መጽሐፈ ኩፋሌ 45

45 1 ወቦአ ፡ እስራኤል ፡ ውስተ ፡ ብሔረ ፡ ግብጽ ፡ ውስተ ፡ ምድረ ፡ ጌሤም ፡ አመ ፡ ሠርቀ ፡ ወርኅ ፡ ራብዕ ፡ በካልእ ፡ ዓመት ፡ ዘሱባዔ ፡ ሣልስ ፡ ዘአርብዓ ፡ ወኀምስቱ ፡ ኢዮቤልው ። 2 ወመጽአ ፡ ዮሴፍ ፡ ይትቀበል ፡ አባሁ ፡ ያዕቆብሃ ፡ ውስተ ፡ ምድረ ፡ ጌሤም ፡ ወሐቀፈ ፡ ክሳደ ፡ አቡሁ ፡ ወበከየ ። 3 ወይቤሎ ፡ እስራኤል ፡ ለዮሴፍ ፡ እሙት ፡ ይእዜሰ ፡ እምዘ ፡ ርኢኩከ ፡ ወይእዜኒ ፡ ይትባረክ ፡ እግዚአብሔር ፡ አምላከ ፡ እስራኤል ፡ ወአምላከ ፡ አብርሃም ፡ ወአምላከ ፡ ይስሐቅ ፡ ዘኢከልአ ፡ ምሕረቶ ፡ ወሣህሎ ፡ እምገብሩ ፡ ያዕቆብ ። 4 ዐቢይ ፡ ሊተ ፡ ዘርኢኩ ፡ ገጸከ ፡ እንዘ ፡ ሕያው ፡ አነ ፡ እስመ ፡ አማን ፡ ህልው ፡ ራእይ ፡ ዘርኢኩ ፡ በቤቴል ፡ ይትባረክ ፡ እግዚአብሔር ፡ አምላኪየ ፡ ለዓለመ ፡ ዓለም ፡ ወቡሩክ ፡ ስሙ ። 5 ወበልዑ ፡ ዮሴፍ ፡ ወአኀዊሁ ፡ በቅድመ ፡ አቡሆሙ ፡ ኅብስተ ፡ ወሰትዩ ፡ ወይነ ፡ ወተፈሥሐ ፡ ያዕቆብ ፡ ፍሥሓ ፡ ዐቢየ ፡ ጥቀ ። እስመ ፡ ርእዮ ፡ ለዮሴፍ ፡ እንዘ ፡ ይበልዕ ፡ ምስለ ፡ አኀዊሁ ፡ ወይሰቲ ፡ በቅድሜሁ ። ወባረኮ ፡ ለፈጣሬ ፡ ኵሉ ፡ ዘዐቀቦ ፡ ወዐቀበ ፡ ሎቱ ፡ ዐሠርተ ፡ ወክልኤተ ፡ ውሉዶ ። 6 ወወሀቦ ፡ ዮሴፍ ፡ ለአቡሁ ፡ ወለአኀዊሁ ፡ ሀብተ ፡ ከመ ፡ ይኅድሩ ፡ ምድረ ፡ ጌሤም ፡ ወውስተ ፡ ራሜሲኖ ፡ ወኵሎ ፡ አድያሚሃ ፡ ሎሙ ፡ ዘይኴንኑ ፡ በቅድሜሁ ፡ ለፈርዖን ። ወኀደረ ፡ እስራኤል ፡ ወውሉዱ ፡ ምድረ ፡ ጌሤም ፡ ምሥናዪሃ ፡ ለምድረ ፡ ግብጽ ፡ ወእስራኤልሰ ፡ ወልደ ፡ ምእት ፡ ወሠላሳ ፡ ዓመት ፡ አመ ፡ ቦአ ፡ ውስተ ፡ ግብጽ ፡ 7 ወሴሰዮሙ ፡ ዮሴፍ ፡ ለአቡሁ ፡ ወለአኀዊሁ ፡ ወጥሪቶሙሂ ፡ ኀባውዘ ፡ በከመ ፡ የአክሎሙ ፡ ለሰብዐቱ ፡ ዓመታተ ፡ ዐባር ። 