መጽሐፈ ኩፋሌ 50

50 1 ወእምድኅረዝ ፡ ሕግ ፡ አይዳዕኩከ ፡ መዋዕለ ፡ ሰንበታት ፡ በገዳመ ፡ ሲና ፡ እንተ ፡ ይእቲ ፡ ማእከለ ፡ ኤሊም ፡ ወሲና ፡ 2 ወሰንበታተ ፡ ምድርኒ ፡ ነገርኩከ ፡ በደብረ ፡ ሲና ፡ ወዓመታተ ፡ ኢዮቤሌዎኒ ፡ ውስተ ፡ ሰንበታተ ፡ ዓመታት ፡ ወዓመቶሰ ፡ ኢነገርናከ ፡ እስከ ፡ አመ ፡ ትበውኡ ፡ ውስተ ፡ ምድር ፡ እንተ ፡ ትእኅዙ ፡ 3 ወታሰነብት ፡ ምድርኒ ፡ ሰንበታቲሃ ፡ በነቢሮቶሙ ፡ ዲቤሃ ፡ ወዓመቶ ፡ ለኢዮቤል ፡ ያእምሩ ። 4 በእንተዝ ፡ ሠራዕኩ ፡ ለከ ፡ ሱባዔ ፡ ዓመታት ፡ ወኢዮቤሌዎታተ ፡ አርብዓ ፡ ወተስዐቱ ፡ ኢዮቤሌዎታት ፡ እምነ ፡ መዋዕሊሁ ፡ ለአዳም ፡ እስከ ፡ ዛቲ ፡ ዕለት ፡ ወሱባዔ ፡ አሐዱ ፡ ወክልኤ ፡ ዓመታት ፡ ወዓዲ ፡ አርብዓ ፡ ዓመት ፡ ርሑቅ ፡ ለአእምሮ ፡ ትእዛዛተ ፡ እግዚአብሔር ፡ እስከ ፡ አመ ፡ ያዐድው ፡ ማዕዶተ ፡ ምድረ ፡ ከናአን ፡ ዐዲዎሙ ፡ ዮርዳኖስ ፡ ገጸ ፡ ዐረቢሁ ፡ 5 ወኢዮቤሌዎታት ፡ የኀልፉ ፡ እስከ ፡ አመ ፡ ይነጽሕ ፡ እስራኤል ፡ እምኵሉ ፡ አበሳ ፡ ዝሙት ፡ ወርኵስ ፡ ወግማኔ ፡ ወኀጢአት ፡ ወጌጋይ ፡ ወየኀድር ፡ ውስተ ፡ ኵሉ ፡ ምድር ፡ እንዘ ፡ ይትአመን ፡ ወአልቦ ፡ እንከ ፡ ሎቱ ፡ መነሂ ፡ ሰይጣነ ፡ ወአልቦ ፡ መነሂ ፡ እኩየ ፡ ወትነጽሕ ፡ ምድር ፡ እምውእቱ ፡ ጊዜ ፡ እስከ ፡ ኵሉ ፡ መዋዕል ። 6 ወናሁ ፡ ትእዛዘ ፡ ሰንበታትኒ ፡ ጸሐፍኩ ፡ ለከ ፡ ወኵሉ ፡ ፍትሐተ ፡ ሕገጊሁ ፡ 7 ሰዱሰ ፡ ዕለተ ፡ ትገብር ፡ ግብረ ፡ ወአመ ፡ ሳብዕት ፡ ዕለት ፡ ሰንበት ፡ ዘእግዚአብሔር ፡ አምላክክሙ ፡ ኢትግበሩ ፡ ባቲ ፡ ኵሎ ፡ ግብረ ፡ አንትሙ ፡ ወውሉድክሙ ፡ ወአግብርቲክሙ ፡ ወአእማቲክሙ ፡ ወኵሉ ፡ እንስሳክሙ ፡ ወነኪርኒ ፡ ዘኀቤክሙ ። 8 ወሰብእ ፡ ዘይገብር ፡ ምንተሂ ፡ ግብረ ፡ ባቲ ፡ ይሙት ፡ ኵሉ ፡ ብእሲ ፡ ዘይጌምና ፡ ለዛ ፡ ዕለት ፡ ዘይሰክብ ፡ ምስለ ፡ ብእሲት ፡ ወዘሂ ፡ ይትናገር ፡ ነገረ ፡ ምግባር ፡ ባቲ ፡ ከመ ፡ ይግበር ፡ ባቲ ፡ ገዪሶ ፡ ወበእንተኒ ፡ ኵሉ ፡ ሠዪጥ ፡ ወተሣይጦ ፡ ወዘሂ ፡ ማየ ፡ ይቀድሕ ፡ ባቲ ፡ ዘኢያስተዳለወ ፡ ሎቱ ፡ በዕለተ ፡ ሳድስት ፡ ወዘኒ ፡ አንሥአ ፡ ዘይጸውር ፡ ኵሎ ፡ ከመ ፡ ያውፅእ ፡ እምደብተራሁ ፡ ወእመኒ ፡ እምቤቱ ፡ ይሙት ። 