መጽሐፈ ኩፋሌ 3

3 1 ወበሰዱስ ፡ መዋዕል ፡ ዘሰንበት ፡ ካልእ ፡ አምጻእነ ፡ በቃለ ፡ እግዚአብሔር ፡ ኀበ ፡ አዳም ፡ ኵሎ ፡ አራዊተ ፡ ወኵሎ ፡ እንስሳ ፡ ወኵሎ ፡ አዕዋፈ ፡ ወኵሎ ፡ ዘይትሐወስ ፡ ውስተ ፡ ምድር ። ወኵሎ ፡ ዘይትሐወስ ፡ ውስተ ፡ ማይ ፡ በበ ፡ ዘመዶሙ ፡ ወበበ ፡ አምሳሎሙ ፡ ወአራዊተ ፡ በቀዳሚት ፡ ዕለት ፡ ወእንስሳ ፡ በሳኒታ ፡ ዕለት ፡ ወአዕዋፈ ፡ በዕለተ ፡ ሣልስት ፡ ወኵሎ ፡ ዘይትሐወስ ፡ ዲበ ፡ ምድር ፡ በዕለተ ፡ ራብዕት ። ወዘይትሐወስ ፡ ውስተ ፡ ማይ ፡ በዕለተ ፡ ኃምስት ፡ 2 ወሰመዮሙ ፡ አዳም ፡ ለኵሎሙ ፡ በበ ፡ አስማቲሆሙ ፡ ወበከመ ፡ ጸውዖሙ ፡ ከማሁ ፡ ኮነ ፡ ስሞሙ ። 3 ወበኃምስ ፡ እላ ፡ መዋዕል ፡ ሀለወ ፡ አዳም ፡ እንዘ ፡ ይሬኢ ፡ ዘንተ ፡ ኵሎ ፡ ተባዕተ ፡ ወአንስተ ፡ በኵሉ ፡ ዘመድ ፡ ዘበምድር ፡ ወውእቱሰ ፡ ሀሎ ፡ ባሕቲቱ ፡ ወአልቦ ፡ ዘረከበ ፡ ሎቱ ፡ ዘይረድኦ ፡ ዘከማሁ ። 4 ወይቤለነ ፡ እግዚአብሔር ፡ ለነ ፡ አኮ ፡ ሠናይ ፡ የሀሉ ፡ ብእሲ ፡ ባሕቲቱ ፡ ንግበር ፡ ሎቱ ፡ መርድአ ፡ ዘከማሁ ፡ 5 ወወደየ ፡ እግዚአብሔር ፡ አምላክነ ፡ ሕድመተ ፡ ላዕሌሁ ፡ ወኖመ ። ወነሥአ ፡ ለብእሲት ፡ እማእከለ ፡ አዕጽምቲሁ ፡ ዐጽመ ፡ አሐደ ፡ ወይእቲ ፡ ገቦ ፡ ፍጥረታ ፡ ለብእሲት ፡ እማእከለ ፡ አዕጽምቲሁ ፡ ወሐነጸ ፡ ሥጋ ፡ ህየንቴሃ ። ወሐነጸ ፡ ብእሲተ ፡ 6 ወአንቅሆ ፡ ለአዳም ፡ እምንዋሙ ። ወነቂሆ ፡ ተንሥአ ፡ በዕለተ ፡ ሳድስት ፡ ወአምጽአ ፡ ኀቤሃ ፡ ወአእመራ ፡ ወይቤላ ፡ ዝንቱ ፡ ይእዜ ፡ ዐጽም ፡ እምዐጽምየ ፡ ወሥጋ ፡ እምሥጋየ ፡ ዛቲ ፡ ትሰመይ ፡ ብእሲትየ ፡ እስመ ፡ እምነ ፡ ብእሲሃ ፡ ተንሥአት ፡ 7 በእንተዝ ፡ ይኩን ፡ ብእሲ ፡ ወብእሲት ፡ አሐደ ፡ ወበእንተዝ ፡ የኀድግ ፡ አባሁ ፡ ወእሞ ፡ ወይፃመር ፡ ምስለ ፡ ብእሲቱ ፡ ወይከውኑ ፡ ሥጋ ፡ አሐደ ። 8 በሳብዕት ፡ ቀዳሚት ፡ አዳም ፡ ወገቦ ፡ ብእሲቱ ፡ ወበሳብዕት ፡ ካልእት ፡ አርአዮ ፡ ኪያሃ ፡ ሎቱ ። ወበእንተ ፡ ዝንቱ ፡ ተውህበ ፡ ትእዛዝ ፡ ለዐቂበ ፡ ሰቡዕ ፡ መዋዕል ፡ ለተባዕት ፡ ወለአንስት ፡ ክልኤ ፡ ሰቡዕ ፡ መዋዕል ፡ ውስተ ፡ ርኵሶን ። 