መጽሐፈ ኩፋሌ 13

13 1 ወሖረ ፡ አብራም ፡ እምካራን ፡ ወነሥአ ፡ ሶራይሃ ፡ ብእሲቶ ። ወሎጥሃ ፡ ወልደ ፡ አራን ፡ እኁሁ ፡ ውስተ ፡ ምድረ ፡ ከናአን ። ወመጽአ ፡ ውስተ ፡ አሱር ፡ ወአንሶሰወ ፡ እስከ ፡ ሰቂሞን ፡ ወኀደረ ፡ ኀበ ፡ ድርሰ ፡ ነዋኅ ። 2 ወርእየ ፡ ወናሁ ፡ ምድር ፡ አዳም ፡ ጥቀ ፡ እምብዋአ ፡ ኤማት ፡ እስከ ፡ ኀበ ፡ ድርስ ፡ ነዋኅ ። 3 ወይቤሎ ፡ እግዚአብሔር ፡ ለከ ፡ ወለዘርእከ ፡ እሁብ ፡ ዛተ ፡ ምድረ ፡ 4 ወሐነጸ ፡ በህየ ፡ ምሥዋዐ ፡ ወአዕረገ ፡ ዲቤሁ ፡ ጽንሐሐ ፡ ለእግዚአብሔር ፡ ዘአስተርአዮ ። 5 ወአንሥአ ፡ እምህየ ፡ ውስተ ፡ ደብረ ፡ ቤቴል ፡ ዘመንገለ ፡ ባሕር ፡ ወአጌ ፡ መንገለ ፡ ጽባሕ ፡ ወተከለ ፡ ደብተራሁ ፡ ህየ ። 6 ወርእየ ፡ ወናሁ ፡ ምድር ፡ ጽፍሕት ፡ ወኄርት ፡ ጥቀ ፡ ወኵሉ ፡ ይሠርፅ ፡ ላዕሌሃ ፡ አውያን ፡ ወበለስ ፡ ወሮማን ፡ ዕፅ ፡ ባላን ፡ ወድርስ ፡ ወጤሬቤንቶስ ፡ ወዕፀወ ፡ ዘይት ፡ ወቄድሮስ ፡ ወቄጲሪሶስ ፡ ወሊባኖስ ፡ ወኵሉ ፡ ዕፀወ ፡ ገዳም ፡ ወማይ ፡ ዲበ ፡ አድባር ። 7 ወባረኮ ፡ ለእግዚአብሔር ፡ ዘአውፅኦ ፡ እምነ ፡ ኡር ፡ ዘከለዳዊያን ፡ ወአምጽኦ ፡ ውስተዝ ፡ ደብር ። 8 ወኮነ ፡ በአሐዱ ፡ ዓመት ፡ በሱባዔ ፡ ሳብዕ ፡ በሠርቀ ፡ ወርኅ ፡ በዘ ፡ ቀዳሚ ፡ ሐነጸ ፡ ምሥዋዐ ፡ በዝ ፡ ደብር ፡ ወጸውዖ ፡ በስመ ፡ እግዚአብሔር ፡ አንተ ፡ አምላኪየ ፡ አምላከ ፡ ዘለዓለም ። 9 ወአዕረገ ፡ ዲበ ፡ ምሥዋዕ ፡ ጽንሐሐ ፡ ለእግዚአብሔር ፡ ከመ ፡ የሀሉ ፡ ምስሌሁ ፡ ወኢይኅድጎ ፡ ኵሎ ፡ መዋዕለ ፡ ሕይወቱ ። 10 ወአንሥአ ፡ እምህየ ፡ ወሖረ ፡ መንገለ ፡ ደቡብ ፡ ወበጽሐ ፡ እስከ ፡ ኬብሮን ፡ ወኬብሮን ፡ አሜሃ ፡ ተሐንጸት ፡ ወነበረ ፡ ህየ ፡ ዓመተ ፡ ክልኤተ ፡ ወሖረ ፡ ውስተ ፡ ምድረ ፡ ደቡብ ፡ እስከ ፡ ቦአ ፡ ሎጥ ። ወኮነ ፡ ዐባር ፡ ዲበ ፡ ምድር ፡ 11 ወሖረ ፡ አብራም ፡ ግብጽ ፡ በሣልስ ፡ ዓመት ፡ ዘሱባዔ ፡ ወኀደረ ፡ ውስተ ፡ ግብጽ ፡ ኀምስተ ፡ ዓመተ ፡ ዘእንበለ ፡ ትትሀየድ ፡ ብእሲቱ ። እምኔሁ ። 