መጽሐፈ ኩፋሌ 42

42 1 ወበቀዳሚ ፡ ዓመት ፡ ዘሱባዔ ፡ ሣልስ ፡ ዘአርብዓ ፡ ወኀምስቱ ፡ ኢዮቤልው ፡ አኀዘ ፡ ዐባር ፡ ይምጻእ ፡ ውስተ ፡ ምድር ፡ ወአበየ ፡ ዝናም ፡ ተውህቦ ፡ ለምድር ፡ እስመ ፡ አልቦ ፡ ምንተኒ ፡ ዘይወርድ ፡ 2 ወዐብረት ፡ ምድር ። ወበምድረ ፡ ግብጽ ፡ ባሕቱ ፡ ቦቱ ፡ ሲሲተ ፡ እስመ ፡ አስተጋብአ ፡ ዮሴፍ ፡ ዘርአ ፡ በምድር ፡ በሰብዐቱ ፡ ዓመት ፡ ዘሠምር ፡ ወዐቀቦ ፡ 3 ወመጽኡ ፡ ግብጽ ፡ ኀበ ፡ ዮሴፍ ፡ ከመ ፡ የሀቦሙ ፡ ሲሲተ ፡ ወከሠተ ፡ መዛግብተ ፡ ኀበ ፡ ሀሎ ፡ ሥርናይ ፡ ዘቀዳሚ ፡ ዓመት ፡ ወሤጠ ፡ ለአሕዛበ ፡ ምድር ፡ በወርቅ ። 4 ወሰምዐ ፡ ያዕቆብ ፡ ከመ ፡ ቦቱ ፡ ሲሲተ ፡ ውስተ ፡ ግብጽ ፡ ወፈነወ ፡ ዐሠርተ ፡ ደቆ ፡ ከመ ፡ ይንሥኡ ፡ ሎቱ ፡ ሲሲተ ፡ በግብጽ ፡ ወብንያምሃሰ ፡ ኢፈነወ ። ወበጽሑ ፡ ምስለ ፡ ዘየሐውር ፡ 5 ወአእመሮ ፡ ዮሴፍ ፡ ወእሙንቱሰ ፡ ኢያእመርዎ ። ወተናገረ ፡ ምስሌሆሙ ፡ ወተስእሎሙ ፡ ወይቤሎሙ ፡ አኮኑ ፡ ሰብአ ፡ ዐይን ፡ አንትሙ ፡ ወመጻእክሙ ፡ ታስተሐይጹ ፡ አሰረ ፡ ምድር ፡ ወዐጸዎሙ ። 6 ወእምዝ ፡ ፈትሖሙ ፡ ወአቀመ ፡ ስምዖንሃ ፡ ባሕቲቶ ፡ ወተስዐተ ፡ አኀዊሁ ፡ ፈነወ ፡ 7 ወመልአ ፡ አሕስሊሆሙ ፡ ሥርናየ ፡ ወወርቆሙሂ ፡ ወደየ ፡ ሎሙ ፡ ውስተ ፡ አሕስሊሆሙ ፡ ወኢያእመሩ ። 8 ወአዘዞሙ ፡ ከመ ፡ ያምጽኡ ፡ እኅዋሆሙ ፡ ዘይንእስ ፡ እስመ ፡ ነገርዎ ፡ ከመ ፡ ሀሎ ፡ አቡሆሙ ፡ ሕያው ፡ ወእኁሆሙ ፡ ዘይንእስ ። 9 ወዐርጉ ፡ እምድረ ፡ ግብጽ ፡ ወበጽሑ ፡ ምድረ ፡ ከናአን ፡ ወነገሩ ፡ ለአቡሆሙ ፡ ኵሎ ፡ ዘከመ ፡ ረከቦሙ ፡ ወእፎ ፡ ተናገረ ፡ ምስሌሆሙ ፡ መኰንነ ፡ ብሔር ፡ ዐጸብጺበ ፡ ወአኀዞ ፡ ለስምዖን ፡ እስከ ፡ ሶበ ፡ ያመጽእዎ ፡ ለብንያም ። 10 ወይቤ ፡ ያዕቆብ ፡ አምከንክሙኒኬ ፡ ወዮሴፍኒ ፡ ኢሀሎ ፡ ወስምዖንሂ ፡ ኢሀሎ ፡ ወብንያምሃኒ ፡ ትነሥእዎ ፡ ላዕሌየኬ ፡ ኮነ ፡ እከይክሙ ። 11 ወይቤ ፡ ኢየሐውር ፡ ወልድየ ፡ ምስሌክሙ ፡ እመቦ ፡ ከመ ፡ ደወየ ። እስመ ፡ ክልኤተ ፡ ወለደት ፡ እሞሙ ፡ ወአሐዱ ፡ ተሐጕለ ፡ ወዘንተኒ ፡ ትነሥኡኒ ፡ እመቦ ፡ ከመ ፡ ፈፀነ ፡ በፍኖት ፡ ወታወርዱ ፡ ሊተ ፡ ርስእየ ፡ በሐዘን ፡ ውስተ ፡ ሞት ። 12 እስመ ፡ ርእየ ፡ ከመ ፡ ገብአ ፡ ወርቆሙ ፡ ኵሉ ፡ በዕቈሪሁ ፡ ወበዝ ፡ ፈርሀ ፡ ፈንዎቶ ። 