መጽሐፈ ኩፋሌ 34

34 1 ወበሳድስ ፡ ዓመቱ ፡ ለዝ ፡ ሱባዔ ፡ እምዝንቱ ፡ ዘአርብዓ ፡ ወአርባዕቱ ፡ ኢዮቤልዉ ። ፈነዎሙ ፡ ያዕቆብ ፡ ለውሉዱ ፡ ይርዐዩ ፡ አባግዒሆሙ ፡ ወአግብርቲሁኒ ፡ ምስሌሆሙ ፡ ውስተ ፡ ጺኦተ ፡ ሰቂሞን ። 2 ወተጋብኡ ፡ ላዕሌሆሙ ፡ ሰብዐቲሆሙ ፡ ነገሥተ ፡ አሞሬዎን ፡ ከመ ፡ ይቅትልዎሙ ፡ ተኀቢኦሙ ፡ ታሕተ ፡ ኦም ፡ ወከመ ፡ ይማህርኩ ፡ እንስሳሆሙ ። 3 ወያዕቆብ ፡ ወሌዊ ፡ ወይሁዳ ፡ ወዮሴፍ ፡ ሀለዉ ፡ ውስተ ፡ ቤት ፡ ኀበ ፡ ይስሐቅ ፡ አቡሆሙ ፡ እስመ ፡ የሐዝኖ ፡ መንፈሱ ፡ ወስእኑ ፡ ኀዲጎቶ ፡ ወብንያም ፡ ውእቱ ፡ ዘይንእስ ፡ ወበእንተዝ ፡ ነበረ ፡ ኀቤሁ ። 4 ወመጽኡ ፡ ነገሥተ ፡ ታፉ ፡ ወነገሥተ ፡ አሬስ ፡ ወነገሥተ ፡ ሴራጋን ፡ ወነገሥተ ፡ ሴሎ ፡ ወንጉሥ ፡ ጋአዝ ፡ ወንጉሠ ፡ ቤቶሮን ፡ ወንጉሠ ፡ ማአኒሳኪር ፡ ወኵሎሙ ፡ እለ ፡ ይነብሩ ፡ ውስተዝ ፡ ደብር ፡ እለ ፡ ይነብሩ ፡ ውስተ ፡ ኦመ ፡ ምድረ ፡ ከናአን ። 5 ወዜነውዎ ፡ ለያዕቆብ ፡ እንዘ ፡ ይብሉ ፡ ከመ ፡ ናሁ ፡ ነገሥቶ ፡ አሞሬዎን ፡ ዐገትዎሙ ፡ ለውሉድከ ፡ ወመራዕዮሙሂ ፡ ተማሠጡ ። 6 ወተንሥአ ፡ እምነ ፡ ቤቱ ፡ ውእቱ ፡ ወሠለስቲሆሙ ፡ ውሉዱ ፡ ወኵሎሙ ፡ ደቀ ፡ አቡሁ ፡ ወደቁ ፡ ወሖረ ፡ ላዕሌሆሙ ፡ በስሳ ፡ ምእት ፡ ዕድ ፡ እለ ፡ ይጸውሩ ፡ አስይፍተ ፡ 7 ወቀተሎሙ ፡ በውስተ ፡ ጺኦት ፡ ዘሰቂሞን ፡ ወዴገኑ ፡ እለ ፡ ጐዩ ፡ ወቀተሎሙ ፡ በአፈ ፡ ሰይፍ ። ወቀተሎ ፡ ለአሬስ ፡ ወለታፉ ፡ ወለሰሬጋን ፡ ወለሲሎ ፡ ወለአማኒሰኪር ፡ ወለጋጋአስ ፡ 8 ወአስተጋብአ ፡ መራዕዪሁ ። ወዐብየ ፡ ላዕሌሆሙ ፡ ወሠርዐ ፡ ጸባሕተ ፡ ላዕሌሆሙ ፡ ከመ ፡ የሀብዎ ፡ ጸባሕተ ፡ ኃምስተ ፡ ፍሬ ፡ ምድሮሙ ። ወሐነጸ ፡ ሮቤልሃ ፡ ወተምናታሬስሃ ፡ 9 ወተመይጠ ፡ በሰላም ። ወገብረ ፡ ምስሌሆሙ ፡ ሰላመ ፡ ወኮንዎ ፡ አግብርተ ፡ እስከ ፡ አመ ፡ ዕለተ ፡ ወረዱ ፡ ውእቱ ፡ ወውሉዱ ፡ ውስተ ፡ ግብጽ ። 