12 ወጠናይስ ፡ ዘግብጽ ፡ አሜሃ ፡ ተሐብጸት ፡ በሰብዓቱ ፡ ክረምት ፡ እምድኅረ ፡ ኬብሮን ። 13 ወኮነ ፡ አመ ፡ ሄዶ ፡ ፈርዖን ፡ ሶራይ ፡ ብእሲቶ ፡ ለአብራም ፡ ቀሠፈ ፡ እግዚአብሔር ፡ ፈርዖንሃ ፡ ወቤቶ ፡ በመቅሠፍት ፡ ዐቢይ ፡ በእንተ ፡ ሶራይ ፡ ብእሲቱ ፡ ለአብራም ። 14 ወአብራም ፡ ክቡር ፡ በጥሪት ፡ ጥቀ ፡ በአባግዕ ፡ ወበአልህምት ፡ ወበአእዱግ ፡ ወበአፍራስ ፡ ወበአግማል ፡ ወበአግብርት ፡ ወበአእማት ፡ ወበብሩር ፡ ወበወርቅ ፡ ፈድፋደ ። ወለሎጥኒ ፡ ወልደ ፡ እኁሁ ፡ በጥሪት ። 15 ወአግብአ ፡ ፈርዖን ፡ ሶራይሃ ፡ ብእሲተ ፡ አብራም ፡ ወአፍለሶ ፡ እምድረ ፡ ግብጽ ፡ ወሖረ ፡ ውስተ ፡ መካን ፡ ኀበ ፡ ተከለ ፡ ደብተራሁ ፡ እንተ ፡ ቀዲሙ ፡ ውስተ ፡ መካነ ፡ ምሥዋዐ ፡ አጌ ፡ እምጽባሐ ፡ ቤቴል ፡ ወባሕር ፡ ወባሪኮ ፡ ለእግዚአብሔር ፡ አምላኩ ፡ ዘሜጦ ፡ በሰላም ። 16 ወኮነ ፡ በዝ ፡ አርብዓ ፡ ወአሐዱ ፡ ኢዮቤልዎን ፡ በሣልስ ፡ ዓም ፡ ዘሱባዔ ፡ ቀዳሚ ፡ ገብአ ፡ ውስተ ፡ ዝመካን ፡ ወአዕረገ ፡ በዲቤሁ ፡ ጽንሐሐ ፡ ወጸውዐ ፡ በስመ ፡ እግዚአብሔር ፡ አምላክ ፡ ልዑል ፡ አምላኪየ ፡ ለዓለመ ፡ ዓለም ። 17 ወበራብዕ ፡ ዓመት ፡ ዘዝ ፡ ሱባዔ ፡ ተፈልጠ ፡ ሎጥ ፡ እምኔሁ ፡ ወኀደረ ፡ ሎጥ ፡ ውስተ ፡ ሰዶም ፡ ወሰብአ ፡ ሰዶም ፡ ኃጥኣን ፡ ጥቀ ። 18 ወአከዮ ፡ በልቡ ፡ እስመ ፡ ተፈልጠ ፡ ወልደ ፡ እኁሁ ፡ እምኔሁ ፡ እስመ ፡ አልቦ ፡ ውሉደ ፡ 19 በውእቱ ፡ ዓመት ፡ አመ ፡ ተፄወወ ፡ ሎጥ ። ወይቤሎ ፡ እግዚአብሔር ፡ ለአብራም ፡ እምድኅረ ፡ ተፈልጠ ፡ እምኔሁ ፡ ሎጥ ፡ በራብዕ ፡ ዓመት ፡ ዘዝ ፡ ሱባዔ ። ወይቤሎ ፡ አንሥእ ፡ አዕይንቲከ ፡ እመካን ፡ ውእደ ፡ ሀለውከ ፡ ትነብር ፡ ህየ ፡ መንገለ ፡ ሰሜን ፡ ወሊባ ፡ ወባሕር ፡ ወጽባሕ ፡ 20 እስመ ፡ ኵላ ፡ ምድረ ፡ እንተ ፡ ትሬኢ ፡ ለከ ፡ ወለዘርእከ ፡ እመሁባ ፡ እስከ ፡ ለዓለም ። ወእሬሲ ፡ ዘርእከ ፡ ከመ ፡ ኆፃ ፡ ባሕር ፡ እመ ፡ ይክል ፡ ሰብእ ፡ ኆልቆ ፡ ኆፃ ፡ ምድር ፡ ወዘርእከኒ ፡ ኢይትኆለቍ ። 