መጽሐፈ ኩፋሌ 36

36 1 ወበሳድስ ፡ ዓመት ፡ ዘዝ ፡ ሱበዔ ፡ ጸውዐ ፡ ይስሐቅ ፡ ክልዔሆሙ ፡ ውሉዶ ፡ ዔሳውሃ ፡ ወያዕቆብሃ ፡ ወመጽኡ ፡ ኀቤሁ ፡ ወይቤሎሙ ፡ አነ ፡ ደቂቅየ ፡ አሐውር ፡ ውስተ ፡ ፍኖተ ፡ አበዊየ ፡ ውስተ ፡ ቤት ፡ ዘለዓለም ፡ ኀበ ፡ ሀለዉ ፡ ህየ ፡ አበዊየ ። 2 ወቅብሩኒ ፡ ቅሩበ ፡ አብርሃም ፡ አቡየ ፡ ውስተ ፡ በአት ፡ ዘካዕበት ፡ ውስተ ፡ ገራህተ ፡ ኤፍሮን ፡ ኬጣዊ ፡ ዘአጥረየ ፡ አብርሃም ፡ ለዝኅረ ፡ መቃብር ፡ ህየ ፡ ውስተ ፡ መቃብር ፡ ዘከረይኩ ፡ ለርእስየ ፡ ህየ ፡ ቅብሩኒ ። 3 ወዘንተ ፡ እኤዝዘክሙ ፡ ውሉድየ ፡ ከመ ፡ ትግበሩ ፡ ጽድቀ ፡ ወርትዐ ፡ በዲበ ፡ ምድር ፡ ከመ ፡ ያምጽእ ፡ እግዚአብሔር ፡ ላዕሌክሙ ፡ ኵሎ ፡ ዘመጠነ ፡ ነገሮ ፡ እግዚአብሔር ፡ ይግበር ፡ ለአብርሃም ፡ ወለዘርኡ ። 4 ወኩኑ ፡ ውሉድየ ፡ በበይናቲክሙ ፡ እንዘ ፡ ታፈቅሩ ፡ አኀዊክሙ ፡ ከመ ፡ ብእሲ ፡ ዘያፈቅር ፡ ነፍሶ ፡ ወእንዘ ፡ የኀሥሥ ፡ ብእሲ ፡ ለእኁሁ ፡ በዘያሤኒ ፡ ሎቱ ፡ ወበገቢር ፡ ኅቡረ ፡ በዲበ ፡ ምድር ፡ ወይትፋቀሩ ፡ በበይናቲሆሙ ፡ ከመ ፡ ነፍሶሙ ። 5 ወበእንተ ፡ ነገረ ፡ ጣዖት ፡ አነ ፡ እጌሥጸክሙ ፡ ከመ ፡ ትመንንዎሙ ፡ ወትፃረርዎሙ ፡ ወከመ ፡ ኢታፍቅርዎሙ ፡ እስመ ፡ ስሕተት ፡ ምሉኣን ፡ እሙንቱ ፡ ለእለ ፡ ያመልክዎሙ ፡ ወለእለ ፡ ይሰግዱ ፡ ሎሙ ። 6 ተዘከርዎ ፡ ውሉድየ ፡ ለእግዚአብሔር ፡ ለአምላከ ፡ አብርሃም ፡ አቡክሙ ፡ ወእምዝ ፡ አነኒ ፡ አምለክዎ ፡ ወተቀነይኩ ፡ ሎቱ ፡ ዘበ ፡ ጽድቅ ፡ ወበስፉሕ ፡ ከመ ፡ ያብዝኅክሙ ፡ ወያልህቅ ፡ ዘርእክሙ ፡ ከመ ፡ ከዋክብተ ፡ ሰማይ ፡ ለብዝኅ ፡ ወይትክልክሙ ፡ ውስተ ፡ ምድር ፡ ተክለ ፡ ጽድቅ ፡ ዘኢይሤረው ፡ ለኵሉ ፡ ትውልድ ፡ ዘለዓለም ። 7 ወይእዜኒ ፡ አነ ፡ አምሕለክሙ ፡ በመሐላ ፡ ዐቢይ ፡ እስመ ፡ አልቦ ፡ መሐላ ፡ ዘእምኔሁ ፡ የዐቢ ፡ በስም ፡ ስቡሕ ፡ ወክቡር ፡ ወዐቢይ ፡ ስሩሕ ፡ ወመንክር ፡ ወኀያል ፡ ወዐቢይ ፡ ዘገብረ ፡ ሰማያተ ፡ ወምድረ ፡ ወኵሎ ፡ ኅቡረ ። ከመ ፡ ትኩኑ ፡ እለ ፡ ትፈርህዎ ፡ ወእለ ፡ ታመልክዎ ፡ 8 ወእንዘ ፡ ያፈቅር ፡ አሐዱ ፡ አሐዱ ፡ እኅዋሁ ፡ በምሕረት ፡ ወበጽድቅ ፡ ወኢይፍቅድ ፡ ብእሲ ፡ እኩየ ፡ ለእኁሁ ፡ እምይእዜ ፡ ወእስከ ፡ ለዓለም ፡ ኵሎ ፡ መዋዕለ ፡ ሕይወትክሙ ፡ ከመ ፡ ትስርሑ ፡ በኵሉ ፡ ምግባሪክሙ ፡ ወኢትትሐጐሉ ። 