10 ወበሳብዕ ፡ ዓመት ፡ ዘዝ ፡ ሱባዔ ፡ ፈነወ ፡ ዮሴፍሃ ። ከመ ፡ ያእምር ፡ ሰላሞሙ ፡ ለአኀዊሁ ፡ እምቤቱ ፡ ውስተ ፡ ምድረ ፡ ሰቂሞን ፡ ወረከቦሙ ፡ በምድረ ፡ ዶታኢም ። 11 ወሐብለይዎ ፡ ወገብሩ ፡ ላዕሌሁ ፡ ምክረ ፡ ከመ ፡ ይቅትልዎ ። ወተመይጦሙ ፡ ሤጥዎ ፡ ለነጋዲተ ፡ እስማኤላዊያን ፡ ወአውረድዎ ፡ ግብጽ ፡ ወሤጥዎ ፡ ለፉጢፋራን ፡ ለኅፅወ ፡ ፈርዖን ፡ ሊቀ ፡ መብስላን ፡ ሣውዕ ፡ ዘሀገረ ፡ ኤሌው ። 12 ወውሉደ ፡ ያዕቆብ ፡ ዘብሑ ፡ ደቤላ ፡ ጠሊ ፡ ወጸንቀቁ ፡ ልብሶ ፡ ለዮሴፍ ፡ በደሙ ፡ ወፈነዉ ፡ ኀበ ፡ ያዕቆብ ፡ አቡሆሙ ፡ አመ ፡ ዐሡሩ ፡ ለወርኅ ፡ ሳብዕ ። 13 ወለሐወ ፡ ኵላ ፡ ይእተ ፡ ሌሊተ ፡ እስመ ፡ ሰርከ ፡ አምጽኡ ፡ ሎቱ ፡ ኪያሁ ፡ ወፈፀነ ፡ በላሐ ፡ ሞቱ ፡ ወይቤ ፡ ከመ ፡ አርዌ ፡ ፀዋግ ፡ በልዖ ፡ ለዮሴፍ ፡ ወላሐዉ ፡ ምስሌሁ ፡ ኵሉ ፡ ሰብአ ፡ ቤቱ ፡ በዛቲ ፡ ዕለት ፡ ወሀለዉ ፡ እንዘ ፡ የሐምሙ ፡ ወይላሕዉ ፡ ምስሌሁ ፡ ኵላ ፡ ይእተ ፡ ዕለተ ። 14 ወተንሥኡ ፡ ውሉዱ ፡ ወወለቱ ፡ ከመ ፡ ይናዝዝዎ ፡ ወኢተናዘዘ ፡ በእንተ ፡ ወልዱ ። 15 ወበውእቱ ፡ ዕለት ፡ ሰምዐት ፡ ባላን ፡ ከመ ፡ ተሐጕለ ፡ ዮሴፍ ፡ ወእንዘ ፡ ትላሕዎ ፡ ሞተት ፡ ወይእቲ ፡ ሀለወት ፡ ትነብር ፡ ውስተ ፡ ቀፍራቴፋ ፡ ወዲናኒ ፡ ወለቱ ፡ ሞተት ፡ እምድኅረ ፡ ተሐጕለ ፡ ዮሴፍ ፡ ወበጽሖሙ ፡ ለእስራኤል ፡ ዝንቱ ፡ ሠለስቱ ፡ ላሕ ፡ በወርኅ ፡ አሐዱ ፡ 16 ወቀበርዋ ፡ ለባላን ፡ አንጸረ ፡ መቃብራ ፡ ለራሔል ፡ ወዲናሃኒ ፡ ወለቶ ፡ ቀበሩ ፡ ህየ ። 