13 ወዐባርኒ ፡ በዝኀ ፡ ወኀየለ ፡ በምድረ ፡ ከናአን ፡ ወበኵሉ ፡ ምድር ፡ ዘእንበለ ፡ ምድረ ፡ ግብጽ ። እስመ ፡ ብዙኃን ፡ እምውሉደ ፡ ግብጽ ፡ ዘገቡ ፡ ዘርኦሙ ፡ ለሲሲት ፡ እምዘ ፡ ርእይዎ ፡ ለዮሴፍ ፡ ከመ ፡ ያስተጋብእ ፡ ዘርአ ፡ ወይሠይም ፡ ውስተ ፡ መዛግብት ፡ ወየዐቅብ ፡ ለዓመተ ፡ ዐባር ። 14 ወተሴሰይዎ ፡ ሰብአ ፡ ግብጽ ፡ በቀዳሚ ፡ ዓመት ፡ ዘዐባር ። 15 ወሶበ ፡ ርእየ ፡ እስራኤል ፡ ከመ ፡ ኀየለ ፡ ጥቀ ፡ ዐባር ፡ ውስተ ፡ ምድር ፡ ወአልቦ ፡ ድኂነ ፡ ወይቤ ፡ ለውሉዱ ፡ ሖሩ ፡ ግብኡ ፡ ወንሥኡ ፡ ለነ ፡ ሲሲተ ፡ ኢንሙት ፡ 16 ወይቤሉ ፡ ኢነሐውር ፡ እመ ፡ ኢመጽአ ፡ እኁነ ፡ ዘይንእስ ፡ ምስሌነ ፡ ኢነሐውር ፡ 17 ወርእየ ፡ እስራኤል ፡ ከመ ፡ እመ ፡ ኢፈነዎ ፡ ምስሌሆሙ ፡ ይትሐጐሉ ፡ ኵሎሙ ፡ እምቅድመ ፡ ዐባር ። 18 ወይቤ ፡ ሮቤል ፡ ሀበንዮ ፡ ውስተ ፡ እዴየ ፡ ወለእመ ፡ ኢያግባእክዎ ፡ ለከ ፡ ቅትል ፡ ክልኤተ ፡ ውሉድየ ፡ ህየንተ ፡ ነፍሰ ፡ ዚአሁ ። ወይቤሎ ፡ ኢየሐውር ፡ ምስሌከ ፡ 19 ወቀርበ ፡ ይሁዳ ፡ ወይቤ ፡ ፈንዎ ፡ ምስሌነ ፡ ወለእመ ፡ ኢያግባእክዎ ፡ ለከ ፡ እቡሰ ፡ እኩን ፡ በቅድሜከ ፡ ኵሎ ፡ መዋዕለ ፡ ሕይወትየ ። 20 ወፈነዎ ፡ ምስሌሆሙ ፡ በካልእ ፡ ዓመት ፡ ዘዝ ፡ ሱባዔ ፡ በሠርቀ ፡ ወርኅ ፡ ወበጽሑ ፡ ብሔረ ፡ ግብጽ ፡ ምስለ ፡ ኵሎሙ ፡ እለ ፡ የሐውሩ ፡ ወአምኃሆሙ ፡ ውስተ ፡ እደዊሆሙ ፡ ማየ ፡ ልብን ፡ ወከርካዕ ፡ ወጤሬቤንቶስ ፡ ወጸቃውዐ ፡ መዓር ። 21 ወበጽሑ ፡ ወቆሙ ፡ ቅድመ ፡ ዮሴፍ ፡ ወርእየ ፡ ብንያምሃ ፡ እኅዋሁ ፡ ወአእመሮ ፡ ወይቤሎሙ ፡ ዝኑ ፡ እኁክሙ ፡ ዘይንእስ ፡ ወይቤልዎ ፡ ውእቱ ። ወይቤ ፡ እግዚአብሔር ፡ ይሣሀልከ ፡ ወልድየ ፡ 22 ወፈነዎ ፡ ውስተ ፡ ቤቱ ፡ ወስምዖንሃኒ ፡ አውጽአ ፡ ሎሙ ። ወገብረ ፡ ሎሙ ፡ ምሳሐ ፡ ወአቅረቡ ፡ ሎቱ ፡ አመኃሁ ፡ ዘአምጽኡ ፡ በእደዊሆሙ ። 23 ወበልዑ ፡ በቅድሜሁ ፡ ወወሀቦሙ ፡ ክፍለ ፡ ለኵሎሙ ፡ ወበዝኀ ፡ መክፈልተ ፡ ብንያም ፡ እመክፈልተ ፡ ኵሎሙ ፡ ትስብዕተ ። 24 ወበልዑ ፡ ወሰትዩ ፡ ወተንሥኡ ፡ ወኀደሩ ፡ ኀበ ፡ አእዱጊሆሙ ። 25 ወኀለየ ፡ ዮሴፍ ፡ ኅሊና ፡ በዘ ፡ ያአምር ፡ ኅሊናሆሙ ፡ እመቦ ፡ ኅሊና ፡ ሰላም ፡ በበይናቲሆሙ ። ወይቤሎ ፡ ለብእሲ ፡ ዘላዕለ ፡ ቤቱ ፡ ምላእ ፡ ሎሙ ፡ ኵሎ ፡ አሕስሊሆሙ ፡ እክለ ፡ ወወርቆሙኒ ፡ አግብእ ፡ ሎሙ ፡ ማእከለ ፡ መዋዲቶሙ ፡ ወኮራ ፡ በዘ ፡ እሰቲ ፡ ደይ ፡ ውስተ ፡ ዘይንእስ ፡ ብሩር ፡ ወፈንዎሙ ።