9 ወእመቦ ፡ ዘኀሠሠ ፡ እምኔክሙ ፡ እኩየ ፡ ለእኁሁ ፡ አእምሩ ፡ እምይእዜ ፡ ከመ ፡ ኵሉ ፡ ዘየኀሥሥ ፡ እኩየ ፡ ለእኁሁ ፡ ውስተ ፡ እዴሁ ፡ ይወድቅ ፡ ወይሤሮ ፡ እምድረ ፡ ሕያዋን ፡ ወዘርኡሂ ፡ ይትሐጐል ፡ እምታሕተ ፡ ሰማይ ። 10 ወአመ ፡ ዕለተ ፡ ሀከክ ፡ ወመርገም ፡ ወመዓት ፡ ወቍጥዓ ፡ ወበእሳት ፡ በላዒ ፡ በከመ ፡ አውዐየ ፡ ሰዶምሃ ፡ ከማሁ ፡ ያውዒ ፡ ምድሮ ፡ ወሀገሮ ፡ ወኵሎ ፡ ዘይከውን ፡ ዚአሁ ። ወይደመሰስ ፡ እመጽሐፈ ፡ ተግሣጸ ፡ ሰብእ ፡ ወኢየዐርግ ፡ ውስተ ፡ መጽሐፈ ፡ ሕይወት ፡ እስመ ፡ ውስተ ፡ ዘይትሐጐል ፡ ወየኀልፍ ፡ ለመርገም ፡ ዘለዓለም ። ከመ ፡ ለኵሉ ፡ መዋዕል ፡ ይኩን ፡ ደይኖሙ ፡ እንዘ ፡ ትትሔደስ ፡ በጽእለት ፡ ወመርገም ፡ ወበመዓት ፡ ወበፃዕር ፡ ወበቍጥዓ ፡ ወበመቅሠፍት ፡ ወበደዌ ፡ ዘለዓለም ። 11 አነ ፡ እነግር ፡ ወአሰምዕ ፡ ላዕሌክሙ ፡ ውሉድየ ፡ በከመ ፡ ኵነኔ ፡ ዘይመጽእ ፡ ዲበ ፡ ብእሲ ፡ ዘይፈቅድ ፡ ይግበር ፡ ሕሡመ ፡ ላዕለ ፡ እኁሁ ። 12 ወከፈለ ፡ ኵሎ ፡ ዘቦ ፡ ጥሪቶ ፡ ለክልኤሆሙ ፡ በይእቲ ፡ ዕለት ፡ ወወሀበ ፡ ዕበየ ፡ ለብእሲ ፡ ዘውእቱ ፡ ቀደመ ፡ ተወልዶ ፡ ወማኅፈደ ፡ ኵሎ ፡ ዘአውዳ ። ወኵሎ ፡ ዘአጥረየ ፡ አብርሃም ፡ በኀበ ፡ ዐዘቅተ ፡ መሐላ ፡ 13 ወይቤ ፡ ዛተ ፡ አዐቢ ፡ ዕበየ ፡ ለብእሲ ፡ ዘውእቱ ፡ ቀደመ ፡ ተወልዶ ። 14 ወይቤ ፡ ዔሳው ፡ ሤጥኩ ፡ ሎቱ ፡ ለያዕቆብ ፡ ወወሀብኩ ፡ ልህቃንየ ፡ ለያዕቆብ ፡ ይትወሀብ ፡ ሎቱ ፡ ወአልብየ ፡ ዘእብል ፡ በእንቲአሃ ፡ ምንተኒ ፡ ቃለ ፡ እስመ ፡ ኀቤሁ ፡ ሀለወት ። 15 ወይቤ ፡ ይስሐቅ ፡ ታዕርፍ ፡ ዲቤክሙ ፡ ውሉድየ ፡ በረከት ፡ ወላዕለ ፡ ዘርእክሙ ፡ በዛቲ ፡ ዕለት ፡ እስመ ፡ አዕረፍክሙኒ ፡ ወኢሐዘነ ፡ ልብየ ፡ በእንተ ፡ ልህቃን ፡ ከመ ፡ ኢትግበር ፡ በእንቲአሃ ፡ ፁገ ፡ 16 ይባርኮ ፡ እግዚአብሔር ፡ ልዑል ፡ ለብእሲ ፡ ዘይገብር ፡ ጽድቀ ፡ ኪያሁ ፡ ወዘርኡ ፡ እስከ ፡ ለዓለም ። 