9 ወእምድኅረ ፡ ተፈጸመ ፡ ለአዳም ፡ አርብዓ ፡ መዋዕል ፡ በምድር ፡ ኀበ ፡ ተፈጥረ ፡ አባእናሁ ፡ ውስተ ፡ ገነተ ፡ ኤዶም ፡ ከመ ፡ ይትቀነይ ፡ ወይዕቀባ ። ወብእሲቶኒ ፡ አብኡ ፡ በሰማንያ ፡ መዋዕል ፡ እምድኅረ ፡ ዝንቱ ፡ ቦአት ፡ ውስተ ፡ ገነተ ፡ ኤዶም ። 10 በእንተ ፡ ዝንቱ ፡ ተጽሕፈ ፡ ትእዛዝ ፡ ውስተ ፡ ጽላተ ፡ ሰማይ ፡ ለእንተ ፡ ትወልድ ፡ ለእመ ፡ ተባዕተ ፡ ወለደት ፡ ሰቡዐ ፡ መዋዕለ ፡ ትንበር ፡ ውስተ ፡ ርኵሳ ፡ በከመ ፡ ሰቡዕ ፡ መዋዕል ፡ ቀዳሚት ፡ ወሠላሳ ፡ መዋዕለ ፡ ወሠሉሰ ፡ ዕለተ ፡ ትንበር ፡ ውስተ ፡ ደመ ፡ ንጽሕ ፡ ወኵሎ ፡ ቅዱሰ ፡ ኢትግሥሥ ፡ ወውስተ ፡ መቅደስ ፡ ኢትባእ ፡ እስከ ፡ አመ ፡ ትፌጽም ፡ ዘንተ ፡ መዋዕለ ፡ ዘበተባዕት ። 11 ወዘበአንስት ፡ ክልኤ ፡ ሰቡዓተ ፡ መዋዕለ ፡ በከመ ፡ ክልኤ ፡ ሰቡዓት ፡ ቀዳሚያት ፡ በርኵሳ ፡ ወስሳ ፡ መዋዕለ ፡ ወሰዱሰ ፡ ዕለተ ፡ ትንበር ፡ በደመ ፡ ንጽሕ ፡ ወይከውና ፡ ኵሎን ፡ ሰማንያ ፡ መዋዕለ ። 12 ወፈጺማ ፡ እላንተ ፡ ሰማንያ ፡ መዋዕለ ፡ አባእናሃ ፡ ውስተ ፡ ገነተ ፡ ኤዶም ፡ እስመ ፡ ቅድስት ፡ ይእቲ ፡ ውስተ ፡ ኵሉ ፡ ምድር ፡ ወኵሉ ፡ ዕፅ ፡ ዘትኩል ፡ ውስቴታ ፡ ቅዱስ ። 13 በእንተዝ ፡ ተሠርዐ ፡ ለእንተ ፡ ትወልድ ፡ ለተባዕት ፡ ወለእንስት ፡ ፍትሖን ፡ ለእላንቱ ፡ መዋዕል ፡ ኵሎ ፡ ቅዱሰ ፡ ኢትልክፍ ፡ ወውስተ ፡ መቅደስ ፡ ኢትባእ ፡ እስከ ፡ አመ ፡ ይትፌጸማ ፡ እላንቱ ፡ መዋዕል ፡ ለተባዕት ፡ ወለእንስት ። 14 ዝንቱ ፡ ሕግ ፡ ወሰምዕ ፡ ዘተጽሕፈ ፡ ለእስራኤል ፡ ይዕቀቡ ፡ ኵሎ ፡ መዋዕለ ። 15 ወበሱባዔ ፡ ቀዳማዊ ፡ ዘኢዮቤልዉ ፡ ቀዳሚ ፡ ወለወ ፡ አዳም ፡ ወብእሲቱ ፡ ሰብዓተ ፡ ዓመተ ፡ ውስተ ፡ ገነተ ፡ ኤዶም ፡ እንዘ ፡ ይትቀነይ ፡ ወየዐቅባ ፡ ወምግባረ ፡ ወሀብናሁ ፡ ወሀሎነ ፡ እንዘ ፡ ንሜህሮ ፡ ገቢሮቶ ፡ ኵሎ ፡ ዘያስተርኢ ፡ ለቅኔ ። 