21 ተንሥእ ፡ ወአንሶሱ ፡ ውስተ ፡ ኑኃ ፡ ወርሕባ ፡ ወርኢ ፡ ኵሎ ፡ እስመ ፡ ለዘርእከ ፡ እሁባ ። ወሖረ ፡ አብራም ፡ ኬብሮን ፡ ወኀደረ ፡ ህየ ። 22 ወበዝ ፡ ዓመት ፡ መጽአ ፡ ከደለጎሞር ፡ ንጉሠ ፡ ኤላም ፡ አመርፋል ፡ ንጉሠ ፡ ሲናአር ፡ ወአሪአክ ፡ ንጉሠ ፡ ሴለሳር ፡ ወቴርጋል ፡ ንጉሠ ፡ አሕዛብ ፡ ወቀተልዎ ፡ ለንጉሠ ፡ ጎሞር ፡ ወጐየ ፡ ንጉሠ ፡ ሰዶም ። ወብዙኃን ፡ ወድቁ ፡ በቍስል ፡ በስላ ፡ ሰዲማው ፡ በባሕረ ፡ ፄው ፡ 23 ወፄወዉ ፡ ሰዶምሃ ፡ ወአዳማሃ ፡ ወሴቦኤም ፡ ወፄወውዎ ፡ ለሎጥኒ ፡ ወልደ ፡ እኁሁ ፡ ለአብራም ፡ ሰኵሎ ፡ ጥሪቶ ፡ ወሖረ ፡ እስከ ፡ ዳን ። 24 ወመጽአ ፡ ዘድኅነ ፡ ወነገሮ ፡ ለአብራም ፡ ከመ ፡ ተፄወወ ፡ ወልደ ፡ እኁሁ ። 25 ወአስተረሰየ ፡ ልደ ፡ ቤቱ ፡ [ወሖረ ፡ አብራም ፡ ወቀተሎ ፡ ለከደለጎሞር ፡ ወየመይጠ ፡ ወዐሠረ ፡ ዐሥራተ ፡ እምኵሉ ፡ ወወሀቦ ፡ ለመልከ ፡ ጼዴቅ ። ወዝንቱ ፡ ዐሥራት] ፡ ዲበ ፡ አብራም ፡ ወዲበ ፡ ዘርኡ ፡ ዓሥራተ ፡ ቀዳሚ ፡ ለእግዚአብሔር ። ወእግዚአብሔር ፡ ሠርዖ ፡ ሥርዓተ ፡ ለዓለም ፡ ከመ ፡ የሀብዎ ፡ ለካህናት ፡ ለእለ ፡ ይትቀነዩ ፡ በቅድሜሁ ፡ ከመ ፡ የአኀዝዋ ፡ ለዓለም ። 26 ወአልቦ ፡ ለዝ ፡ ሕግ ፡ ወሰነ ፡ መዋዕል ፡ እስመ ፡ ትውልድ ፡ ዘለዓለም ፡ ሠርዖ ፡ ከመ ፡ የሀቡ ፡ ዓሥራተ ፡ እምኵሉ ፡ ለእግዚአብሔር ፡ እምዘርእ ፡ ወእምወይን ፡ ወእምቅብእ ፡ ወእምአልህምት ፡ ወእምአባግዕ ፡ 27 ወውእቱ ፡ ወሀበ ፡ ለካህናቲሁ ፡ ለበሊዕ ፡ ወለሰቲይ ፡ በፍሥሓ ፡ በቅድሜሁ ። 28 ወበጽሐ ፡ ኀቤሁ ፡ ንጉሠ ፡ ሰዶም ፡ ወሰገደ ፡ ቅድሜሁ ፡ ወይቤ ፡ እግዚእነ ፡ አብራም ፡ ጸግወነ ፡ ነፍሰ ፡ እለ ፡ ባለሕከ ፡ ወምህርካሁሰ ፡ ይኩንከ ። 29 ወይቤሎ ፡ አብራም ፡ ሎቱ ፡ አነሥእ ፡ እደዊየ ፡ ኀበ ፡ አምላክ ፡ ልዑል ፡ እምፈትል ፡ እስከ ፡ ቶታነ ፡ አሣእን ፡ እመ ፡ እነሥእ ፡ እምኵሉ ፡ ዘዚአከ ፡ ከመ ፡ ኢትኩን ፡ በሃሌ ፡ አነ ፡ አብዐልክዎ ፡ ለአብራም ። ዘእንበለ ፡ ዘበልዑ ፡ ዳእሙ ፡ ወራዙት ፡ ወመክፈልቶሙ ፡ ለዕደው ፡ እለ ፡ ሖሩ ፡ ምስሌየ ፡ አውናን ፡ ወኤስከል ፡ ወመምሪ ፡ እሙንቱ ፡ ይነሥኡ ፡ መክፈልቶሙ ።