መጽሐፈ ኩፋሌ 23

23 1 ወአንበረ ፡ ክልኤሆን ፡ አጻብዐ ፡ ያዕቆብ ፡ ዲበ ፡ አዕይንቲሁ ፡ ወባረኮ ፡ ለአምላከ ፡ አማልክት ፡ ወከደነ ፡ ገጾ ፡ ወሰፍሐ ፡ እገሪሁ ፡ ወኖመ ፡ ንዋመ ፡ ዘለዓለም ። ወተጋብአ ፡ ኀበ ፡ አበዊሁ ። 2 ወበዝ ፡ ኵሉ ፡ ሀሎ ፡ ያዕቆብ ፡ ይሰክብ ፡ ውስተ ፡ ሕፅኑ ፡ ወኢያእመረ ፡ ከመ ፡ ሞተ ፡ አብርሃም ፡ አበ ፡ አቡሁ ። 3 ወነቅሀ ፡ ያዕቆብ ፡ እምንዋሙ ። ወናሁ ፡ ቈረ ፡ አብርሃም ፡ ከመ ፡ በረድ ። ወይቤ ፡ አባ ፡ አባ ፡ ወአልቦ ፡ ዘነበቦ ። ወአእመረ ፡ ከመ ፡ ሞተ ፡ 4 ወተንሥአ ፡ እምሕፅኑ ፡ ወሮጸ ፡ ወነገራ ፡ ለርብቃ ፡ እሙ ። ወሖረት ፡ ርብቃ ፡ ኀበ ፡ ይስሐቅ ፡ ሌሊተ ፡ ወነገረቶ ፡ ወሖሩ ፡ ኅቡረ ፡ ወያዕቆብ ፡ ምስሌሆሙ ፡ ወማኅቶት ፡ ውስተ ፡ እዴሁ ፡ ወሐዊሮሙ ፡ ረከብዎ ፡ ለአብርሃም ፡ እንዘ ፡ ይሰክብ ፡ በድኖ ፡ 5 ወወድቀ ፡ ይስሐቅ ፡ ውስተ ፡ ገጸ ፡ አቡሁ ፡ ወበከየ ፡ ወሰዐሞ ። 6 ወቃል ፡ ተሰምዐ ፡ በቤተ ፡ አብርሃም ። ወተንሥአ ፡ ይስማዔል ፡ ወልዱ ፡ ወሖረ ፡ ኀበ ፡ አብርሃም ፡ አቡሁ ፡ ወበከየ ፡ ለአብርሃም ፡ አቡሁ ፡ ውእቱ ፡ ወኵሉ ፡ ቤተ ፡ አብርሃም ፡ ወበከዩ ፡ ብካየ ፡ ዐቢየ ፡ 7 ወቀበርዎ ፡ ውስተ ፡ በዐት ፡ ካዕበት ፡ ቅሩበ ፡ ሳራ ፡ ብእሲቱ ፡ ወውሉዱ ፡ ይስሐቅ ፡ ወይስማዔል ። ወበከይዎ ፡ አርብዓ ፡ መዋዕለ ፡ ኵሉ ፡ ሰብአ ፡ ቤቱ ፡ ወይስሐቅ ፡ ወይስማዔል ፡ ወኵሉ ፡ ውሉዶሙ ፡ ወውሉደ ፡ ኬጡራ ፡ በመካኖሙ ፡ ወተፈጸመ ፡ ላሐ ፡ ብካየ ፡ አብርሃም ። 8 ሠለስተ ፡ ኢዮቤልዉ ፡ ሐይወ ፡ ወአርባዕተ ፡ ሱባዔ ፡ ዓመተ ፡ ምእተ ፡ ወሰብዓ ፡ ወኀምስተ ፡ ዓመተ ፡ ወፈጸመ ፡ መዋዕለ ፡ ሕይወቱ ፡ ልህቀ ፡ ወፍጹመ ፡ መዋዕል ፡ 9 እስመ ፡ መዋዕለ ፡ ቀደምት ፡ እማንቱ ፡ ለሕይወቶሙ ፡ ዐሠርቱ ፡ ወተስዐቱ ፡ ኢዮቤልውሳት ። ወእምድኅረ ፡ አይኅ ፡ አኀዙ ፡ ይንትጉ ፡ እምዐሠርቱ ፡ ወተስዐቱ ፡ ኢዮቤልውሳት ፡ ወለአኅጽጾ ፡ እምኢዮቤልውሳት ፡ ወለረሲእ ፡ ፍጡነ ፡ ወለተጸግቦ ፡ መዋዕሊሆሙ ፡ እምገጸ ፡ ሕማም ፡ ብዙኅ ፡ ወበእከየ ፡ ፍናዊሆሙ ፡ ዘእንበለ ፡ አብርሃም ። 