16 ወሀሎ ፡ እንዘ ፡ ይትቀነይ ፡ ወውእቱሰ ፡ ዕራቁ ፡ ወኢያአምር ፡ ወኢየኀፍር ፡ ወየዐቅብ ፡ ገነተ ፡ እምአዕዋፍ ፡ ወእምአራዊት ፡ ወእምእንስሳ ፡ ወያስተጋብእ ፡ ፍሬሁ ፡ ወይበልዕ ፡ ወያነብር ፡ ትራፎ ፡ ሎቱ ፡ ወለብእሲቱ ፡ ወያነብር ፡ ዘይትዐቀብ ። 17 ወኀሊቆ ፡ ፍጻሜሁ ፡ ለሰብዓቱ ፡ ዓመት ፡ እለ ፡ ፈጸመ ፡ በህየ ፡ ሰብዓተ ፡ ዓመተ ፡ ጥንቁቀ ። ወበካልእ ፡ ወርኅ ፡ አመ ፡ ዐሡሩ ፡ ወሰቡዑ ፡ መጽአ ፡ አርዌ ፡ ምድር ፡ ወቀርበ ፡ ኀበ ፡ ብእሲት ፡ ወይቤላ ፡ አርዌ ፡ ምድር ፡ ለብእሲት ፡ እምኵሉ ፡ ፍሬ ፡ ዕፀው ፡ ዘውስተ ፡ ገነት ፡ አዘዘክሙ ፡ እግዚአብሔር ፡ እንዘ ፡ ይብል ፡ ኢትብልዑ ፡ እምኔሁ ። 18 ወትቤሎ ፡ እምኵሉ ፡ ፍሬ ፡ ዕፅ ፡ ዘውስተ ፡ ገነት ፡ ይቤለነ ፡ እግዚአብሔር ፡ ብልዑ ። ወእምነ ፡ ፍሬ ፡ ዕፅ ፡ ዘማእከለ ፡ ገነት ፡ ይቤለነ ፡ ኢትብልዑ ፡ እመኔሁ ፡ ወኢትልክፍዎ ፡ ከመ ፡ ኢትሙቱ ። 19 ወይቤላ ፡ አርዌ ፡ ምድር ፡ ለብእሲት ፡ አኮ ፡ ሞተ ፡ ዘትመውቱ ፡ እስመ ፡ ያአምር ፡ እግዚአብሔር ፡ አመ ፡ ዕለተ ፡ ትበልዑ ፡ ይትረኀው ፡ አዕይንቲክሙ ፡ ወትከውኑ ፡ ከመ ፡ አማልክት ፡ ወታአምሩ ፡ ሠናየ ፡ ወእኩየ ። 20 ወርእየት ፡ ብእሲት ፡ ዕፀ ፡ ከመ ፡ አዳም ፡ ውእቱ ፡ ወያሠምር ፡ ለዐይን ፡ ወሠናይ ፡ ፍሬሁ ፡ ለበሊዕ ። ወነሥአት ፡ እምኔሁ ፡ ወበልዐት ፡ 21 ወከደነት ፡ ኀፍረታ ፡ በቈጽለ ፡ በለስ ፡ ዘቀዳሚ ። ወወሀበቶ ፡ ለአዳም ፡ ወበልዐ ፡ ወተርኅወ ፡ አዕይንቲሁ ፡ ወርእየ ፡ ከመ ፡ ዕራቁ ፡ ውእቱ ፡ 22 ወነሥአ ፡ ቈጽለ ፡ በለስ ፡ ወጠቀበ ፡ ወገብረ ፡ ሎቱ ፡ ሞራአ ፡ ወከደነ ፡ ኀፍረቶ ። 23 ወረገሞ ፡ እግዚአብሔር ፡ ለአርዌ ፡ ምድር ፡ ወተምዕዎ ፡ ለዓለም ። ወለብእሲትሂ ፡ ተምዕዓ ፡ እስመ ፡ ሰምዐት ፡ ቃለ ፡ አርዌ ፡ ምድር ፡ ወበልዐት ። ወይቤላ ፡ 24 አብዝኆ ፡ አበዝኅ ፡ ሐዘንኪ ፡ ወፀዕርኪ ፡ በሐዘን ፡ ለዲ ፡ ውሉደ ፡ ወኀበ ፡ ምትኪ ፡ ምግባኢኪ ፡ ወውእቱ ፡ ይኴንነኪ ። 