9 ኢትግበሩ ፡ ሰንበት ፡ ምንተሂ ፡ ግብረ ፡ ዘኢያስተዳለውክምዎ ፡ ለክሙ ፡ በዕለተ ፡ ሳድስት ፡ ለበሊዕ ፡ ወለሰቲይ ፡ ወለአዕርፎ ፡ ወለአሰንብቶ ፡ እምኵሉ ፡ ግብር ፡ በዛቲ ፡ ዕለት ፡ ወለባርኮ ፡ እግዚአብሔር ፡ አምላክክሙ ። ዘወሀበክሙ ፡ ዕለት ፡ በዓል ፡ ወዕለተ ፡ ቅድስተ ፡ ወዕለተ ፡ መንግሥት ፡ ቅድስት ፡ ለኵሉ ፡ እስራኤል ፡ ዛቲ ፡ ዕለት ፡ በመዋዕሊሆሙ ፡ በኵሉ ፡ መዋዕል ፡ 10 እስመ ፡ ዐባይ ፡ ክብር ፡ እንተ ፡ ወሀበ ፡ እግዚአብሔር ፡ ለእስራኤል ፡ ለበሊዕ ፡ ወለሰቲይ ፡ ወለጸጊብ ፡ በዛቲ ፡ ዕለተ ፡ በዓል ፡ ወለአዕርፎ ፡ ባቲ ፡ እምኵሉ ፡ ግብር ፡ ዘእምግብረ ፡ እጓለ ፡ እመሕያው ፡ ዘእንበለ ፡ ዐጢነ ፡ ዕጣን ፡ ወለአብኦ ፡ ቍርባን ፡ ወመሥዋዕት ፡ ቅድመ ፡ እግዚአብሔር ፡ ለመዋዕል ፡ ወለሰንበታት ፡ 11 ዝግብር ፡ ባሕቲቱ ፡ ይትገበር ፡ በመዋዕለ ፡ ሰንበታት ፡ በቤተ ፡ መቅደሱ ፡ ለእግዚአብሔር ፡ አምላክክሙ ፡ ከመ ፡ ያስተስርዩ ፡ ዲበ ፡ እስራኤል ፡ መባአ ፡ ወትረ ፡ ዕለተ ፡ እምዕለት ፡ ለተዝካር ፡ ዘይሠጠው ፡ ቅድመ ፡ እግዚአብሔር ፡ ወይትወከፎሙ ፡ ለዓለም ፡ ዕለተ ፡ እምዕለት ፡ በከመ ፡ ተአዘዝከ ። 12 ወኵሉ ፡ ሰብእ ፡ ዘይገብር ፡ ግብረ ፡ ወዘሂ ፡ የሐውር ፡ መንገደ ፡ ወዘሂ ፡ ይትቀነይ ፡ ወፍረ ፡ ወእመሂ ፡ በቤቱ ፡ ወእመሂ ፡ በኵሉ ፡ መካን ። ወዘሂ ፡ ያነድድ ፡ እሳተ ፡ ወዘሂ ፡ ይጼዐን ፡ ዲበ ፡ ኵሉ ፡ እንስሳ ። ወዘሂ ፡ ይነግድ ፡ በሐመር ፡ ባሕረ ፡ ወኵሉ ፡ ሰብእ ፡ ዘይዘብጥ ፡ ወይቀትል ፡ ምንተሂ ፡ ወዘሂ ፡ የሐርድ ፡ እንስሳ ፡ ወዖፈ ፡ ወዘሂ ፡ አሥገረ ፡ እመሂ ፡ አርዌ ፡ ወዖፈ ፡ ወእመኒ ፡ ዓሣ ፡ ወዘሂ ፡ ይጸውም ፡ ወይገብር ፡ ፀብአ ፡ በዕለተ ፡ ሰንበት ፡ 13 ወሰብእ ፡ ዘይገብር ፡ ኵሎ ፡ ዘእምዝ ፡ በዕለተ ፡ ሰንበት ፡ ይሙት ። ከመ ፡ ይኩኑ ፡ ውሉደ ፡ እስራኤል ፡ እንዘ ፡ ያሰነብቱ ፡ በከመ ፡ ትእዛዛተ ፡ ሰንበታተ ፡ ምድር ፡ በከመ ፡ ተጽሕፈ ፡ እምውስተ ፡ ጽላት ፡ ዘወሀበኒ ፡ ውስተ ፡ እደዊየ ፡ ከመ ፡ እጽሐፍ ፡ ለከ ፡ ሕገገ ፡ ጊዜ ፡ ወጊዜ ፡ በበ ፡ ኩፋሌ ፡ መዋዕሊሁ ። ተፈጸመ ፡ በዝየ ፡ ነገር ፡ ዘኩፋሌ ፡ መዋዕል ።