10 እስመ ፡ አብርሃምሰ ፡ ፍጹም ፡ በኵሉ ፡ ምግባሪሁ ፡ ምስለ ፡ እግዚአብሔር ። ወእንዘ ፡ ያሠምር ፡ ዘበጽድቅ ፡ ኵሎ ፡ መዋዕለ ፡ ሕይወቱ ፡ ወናሁ ፡ ኢፈጸመ ፡ አርባዕተ ፡ ኢዮቤሉሳተ ፡ በሕይወቱ ፡ እስከ ፡ አመ ፡ ረስአ ፡ ቅድመ ፡ ገጸ ፡ እከይ ፡ ወጸግበ ፡ መዋዕላቲሁ ፡ 11 ወኵሉ ፡ ትውልድ ፡ ዘይትነሣእ ፡ እምይእዜ ፡ ወእስከ ፡ ዕለተ ፡ ደይን ፡ ዐባይ ፡ ይረስኡ ፡ ፍጡነ ፡ ዘእንበለ ፡ ይፈጽሙ ፡ ክልኤ ፡ ኢዮቤልዉ ። ወትከውን ፡ እንተ ፡ ተኀድጎሙ ፡ አእምሮቶሙ ፡ እምርስኦሙ ፡ ወተአትት ፡ ኵላ ፡ አእምሮቶሙ ፡ 12 ወበውእቱ ፡ መዋዕል ፡ እመ ፡ ሐይወ ፡ ብእሲ ፡ ኢዮቤልዉ ፡ ወመንፈቀ ፡ ዓመታት ፡ ይብሉ ፡ በእንቲአሁ ፡ አብዝኀ ፡ ሐይወ ፡ ወመብዝኅተ ፡ መዋዕሊሁ ፡ ሕማም ፡ ወስራሕ ፡ ወምንዳቤ ፡ ወአልቦ ፡ ሰላመ ፡ 13 እስመ ፡ መቅሠፍት ፡ ዲበ ፡ መቅሠፍት ፡ ወጽልዓን ፡ ዲበ ፡ ጽልዓን ፡ ወምንዳቤ ፡ ዲበ ፡ ምንዳቤ ፡ ወስምዓተ ፡ እኩይ ፡ ዲበ ፡ ስምዓተ ፡ እኩይ ፡ ወደዌ ፡ ዲበ ፡ ደዌ ፡ ወኵሉ ፡ ኵነኔ ፡ እኩይ ፡ ዘከማሁ ፡ ዝንቱ ፡ ምስለ ፡ ዝንቱ ፡ ደዌ ፡ ወገበጥባጥ ፡ ወአስሐትያ ፡ ወበረድ ፡ ወሐመዳ ፡ ወነበርጻው ፡ ወሰከሕካሕ ፡ ወሰዖዛዝ ፡ ወዐባር ፡ ወሞት ፡ ወመጥባሕት ፡ ወፂዋዌ ። ወኵሉ ፡ መቅሠፍት ፡ ወሕማም ። 14 ወኵሉ ፡ ዝንቱ ፡ ይመጽእ ፡ በትውልድ ፡ እኪት ፡ እንተ ፡ ታኤብስ ፡ ምድረ ፡ በርኵሰ ፡ ዝሙት ፡ ወበግማኔ ፡ ወበሰቆራር ፡ ግብሮሙ ። 15 አሜሃ ፡ ይብሉ ፡ ለቀደምት ፡ መዋዕሌሆሙ ፡ ብዙኅ ፡ እስከ ፡ ዐሠርቱ ፡ ምእት ፡ ዓመት ፡ ወሠናይ ። ወናሁ ፡ መዋዕለ ፡ ሕይወትነ ፡ እመ ፡ አብዝኀ ፡ ሰብእ ፡ ሐይወ ፡ ሰብዓ ፡ ዓመተ ፡ ወእመ ፡ ኀየለ ፡ ሰማንያ ፡ ዓመተ ፡ ወኵሉ ፡ እኩይ ፡ ወአልቦ ፡ ምንተኒ ፡ ሰላመ ፡ በመዋዕለ ፡ ትውልድ ፡ ይእቲ ፡ እኪት ። 