8 ወሐመት ፡ ምድረ ፡ ግብጽ ፡ እምቅድመ ፡ ገጸ ፡ ዐባር ። ወአስተጋብአ ፡ ዮሴፍ ፡ ኵለንታሃ ፡ ምድረ ፡ ግብጽ ፡ ለፈርዖን ፡ በእክል ፡ ወሰብአኒ ፡ ወእንስሳሆሙኒ ፡ ወኵሎ ፡ አጥረየ ፡ ፈርዖን ፡ 9 ወተፈጸመ ፡ ዓመታተ ፡ ዐባር ። ወወሀበ ፡ ዮሴፍ ፡ ለአሕዛብ ፡ ዘውስተ ፡ ምድር ፡ ዘርአ ፡ ወሲሲተ ፡ ከመ ፡ ይዝርኡ ፡ በሳምን ፡ ዓመት ፡ እስመ ፡ መልአ ፡ ፈለግ ፡ ዲበ ፡ ኵላ ፡ ምድረ ፡ ግብጽ ፡ 10 እስመ ፡ በሰብዓቱ ፡ ዓመታተ ፡ ዐባር ። ኢሰቀየ ፡ ዘእንበለ ፡ ውኁዳት ፡ መካን ፡ ኀበ ፡ ድንጋገ ፡ ፈለግ ፡ ወይእዜሰ ፡ መልአ ። ወዘርኡ ፡ ግብጽ ፡ ምድረ ፡ ወፈርየት ፡ ብዙኀ ፡ ሠናየ ፡ በውእቱ ፡ ዓመት ፡ 11 ወውእቱ ፡ ዓመት ፡ ቀዳሚ ፡ ዘሱባዔ ፡ ራብዕ ፡ ዘአርብዓ ፡ ወኀምስቱ ፡ ኢዮቤሌው ። 12 ወነሥአ ፡ ዮሴፍ ፡ እምእክል ፡ ዘዘርኡ ፡ ኀምስቶ ፡ ለንጉሥ ፡ ወራብዕተ ፡ እደ ፡ ኀደገ ፡ ሎሙ ፡ ለሲሲት ፡ ወለዘርእ ፡ ወረሰዮ ፡ ዮሴፍ ፡ ሥርዐተ ፡ ለምድረ ፡ ግብጽ ፡ እስከ ፡ ዛቲ ፡ ዕለት ። 13 ወሐይወ ፡ እስራኤል ፡ በምድረ ፡ ግብጽ ፡ ዐሠርተ ፡ ወሰብዓተ ፡ ዓመተ ። ወኮና ፡ ኵሎን ፡ መዋዕል ፡ እለ ፡ ሐይወ ፡ ሠለስቱ ፡ ኢዩቤልውስ ፡ ምእት ፡ ወአርብዓ ፡ ወሰብዓቱ ፡ ዓመት ፡ ወሞተ ፡ በዓመት ፡ ራብዕ ፡ ዘሱባዔ ፡ ኃምስ ፡ ዘአርብዓ ፡ ወኀምስቱ ፡ ኢዩቤልውስ ። 14 ወባረኮሙ ፡ እስራኤል ፡ ለውሉዱ ፡ ዘእንበለ ፡ ይሙት ፡ ወነገሮሙ ፡ ኵሎ ፡ ዘኮነ ፡ ይረክቦሙ ፡ በምድረ ፡ ግብጽ ፡ ወበደኃሪ ፡ መዋዕል ፡ ዘከመ ፡ ይመጽእ ፡ ላዕሌሆሙ ፡ አይድዖሙ ፡ ወባረኮሙ ። ወወሀቦ ፡ ለዮሴፍ ፡ ክልኤተ ፡ መክፈልተ ፡ በዲበ ፡ ምድር ፡ 15 ወኖመ ፡ ምስለ ፡ አበዊሁ ፡ ወተቀብረ ፡ ውስተ ፡ በአት ፡ ዘካዕበት ፡ በምድረ ፡ ከናአን ፡ ቅሩበ ፡ አብርሃም ፡ አቡሁ ፡ ውስተ ፡ መቃብር ፡ ዘከረየ ፡ ለርእሱ ፡ ውስተ ፡ በአተ ፡ ካዕበት ፡ በምድረ ፡ ኬብሮን ። 16 ወወሀቦ ፡ ኵሎ ፡ መጻሕፍቲሁ ፡ ወመጻሕፍተ ፡ አበዊሁ ፡ ለሌዊ ፡ ወልዱ ፡ ከመ ፡ ይዕቀቦን ፡ ወከመ ፡ የሐድሶን ፡ ለውሉዱ ፡ እስከ ፡ ዛቲ ፡ ዕለት ።