25 ወለአዳምሂ ፡ ይቤሎ ፡ እስመ ፡ ሰማዕከ ፡ ለብእሲትከ ፡ ወበላዕከ ፡ እምውስተ ፡ ውእቱ ፡ ዕፅ ፡ ዘአዘዝኩከ ፡ ከመ ፡ ኢትብላዕ ፡ እምኔሁ ። ርግምተ ፡ ትኩን ፡ ምድር ፡ በእንቲአከ ፡ አስዋከ ፡ ወአሜከላ ፡ ይብቈልከ ፡ ወብላዕ ፡ ኅብስተከ ፡ በሃፈ ፡ ገጽከ ፡ እስከ ፡ አመ ፡ ትገብእ ፡ ውስተ ፡ ምድር ፡ እንተ ፡ እመኔሃ ፡ ተንሣእከ ፡ እስመ ፡ ምድር ፡ አንተ ፡ ወውስተ ፡ ምድር ፡ ትገብእ ። 26 ወገብረ ፡ ሎሙ ፡ አልባሰ ፡ ዘማእስ ፡ ወአልቦሶሙ ፡ ወፈነዎሙ ፡ እምገነተ ፡ ኤዶም ። 27 ወበይእቲ ፡ ዕለት ፡ እንዘ ፡ ይወፅእ ፡ እምገነተ ፡ ኤዶም ፡ ዐጠነ ፡ ለመዓዛ ፡ ሠናይ ፡ ዕጣነ ፡ ስሒነ ፡ ወቅንአተ ፡ ወማየ ፡ ልብን ፡ ወሰንበልተ ፡ በጽባሕ ፡ ምስለ ፡ ትንሣኤ ፡ ፀሐይ ፡ አመ ፡ ከደነ ፡ ኃፍረቶ ፡ 28 ወበይእቲ ፡ ዕለት ፡ ተፈጸመ ፡ አፈ ፡ ኵሉ ፡ አራዊተ ፡ ወዘእንስሳ ፡ ወዘአዕዋፍ ፡ ወዘያንሶሱ ፡ ወዘይትሐወስ ፡ እምነቢብ ፡ እስመ ፡ ኵሎሙ ፡ ይትናገሩ ፡ ዝንቱ ፡ ምስለ ፡ ዝንቱ ፡ ከንፈረ ፡ አሐደ ፡ ወልሳነ ፡ አሐደ ። 29 ወፈነወ ፡ እምገነተ ፡ ኤዶም ፡ ኵሎ ፡ ዘሥጋ ፡ ዘሀሎ ፡ ውስተ ፡ ነገተ ፡ ኤዶም ፡ ወተዘርዉ ፡ ኵሉ ፡ ዘሥጋ ፡ በበ ፡ ዘመዶሙ ፡ ወበበ ፡ ፍጥረቶሙ ፡ ውስተ ፡ መካን ፡ ዘተፈጥረ ፡ ሎሙ ። 30 ወለአዳም ፡ ባሕቲቱ ፡ ወሀቦ ፡ ይክድን ፡ ኃፍረቶ ፡ እምኵሉ ፡ አራዊት ፡ ወእንስሳ ። 31 በእንተዝ ፡ ተአዘዘ ፡ ውስተ ፡ ጽላት ፡ ላዕለ ፡ ኵሎሙ ፡ እለ ፡ ያአምሩ ፡ ፍትሐ ፡ ሕግ ፡ ይክድኑ ፡ ኀፍረቶሙ ፡ ወኢይትከሠቱ ፡ ከመ ፡ አሕዛብ ፡ ይትከሠቱ ። 32 ወአመ ፡ ሠርቀ ፡ ወርኅ ፡ ራብዕ ፡ ወፅኡ ፡ አዳም ፡ ወብእሲቱ ፡ እምገነተ ፡ ኤዶም ፡ ወኀደሩ ፡ ውስተ ፡ ምድረ ፡ ኤልዳ ፡ ውስተ ፡ ምድረ ፡ ፍጥረቶሙ ፡ 33 ወሰመየ ፡ አዳም ፡ ስመ ፡ ብእሲቱ ፡ ሔዋ ፡ 34 ወኢኮኑ ፡ ምስለ ፡ ወልድ ፡ እስከ ፡ ቀዳሚ ፡ ኢዮቤልዉ ። ወእምድኅረ ፡ ዝንቱ ፡ አእመራ ፡ 35 ወውእቱሰ ፡ ይትጌበራ ፡ ለምድር ፡ በከመ ፡ ተምህረ ፡ በገነተ ፡ ኤዶም ።