17 ወሀሎ ፡ እንዘ ፡ ይላሑ ፡ ድኅሬሁ ፡ ለዮሴፍ ፡ ዓመተ ፡ አሐደ ፡ ወኢነገፈ ፡ እስመ ፡ ይቤ ፡ እረድ ፡ ውስተ ፡ መቃብር ፡ እንዘ ፡ እላሑ ፡ በእንተ ፡ ወልድየ ። 18 በእንተዝ ፡ ተሠርዐ ፡ ዲበ ፡ ውሉደ ፡ እስራኤል ፡ ከመ ፡ ይሕመሙ ፡ በዐሡር ፡ ወርኅ ፡ በሳብዕ ፡ አመ ፡ ዕለተ ፡ በጽሐ ፡ ዘያበኪ ፡ ዮሴፍሃ ፡ ኀበ ፡ ያዕቆብ ፡ አቡሁ ፡ ከመ ፡ ያስተስሪ ፡ ባቲ ፡ ሎቱ ፡ በእጕለ ፡ አጣሊ ። አመ ፡ ዐሡሩ ፡ ለወርኅ ፡ ሳብዕ ፡ ምዕረ ፡ ለዓመት ፡ በእንተ ፡ ኀጢአቶሙ ፡ እስመ ፡ አሕዘኑ ፡ ምሕረተ ፡ አቡሆሙ ፡ በእንተ ፡ ዮሴፍ ፡ ወልዱ ። 19 ወተሠርዐት ፡ ዛቲ ፡ ዕለት ፡ ከመ ፡ ይሕዘኑ ፡ ባቲ ፡ በእንተ ፡ ኀጢአቶሙ ፡ ወበእንተ ፡ ኵሉ ፡ አበሳሆሙ ፡ ወበእንተ ፡ ኵሉ ፡ ስሕተቶሙ ፡ ከመ ፡ ያንጽሑ ፡ ርእሶሙ ፡ በዛቲ ፡ ዕለት ፡ ምዕረ ፡ ለዓመት ። 20 ወእምድኅረ ፡ ተሐጕለ ፡ ዮሴፍ ፡ ነሥኡ ፡ ለርእሶሙ ፡ ውሉደ ፡ ያዕቆብ ፡ አንስቲያ ። ስማ ፡ ለብእሲተ ፡ ሮቤል ፡ ኦዳ ። ወስማ ፡ ለብእሲተ ፡ ስምዖን ፡ አዴባአ ፡ ከነናዊት ። ወስማ ፡ ለብእሲተ ፡ ሌዊ ፡ ሜልካ ፡ እምአዋልደ ፡ አራም ፡ እምዘርአ ፡ ውሉደ ፡ ታራን ። ወስማ ፡ ለብእሲተ ፡ ይሁዳ ፡ ቤተሱኤል ፡ ከነናዊት ። ወስማ ፡ ለብእሲተ ፡ ይሳኮር ፡ ሔዘቃ ። ወስማ ፡ ለብእሲተ ፡ ዛብሎን ። [ኔኤማን ፡ ?] ፡ ወስማ ፡ ለብእሲተ ፡ ዳን ፡ ኤግላ ፡ ወስማ ፡ ለብእሲተ ፡ ንፍታሌም ፡ ራሱኡ ፡ እንተ ፡ መስጴጦምያ ። ወስማ ፡ ለብእሲተ ፡ ጋድ ፡ ማከ ። ወስማ ፡ ለብእሲተ ፡ አሴር ፡ ኢዮና ። ወስማ ፡ ለብእሲተ ፡ ዮሴፍ ፡ አስኔት ፡ ግብጻዊት ። ወስማ ፡ ለብእሲተ ፡ ብንያም ፡ ኢያስከ ፡ 21 ወተመይጦ ፡ ስምዖን ፡ ነሥአ ፡ ብእሲተ ፡ እምነ ፡ መስጴጦምያ ፡ ካልእተ ፡ ከመ ፡ አኀዊሁ ።