16 ወበይእቲ ፡ ትውልድ ፡ ይከውኑ ፡ ደቂቅ ፡ እንዘ ፡ ይዛለፉ ፡ አበዊሆሙ ፡ ወአዕሩጊሆሙ ፡ በእንተ ፡ ኀጢአት ፡ ወበእንተ ፡ ዐመፃ ፡ ወበእንተ ፡ ንባበ ፡ አፉሆሙ ፡ ወበእንተ ፡ እከያት ፡ ዐበይት ፡ ዘእሙንቱ ፡ ይገብሩ ። ወበእንተ ፡ ኀዲጎቶሙ ፡ ሥርዓተ ፡ ዘተካየደ ፡ እግዚአብሔር ። ማእከሎሙ ፡ ወማእከሎ ፡ ከመ ፡ ይዕቀቡ ፡ ወይግበሩ ፡ ኵሎ ፡ ትእዛዞ ፡ ወሥርዓቶ ፡ ወኵሎ ፡ ሕጎ ፡ ወአልቦ ፡ ተግኅሦ ፡ ፀጋመ ፡ ወየማነ ፡ 17 እስመ ፡ ኵሎሙ ፡ አእከዩ ፡ ወኵሉ ፡ አፍ ፡ ይትናገር ፡ አበሳ ። ወኵሉ ፡ ግብሮሙ ፡ ርኩስ ፡ ወሰቆራር ፡ ወኵሉ ፡ ፍኖቶሙ ፡ ግማኔ ፡ ወርኵስ ፡ ወሙስና ። 18 ናሁ ፡ ምድር ፡ ትትሐጐል ፡ በእንተ ፡ ኵሉ ፡ ምግባሮሙ ፡ ወአልቦ ፡ ዘርአ ፡ ወይን ፡ ወአልቦ ፡ ቅብአ ፡ እስመ ፡ ኵሉ ፡ ካሕድ ፡ ምግባሪሆሙ ፡ ወኵሎሙ ፡ ይትሐጐሉ ፡ ኅቡረ ፡ አራዊት ፡ ወእንስሳ ፡ ወአዕዋፍ ። ወኵሉ ፡ ዓሣተ ፡ ባሕር ፡ እምቅድመ ፡ ውሉደ ፡ ሰብእ ፡ 19 ወይትባአሱ ፡ እሉ ፡ ምስለ ፡ እሉ ፡ ወራዙት ፡ ምስለ ፡ ሊቃናት ፡ ወሊቃናት ፡ ምስለ ፡ ወራዙት ፡ ነዳይ ፡ ምስለ ፡ ባዕል ፡ ትሑት ፡ ምስለ ፡ ዐቢይ ፡ ወምስኪን ፡ ምስለ ፡ መኰንን ፡ በእንተ ፡ ሕግ ፡ ወበእንተ ፡ ኪዳን ፡ እስመ ፡ ረስዑ ፡ ትእዛዘ ፡ ወኪዳነ ፡ ወበዓለ ፡ ወወርኀ ፡ ወሰንበተ ፡ ወኢዮቤሌው ፡ ወኵሎ ፡ ኵነኔ ። 20 ወይቀውሙ ፡ በአስይፍት ፡ ወበቀትል ፡ ከመ ፡ ይሚጥዎሙ ፡ ውስተ ፡ ፍኖት ፡ ወኢይትመየጡ ፡ እስከ ፡ ይትከዐው ፡ ደም ፡ ብዙኅ ፡ ዲበ ፡ ምድር ፡ እሉ ፡ በእሉ ፡ 21 ወእለ ፡ ድኅኑ ፡ በፍኖተ ፡ ጽድቅ ፡ ኢይትመየጡ ፡ እምነ ፡ እከዮሙ ፡ እስመ ፡ ኵሎሙ ፡ ለትእግልት ፡ ወውስተ ፡ ብዕል ፡ ይትነሥኡ ፡ ከመ ፡ ይንሣእ ፡ አሐዱ ፡ ኵሎ ፡ ዘቢጹ ፡ ወስመ ፡ ዐቢየ ፡ ይሰመዩ ፡ ወአኮ ፡ በህልው ፡ ወአኮ ፡ በጽድቅ ፡ ወቅድሳተ ፡ ቅዱስ ፡ ያረኵሱ ፡ በርኵሰ ፡ ሙስና ፡ ግማኔሆሙ ። 22 ወይከውን ፡ መቅሠፍት ፡ ዐቢይ ፡ ዲበ ፡ ግብረ ፡ ይእቲ ፡ ትውልድ ፡ እምኀበ ፡ እግዚአብሔር ፡ ወይሁቦሙ ፡ ለመጥባሕት ፡ ወለኵነኔ ፡ ወለፂዋዌ ፡ ወለሀይድ ፡ ወለብልዐት ። 23 ወያነቅህ ፡ ላዕሌሆሙ ፡ ኃጢኣኒሆሙ ፡ ለአሕዛብ ፡ እለ ፡ አልቦሙ ፡ ላዕሌሆሙ ፡ ምሕረተ ፡ ወሣህለ ፡ ወለገጸ ፡ መኑሂ ፡ ኢያደልው ፡ ኢለልሂቅ ፡ ወኢለወሬዛ ፡ ወኢለመኑሂ ፡ እስመ ፡ እኩያን ፡ ወኀያላን ፡ ከመ ፡ ይእከዩ ፡ እምኵሉ ፡ ውሉደ ፡ ሰብእ ፡ ወይገብሩ ፡ ውስተ ፡ እስራኤል ፡ ሀከከ ፡ ወዲበ ፡ ያዕቆብ ፡ አበሳ ፡ ወይትከዐው ፡ ደም ፡ ብዙኅ ፡ ዲበ ፡ ምድር ፡ ወአልቦ ፡ ዘያስተጋብእ ፡ ወአልቦ ፡ ዘይቀብር ። 