17 ወፈጸመ ፡ እንዘ ፡ ይኤዝዞሙ ፡ ወእንዘ ፡ ይባርኮሙ ፡ ወበልዑ ፡ ወሰትዩ ፡ በቅድሜሁ ፡ ኅቡረ ፡ ወተፈሥሐ ፡ እስመ ፡ ኮነ ፡ ዐርዮ ፡ በማእከሎሙ ፡ ወወፅኡ ፡ እምኀቤሁ ፡ ወአዕረፉ ፡ ይእተ ፡ ዕለተ ፡ ወኖሙ ። 18 ወኖመ ፡ ይስሐቅ ፡ ውስተ ፡ ዐራቱ ፡ በዛቲ ፡ ዕለት ፡ እንዘ ፡ ይትፌሣሕ ፡ ወኖመ ፡ ንዋመ ፡ ዘለዓለም ። ወሞተ ፡ ወልደ ፡ ምእት ፡ ወሰማንያ ፡ ዓመት ፡ ዕሥራ ፡ ወኀምስ ፡ ሱባዔ ፡ ፈጸመ ፡ ወኀምስተ ፡ ዓመተ ። ወቀበርዎ ፡ ክልኤሆሙ ፡ ውሉዱ ፡ ዔሳው ፡ ወያዕቆብ ። 19 ወሖረ ፡ ዔሳው ፡ ውስተ ፡ ምድረ ፡ ኤዶም ፡ ውስተ ፡ ደብረ ፡ ሲር ፡ ወነበረ ፡ ህየ ። 20 ወያዕቆብ ፡ ኀደረ ፡ ውስተ ፡ ደብረ ፡ ኬብሮን ፡ ውስተ ፡ ማኅፈድ ፡ ዘምድረ ፡ ፍልሰተ ፡ አቡሁ ፡ አብርሃም ። ወአምለኮ ፡ ለእግዚአብሔር ፡ በኵሉ ፡ ልቡ ፡ ወበከመ ፡ ትእዛዛት ፡ ዘያስተርኢ ፡ በከመ ፡ ፈለጠ ፡ ዘመዋዕለ ፡ ልደቱ ። 21 ወሞተት ፡ ልያ ፡ ብእሲቱ ፡ በዓመት ፡ ራብዕ ፡ ዘሱባዔ ፡ ካልእ ፡ ዘአርብዓ ፡ ወኃምስ ፡ ኢዮቤልዉ ፡ ወቀበራ ፡ ውስተ ፡ በአት ፡ ዘእንተ ፡ ክልኤ ፡ ቅሩበ ፡ ርብቃ ፡ እሙ ፡ በፀጋሙ ፡ ለመቃብረ ፡ ሳራ ፡ እመ ፡ አቡሁ ፡ 22 ወመጽኡ ፡ ኵሎሙ ፡ ውሉዳ ፡ ወውሉዱ ፡ ከመ ፡ ይብክይዋ ፡ ልያሃ ፡ ብእሲቶ ፡ ምስሌሁ ፡ ወከመ ፡ ይናዝዝዎ ፡ በእንቲአሃ ፡ እስመ ፡ ሀሎ ፡ ይላሕዋ ፡ 23 እስመ ፡ ያፈቅራ ፡ ፈድፋደ ፡ ጥቀ ፡ እምአመ ፡ ሞተት ፡ ራሔል ፡ እኅታ ፡ እስመ ፡ ፍጽምት ፡ ወራትዕት ፡ ይእቲ ፡ በኵሉ ፡ ፍናዊሃ ፡ ወታከብሮ ፡ ለያዕቆብ ። ወበኵሉ ፡ መዋዕል ፡ ዘሐይወት ፡ ምስሌሁ ፡ ኢሰምዐ ፡ እምአፉሃ ፡ ቃለ ፡ ድሩከ ፡ እስመ ፡ የዋሂት ፡ ወሰላመ ፡ ወርትዐ ፡ ወክብረ ፡ ባቲ ፡ 24 ወይዜከር ፡ ኵሎ ፡ ምግባራቲሃ ፡ ዘገብረት ፡ በሕይወታ ፡ ወይላሕዋ ፡ ጥቀ ፡ እስመ ፡ ያፈቅራ ፡ በኵሉ ፡ ልቡ ፡ ወበኵሉ ፡ ነፍሱ ።