዚአብሔር ፡ ለዓለም ፡ ወለዓለመ ፡ ዓለም ፡ አሜን ፡ አሜን ።