24 በውእቱ ፡ መዋዕል ፡ ይጸርኁ ፡ ወይጼውዑ ፡ ወይጼልዩ ፡ ከመ ፡ ይድኀኑ ፡ እምእደ ፡ ኃጥኣን ፡ አሕዛብ ፡ ወአልቦ ፡ ዘያድኅን ፡ 25 ወይጸዐዱ ፡ አርእስተ ፡ ደቂቅ ፡ በሲበት ፡ ወያስተርኢ ፡ ሕፃን ፡ ወልደ ፡ ሠለስቱ ፡ ሱባዔ ፡ ልሂቀ ፡ ከመ ፡ ዘምእት ፡ ዓመቱ ፡ ወይትሐጐል ፡ ቁመቶሙ ፡ በምንዳቤ ፡ ወበጻዕር ። 26 ወበውእቶን ፡ መዋዕል ፡ ይእኅዙ ፡ ደቂቅ ፡ ይትኀሠሡ ፡ ሕገገ ፡ ወለኃሢሠ ፡ ትእዛዝ ፡ ወለተመይጦ ፡ ውስተ ፡ ፍኖተ ፡ ጽድቅ ። 27 ወይእኅዛ ፡ መዋዕል ፡ ይብዝኃ ፡ ወይልሀቃ ፡ ወውሉደ ፡ ሰብእ ፡ ትውልድ ፡ እምትውልድ ፡ ወዕለት ፡ እመዋዕል ፡ እስከ ፡ ሶበ ፡ ይቀርብ ፡ መዋዕሊሆሙ ፡ ለዐሠርቱ ፡ ምእት ፡ ዓመት ፡ ወለብዙኅ ፡ ዓመታት ፡ እምነ ፡ ብዙኅ ፡ መዋዕል ፡ 28 ወአልቦ ፡ ልሂቀ ፡ ወአልቦ ፡ ዘይጸግብ ፡ መዋዕለ ፡ እስመ ፡ ኵሎሙ ፡ ሕፃናተ ፡ ወደቂቀ ፡ ይከውኑ ፡ 29 ወኵሎን ፡ መዋዕሊሆሙ ፡ በሰላም ፡ ወበፍሥሓ ፡ ይፌጽሙ ፡ ወይሐይዉ ፡ ወአልቦ ፡ መነሂ ፡ ሰይጣነ ፡ ወአልቦ ፡ መነሂ ፡ እኩየ ፡ ዘያማስን ፡ እስመ ፡ ኵሎን ፡ መዋዕሊሆሙ ፡ መዋዕለ ፡ በረከት ፡ ወፈውስ ፡ ይከውና ። 30 አሜሃ ፡ ይፌውስ ፡ እግዚአብሔር ፡ አግብርቲሁ ፡ ወይትነሥኡ ፡ ወይሬእዩ ፡ ሰላመ ፡ ዐቢየ ፡ ወይሰድድ ፡ ጸላእቶ ፡ ወይሬእዩ ፡ ጻድቃን ፡ ወያአኵቱ ፡ ወይትፌሥሑ ፡ እስከ ፡ ለዓለመ ፡ ዓለም ፡ በፍሥሓ ። ወይሬእዩ ፡ በፀሮሙ ፡ ኵሎ ፡ ኵነኔሆሙ ፡ ወኵሎ ፡ መርገሞሙ ፡ 31 ወያዐርፍ ፡ አዕፅምቲሆሙ ፡ ውስተ ፡ ምድር ። ወመንፈሶሙ ፡ ያበዝኅ ፡ ትፍሥሕተ ፡ ወያአምሩ ፡ ከመ ፡ ሀሎ ፡ እግዚአብሔር ፡ ገባሬ ፡ ኵነኔ ፡ ወይገብር ፡ ሣህለ ፡ ለአምኣት ፡ ወለአእላፍ ፡ ወለኵሎሙ ፡ እለ ፡ ያፈቅርዎ ። 32 ወአንተኒ ፡ ሙሴ ፡ ጸሐፍ ፡ ዘንተ ፡ ቃላተ ፡ እስመ ፡ ከመዝ ፡ ጽሑፍ ፡ ውእቱ ፡ ወየዐርጉ ፡ ውስተ ፡ ስምዐ ፡ ጽላተ ፡ ሰማይ ፡ ለትውልድ ፡ ዘለዓለም ።